Gudnius abaotem Jisas Kraes wea Jon hemi raetem 20:17 - Pijin Deuterocanon

¹⁷ Jisas hemi tok olsem long hem, “Yu no holem mi, bikos mi no gobaek yet long Dadi blong mi. Bat yu go long olketa brata blong mi, an yu talem long olketa wea bae mi gobaek nao long Dadi blong mi wea hemi Dadi blong yufala tu, an hemi God blong mi an hemi God blong yufala tu.”

Pijin Bible

¹⁷ Jisas hemi tok olsem long hem, “Yu no holem mi, bikos mi no gobaek yet long Dadi blong mi. Bat yu go long olketa brata blong mi, an yu talem long olketa wea bae mi gobaek nao long Dadi blong mi wea hemi Dadi blong yufala tu, an hemi God blong mi an hemi God blong yufala tu.”

Gudnius abaotem Jisas Kraes wea Jon hemi raetem 20:17 ပူးပေါင်းရင်းမြစ်များ

2 Kings 4:29

Oraet, Elaesa hemi tok olsem long Gehasi, “Yu mas redi fo go. Tekem wokingstik blong mi, an go kuiktaem long Sunem. Sapos yu mitim eniwan long rod, yu no stop fo talem halo long hem. An sapos hemi talem halo long yu, yu no toktok long hem. Yu mas go stret long haos blong woman ya, an yu tekem wokingstik blong mi, an putum antap long fes blong boe ya.”

2 Kings 7:9

Go-go-go, olketa tok olsem, “!Yumi gohed fo duim wanem hemi no stret ya! Yumi garem gudfala nius tude, bat yumi haedem. Sapos yumi weit go kasem moning fo yumi talem, ating bae olketa panisim yumi. Yumi mas go distaem nao fo talem olketa bikman blong king.”

Sams 22:22

Nao bae mi talem olketa wantok blong mi abaotem wanem yu bin duim long mi. Ya, bae mi preisim yu taem olketa hipap fo wosipim yu.

Sams 43:4

Taem mi kasem Tambuhaos blong yu bae mi go long olta blong yu fo mekem sakrifaes long yu God, bikos yu nao yu mekem mi hapi, Yu nao yu God blong mi, hem nao bae mi ringim gita blong mi an bae mi singsing fo preisim yu.

Sams 48:14

“God ya, hemi God blong yumi. An bae hemi gadem yumi evritaem olowe nao.” (Singsing blong olketa long laen blong Kora.)

Sams 68:18

Taem hemi goap antap long Saeon, hemi tekem go plande pipol wea hemi winim olketa long faet. Nomata pipol wea i agensim hem, olketa tu i givim presen long hem. Yawe hu hemi God, bae hemi stap long ples ya olowe nao.

Sams 89:26

Bae Deved hemi tok olsem long mi, ‘Yu nao yu God blong mi, an yu dadi blong mi. Ya, yu nao yu man fo gadem mi, an fo sevem mi.’

Aesaea 41:10

So yufala no fraet, an yufala no seksek. Mi nao God blong yufala, an mi stap wetem yufala. Bae mi mekem yufala strong, an bae mi helpem yufala. Ya, bae strongfala raet han blong mi hemi gadem yufala long stretfala wei.

Jeremaea 31:33

Hem ya nao disfala niufala spesol agrimen wea bae mi mekem wetem olketa pipol blong Israel. Bae mi putum lo blong mi insaet long maen blong olketa, an bae mi raetemdaon long haat blong olketa. Bae mi nao God blong olketa, an bae olketa kamap moa spesol pipol blong mi.

Jeremaea 32:38

Long taem ya, bae olketa kamap moa spesol pipol blong mi, an bae mi nao God blong olketa.

Esikiel 36:28

An bae yufala save stap gudfala long disfala lan wea mi bin givim long olketa grani blong yufala bifoa. Nao bae yufala spesol pipol blong mi moa, an mi nao mi God blong yufala.

Esikiel 37:27

Bae mi stap long ples ya wetem olketa fo evritaem olowe nao. Ya, bae mi nao God blong olketa, an olketa kamap moa spesol pipol blong mi.

Matiu 12:50

Eniwan hu hemi duim wanem Dadi blong mi long heven hemi laekem, hem nao brata blong mi an sista blong mi an mami blong mi.”

Matiu 25:40

Long taem ya, mi disfala King ya, bae mi ansarem olketa olsem, ‘Mi talem yufala tru samting nao, taem yufala duim kam enisamting long eniwan long olketa brata o sista blong mi hu hemi lou tumas, yufala duim diswan long mi nao ya.’

Matiu 28:7

Yutufala gobaek kuiktaem long olketa disaepol blong hem an yutufala talem long olketa olsem, ‘Hemi laefbaek moa from dae nao. Bae hemi go fastaem fo weitem yufala long Galili. An long ples ya nao bae yufala save lukim hem.’ Yufala mas tingim gud nao wanem mi bin talem yufala.”

Gudnius abaotem Jisas Kraes wea Mak hemi raetem 12:26

Nao abaotem wei wea man hemi laefbaek moa, ating yufala nating ridim nomoa long buk blong Mosis abaotem smolfala tri wea faea hemi bone olobaot long hem. Long taem ya, God hemi talem Mosis olsem, ‘Mi nao mi God blong Ebraham an Aesak an Jekob ya.’

Gudnius abaotem Jisas Kraes wea Mak hemi raetem 16:19

Taem Jisas Masta blong olketa, hemi toktok long olketa finis nomoa, God hemi tekem hem go antap long heven nao. An hemi sidaon long raetsaet blong God.

Gudnius abaotem Jisas Kraes wea Luk hemi raetem 10:4

An yufala mas no tekem eni paos o eni basket o sandol wetem yufala. An yufala no stop tu fo stori wetem eniwan wea yufala mitim long rod.

Gudnius abaotem Jisas Kraes wea Jon hemi raetem 13:1

Distaem hemi kasem las de bifoa Fist blong Pasova. An Jisas hemi save nao dat hemi kasem taem fo hemi lusim disfala wol fo gobaek long Dadi blong hem moa. Jisas hemi lavem olowe olketa long disfala wol wea olketa falom hem, an hemi gohed fo lavem olketa go-go kasem taem hemi dae.

Gudnius abaotem Jisas Kraes wea Jon hemi raetem 13:3

Nao Jisas hemi save finis wea Dadi blong hem hemi givim evrisamting long han blong hem finis. An hemi save tu dat hemi kamaot long God, an bae hemi gobaek moa long God.

Gudnius abaotem Jisas Kraes wea Jon hemi raetem 14:2

Haos blong Dadi blong mi hemi garem plande rum insaet long hem. Sapos diswan hemi no tru, mi no talem olsem long yufala. Bat diswan hemi tru ya, so mi go fo mekredi long ples fo yufala nao.

Gudnius abaotem Jisas Kraes wea Jon hemi raetem 14:28

Yufala herem finis taem mi tok olsem long yufala, ‘Bae mi lusim yufala, an bae mi kambaek long yufala moa.’ Sapos yufala lavem mi, bae yufala hapi nomoa, bikos bae mi go long Dadi ya wea hemi bikfala moa winim mi.

Gudnius abaotem Jisas Kraes wea Jon hemi raetem 14:6

Nao Jisas hemi talem hem olsem, “Mi nao mi disfala rod an mi save talem evri tru samting an mi save givim laef. No eniwan save go long Dadi ya long eni nara rod, mi nomoa mi rod fo go long hem.

Gudnius abaotem Jisas Kraes wea Jon hemi raetem 16:28

Fastaem, mi stap wetem Dadi ya an mi lusim hem fo kam long disfala wol, an distaem, mi lusim disfala wol ya fo gobaek moa long Dadi ya.”

Gudnius abaotem Jisas Kraes wea Jon hemi raetem 17:11

Mi bae mi kam long yu nao. Bae mi no stap long disfala wol ya, bat olketa nao bae i stap yet long wol. Dadi wea yu holi, yu bae lukaftarem olketa ya long paoa blong nem blong yu, disfala nem wea yu givim kam long mi. Long wei ya, bae yu mekem olketa kamap wan nomoa, long sem wei wea yumitufala i wan nomoa.

Gudnius abaotem Jisas Kraes wea Jon hemi raetem 17:25

Dadi, yu stret tumas ya. Nomata olketa pipol blong disfala wol olketa nating save long yu, mi nao mi save long yu. An olketa hu i blong mi, olketa save dat yu nao yu sendem mi kam.

Gudnius abaotem Jisas Kraes wea Jon hemi raetem 17:5

Long distaem Dadi, mi laekem yu fo somaot moa disfala saen blong bikfala paoa blong mi wea mi garem taem mi stap wetem yu bifoa, taem disfala wol hemi no stap yet.

Gudnius abaotem Jisas Kraes wea Jon hemi raetem 20:27

Bihaen ya, hemi sei long Tomas nao, “Yu putum fingga blong yu long hia an yu lukim tufala han blong mi. Yu kam an putum han blong yu insaet long saet blong mi. !Yu mas lusim tufala tingting blong yu, an yu mas biliv!”

Gudnius abaotem Jisas Kraes wea Jon hemi raetem 7:33

Nao Jisas hemi tok olsem, “Bae mi stap wetem yufala fo lelebet taem nomoa ya, an bihaen ya bae mi gobaek moa long man hu hemi sendem mi kam.

Leta wea Pol hemi raetem go long sios long Rom 8:29

An olketa pipol God hemi siusim olketa bifoa kam, hemi planem fo olketa kamap wankaen wetem San blong hem. Long wei ya nao, San blong hem hemi fasbon long plande brata blong hem.

2 Korin 6:18

An mi nao bae mi olsem Dadi blong yufala, an bae yufala nao olketa san an dota blong mi. Mi God wea mi garem evri paoa nao mi talem diswan.”

Galesia 3:26

Yufala evriwan ya yufala i olketa pikinini blong God bikos yufala biliv long Jisas Kraes.

Hibrus 11:16

Bat wanem olketa laekem tumas nao hemi fo stap long wanfala kantri wea hemi gudfala moa, an heven nao hemi disfala kantri ya. Dastawe nao God hemi no filsem taem pipol kolem hem God blong olketa. Bikos hem nao hemi mekredi finis long wanfala bikfala taon fo olketa.

Hibrus 8:10

Hem ya nao disfala niufala spesol agrimen wea bae mi mekem wetem olketa pipol blong Israel. Bae mi putum lo blong mi insaet long maen blong olketa, an bae mi raetemdaon long haat blong olketa. Bae mi nao God blong olketa, an bae olketa i kamap moa spesol pipol blong mi.

1 Pita 1:3

!Hemi gud tumas fo yumi talem tengkiu long God, Dadi blong Jisas Kraes Masta blong yumi! Hemi barava sore an kaen tumas long yumi, so hemi mekem Jisas Kraes laefbaek moa from dae fo mekem yumi bon moa long niu laef, an fo mekem yumi trastem promis blong God olowe.

1 Jon 3:2

Olketa fren, long distaem nao yumi olketa pikinini blong God, bat wanem nao bae hemi hapen long yumi, God hemi no talemaot yet. Bat wanfala samting nao yumi save, taem Kraes bae hemi kambaek moa, bae yumi barava lukim hem an bae yumi kamap olsem hem nao.

Revelesin 21:3

Nao mi herem wanfala voes from tron, wea hemi singaot olsem, “Lukim, ples blong God hemi stap wetem olketa pipol nao. An bae hemi stap oltaem wetem olketa, an olketa nao i barava pipol blong hem. God seleva nao bae hemi stap wetem olketa, an bae hemi barava God blong olketa.

Revelesin 21:7

Eniwan wea hemi winim faet blong hem bae mi givim hem olketa samting ya, an mi nao bae mi God blong hem, an hem nao bae hemi pikinini blong mi.