Jeremaea 25:15 - Pijin Deuterocanon

¹⁵ (Profet) Hem nao Yawe God blong Israel, hemi tok long mi olsem, “Yu tekem disfala ful kap long kros blong mi go long evri kantri wea bae mi sendem yu go long hem, mekem olketa pipol fo dring long hem.

Pijin Bible

¹⁵ (Profet) Hem nao Yawe God blong Israel, hemi tok long mi olsem, “Yu tekem disfala ful kap long kros blong mi go long evri kantri wea bae mi sendem yu go long hem, mekem olketa pipol fo dring long hem.

Jeremaea 25:15 ပူးပေါင်းရင်းမြစ်များ

Stori abaotem Job 21:20

Nogud man mas garem panis blong hem seleva, mekem hem filim kros blong God hu hemi garem evri paoa.

Sams 11:6

Bae hemi sendem kamdaon faea wetem olketa hot ston, fo bonem olketa ya finis. An bae hemi panisim olketa long win wea hemi barava hot fogud.

Sams 60:3

Mifala olketa pipol blong yu, i safa fogud ya, Hemi olsem yu givim waen long mifala an mifala dringim tumas nao, an waen ya hemi panis blong yu fo mifala.

Sams 75:8

Yawe hemi kros tumas long olketa nogud pipol. An kros blong hem fo olketa hemi olsem strongfala waen wea hemi fulap long kap wea hemi holem. An bae hemi poarem go strongfala waen ya mekem olketa nogud pipol ya i dringim go-go olketa barava finisim.

Sams 75:9

Bat bae mi gohed nomoa fo tokabaotem God blong Jekob olowe nao. An bae mi singsing fo preisim hem.

Aesaea 14:26

Hem nao plan blong mi fo olketa narafala kantri long wol ya. Mi liftimapem finis han blong mi fo panisim olketa.”

Aesaea 34:2

Yawe hemi kros tumas long evri kantri long disfala wol wetem evri ami blong olketa. Hemi bin jajem olketa finis, an bae hemi kilim dae olketa evriwan.

Aesaea 51:17

(Profet) !Wekap, yufala pipol blong Jerusalem! Yufala dring finis long disfala ful kap long kros blong Yawe wea hemi bin givim fo panisim yufala. Yufala dringim finis, an hemi olsem wea yufala evriwan nao i drang fogud an wakabaot krangge olobaot.

Aesaea 51:22

Yawe nao, hu hemi God an Masta blong yufala an hemi gadem yufala olketa pipol blong hem, hemi tok olsem, “Bae mi tekemaot disfala ful kap ya long kros blong mi from yufala, wea mi bin panisim yufala long hem. An bae yufala no dring moa long disfala kap wea hemi mekem yufala fo wakabaot krangge olobaot.

Aesaea 51:23

Bae mi putum disfala kap long han blong olketa hu i bin barava mekem yufala safa, olsem wea olketa mekem yufala fo leidaon falom olketa rod long taon an step nomoa long yufala olsem ravis.”

Jeremaea 1:5

“Jeremaea. Taem mi no wakem yu yet insaet long bele blong mami blong yu, mi save long yu finis. Ya, taem yu no bon kam yet, mi bin makem yu fo wanfala spesol waka. An mi nao siusim yu fo kamap profet blong mi wea bae yu talemaot toktok blong mi long olketa kantri long wol.”

Jeremaea 36:2

“Jeremaea. Stat long taem blong King Josaea kam kasem tude, mi bin gohed fo talemaot olketa toktok long yu abaotem tufala kingdom long Israel an Jiuda wetem olketa narafala kantri tu. Distaem mi laekem yu fo tekem wanfala buk, an raetemdaon evri toktok ya.

Jeremaea 43:11

Taem hemi kam, bae hemi faet long Ijip, an hemi winim nao olketa pipol long ples ya. Nao olketa pipol long ples ya wea mi makem fo dae long bikfala sik, bae olketa dae long sik. An olketa wea mi makem fo olketa enemi i fosim olketa fo lusim lan blong olketa an stap long narafala kantri, bae olketa mas go long hem. An olketa wea mi makem fo dae long faet, bae olketa dae long faet.

Jeremaea 45:5

?Waswe, yu tingse yu save stap gudfala winim olketa narafala pipol? Nomoa. Yu mas no ekspektem gudfala laef olsem. Mi bae mi mekem bikfala trabol fo kam kasem evri pipol long disfala wol, bat bae mi letem yu fo stap laef long eniples wea yu go long hem.” Hem nao mesij blong Yawe.

Jeremaea 46:1

Hem ya nao olketa Mesij blong Yawe agensim olketa narafala kantri long wol wea hemi givim long Profet Jeremaea.

Jeremaea 48:26

Yawe hemi gohed fo tok olsem, “Moab hemi mekhae long hem seleva moa winim mi Yawe. So bae hemi mas kamap olsem hemi fuldrang, mekem evriwan i mekful long hem. Bae hemi filnogud tumas olsem spakmasta wea hemi toraot an foldaon long vomet ya, mekem evriwan hemi mekfan long hem.

Jeremaea 49:12

Hem nao Yawe hemi tok olsem, “?Sapos olketa pipol wea i stret mas dringim disfala ful kap long kros blong mi, yufala tingse bae yufala mas no dringim tu? !Nomoa! Panis ya mas kasem yufala evriwan nao.

Jeremaea 51:7

Kam kasem distaem, Babilon hemi olsem gol kap wea mi holem long han blong mi, an kap ya hemi fulap long waen wea hemi olsem ful paoa long kros blong mi. Babilon hemi mekem olketa kantri long wol ya i dringim disfala waen, mekem olketa olsem fuldrang an kamap krangge nao.

Esikiel 23:32

“Mi Lod Yawe nao mi tok olsem: Bae yu dring tu long sem kap wea sista blong yu bin dring long hem. Kap ya nao hemi bik an dip, an panis ya bae hemi had. Bae olketa pipol i mekfan an tokspoelem yu, bikos kap ya hemi fulap fogud.

Esikiel 23:33

Disfala kap blong sista blong yu wea nem blong hem nao Samaria, bae hemi mekem yu drang fogud an yu barava sore fogud. Bae yu garem trabol wea bae hemi spoelem yu.

Esikiel 29:12

Bae mi mekem Ijip fo kamap nogud tumas, winim olketa narafala drae eria long wol, an no eniwan save stap long olketa taon blong hem go-go foti yia hemi finis. Bae mi ronemaot olketa pipol blong Ijip fo stap olobaot long midol long olketa narafala pipol blong olketa deferen kantri.

Esikiel 36:5

Ya, Lod Yawe nao hemi tok olsem: Kros blong mi fo kantri long Idom wetem olketa narafala kantri raonem yufala, hemi bone olsem hot faea. Ya, mi barava agensim olketa, bikos taem enemi hemi spoelem olketa pipol blong mi, olketa kantri ya i hapi tumas fo tekova long lan blong mi.

Obadaea 1:16

Taem olketa enemi ya i spoelem Tambuhaos blong mi, yufala bin kamap long tambu maonten blong mi fo dring an selebret. Bat yufala wetem evri enemi blong mi, bae yufala evriwan mas dringim finis disfala ful kap waen wea hemi olsem ful paoa long kros blong mi go-go mi barava spoelem finis yufala evriwan.

Habakuk 2:16

!Bat bae Yawe hemi fosim yufala fo dringim finis disfala ful kap waen wea hemi olsem ful paoa long kros blong hem! Bae hemi olsem wea yufala tu i kamap drang an barava filsem, bikos evriwan nomoa save lukluk long neket bodi blong yufala. Bae pipol no mekhae long yufala olsem wea yufala laekem. Bat bae olketa barava lukdaonem yufala olsem ravis wea man hemi toraotem.

Revelesin 14:10

bae God hemi panisim hem. Bae man ya hemi dringim disfala kap waen, wea hem nao olsem ful paoa blong kros blong God. Olketa bae safa nogud tumas long barava hot faea wea hemi laet long diskaen ston salfa. An olketa holi enjel an Smolfala Sipsip ya bae lukim diswan.

Revelesin 14:19

So enjel ya hemi yusim huknaef blong hem fo havestem olketa frut blong olketa grep tri long wol. Hemi torowem olketa frut ya insaet long bikfala hol long ston wea olketa yusim fo wakem waen long hem. Ples ya hemi saen blong kros blong God.