1 Tesalonaeka 3:2 - Pijin Deuterocanon

² an mitufala sendem go brata blong yumi Timoti fo kam long yufala. Timoti tu hemi wakaman blong God fo talemaot Gudnius abaotem Kraes. Mitufala sendem hem kam fo strongim moa biliv blong yufala.

Pijin Bible

² an mitufala sendem go brata blong yumi Timoti fo kam long yufala. Timoti tu hemi wakaman blong God fo talemaot Gudnius abaotem Kraes. Mitufala sendem hem kam fo strongim moa biliv blong yufala.

1 Tesalonaeka 3:2 ပူးပေါင်းရင်းမြစ်များ

Aposol 16:1

Pol an Saelas tufala go kasem taon long Debe, an bihaen, tufala go moa long taon long Listra, wea wanfala Kristin, nem blong hem Timoti nao, hemi stap. Mami blong man ya hemi wanfala Jiu hu hemi Kristin, bat dadi blong hem hemi man blong Grik.

Aposol 16:5

Nao long wei ya, olketa sios olketa gohed fo kamap strong moa long wei blong biliv. An evri de nomoa, plande pipol moa olketa kam fo joenem olketa.

Aposol 18:5

An taem Saelas an Timoti tufala lusim Masedonia an kamdaon joenem Pol, Pol hemi stat fo talemaot disfala Gudnius long evri de nomoa. Hemi gohed fo talemaot gud long olketa Jiu wea Jisas nao hemi disfala Mesaea.

Leta wea Pol hemi raetem go long sios long Rom 16:21

Timoti hu hemi waka wetem mi, hemi sei halo long yufala. An Lusias an Jeson an Sosipata wea olketa i wantok blong mi, trifala sei halo long yufala tu.

1 Korin 3:10

God hemi givim kam paoa long mi fo mi stap olsem nambawan kapenta blong haos, wea mi bin putum kam faondesin blong yufala finis. An nara man nao hemi gohed fo bildim antap long diswan. Bat evriwan nao hemi mas lukaot, mekem hemi bildim gudfala.

1 Korin 4:17

An dastawe nao mi sendem go Timoti, disfala man wea hemi olsem gudfala pikinini blong mi wea hemi duim gudfala waka tumas fo Masta. Bae hemi tisim yufala moa abaotem olketa rul wea mi falom long disfala niu laef wea yumi stap joen wetem Jisas Kraes, olsem mi save tisim olketa pipol blong sios long evri ples.

2 Korin 1:1

Mi Pol, wea God hemi mekem mi kamap aposol blong Jisas Kraes. Mi wetem Kristin brata blong yumi Timoti, mitufala raet go long yufala pipol blong God long Korin an long olketa nara ples long provins long Akaea.

2 Korin 1:19

Mi wetem Saelas an Timoti, mitrifala save tokabaotem Jisas Kraes San Blong God, wea hemi no save talem “Yes” an “No” long semtaem. Nomoa, hem ya hemi talemaot “Yes” oltaem.

2 Korin 2:12

Taem mi bin kasem Troas fo talemaot Gudnius abaotem Kraes, Masta hemi helpem mifala fo duim plande gudfala waka.

2 Korin 2:13

Bat mi barava wari fogud, bikos mi no faendem fren blong mi Taetas. So mi gudbae long olketa pipol ya, an mi go olowe long Masedonia nao.

2 Korin 8:23

Yufala save long Taetas finis, hemi fren blong mi an hemi waka tugeta wetem mi fo helpem yufala. An nara tufala brata ya, tufala nao kam long nem blong olketa sios, an waka blong tufala i haemapem nem blong Kraes.

Filipae 1:25

Ya, mi barava save dat hemi olsem. An mi save dat bae mi stap yet wetem yufala evriwan, mekem mi helpem yufala fo gohed moa an stap hapi olowe long biliv blong yufala.

Kolosi 1:1

Mi Pol ya, wea God hemi mekem mi kamap aposol blong Jisas Kraes. Mi wetem Kristin fren blong yumi Timoti,

Kolosi 1:7

Gudfala fren Epafras wea hemi waka wetem mifala, hem nao hemi tisim olketa samting abaotem lav blong God long yufala. Hemi helpem mifala ya wea hemi wanfala gudfala wakaman long disfala waka blong Kraes.

Kolosi 4:12

Wantok blong yufala Epafras wea hemi wakaman blong Jisas Kraes, hemi talem halo go long yufala. Oltaem nomoa hemi gohed fo prea strong fo yufala. Hemi askem God fo helpem yufala fo stanap strong finis long Kristin laef blong yufala, an fo mekem tingting blong yufala hemi savegud long evrisamting wea God hemi laekem.

Kolosi 4:9

An mi sendem tu wantok blong yufala Onesimas fo go wetem hem. Onesimas hemi gudfala fren blong yumi wea yumi save trastem hem tumas. Tufala nao bae i talemaot long yufala evrisamting wea hemi hapen finis long disfala ples ya.

1 Tesalonaeka 3:13

Long wei ya nao, bae hemi strongim moa tingting blong yufala. So taem Jisas Masta blong yumi bae hemi kambaek moa wetem evri pipol blong hem, laef blong yufala bae hemi stret an holi long ae blong God Dadi blong yumi.

1 Tesalonaeka 3:5

Dastawe nao mi wari fogud, an mi sendem kam Timoti long yufala fo faendemaot abaotem biliv blong yufala. An mi wari tumas, nogud Seitan hemi trikim yufala an mekem olketa waka blong mifala hemi yusles nomoa.

2 Tesalonaeka 2:17

Mifala prea wea hemi mas mekem tingting blong yufala fo strong moa, an mekem yufala gohed olowe fo duim evri gudfala waka an fo talem evri gudfala toktok.