Roma 1:1 - Allahle a neme heteungekoke homofae

¹ Onomi foka, aka naei baeke naei Roma yona nekaube. Reyae Paulus, Wali Ondofolole kaliare mokale kiyae, nda homo moloukokale. Allah yae rare kaeneufekoke Yesus Wali Ondofolole abu akore yeubokale nane merau eleufeboke Naei a foi faeu foi ukeufere hufemilere.

Roma 1:1 ပူးပေါင်းရင်းမြစ်များ

Markus 1:14

Ya mbai mo Ondofolo Herodes ukeumile Yohanesre ikilenaibonde kawane ahenainyekondere. Na heki ban mo, Yesus Galilea kanire meke, Allahle a foi faeu foi nebeinye huwoumi.

Yohanes 12:26

Ro miyae Raei kaliare mokate yo Raei moisa hakonaikonde hele nane merau Reyae erenekende ijenne nebei u mekai ma yo nangkele. Nde yae Raei kaliare mokole kiyae, Maeko yae nebei kiyaere ennekaende.

Yohanes 15:15

“Mare benen Raei yebaei bubaei yae ekaenei. Rabuhine ban rowa mbai naei uwa naei are na yebaei bubaeise ehuweikoi sului. Nebeibe mare kena buhaere haemale holona yae Reyae kaenamale, rabuhine ban Maeko yae elewole a nanemene Reyae borowale hului mare nebei abe isaeyaemale.

Yohanes 15:20

Reyae uwamale are bene foi yae nekenayembe. Yebaei bubaei yoni-yoni na rowale na metete ban. Wali beko nibine orate yo hiwa Rare weitasi kowaisene, nebei wanen mbai mare weitasi konayembe. Ro miyae hiwa Raei ako faeuko huwamaele huluinye hakowaisene, nebei wanen mbai mayae huwembe are hakonate.

Kisah 13:9

Naendae mekaisebe, Saulus (nane merau Paulus yae kaenainye kiyaere) Allahle Roh yae maemae koungekoke eke Elimasre na ijoko bele keleungekoke weunge,

Kisah 20:24

Nebeibe Tuhan Yesus a ukeufe ro miyaere hufemile Allah kena buhae aere ban mae heumikokene wali hole molommibonde nibi wekeunge. Nebei a foi faeu foise ro miyaere keleremiyendere huba halerengkondere, nda wali koko raei walire buhae ohokoi Naei ane mo hakorende.

Kisah 21:40

Nebei fela yun be hineungeboke Paulus are elengkondere. Oro walo randa yeufebeunguke mo, me yae kowoumi. Ro miyae nemene aku ban yaeiboke. Hilaiboke mo, Paulus nebei yo naei afaeu wae weumi:

Kisah 22:21

“Nebeibe Tuhan mae benende weufe, ‘Eyei mo eye, Reyae ware ufete a hau bu hau Yahudi ro miyae ban yore elere.’ ”

Kisah 22:7

Reyae kani ranne na hibi rukale, borale a mbai rare weufe, ‘Saulus, Saulus! Rahene weyae Rare weitasi hele koimeyarae?’ ”

Kisah 26:1

Nebeisa Agripa yae Paulusre weunge, “Meyae waemayeufinde waei a naei na hele eleukondere.” Paulus na me bumare yae raneungejeke, nda wanen mae weumi,

Kisah 26:14

Nemene nebei ewande yo ane balekande. Nebeisa borale bae a mbai rare Ibrani afaeu wae weufe, ‘Saulus, Saulus, rahene Rare weitasi koimeyaere? Rare waei beko koufemendena, nebei ehee bukulu mbai wenaeijae hubaungehinde.’

Kisah 27:23

Rabuhine ban, mana reniai honale yae, raei Allah Naei me einye nekale Kiyae, reyae eise molanale Kiyae, Na malaikat meke raei bokore.

Kisah 9:15

Nebeibe Tuhan mae Ananiasre weunge, “Eyeise mo eye! Reyae nare eleubokale Raei burelen boi-boise orondere. Ro miyae kani hi kela hina Yahudi ban yo belere naei ondofolo-ondofolo belere Israel ro miyae belere Raei are huwemmiyendere.

Roma 1:16

Wali Ondofolole a foi faeu foi hufemile naeise reyae fe ehubaisi, rabuhine ban nebei a foi faeu foi walora Allahlena elae yae ro miyae Wali Ondofolo Naei a elelere hila rabo halaete yore holere molonaimibondere, na bereise Yahudi ro miyae nane merau Yahudi ban ro miyae bele.

Roma 1:5

Yahudi ban ro miyae kaenemamile Wali Ondofolo Naei a elelere hila rabo halenainyele hakonainyele naeise, Naei walora Allah maere kena buhae aere ban mae heumekoke nane merau Yesusle abu akore mokoumeboke.

Roma 1:9

Allah Naei Kelule a foi faeu foi yo ran yo randa raei kena u na maemae hele yae huweimeyamale yae Naei kaliare mokale. Neyae Naeisaei nekele mai naeise reyae ebeline Nare na hibi-hibi eibowanale.

Roma 11:13

Nda hee mayae Yahudi ro miyae ban yore reyae wamale, Allah rare kaeneufekoke mai foi naeise Wali Ondofolole abu akore yeubokalene, mai aerene kalia mokalere na bereise eranale.

Roma 15:16

ukeufe Yesus Wali Ondofolole kaliare Yahudi ban yo u nolo ukainye mokorele. Allahle Roh yae Allahre kena foise mokonainyele u mekaise Yahudi ban ro miyaere mokommibonde nane merau nebei yo hili era akau era wanen mae Allahre kena foise mokonainyele naeise, Allah ukeufe imam wanen mae Naei Wali Ondofololena a foi faeu foi Yahudi ban ro miyaere eremihuwende.

Roma 15:29

Reyae raeisaei mai bokore erele hee, mai kalo moloungkokembe hului Wali Ondofolo raei walora na hului mokonembombe.

Roma 16:18

Rabuhine ban nebei u mekai ma ro miyaebe aei Tuhan Wali Ondofolole kaliare mokate ban, nebeibe na bekore kena haehae kate more ei moloyainye. Isaei hebaen isaeyeiboi ro miyae holonare a yukaei-yukaei bele a moi-moi mokaimi bele yae ame-ame beyaimi.

Roma 16:25

Aka naei baeke naei, reyae Wali Ondofolena a foi faeu foise huwengkokamale. Nebei a heki hele nunne honowate. Nebeibe nda hee yoho nemene Wali Ondofolore hila rabo halenainyele naeise, nane merau hakonainyele naeise, Allah Hubalo Mando yae Naei yenjo kayaayo naei homofaene ukeumi molaikoke, nane merau nda heene Wali Ondofolole naeise yakaumeboke. Nebei Allah na hului mokonembonde Wali Ondofolo Naei a elelere hila rabo elae yae halemembe, hakomembe.

1 Korintus 1:1

Onomi foka, Allahle jemaat Korintus yona nekaube. Mayae Yesus Wali Ondofolo bele mbainye nekaube yae Allahre kena foise mokaunge u mekai bele nekeyembe. Mare Yesus Naei eleuboke wekeunge holona yo wanen u mekai nekemembere kaenengkokembe ro miyae naeise, nane merau makei-makeinye nekate Tuhan Yesus Wali Ondofolo yae hakommibondere kaeneyainye yo nanemene naeise, nda homo moloukokale. Eyae nemene Yesus Tuhande kaenannele. Reyae Paulus Allah kena koukoke hului kaeneufekoke Yesus Wali Ondofolole abu akore yeubokale kiyae bele aei aka baeke Sostenesle mare ro melaeyembe.

1 Korintus 9:1

Reyae Musale walora wali heere foloukoke huluinye ehee bukulu hayemmera me ruboufeboke. Yesus Wali Ondofolo naei abu akore yeubokale, Yesus aei Tuhande raei ijoko yae ereubokale. Raei kalia mokowanalera mayae Wali Ondofolore hila rabo halaeunge.

2 Korintus 1:1

Onomi foka, Allahle jemaat Korintus yona bele Akhaya kanina Yesus Naei eleuboke wekeumi holona yo bele. Reyae Paulus, Allah kena koukoke huluinye Yesus Wali Ondofolole abu akore yeubokale kiyae bele aei aka baeke Timotius bele mare ro melaeyayembe.

2 Korintus 11:5

“Emekai bele abu ako” yae eraimi yora raei uware are holo yae ehubai.

2 Korintus 11:7

Wali Ondofolole a foi faeu foi huwamale hee raei roibu mare eriyei. Naendae wanen, Allah mare rore ronembombe naeise raei uwa ane oitasiyanalere bekobe mokowamale?

2 Korintus 12:11

Mayae moisa elae huraufekokene, reyae kobu ro miyaere yeubokale. Mai baka ranne huluinye mayae raei naeise a foi elaube, rabuhine ban naendae mekai horo rare me baei banbe, nebeibe “emekai bele abu ako” yae eraumi nolona mbai sambai rare ehameikoi sului.

2 Korintus 2:12

Wali Ondofolole na a foi faeu foise hufemilere Troas yore ekale hee, nebeinye kalia mokorele naeise Tuhan nibi kaeu-kaeu fele wekeungele.

2 Korintus 4:5

Maei uwa naei a faeube huwammile ban, nebeibe Yesus Wali Ondofolo na hele Neyae Tuhan a faeube huwayembe, nane merau meyae nebei Kiyaele aerene mai yebaei bubaeise yaendeboke abe huwammile.

Galatia 1:1

Aka naei baeke naei jemaat-jemaat Galatia kanine nekaube, mauwa bele! Reyae Paulus, Yahudina, Yesusle abu akore yeubokalere, ro yae miyae yae rare eleiboi, nane merau moi eneisi. Nana hesele Yesus Wali Ondofolo yae nane merau Ako Allah, Yesus ohaline baikoke herekera walire ikeunge Kiyaele, rare eleiseboke nda kalia are ukeisele.

Efesus 1:1

Onomi foka mayae Yesus Naei eleubokembe wekembe ro miyae, Efesus yone nekaube, Yesus Wali Ondofolole a elelere hila rabo haleyaube yo. Reyae Paulus, Allahle kena huluinye Yesus Wali Ondofolole abu akore yeubokale.

Efesus 1:13

Nane merau mayae Yahudi ban ro miyae Yahudi ro miyae aengkele Wali Ondofolo Naei holone mbaise yaendeboke. Mayae Yahudi ban ro miyae Yesusle naeise na hele a foi faeu foi borokaube heene ehe yae kaukoke. Nebei a faeu wae Allah mare wali holere molombokembe. Nebei a foi faeu foi hakowaubene Allah are heteungekoke Roh mare aubokembe yae me noufe herawembokembe.

Efesus 4:11

Nebei Yesus mbai Allah Naei kaliare mokonate naeise Allah yae eleukoke wekeumi ro miyaere mokommihande. Naei jemaat amminunde naeise Yesus ro miyaere meli mekai mahi-mahi kiteumiboke. Nebei yo nolone hiwa Yesusle abu ako, hiwa Allah weumi are huwate, hiwa Yesuslena a foi faeu foise huweyate yo, hiwa jemaatre holeyate yo, hiwa Allahle a faeu kelei-kelei yore yaeiboke.

Filipi 1:1

Mai onomi foka Filipi yona Yesus Naei elembokembe wekembe holona yo. Mayae jemaat be yun be yebaere hebaube yo bele jemaat kaliare mokaube yo bele nane merau Yesus Wali Ondofolore hila rabo halaube ro miyae hosoro bele. Meyae bee Paulusle Timotiusle Yesus Wali Ondofolole yebaei bubaeise yendeboke mare ro melaeyayembe.

Filipi 2:11

nane merau nanemene Yesus Wali Ondofolore Tuhan mae wo enaikonde. Nebei mekai yaere aei Ako Allahre hili hebenainyende.

Kolose 1:1

Onomi foka aka naei baeke naei Kolose yone nekaube, Yesus Naei eleuboke wekeumi ro miyae, Yesusre na hibi-hibi hakoyaungere reyae Paulus nane merau aei aka baeke Timotius bele mare ro melaeyayembe. Allah kena kole huluinye Reyae Wali Ondofolo Yesusle abu akore yeubokale. Reyae ebeli banale aei Arai Allah kena buhae aere ban mae henembe nane merau kena foi u foi mokonembombe.

Kolose 1:25

Reyae Paulus jemaat na kaliane mokale, rabuhine ban nebei naeise Allah yae rare a ukeufe. Nane merau Allah yae rare a ukeufe Naei ako faeuko nemene fomene mare huwerengkombe.

1 Tesalonika 2:2

Mai bokore meyae ei hee yae, Filipi yone beko hubannekoke, maere fere mokonainyebondere a beko yae uwaimele. Nebeibe Allah maere be kaleumehakene, meyae Naei a foi faeu foi huwayembe, naendae wanen horo ro miyae maei a elewandere ahenaimekondere relewainyele.

1 Tesalonika 2:8

Meyae mare buhae hele hewayembene, Allahlera a foi faeu foi mare huwewayembe mo ban, nane merau mai foi naeise mokowande. Meyae mare kena buhae hele hewayembe.

1 Tesalonika 2:9

U bene nekenayembe hele aka naei baeke naei, meyae Allahlena a foi faeu foi huwewayembe heena, menaeijae reniai rai kalia mokandekoke mai wali rambunbe yaromayengkombe belene.

1 Timotius 1:1

Onomi foka Timotius. Weyae Wali Ondofolo Naei a elelere hila rabo halaenaene reyae ware kelu hele yae erawale. Reyae Paulus, Allah aei Holelo bele Yesus Wali Ondofolo bele rare ukeisele huluinye Yesus Naei abu akore yeubokale. Eyae hila rabo halaende Yesus Wali Ondofolo wali hena bona yemmele Kiyaere yeuboke. Reyae ebeli banale Allah aei Ako Kiyaele Yesus Wali Ondofolo bele ware kena buhae aere ban mae heneyete, yanekoi yase yae ei haweyete, rei mai inyeyete.

1 Timotius 2:7

Allah rare ukeufe nebei are Yahudi ban ro miyaere hufemile nane merau keleremile, ro miyae Yesus Naei a elelere hila rabo halenainyelena, wali hena bona enaiyaronde. Nebei naeise na helebe wamale, reyae ame-ame ebei.

Titus 1:1

Onomi foka Titus, raei kelu wanen kiyae. Reyae Paulus, Allah yae eleufeboke Naei kaliare mokorelere nane merau Yesusle abu akore isebondere. Allah ukeufe Naei eleukoke ro miyaere yaufemibonde Yesusre hila rabo halenainyele naeise, nane merau nebei ro miyaere Wali Ondofolole na hele wali nibi a isaeisemile naei wali Allah na kenare kole huluinye nekenate naeise.

Ibrani 5:4

Ro miyae hi nauwa imam kabande yembonde naei, nenaeijae nauware ekaeiboi sului. Nendahina Allah yae Harunde kaeneungekoke wanen, imam kabande yembonde ro miyaere Allah yae kaenennekonde.

Ibrani 7:26

Nebei wanen imam kaban na hului aere na hibi-hibi hakommele. Naei u mekai nda wanen nekele: Allah Naei naeise Nare eleuboke wekeunge, Nare a beko ewei sului, u mekai yolo-yolo, me nene u nenere kate ro miyae holone ebaeiboi, nane merau kunsoboi waufoboi ranne ekaikaeinye.

Yakobus 1:1

Onomi foka mayae yoho me bee oro nen bee bele yo hi yan hine faeungekoke nekeyaube yore. Reyae Yakobus, Allahle Tuhan Yesus Wali Ondofolole yebaei bubaei yae, ro melaeyamale.

1 Petrus 4:17

Nda kani kelana ro miyae na walire Allah hului kolommikonde ya na hului yeuboke. Na bere Allah naei imae ei obe einya yora huba rawembonde hului kolommikonde. Nane merau hului kolommikondere aei holonara huba rawembondena, Allah yae ikeume Wali Ondofolole a foi faeu foi huwayekere ehakoiboi yore me emminononde hele.

2 Petrus 1:1

Onomi foka! Reyae Simon Petrus, Yesus Wali Ondofolole kaliabe mokale, Naei abu akore yeubokale. Allah aei Walilo, Yesus Wali Ondofolo Kiyae, na wali himaloungeboke hele walora ro miyae hiwa Nare hila rabo haleyainye. Nebei ro miyaere reyae nda homone molale. Naei hila rabo haleyainye roibu maengkele nane hului mbai.

Yudas 1:1

Onomi foka mayae Allah yae kaenengkokembe yo, Ako Allah kena buhae hembe yo, Yesus Wali Ondofolo yae ei hawembe yo. Reyae Yudas, Yakobus na aka baeke, Yesus Wali Ondofolole kaliare mokale kiyae.

Wahyu 1:1

Nda homofaene Yesus Wali Ondofolole naeise. Allah Naei kaliare mokate yore na heki ban mo benate rambunde kelemmibonde naeise, Allah yae nebei benate yoni-yoni Yesusre yakaungeboke. Yesus yae Na malaikatre ukeunge reyae Yohanes Naei kaliare mokale kiyaele bokore meke, nebei yoni-yoni benatere isaeyensebondere.

Wahyu 22:6

Nebeisa nebei malaikat yae rare weufe, “Na ranne a yoni-yoni na hele nane merau rabo ensalembe. Tuhan Allah Naei Rohre weunge yenjo kayaayo walora huwemmile Kiyae, Naei malaikatre ukeunge meke Naei kaliare mokate holona yore na heki ban benate rambunde kelemmibonde naeise.”

Wahyu 22:9

Nebeibe neyae weufe, “Ae, nebei mekai omokoijae! Allahre mo ei moloinye! Rabuhine ban waeinya wanen mbai reyae Allahle kaliare mokale ro, nane merau waei aka baeke Allahle yenjo kayaayo bele ro miyae nanemene fomene nda homofae einya a usaei wasaeise hakoyate yo bele nane hului mbai.”