Taitasi 1:2 - Panake Pi La: Ula: Buka pita: Kine Pieke Buka

² Ika꞉ mo koto hone tulalemeeki make mo ota꞉ pi miniki halemeeki make do hau yaapota꞉ mo deto hala꞉ hauna꞉ ti laasa꞉eki pa꞉ta꞉ ti lalememe. Mo yayapiki pi na lo hala꞉ Koda꞉ma꞉ amba꞉ mo ala꞉ta꞉ ala꞉ta꞉ paeyao na wepia wina꞉ leke do deto hala꞉ ekita꞉ niki pa꞉ta꞉ hone witolo hata꞉ pi la꞉ wiekeme.

Taitasi 1:2 ပူးပေါင်းရင်းမြစ်များ

Ma꞉tiu 25:34

Kutu pu paeya꞉ka꞉na꞉ta꞉ mo Kini Halima꞉ ipika꞉ popeke nanema꞉ halimi wanda꞉hali pa꞉ta꞉ alota꞉ Ikita꞉ Koda꞉na꞉ wamo pa꞉la꞉eki mimiki wanda꞉hali yeleme ekina꞉ ika꞉ Apa꞉ Koda꞉ma꞉ do kenke kini pea wepieke toma꞉na꞉ kone tikitiki yao wina꞉ la꞉la꞉ kilu tumbuao hala꞉ kenke a꞉pa mipee lelieke.

Ma꞉tiu 25:46

Koto wanda꞉halita꞉ honiki na paeyo hala꞉ hoke yenki mu hala꞉ pa꞉ta꞉ tapaalieke. Pate mo tikitiki wopu piki wanda꞉hali ikita꞉ honiki na paeyo deto hala꞉ pa꞉ta꞉ pelimikie leekeme.

Maka 10:17

Yesuma꞉ pota꞉na꞉ poluekema꞉ haena꞉ hali homekema꞉ a̱i̱ya puaata꞉ Yesuna꞉ puki pa꞉ta꞉ tumiki yotuao pita꞉ lota꞉ piekeme dupa. Epeke Wala꞉la꞉ Halio. Deto hala꞉eki muluekema꞉ eki ponope leekeme.

Dioni 10:28

Iki pa꞉ta꞉ da꞉ta hao hala꞉eki halono ikita꞉ ota꞉ na homilimikie. Kutupa ikita꞉ ya kiki pa꞉ta꞉ haena꞉ hali ma꞉nda꞉ma꞉ pa꞉ta꞉la꞉ mea꞉peke na ya꞉la꞉me.

Dioni 17:2

Nakana꞉ma꞉ ipikita꞉ wanda꞉hali paeyaona꞉ you haena꞉ laata꞉ Nakana꞉ma꞉ ipiki pa꞉ta꞉ halo pele wanda꞉hali paeyaota꞉ ipikana꞉ma꞉ da꞉tao hao haena꞉yeke lele ekina꞉ loa꞉me.

Dioni 17:24

Apa꞉o. Do haliwekita꞉ nakana꞉ma꞉ I̱ pa꞉ta꞉ keleme. Koto pele ekina꞉ I̱ halo alena꞉ iki make koto pa꞉ta꞉ haena꞉ yaka pa̱a̱ piki biki tieke moloeki handena꞉yeke I̱ma꞉ hone pa꞉la꞉me. Koto biki tieketa꞉ nakana꞉ma꞉ keleekie. Do kenke a̱i̱ na wepieke dina꞉ kone I̱ pa꞉ta꞉ pukima꞉ homele ekina꞉ keleme.

Dioni 5:39

Deto hala꞉eki handa꞉ uluekema꞉ ikana꞉ma꞉ mo hande Baibolo buka pimanu pa꞉ta꞉ teke weitelemepateta꞉ mo hande Baibolo buka pi manuma꞉ kone yaka pi lawaasa꞉me.

Dioni 6:54

Hali epima꞉ yaka loke mindiki make yaka we make nea꞉ka꞉na꞉ta꞉ da꞉ta hao hala꞉me. Kutupa mo hande paelie dina꞉ koto halita꞉ I̱ma꞉ pa mea tiawaalueke.

Dioni 6:68

Saimono Pidama꞉ ipika꞉ pi hombo peaaso alota꞉ Tekehalio. Epi pa꞉ta꞉ pomonope. Naka꞉ pi manuta꞉ da꞉tao hala꞉ pimanue.

Aposolo 15:18

Tekehalima꞉ amba꞉ kone dupiki pi la halaata꞉ koto ala꞉ handa꞉e leekeme.

Loma꞉ 1:2

Do hande Pi Seliapota꞉ Koda꞉ma꞉ amba꞉ kiake pi la꞉ witolo hata꞉ ipika꞉ pi la꞉ mea halo haemeke potopede haliweki pa꞉ta꞉ la halaata꞉ yakopiki Baibolo bukana꞉ make wape pina꞉ leekeme.

Loma꞉ 16:25

Nikana꞉ma꞉ Koda꞉na꞉ pi laamana꞉e. Koda꞉ma꞉ mo amba꞉ kiake kone a꞉mbao wieke pa ame I̱ma꞉ walolo hande Yesu Ketisona꞉ Pi Seliapo pa꞉ta꞉ yama꞉ Koda꞉ma꞉ ika꞉ hone tulao haleme ekita꞉ ana꞉na꞉ taka꞉lao hamina꞉ lelieke. Koto walolo pita꞉ mo amba꞉ kiaake kone a꞉mbao wieke ota꞉ pie.

Loma꞉ 2:7

Mandane wanda꞉halima꞉ta꞉ epeke haumanu pu hatiki peaata꞉ ika꞉ biki epeke wina꞉ lolo pa꞉la꞉eki make Koda꞉ma꞉ ika꞉ pi lawalo pa꞉la꞉eki make homa꞉peke na yeke da꞉ta hao halo pa꞉la꞉eki make weiyu halememe. Kutu piki wanda꞉hali pa꞉ta꞉ Koda꞉ma꞉ da꞉ta hao halo pa꞉la꞉eki halieke.

Loma꞉ 5:2

Nikana꞉ma꞉ Yesu Ketiso pa꞉ta꞉ hone tulaaloma꞉ ekina꞉ ipikana꞉ma꞉ Koda꞉ma꞉ niki pa꞉ta꞉ pa hameke a꞉ta꞉ma꞉ homa꞉la꞉eki handomono la꞉la꞉me. Kutupa ameta꞉ koto tupa꞉ haloma꞉me. Koto ekina꞉ Koda꞉ma꞉ ipika꞉ pa̱a̱ pa꞉la꞉eki niki pa꞉ta꞉ teli teli peaalo pa꞉la꞉eki hone ti lao hata꞉ ta꞉na꞉ma꞉ homa haloma꞉me.

Loma꞉ 5:21

Koto ekina꞉ wanda꞉hali paeyao homolo puma꞉ ekina꞉ hoke hau pita꞉la꞉eki titipu wotu piekeme. Koto tupa꞉ kone Koda꞉ma꞉ niki pa꞉ta꞉ pa hameke a꞉ta꞉ma꞉ homolo hata꞉ nikita꞉ ipiki yaapo tikitiki yao hamono laata꞉ da꞉ta hao hamono la꞉la꞉me. Koto pa꞉la꞉ ekima꞉ Koda꞉ ipika꞉ pa hameke a꞉ta꞉ma꞉ homa꞉la꞉eki titipu wopu pa꞉la꞉eki peneme yao wala꞉la꞉me. Kutupa koto pa꞉la꞉ ekita꞉ Koda꞉ma꞉ nika꞉ Tekehali Yesu Ketisoma꞉ peaena꞉ leekeme.

Loma꞉ 5:4

Kutupa nikita꞉ la handa꞉la꞉eki epena꞉ kone da̱o̱la haoma꞉ka꞉na꞉ta꞉ Koda꞉ma꞉ ota꞉ halie laa lelieke. Kotoeki lolo pa꞉la꞉ ekina꞉ nikana꞉ma꞉ hone ti lao halumeke.

Loma꞉ 6:23

Hoke hau piteleme ekina꞉ mea꞉peke yenkita꞉ homa꞉la꞉ekie. Kutu pa꞉la꞉pate Koda꞉ma꞉ pa hameke kita꞉la꞉ ekita꞉ da꞉ta hao hala꞉ekie. Nika꞉ Tekehali Yesu Ketiso yaapo ta꞉ma꞉ni pea hamono kita꞉la꞉me.

Kolosi 1:27

Koda꞉na꞉ pulueke hone ula꞉ ekita꞉ ipika꞉ a꞉mbao ula꞉ ekita꞉ ipika꞉ wanda꞉halima꞉ hone wina꞉e hone wita꞉la꞉me. Do napeke wia seliapo piki a꞉mbao ula꞉ ekita꞉ paeyaoma꞉ hone wina꞉ ula꞉ ekina꞉ loa꞉me. Do a꞉mbao ula꞉ ekita꞉ Ketisota꞉ iki pa꞉ta꞉ hala꞉me. Koto ekina꞉ta꞉ ikita꞉ Koda꞉na꞉ pa̱a̱ pa꞉ta꞉ pua halimikie la ala꞉me.

1 Desalonaika 2:15

Hande Diu haliwekima꞉ta꞉ nika꞉ Tekehali Yesu make mo hande potopede haliweki make limikime. Koto homeke tapakema꞉ kone niki make a꞉nda꞉ lu moneasememe. Ikana꞉ma꞉ Koda꞉na꞉ hone pa꞉la꞉eki kiaaso hata꞉ wanda꞉hali paeyao pa꞉ta꞉ make a꞉nda꞉ lia halememe.

1 Desalonaika 5:8

Kutu pu halemepate nikita꞉ pa̱a̱ pita꞉la꞉ ekina꞉ wanda꞉hali haloma꞉me. Koto ekina꞉ta꞉ epeke hone wia hamana꞉ pea꞉pa꞉peke aleo. Nika꞉ hone tulaasoma꞉eki pita꞉ pukima꞉ homoloma꞉ ekita꞉ hakoko a꞉mbaasa꞉ hanka꞉ leke pambaota꞉ Koda꞉ma꞉ niki mea da꞉taalo pa꞉la꞉ ekina꞉ hone puaasoma꞉ ekita꞉ nika꞉ a꞉nda꞉ pita꞉la꞉ you aka꞉ leke pambamana꞉e.

1 Timodi 6:12

Wanda꞉halima꞉ hoto neli kita꞉la꞉ nate nina꞉ mo hande tombo muluekema꞉ honkopu hao a̱i̱ya pu halememe. Koto tupa꞉ nakana꞉ma꞉ make Koda꞉ pa꞉ta꞉ hone tulaaso hata꞉ naka꞉ deto hala꞉ ekita꞉ mo tombo wataasa꞉ tupa꞉ muluekema꞉ ota꞉ honkopu hao a̱i̱ya pu hapeke. Koto deto hala꞉ ekita꞉ nakana꞉ma꞉ wanda꞉hali wopuna꞉ leke popelekena꞉ Koda꞉ pa꞉ta꞉ hone tulaasome alo hata꞉ peneme yaeketa꞉ kota꞉ Koda꞉ma꞉ muelena꞉yeke neke wi lea꞉me.

1 Timodi 6:19

Koto hau a꞉nda꞉ pu haemeka꞉na꞉ta꞉ kota꞉ ika꞉ wetepe hapeke yolo pa꞉la꞉ ekina꞉ epeke teke u haena꞉ lelimikie. Kutu pimika꞉na꞉ta꞉ kota꞉ mo ota꞉ deto hala꞉eki miniki hao halimikie.

2 Timodi 1:1

Polo I̱ta꞉ mo Ketiso Yesuna꞉ aposolo hali halome. Koda꞉ma꞉ la꞉ wieke deto hala꞉eki Ketiso Yesu pa꞉ta꞉ yama꞉ nikana꞉ma꞉ moloma꞉ ekina꞉ pi walono yeke Koda꞉ma꞉ I̱ ma̱leke lia tapaala꞉me.

2 Timodi 1:9

Nikita꞉ ipika꞉ wanda꞉hali hamono yeke Koda꞉ma꞉ pa꞉ta꞉la꞉ mea wi la꞉la꞉me. Koto hau pieke ekina꞉ teketa꞉ nikana꞉ma꞉ epeke hau puma꞉ ekina꞉ dia꞉pate pa ipikana꞉ma꞉ a꞉ta꞉ma꞉ homolo hata꞉ ipika꞉ hone pieke ekima꞉ kone niki wi la꞉la꞉me. Koda꞉ma꞉ do kenke a̱i̱ na wepia wina꞉ leeke pita꞉ma꞉ta꞉ do a꞉ta꞉ma꞉ homa꞉la꞉ hauta꞉ niki miomono yeke Ketiso Yesu pa꞉ta꞉ yama꞉ wina꞉ leekeme.

2 Timodi 2:10

I̱ma꞉ mo Koda꞉ma꞉ ma̱leke lila꞉ wanda꞉hali tamba꞉ muluekema꞉ do ka꞉nda꞉ paeyaota꞉ na kiake mea tu halome. Mo wanda꞉halita꞉ Ketiso Yesu pa꞉ta꞉ yama꞉ a꞉pa꞉la꞉ na paelo pa꞉la꞉ pa̱a̱ tiekema꞉ wina꞉ la꞉la꞉ da꞉taasa꞉eki mina꞉yeke I̱ma꞉ do ka꞉nda꞉ tu moneao halome.

2 Timodi 2:13

Nikana꞉ma꞉ nika꞉ hone ti lao halumeke laa kone pa hone na ti lao haoma꞉ka꞉na꞉ kone kota꞉ kutu pumonopate pa ipikana꞉ma꞉ ipika꞉ pulueke laa la꞉ ula꞉ pita꞉ ota꞉ na tunkulieke. Pa ekipeke ipikana꞉ma꞉ ipika꞉ titina꞉ la꞉ ula꞉ pi kialuekema꞉ wetepe topo piki pi ma꞉nda꞉ lapeke na ya꞉la꞉me.

2 Timodi 2:15

Nakana꞉ma꞉ ota꞉ epeke e poka꞉la꞉ hali haluekema꞉ta꞉ neke yala꞉ peaama꞉na꞉ naka꞉ titina꞉ honeta꞉ Koda꞉ma꞉ I̱ pa꞉ta꞉ ta꞉na꞉ma꞉ homena꞉e hone witolo hata꞉ e poko hapeke. Koda꞉na꞉ ota꞉ pi tikitiki wala꞉la꞉ hali hata꞉ta꞉ koto hau pu hapeke.

Taitasi 2:13

mo hande ota꞉ ipilie nate opolo epena꞉e laa hone tulaasa꞉ hata꞉ yu wia haloma꞉me. Koto epolo pa꞉la꞉ nateta꞉ mo nika꞉ Koda꞉ tieke make da꞉taala꞉ hali Yesu Ketiso make ipilika꞉ pa̱a̱ tieke peneme yaasa꞉eki opolo ipilieke.

Taitasi 2:7

Naka꞉ kone naka꞉ pilipi hau paeyaota꞉ wanda꞉halima꞉ handaa honda꞉mea pu haena꞉ epeke hau seliapomanu pu hapeke. Naka꞉ pi wala꞉la꞉ hauna꞉ hone wopu wia mo hapeke pitiki pimanu homeke walo hapeke.

Taitasi 3:7

Kutu pieke ekima꞉ta꞉ mo Ketiso ipika꞉ a꞉ta꞉ma꞉ homeeke ekina꞉ niki Koda꞉na꞉ leke popelekena꞉ tikitiki pea make nika꞉ hone puaasoma꞉ deto hala꞉eki make miomono piekeme. Do ala꞉ pita꞉ ota꞉ pie.

1 Dioni 2:25

Kotota꞉ mo hande Ketisoma꞉ niki pa꞉ta꞉ kulueke laa pi la꞉ wia꞉ ekita꞉ Da꞉ta꞉la꞉eki lataa.

1 Dioni 5:20

Nika꞉ hone uluma꞉ ekita꞉ mo Koda꞉na꞉ Eiyeketa꞉ niki hone lenkipa wita꞉la꞉eki kulu a꞉pa꞉la꞉me. Pa ekipeke nikana꞉ma꞉ mo ota꞉ Koda꞉ hone ulu poloma꞉ tupa꞉ pa꞉la꞉me. Ipiki ame̱le̱ hone homeke witolo hata꞉ pa ipika꞉ Eiyeke Yesu Ketiso kone hone homeke wia haloma꞉me. Ipikita꞉ mo ota꞉ Koda꞉e. Kutupa ipikita꞉ deto hala꞉ ekina꞉ tekee.

Diudi 1:21

Kutupa ikana꞉ma꞉ta꞉ mo nika꞉ Tekehali Yesu Ketiso ipika꞉ a꞉ta꞉ma꞉ homolo kita꞉la꞉ deto hala꞉eki muluekema꞉ yu wia꞉ hata꞉ta꞉ Koda꞉na꞉ pukima꞉ homa꞉la꞉eki oto pa꞉ta꞉ hapa꞉peke.

Peneme Yaeyekeeki 13:8

Do kenkena꞉ hala꞉ wanda꞉hali paeyaoma꞉ta꞉ mo sayale pa꞉ta꞉ panda꞉puniao yeiya꞉ laaso hata꞉ yeni pilimikie. Pate do kenke a̱i̱ na wepiki haena꞉ kone ika꞉ biki manuta꞉ mo deto hala꞉ wanda꞉halina꞉ biki ula꞉ bukana꞉ laala꞉ wanda꞉hali homeke homekema꞉ kotoeki na pilimikie. Koto biki ula꞉ bukata꞉ hande limiki Sipisipi Ma꞉na꞉ Ikikina꞉ bukae.

Peneme Yaeyekeeki 17:8

Koto sayaleta꞉ amba꞉ta꞉ da꞉ta haya꞉pate ameta꞉ na da꞉taa hala꞉me. Ipikita꞉ ame do siki mo honiki na wiki naku kiake pa꞉ta꞉ hama opolu bao ipiki hoeyaena꞉ pelieke. Do kenkena꞉ haleme wanda꞉hali ika꞉ biki manuta꞉ do kenke a̱i̱ na wepiki haena꞉ kone mo deto hala꞉ wanda꞉halina꞉ biki ula꞉ bukana꞉ ika꞉ biki na lake wanda꞉halita꞉ mo hande sayale handolo hata꞉ penkilipa꞉tia pomilimikie. Amba꞉ a꞉nda꞉ta꞉ da꞉ta haya꞉pate ameta꞉ na deteke hala꞉me. Pate paa opolo ipilieke.