Esra 4:24 - Pijin Deuterocanon

²⁴ From samting ya nao, disfala waka fo bildimbaek moa Tambuhaos blong God long Jerusalem, hemi barava stop nao, an hemi gohed olsem, wea olketa no waka long hem go-go kasem mektu yia wea King Darias hemi rul ovarem Pesia.

Pijin Bible

²⁴ From samting ya nao, disfala waka fo bildimbaek moa Tambuhaos blong God long Jerusalem, hemi barava stop nao, an hemi gohed olsem, wea olketa no waka long hem go-go kasem mektu yia wea King Darias hemi rul ovarem Pesia.

Esra 4:24 ပူးပေါင်းရင်းမြစ်များ

Esra 3:8

Long mektu mans blong mektu yia bihaen long taem olketa bin kambaek long ples wea olfala Tambuhaos hemi stap long hem bifoa, olketa stat fo wakembaek moa Tambuhaos ya. Serababel, san blong Sealtiel, an Jesua, san blong Jehosadak, wetem olketa prist an olketa Livaet, an evri narafala pipol hu i kambaek long Jerusalem, i joen tugeta fo duim waka ya. Olketa lida i siusim olketa Livaet hu i kasem mektuenti yia blong olketa, fo kamap bos ovarem olketa waka ya fo bildimbaek moa Tambuhaos blong Yawe.

Esra 4:23

Taem man hu hemi tekem kam disfala leta from King Atasekses, hemi ridimaot go long Rehum an Simsae, wetem olketa man hu i waka wetem tufala, kuiktaem nomoa olketa go long Jerusalem, an fosim olketa Jiu fo stopem waka ya.

Esra 4:5

An olketa suitim long seleni olketa wakaman long gavman blong Pesia, mekem olketa agensim waka ya. Olketa enemi ya i gohed fo duim semkaen samting, stat long disfala taem blong King Saeras, go-go kasem taem wea Darias hemi kamap king.

Esra 5:1

Long datfala taem, Profet Hagae, an Profet Sekaraea, hu hemi long laen blong Ido, wea tufala i profet long olketa Jiu long Jerusalem an olketa narafala pat blong Jiuda, tufala talemaot profesi long olketa long nem blong God blong Israel.

Esra 5:5

Bat God hemi lukaftarem olketa lida ya blong olketa Jiu. Olketa bikman blong provins ya i raetem wanfala leta go long King Darias fastaem, an olketa weit nao fo ansa long leta ya, mekem olketa no stopem waka ya.

Esra 6:1

So King Darias hemi talem olketa wakaman blong hem fo lukaotem toktok ya blong King Saeras long olketa buk wea olketa kipim long haos blong olketa rekod long taon long Babilon.

Esra 6:14

So, olketa lida blong olketa Jiu i gohed gudfala long waka ya, falom olketa profesi blong Profet Hagae wetem Profet Sekaraea, hu hemi long laen blong Ido. Olketa finisim Tambuhaos ya, olsem wea God blong Israel bin talem, an olsem wea King Saeras, an King Darias, an King Atasekses bin talem long taem wea trifala ya bin king blong Pesia.

Esra 6:15

Olketa finisim Tambuhaos ya long mektri de long mans ya Ada long meksiks yia wea King Darias hemi rul ovarem Pesia.

Nehemaea 6:3

So mi sendem samfala mesenja go fo tok olsem long tufala, “Mi gohed fo duim disfala impoten waka, an mi no save kamdaon. ?Waswe nao mi laekem fo lusim waka ya fo kam tok wetem yutufala?”

Nehemaea 6:9

Olketa ya i traem nomoa fo mekem mifala fraet, mekem mifala wikdaon an no save finisim waka ya. So mi prea olsem, “O God, plis yu mekem mi strong.”

Stori abaotem Job 20:5

ravis pipol i save hapi fo lelebet taem nomoa.

Daniel 11:2

An distaem, bae mi talemaot disfala tru samting. Bae trifala king moa i rul ovarem Pesia, an bihaen bae mekfoa king hemi kamap hu hemi ris moa winim trifala ya fastaem. An taem wea hemi kamap barava strong bikos hemi ris tumas, bae hemi mekem olketa pipol fo faet agensim king blong Gris.

Daniel 9:25

Yu mas save gud long diswan: Stat long taem wea disfala toktok hemi kamaot from profet abaotem taem fo bildimbaek moa Jerusalem, go-go kasem taem wea bae disfala man hu God hemi siusim hemi kamap, bae hemi kasem sevenfala seven yia (hem nao 49 yia). An long datfala taem, wea bae olketa bildimbaek moa Jerusalem, wetem olketa rod blong hem, an olketa strongfala sefples, bae hemi kasem siksti-tufala seven yia (hem nao 434 yia). Bat plande trabol bae hemi kamap.

Hagae 1:1

Long mektu yia wea Darias hemi king long Pesia, long fas de blong meksiks mans long hem, Yawe hemi talemaot Mesij blong hem long Profet Hagae, mekem hemi go talemaot long gavna blong Jiuda, Serababel, san blong Sealtiel, an long Haeprist Josua, san blong Jehosadak.

Hagae 1:15

Olketa statem waka ya long mektu yia blong King Darias, long mektuenti-foa de blong meksiks mans.

Hagae 2:15

?Yufala mas tingting gud long olketa samting wea i kasem yufala kam kasem distaem. Taem yufala no stat yet fo bildimbaek moa disfala Tambuhaos blong mi,

Hagae 2:18

Tude hemi mektuenti-foa de blong meknaen mans, an tude yufala finisim nao faondesin blong Tambuhaos blong mi. Stat distaem, yufala save lukim wanem bae hemi kamap.

Sekaraea 1:1

Long mekeit mans blong mektu yia wea King Darias hemi rul ovarem Pesia, Yawe hemi talemaot Mesij blong hem long Profet Sekaraea, san blong Berekaea, an grani blong Ido. Hemi tok olsem,

1 Tesalonaeka 2:18

So mifala traehad tumas fo kambaek moa long ples blong yufala. An mi Pol, tu-tri taem nao mi traehad finis fo faendem samfala wei fo kam lukim yufala, bat Seitan nao hemi blokem ka-kam blong mifala.