Gudnius abaotem Jisas Kraes wea Mak hemi raetem 6:48 - Pijin Deuterocanon

⁴⁸ Nao taem hemi kolsap kasem delaet nomoa, Jisas hemi lukim dat olketa disaepol blong hem olketa barava hadwaka tumas nao fo padolem bot ya agensim win. So Jisas hemi kam long olketa, wea hemi wakabaot kam nomoa antap long wata ya. Hemi wakabaot kam, an hemi kolsap gopas long olketa nao.

Pijin Bible

⁴⁸ Nao taem hemi kolsap kasem delaet nomoa, Jisas hemi lukim dat olketa disaepol blong hem olketa barava hadwaka tumas nao fo padolem bot ya agensim win. So Jisas hemi kam long olketa, wea hemi wakabaot kam nomoa antap long wata ya. Hemi wakabaot kam, an hemi kolsap gopas long olketa nao.

Gudnius abaotem Jisas Kraes wea Mak hemi raetem 6:48 ပူးပေါင်းရင်းမြစ်များ

Jenesis 19:2

an hemi tok olsem, “Tufala, yutufala kam, yumi go long haos blong mi. Bae yutufala save wasim lek blong yutufala, an yutufala save slip long ples ya. An tumoro, bae yutufala save wekap long eli moning fo go long gogo blong yutufala moa.” Bat tufala tok olsem, “No, hemi gud nomoa. Ples blong olketa strensa hemi stap nomoa long taon ya. Bae mitufala go slip long hem.”

Jenesis 32:26

Nao man ya hemi tok olsem, “!Yu lego long mi! !Kolsap hemi delaet nao ya!” Bat Jekob hemi tok olsem, “!Nomoa! !Bae mi lego long yu sapos yu blesim mi fastaem!”

Stori abaotem Job 9:8

Hem seleva nomoa hemi mekem olketa samting wea i stap long skae, an hemi step long olketa wev fo mekem dipsi i kuaet.

Sams 104:3

an yu bin mekem ples blong yu antap long skae. Yu yusim olketa klaod olsem kaat wea hos hemi pulum, an yu raed antap long win wea hemi blou.

Sams 93:4

Bat yu nao yu rul long heven, an yu hae moa winim noes blong rafsi. Ya, paoa blong yu hemi strong moa winim paoa blong rafsi.

Eksodas 14:24

Bat barava long eli moning yet, Yawe hu hemi stap long bikfala faea ya an long bikfala klaod ya, hemi luk kamdaon long ami blong Ijip, an hemi mekem olketa krangge.

Aesaea 54:11

Yawe hemi tok moa olsem, “!Olketa pipol blong Jerusalem! Distaem yufala gohed fo safa tumas, an plande trabol nomoa hemi kasem yufala. An no eniwan nao hemi helpem yufala fo filgud moa. Bae mi mekem yufala fo kamap gud moa, olsem wea mi bildimbaek moa faondesin long taon blong yufala long olketa nambawan blu ston.

Matiu 14:24

bat olketa disaepol olketa go farawe finis long bot ya. An olketa wev i go-gohed fo bangam bot ya nao, bikos olketa go agensim win.

Matiu 24:43

An yufala save, sapos man wea hemi onam haos hemi save long taem wea man fo stil bae hemi kam, bae hemi lukluk nomoa an bae hemi no slip, mekem hemi stopem disfala man fo no go insaet long haos blong hem.

Gudnius abaotem Jisas Kraes wea Mak hemi raetem 13:35

Nao long sem wei ya, yufala tu mas lukaot gudfala, bikos yufala no save wataem nao masta blong haos ya bae hemi kambaek long hem. Maet hemi kambaek long ivining o long midol long naet o long eli moning taem kokorako hemi krae o maet long taem wea san hemi kamap.

Gudnius abaotem Jisas Kraes wea Mak hemi raetem 6:47

An taem ya, hemi stat fo tudak nao an disfala bot ya hemi long midol long leik ya, bat Jisas hemi stap seleva nomoa antap long hil ya.

Gudnius abaotem Jisas Kraes wea Mak hemi raetem 6:49

Bat taem olketa lukim dat hemi wakabaot kam antap long wata ya nomoa, olketa tingse hemi wanfala devol. So olketa barava singaot bikfala nao.

Gudnius abaotem Jisas Kraes wea Luk hemi raetem 12:38

Olketa wakaman i save hapi ya taem bikman blong olketa hemi lukim dat olketa redi finis weitem hem, nomata hemi kambaek long midol long naet o long eli moning, taem hemi tudak yet.

Gudnius abaotem Jisas Kraes wea Luk hemi raetem 24:28

Nao olketa kam kolsap long vilij wea tufala go-go fo hem, bat Jisas hemi luk olsem hemi wande fo lusim tufala an gohed moa.

Gudnius abaotem Jisas Kraes wea Jon hemi raetem 1:13

Olketa i no bon kam olsem pikinini wea hemi bon long blad blong mami an dadi, bat God nao hemi mekem olketa fo kamap pikinini blong hem.

1 Samuel 11:11

Long neks de long eli moning, King Sol hemi divaedem olketa soldia blong hem long trifala grup. Taem hemi tudak yet, olketa ran go long olketa haostent blong ami blong Amon fo kilim olketa. An olketa kilim dae olketa long ami blong Amon go-go hemi kasem midol long de. Tu-tri man blong Amon wea i no dae i ranawe seleva.