Matiu 7:13 - Pijin Deuterocanon

¹³ “Yufala mas go insaet long disfala smolfala geit, bikos geit wea hemi bikfala tumas an rod wea hemi isi tumas fo go long hem, hem nao hemi go kasem long hel an plande pipol nao olketa go-go falom.

Pijin Bible

¹³ “Yufala mas go insaet long disfala smolfala geit, bikos geit wea hemi bikfala tumas an rod wea hemi isi tumas fo go long hem, hem nao hemi go kasem long hel an plande pipol nao olketa go-go falom.

Matiu 7:13 ပူးပေါင်းရင်းမြစ်များ

Jenesis 6:12

Nao taem God hemi luk long wol ya, hemi lukim dat wol hemi kamap barava nogud tumas nao from olketa ravis wei blong olketa pipol ya.

Jenesis 6:5

Nao long taem ya, olketa man long wol olketa gohed fo kamap nogud tumas, an oltaem, tingting blong olketa i fulap nomoa long olketa nogud samting. An taem Yawe hemi lukim samting ya,

Provebs 16:25

Wanfala man hemi tingse rod hemi laekem i gud nomoa, bat hemi rod blong dae.

Provebs 7:27

Fo go long haos blong hem, hem nao bikrod godaon long grev.

Provebs 9:6

Lusim krangge wei blong yufala an falom wei blong mi, bae yufala garem laef.”

Aesaea 1:9

Sapos Yawe hu hemi garem evri paoa hemi no bin sevem samfala long yumi, bae yumi olsem nao olketa pipol blong Sodom an Gomora wea olketa bin lus finis.

Aesaea 35:8

Wanfala bikfala rod bae hemi stap long ples ya an bae olketa kolem, Holi Rod blong Yawe. Olketa nogud pipol an olketa krangge pipol bae i no wakabaot falom rod ya, bat olketa pipol hu i falom nomoa gudfala wei save falom Holi Rod blong Yawe.

Aesaea 55:7

Yufala hu i falom olketa nogud wei, yufala mas lusim olketa wei ya. Yufala mas lusim olketa ravis tingting blong yufala. Yufala mas kambaek long Yawe hu hemi God blong yumi, mekem hemi sore long yufala an fogivim olketa sin blong yufala.

Matiu 23:13

“!Yufala olketa tisa blong Lo an yufala olketa Farasi, yufala lukaot! !Yufala save laea tumas ya! Yufala nao i stopem pipol fo no go insaet long kingdom long Heven. Yufala seleva no wari fo go insaet an yufala stopem tu olketa hu i traehad fo go insaet.

Matiu 25:41

“Bihaen moa, bae mi tok olsem long olketa pipol hu olketa stap long lefsaet blong mi, ‘Yufala wea God bae hemi panisim yufala, yufala goawe from mi. Ples blong yufala nao hemi longwe insaet long faea wea hemi no save finis ya, wea God hemi mekredi fo Seitan an olketa enjel blong hem.

Matiu 25:46

Nao olketa pipol ya, bae olketa panisim olketa olowe nao. Bat olketa pipol wea olketa stret long ae blong God bae olketa garem tru laef wea hemi no save finis.”

Matiu 3:2

an hemi sei, “Yufala evriwan i mas lusim olketa ravis wei blong yufala, bikos kingdom long Heven hemi kolsap kam nao.”

Matiu 3:8

Yufala ya, yufala mas lusim olketa ravis wei blong yufala tu ya, mekem yufala garem olketa gudfala frut nao long laef blong yufala.

Matiu 7:14

Bat geit wea hemi smolfala nomoa an rod wea hemi had fo go long hem, hem nao hemi go kasem tru laef an hemi no plande pipol nao wea olketa faendem.”

Gudnius abaotem Jisas Kraes wea Luk hemi raetem 14:33

So yufala tu mas tingting gud fastaem olsem, bikos man hu hemi no wiling fo lusim evrisamting wea hemi garem, hemi no save kamap wanfala disaepol blong mi ya.”

Gudnius abaotem Jisas Kraes wea Luk hemi raetem 9:33

Taem tufala man ya i stat fo lusim Jisas an gobaek, Pita hemi tok olsem long Jisas, “Masta, hemi gud tumas nao mifala stap long hia. Bae mifala wakem trifala smol haos, wanfala fo yu an wanfala fo Mosis an wanfala fo Elaeja.” Pita hemi talem olsem from hemi no minimgud wanem hemi go-gohed.

Gudnius abaotem Jisas Kraes wea Jon hemi raetem 10:9

Mi nao mi olsem geit blong sipsip. Eniwan hu hemi kam long mi, bae God hemi sevem hem. An bae hemi olsem sipsip wea hemi kam insaet fo stap long sef ples an hemi goaot moa fo faendem kaikai.

Gudnius abaotem Jisas Kraes wea Jon hemi raetem 14:6

Nao Jisas hemi talem hem olsem, “Mi nao mi disfala rod an mi save talem evri tru samting an mi save givim laef. No eniwan save go long Dadi ya long eni nara rod, mi nomoa mi rod fo go long hem.

Aposol 3:19

So yufala mas lusim olketa ravis wei blong yufala an tane kambaek long God, mekem hemi save tekemaot olketa sin blong yufala.

Leta wea Pol hemi raetem go long sios long Rom 9:22

God tu hemi olsem. Hemi garem paoa fo somaot kros blong hem an fo mekem olketa pipol save long paoa blong hem. Bat hemi gohed yet fo kontrolem kros blong hem, nomata hemi fit fo hemi barava spoelem pipol hu hemi kros long olketa.

2 Korin 4:4

Olketa no save biliv, bikos laea god blong disfala wol hemi mekem maen blong olketa fo blaen. So olketa no save lukim disfala laet blong Gudnius, wea hemi abaotem saen blong bikfala paoa blong Kraes hu hemi barava olsem God.

2 Korin 6:17

Dastawe Masta hemi sei olsem, “Yufala mas lusim olketa nara pipol, an yufala mas no stap kolsap long olketa. Yufala mas no tasim enisamting wea hemi no klin. Sapos yufala falom diswan, bae mi hapi long yufala.

Galesia 5:24

Olketa pipol blong Kraes, olketa nilam long kros disfala wei blong man fo sin wetem evri ravis tingting fo duim olketa nogud samting.

Filipae 3:19

Diskaen pipol ya, wanem olketa laekem fo bodi blong olketa seleva, hem nao olsem god blong olketa. An olketa praod fo duim olketa samting wea yumi save filsem tumas long hem. Olketa tingting olowe long evrisamting blong wol nomoa. Bae olketa kaen pipol olsem i go lus long hel.

1 Jon 5:19

An yumi save dat yumi nao i pipol blong God, bat olketa pipol blong disfala wol i stap andanit long paoa blong Seitan.

Revelesin 12:9

Olketa raosim hem wetem olketa enjel blong hem an torowem olketa godaon long wol. Bikfala snek ya, hem nao disfala snek blong bifoa kam yet. An hem nao olketa kolem hem “Devol” o “Seitan”, wea hemi save trikim evri pipol long wol fo duim olketa nogud samting.

Revelesin 13:8

Nao evri pipol wea olketa stap long wol ya, bae olketa wosipim wael animol ya. Hem nao olketa pipol wea nem blong olketa no stap insaet long buk blong laef stat kam long taem wea God hemi mekem disfala wol. Disfala buk ya hemi blong Smolfala Sipsip wea olketa bin kilim hem dae bifoa.

Revelesin 20:15

An olketa torowem go insaet long disfala bikfala hol blong faea tu olketa pipol wea nem blong olketa i no stap insaet long disfala buk blong laef.

Revelesin 20:3

Den enjel ya hemi torowem snek ya insaet long hol ya, an hemi satem doa blong disfala ples an hemi lokem strong. Bikfala snek ya bae hemi stap insaet long hol ya fo 1,000 yia, mekem hemi no save laea moa long olketa pipol long wol. Bat bihaen long 1,000 yia, bae enjel ya mas letem hem fri moa fo lelebet taem.