1 Korin 4:14 - Pijin Deuterocanon

¹⁴ Mi no raetem disfala toktok long yufala fo mekem yufala filsem. Nomoa. Mi lavem yufala olsem olketa pikinini blong mi, an mi laek fo stretem tingting blong yufala nomoa.

Pijin Bible

¹⁴ Mi no raetem disfala toktok long yufala fo mekem yufala filsem. Nomoa. Mi lavem yufala olsem olketa pikinini blong mi, an mi laek fo stretem tingting blong yufala nomoa.

1 Korin 4:14 ပူးပေါင်းရင်းမြစ်များ

Esikiel 3:21

Bat sapos yu wonem stretfala man ya an hemi no duim eni ravis samting, bae laef blong hem hemi sef nomoa bikos hemi lisin long woning blong yu, an bae laef blong yu seleva hemi sef tu.”

Aposol 20:31

So yufala mas lukaot gudfala. An yufala no fogetem tu, wea olowe nomoa, nomata naet, mi bin tisim yufala an mi bin krae wetem yufala evriwan. An diswan hemi bin gohed fo trifala yia nao.

1 Korin 15:34

Yufala mas stat tingting gudfala moa, an yufala mas finis from disfala wei blong sin. Samfala long yufala, olketa nating save long God, an mi talem diswan mekem yufala filsem long hem.

1 Korin 4:15

Nomata sapos yufala garem 10,000 pipol fo tisim yufala long wei blong Kraes, wanfala man nomoa hemi olsem dadi blong yufala. Mi tekem kam disfala Gudnius long yufala ya, mekem mi nao mi kamap olsem dadi blong yufala long saet blong Jisas Kraes.

1 Korin 4:17

An dastawe nao mi sendem go Timoti, disfala man wea hemi olsem gudfala pikinini blong mi wea hemi duim gudfala waka tumas fo Masta. Bae hemi tisim yufala moa abaotem olketa rul wea mi falom long disfala niu laef wea yumi stap joen wetem Jisas Kraes, olsem mi save tisim olketa pipol blong sios long evri ples.

1 Korin 6:5

?Maewat, yufala no save filsem ya? ?Waswe, no eni man hemi stap insaet long sios wea hemi garem gudfala save, mekem hem nao hemi save stretem eni raoa wea olketa Kristin maet garem?

1 Korin 9:15

Bat nomata olsem, mi no bin tekem enisamting nomoa. An mi no raetem diswan bikos mi laek fo tekem enisamting fo mi seleva. Moabeta mi dae fastaem. Bae no eniwan i save sensim disfala wei blong mi wea mi save praod tumas long hem.

2 Korin 11:11

?Waswe, yufala tingse mi talem diswan bikos mi no lavem yufala? !Nomoa! God nao hemi save dat mi lavem yufala tumas.

2 Korin 12:19

Maet yufala tingse mifala raetem olketa samting ya fo somaot dat mifala no duim enisamting rong. !Nomoa ya! Mifala talem olketa samting long wei wea Kraes hemi laekem mifala fo duim long ae blong God. Olketa fren, evrisamting wea mifala bin raetem, mifala raetem fo strongim biliv blong yufala.

2 Korin 7:3

Mi no talem diswan fo tok agensim wei blong yufala. Nomoa. Mi bin talem yufala finis, mifala lavem yufala tumas, an nomata yumi laef o yumi dae bae yumi joen tugeta olowe.

Kolosi 1:28

Mifala gohed fo talemaot Gudnius abaotem Kraes ya long evri pipol, wea mifala gohed fo wonem olketa an tisim olketa gudfala. Mifala yusim olketa waes toktok ya, mekem mifala save helpem evriwan fo grouap strong long biliv long Kraes.

1 Tesalonaeka 2:11

An yufala save dat mifala helpem yufala evriwan, olsem wanfala dadi hemi helpem olketa pikinini blong hem.

1 Tesalonaeka 5:14

Olketa Kristin fren, mifala talem strong moa long yufala fo wonem olketa hu i les tumas fo waka. Yufala mas helpem olketa hu i fraet tumas, an strongim moa tingting blong olketa. Yufala mas helpem olketa wea tingting blong olketa hemi wik tumas, an no raf long eniwan.

2 Tesalonaeka 3:14

Maet samwan long yufala hemi no save obeim olketa toktok wea mifala bin raetem go long disfala leta. Sapos olsem, hemi gud fo yufala mas luksave gud long man ya. An yufala mas no stap tugeta wetem hem, mekem hemi filsem long wei blong hem seleva.

Filimon 1:10

Mi askem yu fo yu mas barava kaen long Onesimas. Taem mi stap long prisin nomoa, mi tisim hem fo biliv long Kraes so hemi olsem pikinini blong mi nao.

1 Jon 2:1

So olketa pikinini blong mi, mi raet go long yufala, mekem yufala no duim eni ravis samting. Bat sapos eniwan hemi duim eni ravis samting, bae Jisas Kraes save helpem hem. Bikos hem nao hemi barava stret, an hemi save tok go long Dadi blong yumi fo helpem yumi.

3 Jon 1:4

Taem mi herem dat olketa pikinini blong mi i gohed fo falom tru toktok, mi barava hapi tumas. No enisamting moa save mekem mi hapi winim diswan.