1 Timoti 5:17 - Pijin Deuterocanon

¹⁷ Hemi fitim fo yufala mekhae long olketa lida hu i lukaftarem sios gudfala an givim gudfala wejis long olketa tu, olsem olketa hu i save gohed fo wakahad fo talemaot Gudnius an tisim olketa toktok blong God.

Pijin Bible

¹⁷ Hemi fitim fo yufala mekhae long olketa lida hu i lukaftarem sios gudfala an givim gudfala wejis long olketa tu, olsem olketa hu i save gohed fo wakahad fo talemaot Gudnius an tisim olketa toktok blong God.

1 Timoti 5:17 ပူးပေါင်းရင်းမြစ်များ

2 Kings 2:9

Bihaen tufala katkros finis, Elaeja hemi tok olsem long Elaesa, “I no longtaem nomoa, bae Yawe hemi tekem mi goap. Sapos yu garem enisamting wea yu laekem mi fo duim fo yu fastaem, hemi gud fo yu talem long mi nao.” An Profet Elaesa hemi tok olsem, “Disfala paoa blong spirit blong yu, plis yu mekem mi garem dabol long hem winim wanem yu givim long olketa narafala profet.”

Aesaea 40:2

Tok isi long olketa blong Jerusalem, an talemaot long olketa dat disfala hadtaem wea hemi kasem olketa hemi finis nao. Mi nao Yawe, an mi panisim olketa finis from evri sin blong olketa. Ya, mi bin givim barava had panis long olketa, bat hemi finis nao.”

Jeremaea 16:18

Bae mi dabolem panis blong yufala from olketa sin blong yufala, bikos yufala mekem disfala lan blong mi fo kamap ravis long ae blong mi. Ya, yufala bin fulumapem lan blong mi wetem olketa ravis kaving god blong yufala wea i no garem laef.” Hem nao mesij blong Yawe.

Jeremaea 17:18

Olketa hu i gohed fo mekem mi safa, plis yu mekem olketa sem fogud, bat yu no mekem mi filsem. Plis yu mekem olketa barava fraet, bat yu no mekem mi fraet. Plis yu letem taem blong bikfala trabol fo kasem olketa, an dabolem panis blong olketa.

Sekaraea 9:12

Hemi olsem wea yufala bin stap long prisin. Bat yufala hu bin gohed fo trastem Yawe fo sevem yufala, distaem yufala save kambaek moa long strongfala sefples blong yufala. An bikos yufala bin safa tumas, bae mi blesim yufala an dabolem olketa gudfala samting wea yufala bin garem bifoa.

Nambas 18:31

Olketa samting ya i olsem pei blong yufala long waka wea yufala duim long Tambu Haostent. Yufala wetem famili blong yufala nao i save kaikaim long eni ples nomoa.

Matiu 24:25

Hem nao mi talem yufala abaotem wanem bae hemi hapen.

Gudnius abaotem Jisas Kraes wea Luk hemi raetem 10:7

An yufala mas stap long sem haos ya nomoa, an yufala mas no go olobaot long olketa nara haos moa. An yufala gohed tu fo kaikai an dringim enisamting nomoa wea olketa givim long yufala, bikos man wea hemi waka, hemi fitim fo hemi tekem pei blong hem.

Gudnius abaotem Jisas Kraes wea Luk hemi raetem 12:42

Nao Masta hemi tok olsem, “?Hu nao wakaman hu hemi waes an hemi save kipim promis olowe? Hem nao disfala man wea bos blong hem hemi putum hem fo lukaftarem olketa nara wakaman blong hem, mekem hem nao save givim kaikai long olketa long barava taem fo kaikai.

Gudnius abaotem Jisas Kraes wea Jon hemi raetem 4:38

Mi ya, mi sendem yufala go fo tekem kaikai long gaden wea yufala no bin hadwaka nomoa fo plantem. Samfala deferen pipol nao olketa bin hadwaka, an hadwaka blong olketa hemi helpem yufala nao.”

Aposol 11:30

Olketa duim olsem nao, an olketa sendem go Banabas an Sol, fo tufala tekem go koleksin an givim long olketa lida long sios blong olketa.

Aposol 20:35

Long evri waka blong mi, mi bin somaot long yufala wea yumi mas hadwaka olowe, mekem yumi save helpem olketa hu i no strong. An yumi mas tingim go disfala toktok blong Jisas Masta blong yumi, wea hemi sei, ‘Man wea hemi save givim olketa samting go, hem nao hemi hapi moa winim man wea hemi save tekem olketa samting fo hem seleva.’”

Aposol 28:10

So olketa givim plande samting long mifala, an taem mifala redi fo lusim ples ya, olketa givim mifala evrisamting wea mifala nidim fo gogo blong mifala.

Leta wea Pol hemi raetem go long sios long Rom 12:8

Sapos God givim spesol paoa long yumi fo strongim tingting blong eniwan, yumi mas duim nao. An sapos hemi spesol paoa fo helpem pipol wetem enikaen samting, yumi mas duim long gudfala wei. Sapos yumi garem spesol paoa fo lidim pipol, yumi mas lukaftarem olketa gudfala. An sapos yumi garem spesol paoa fo sore an kaen long pipol, yumi mas duim nomoa an hapi long hem.

Leta wea Pol hemi raetem go long sios long Rom 15:27

Olketa seleva nao duim diswan bikos olketa garem kaon long olketa long Jerusalem. Bikos olketa Jiu i givim go fastaem long olketa, olketa gudfala samting blong Spirit long Gudnius. Dastawe nao olketa hu i no Jiu olketa givim go olketa gudfala samting blong wol.

Leta wea Pol hemi raetem go long sios long Rom 16:12

Yufala sei halo long Traefina an Traefosa, tufala woman hu i wakahad long saet blong Masta. An yufala sei halo long nambawan fren blong mi Pesis, hu hemi narafala woman hu hemi wakahad tumas long saet blong Masta.

1 Korin 15:10

Bat bikos God nao hemi lavem mi tumas, dastawe mi stap olsem distaem. An God hemi no westem lav blong hem nating. Nomoa ya. Mi bin wakahad tumas winim olketa nara aposol. Bat diswan hemi no barava waka blong mi seleva ya, kaenfala lav blong God nao hemi bin stap wetem mi fo duim diswan.

1 Korin 16:16

yufala mas obeim olketa lida olsem olketa. An yufala mas obeim tu olketa hu i helpem olketa lida an duim eni hadwaka olsem.

1 Korin 3:9

Mitufala nao i waka tugeta fo helpem God, an yufala nao olsem gaden blong hem. An yufala ya, yufala haos blong God tu ya.

2 Korin 6:1

Mifala waka tugeta wetem God, an askem strong long yufala fo no tekem olsem samting nating, disfala kaenfala lav wea God hemi somaot long yufala.

Galesia 6:6

Eniwan hu hemi lane abaotem toktok blong God, hemi mas searem olketa gud samting hemi garem wetem tisa blong hem.

Diutronomi 18:8

An hemi save garem pat long olketa tambu ofaring long semsem wei wea olketa wantok blong hem i garem. Hemi save garem olketa samting ya nomata hemi garem enisamting moa from olketa wantok blong hem.”

Filipae 2:16

bikos yufala gohed fo talemaot disfala toktok blong laef long olketa. Sapos yufala duim olsem, bae mi save filpraod long yufala long datfala De blong Kraes. Bikos bae hemi somaot long de ya, dat mi no bin wakahad nating.

Filipae 2:29

Bae yufala mas welkamem hem moa long nem blong Masta. An yufala mas tinghae long olketa pipol olsem hem,

Filipae 4:3

An yu Susuge, wea yu stap tugeta wetem mi long waka, yu tu mas helpem tufala woman ya. Tufala bin wakahad fo talemaot Gudnius wetem mi an wetem Klemen an olketa narawan moa wea nem blong olketa i stap insaet long buk blong laef.

1 Timoti 3:5

?Sapos eniwan hemi no save lukaftarem famili blong hem seleva, hao nao hemi save lukaftarem sios blong God?

1 Timoti 4:10

Yumi gohed nomoa fo wakahad, bikos yumi barava biliv long God hu hemi laef. Hem nao hemi Sevia blong evri pipol, an hemi tru, bae hemi sevem yumi evriwan hu i biliv long hem.

1 Timoti 4:14

Disfala spesol paoa wea yu garem, yu mas no letem hem fo stap nating. God nao hemi givim yu diswan, taem olketa profet i talemaot toktok abaotem yu an olketa lida long sios i putum han blong olketa antap long yu.

1 Timoti 4:16

Yu mas lukaftarem gud laef blong yu wetem olketa toktok wea yu gohed fo tisim ya. Sapos yu duim diswan, bae yu sevem yu seleva wetem olketa pipol hu i herem yu tu.

1 Timoti 4:6

Sapos yu talemaot olketa toktok ya long olketa Kristin fren blong yumi, bae yu wanfala gudfala wakaman blong Jisas Kraes. An bae yu grouap strong long olketa gudfala tising insaet long biliv wea yu falom kam finis.

1 Timoti 5:19

Yu no lisin long eni toktok agensim wanfala lida long sios, sapos wanfala man nomoa hemi talem. Tufala o trifala man nao i mas kam fo ripotem samting long yu fastaem.

1 Timoti 5:3

Yufala mas helpem olketa wido woman wea olketa barava no save lukaftarem olketa seleva.

2 Timoti 2:6

Man hu hemi wakahad tumas long gaden blong hem, hemi fitim fo hem nao fas man fo tekem kaikai taem hemi redi fo digimap.

2 Timoti 4:2

yu mas gohed fo talemaot toktok blong God olowe, nomata long taem wea pipol no wande lisin long yu. Yu mas traehad fo helpem pipol fo luksave long tru toktok, an yu mas stretem wei blong olketa an helpem olketa fo gohed strong moa. An yu mas kaen long evriwan taem yu tisim olketa gudfala.

Hibrus 13:17

Olketa lida blong yufala i lukaftarem laef blong yufala. An bihaen nao, bae olketa mas talem God abaotem wanem olketa bin duim. Dastawe yufala mas obeim olketa an tinghae long olketa, mekem olketa hapi long waka ya. Sapos yufala mekem waka blong olketa fo kamap hevi, bae hemi no save helpem yufala nao ya.

Hibrus 13:24

Yufala mas sei halo long evri lida long sios wetem olketa evri pipol blong God. Olketa Kristin hu i stap kam long Itali, olketa sei halo long yufala tu.

Hibrus 13:7

Yufala tingimbaek olketa lida blong yufala bifoa, hu i talemaot toktok blong God long yufala. Yufala tingting long gudfala wei blong laef blong olketa go-go olketa dae, an yufala mas falom gud disfala wei blong biliv blong olketa.