Loma꞉ 6:22 - Panake Pi La: Ula: Buka pita: Kine Pieke Buka

²² Kutupa halemepate hoke hauna꞉ wele pita꞉la꞉ ekima꞉ iki mea tonkao wieke ekita꞉ Koda꞉ma꞉ iki ka꞉la꞉pa꞉ tapaowala꞉me. Kutupa ikita꞉ ipika꞉ pa hameke e pokaaseme wanda꞉hali leke halememe. Koto peleme ekina꞉ ikana꞉ma꞉ ika꞉ loke tieke paeyao ipiki pa꞉ta꞉ halaata꞉ deto hala꞉eki make milimikie.

Loma꞉ 6:22 ပူးပေါင်းရင်းမြစ်များ

Kini Pieke 50:17

neke pa꞉ta꞉ dupa lota꞉ piomono lea꞉me. Pilisio. Naka꞉ kame tonuma꞉ neke luekema꞉ pimi ata꞉ka꞉ peake hauta꞉ pa paeyaapeke lea꞉me. Koto ekina꞉ta꞉ pilisio. Ameta꞉ mo nikana꞉ma꞉ ata꞉ka꞉ peake hau puma꞉eki pa paeyawapeke. Mo hande naka꞉ apa꞉na꞉ Koda꞉na꞉ e pokaasoma꞉ tapakema꞉ poloma꞉ ekina꞉ loa꞉me lemekeme. Diosepema꞉ koto pi mu haota꞉ e̱ leekeme.

Ma꞉tiu 13:40

Pa mo hande hoke ambumanu yoka mea tonkao pua tina꞉ momba꞉la yankolo pieke tupa꞉ta꞉ kota꞉ do kenke ya paelia꞉ dina꞉ make mandake hau kone pilieke.

Ma꞉tiu 13:43

Koto natena꞉ta꞉ mo ika꞉ Apa꞉na꞉ Kilu Tombuao Hala꞉ tukiki pa꞉ta꞉ epeke hau peleme wanda꞉hali ikita꞉ mo natena꞉ pa̱a̱ tupa꞉ pu halimikie. Hali epima꞉ ipika꞉ katake lombea꞉ka꞉na꞉ta꞉ kota꞉ do pi ota꞉ opina꞉e.

Ma꞉tiu 19:29

Kutaa make mo mandaali epi a꞉nda꞉ma꞉ I̱ teliolo hata꞉ ika꞉ da o ika꞉ hameketiti o ana꞉titi o apa꞉ ama꞉ o weki wandiki sunu o kenkemanu make mina꞉pa꞉laemeka꞉na꞉ta꞉ kota꞉ do kenkena꞉ hata꞉ kone mo ika꞉ mina꞉pa꞉laleme ale manuta꞉ paa 100 tupa꞉ lombei peao meata꞉ deto hala꞉eki make milimikie.

Ma꞉tiu 25:46

Koto wanda꞉halita꞉ honiki na paeyo hala꞉ hoke yenki mu hala꞉ pa꞉ta꞉ tapaalieke. Pate mo tikitiki wopu piki wanda꞉hali ikita꞉ honiki na paeyo deto hala꞉ pa꞉ta꞉ pelimikie leekeme.

Dioni 15:16

I̱ta꞉ ikana꞉ma꞉ na mea haena꞉ lelemepate pa ikita꞉ I̱ma꞉ talopu meaata꞉ ikita꞉ pua hande u halo pa꞉la꞉ napeke a꞉eyamina꞉yeke mea haena꞉ lolome. Koto ekina꞉ ikana꞉ma꞉ yaka Apa꞉ pa꞉ta꞉ ala꞉ta꞉ ma꞉nda꞉ yaka biki alo hata꞉ honke lemeka꞉na꞉ta꞉ ipikana꞉ma꞉ iki pa꞉ta꞉ ota꞉ kilieke.

Dioni 15:2

Yaka paleke mandane ekima꞉ kiliki na a꞉eya꞉ka꞉na꞉ta꞉ kota꞉ koto paleketa꞉ yaka Apa꞉ma꞉ poka mea baalieke. Kutupa mo mandane kiliki a꞉eta꞉la꞉ paleke manuta꞉ wamo peaaso hata꞉ kiliki wopu a꞉ena꞉yeke yaka Apa꞉ma꞉ poka꞉ mepi pilieke.

Dioni 4:36

Ne napeke poka꞉ mepi pita꞉la꞉ halima꞉ta꞉ ipika꞉ yenki minolo hata꞉ mo hande ne napekemanu mea pua momba꞉la wia꞉ka꞉na꞉ta꞉ da꞉ta hao hala꞉eki kone yelieke. Kutu pia꞉ka꞉na꞉ta꞉ ne wae noka꞉pa꞉la꞉ hali make napeke poka꞉ mepi pita꞉la꞉ hali make ipiliki telipina꞉ma꞉ ta꞉na꞉ma꞉ homilipipikie leekeme.

Dioni 8:32

ota꞉ hau pita꞉la꞉eki handilimikie. Kutupa mo ota꞉ hau pita꞉la꞉ ekima꞉ iki ka꞉la꞉pa꞉ tapao hamina꞉ lelieke.

Loma꞉ 6:14

Hande Lo Pi manuna꞉ dupa꞉pe laa wala꞉la꞉eki ika꞉ wenoko tikitikina꞉ na mea wikita꞉ hande Koda꞉na꞉ pa a꞉ta꞉ma꞉ homa꞉la꞉eki homeke ika꞉ wenoko tikitikina꞉ mea wina꞉ aleme ekina꞉ kota꞉ hoke hau pita꞉la꞉ ekima꞉ iki paa a꞉nda꞉ na lu tombuaena꞉ lapa꞉pekema.

Loma꞉ 6:18

Hoke hauna꞉ wele pita꞉la꞉ ekina꞉ iki mea tonkao wieke ekita꞉ Koda꞉ma꞉ iki ka꞉la꞉pa꞉ tapaowala꞉me. Kutupa iki ameta꞉ tikitiki haumanu puluekema꞉ Koda꞉ ipika꞉ pa hameke e pokaaseme wanda꞉hali halememe.

Loma꞉ 6:21

Kutupu haeme hau manuma꞉ ameta꞉ iki yaala꞉ma꞉ homelemepate iki epeaaso na pia꞉me. Kutu piki hau manuma꞉ta꞉ wanda꞉hali homao halememe.

Loma꞉ 7:25

Koda꞉ pa꞉ta꞉ I̱ma꞉ keiyae pi alome. Ipikana꞉ma꞉ nika꞉ Tekehali Yesu Ketisoma꞉ I̱ tamba꞉ mina꞉ lolo pa꞉la꞉ ekina꞉ loa꞉me. Kota꞉ yaka haloeki dupa. I̱ma꞉ yaka kone Koda꞉na꞉ Lo Pimanu yaka hone wia halopate yaka lokena꞉ hone pa꞉la꞉eki manuma꞉ I̱ma꞉ hoke hau piono pu tiaasa꞉ hauna꞉eki peao halome.

Loma꞉ 7:4

Ya kame tonuo. Koto tupa꞉ iki pa꞉ta꞉ make ula꞉me. Ikita꞉ Ketiso ipika꞉ loke kone haleme ekina꞉ hande Lo Pimanu pa꞉ta꞉ ikita꞉ homolo hata꞉ pa ameta꞉ mo Koda꞉ma꞉ paa mea tiaeyeke halina꞉eki halememe. Koto ekita꞉ nikana꞉ma꞉ Koda꞉na꞉ epeke haumanu pu hamonoyeke pa꞉la꞉me.

Loma꞉ 8:2

Do ekina꞉yeke loa꞉me. Nikita꞉ Yesu Ketiso ame̱le̱ ta꞉ma꞉ni pea ota꞉ hamono la꞉la꞉ Sipitidita꞉ ipikana꞉ma꞉ kone I̱ handeteke hata꞉ walo hala꞉ ekima꞉ta꞉ mo hoke hau pita꞉ homa꞉la꞉eki yaapo pu tiaasa꞉ hauma꞉ tonka pelia hala꞉eki ka꞉la꞉pa꞉ tapaala꞉me.

1 Kotindi 7:22

Do ekina꞉yeke loa꞉me. Mo pa hameke e pokaasa꞉ halima꞉ta꞉ Tekehalima꞉ ipiki wi ala꞉eki opuata꞉ kota꞉ ipikita꞉ mo Tekehalima꞉ ka꞉la꞉pa꞉ tapao haena꞉ la꞉la꞉ halie. Koto tupa꞉ kone mo pa hala꞉ halima꞉ta꞉ Tekehalima꞉ ipiki wi ala꞉eki opuata꞉ kota꞉ ipikita꞉ mo Ketisona꞉ e pa hameke pokaasa꞉ halie.

2 Kotindi 3:17

Koto Tekehali pa꞉ta꞉e la꞉la꞉ ekita꞉ mo Sipitidi pa꞉ta꞉ konee la꞉la꞉me. Kutupa mo Tekehalina꞉ Sipitidi hala꞉ ale pa꞉ta꞉ta꞉ kota꞉ ka꞉la꞉pa꞉ tapaasa꞉ hau ula꞉me.

Ka꞉leisia 1:10

Do alo pima꞉ta꞉ mo wanda꞉hali ta꞉na꞉ma꞉ homa꞉ tiaaluekema꞉ alope. Dia꞉me. Ota꞉ dia꞉me. I̱ma꞉ta꞉ Koda꞉ma꞉ ta꞉na꞉ma꞉ homolo pa꞉la꞉eki weitolome. I̱ma꞉ta꞉ wanda꞉halima꞉ ya biki daeyaena꞉ taapolope. Dia꞉me. Koto hau puluekema꞉ taapoa꞉ka꞉na꞉ta꞉ kota꞉ I̱ta꞉ Ketisona꞉ e pokaaso hali na hapeke ya꞉la꞉me.

Ka꞉leisia 5:13

Ya kame tonuo. Ameta꞉ ikina꞉ do tupa꞉ alome. Ikita꞉ ka꞉la꞉pa꞉ tapao haleme haliweki hamena꞉ Koda꞉ma꞉ wi la꞉la꞉me. Koto pa꞉la꞉pate ika꞉ honema꞉ nikita꞉ ka꞉la꞉pa꞉ tapao haloma꞉me hone witolo pa mo hande lokena꞉ hone pa꞉la꞉ amba꞉ hau manuma꞉ neke na handeteke haena꞉ lapa꞉peke. Kotoeki na pikita꞉ pa ika꞉ kametonu ame̱le̱ pukima꞉ homeleme ekima꞉ ika꞉ ika꞉ kone tamba꞉ mu alualu puemena꞉ lena꞉ lapa꞉peke.

Ka꞉leisia 5:22

Koto pa꞉la꞉pate mo Holi Sipitidima꞉ta꞉ epeke haumanu dupa peawaasa꞉me. Pukima꞉ homa꞉la꞉ hau make puki tukiki nane ota꞉ ta꞉na꞉ma꞉ homa꞉la꞉ hau make puki lopaasa꞉ hau make homu pea yu wia hala꞉ hau make a꞉ta꞉ma꞉ homolo epeke pita꞉la꞉ ekima꞉ ma꞉nda꞉ tamba꞉ mina꞉la꞉ hau make hone tulao hata꞉ e poka꞉la꞉ hau make

Epesese 5:9

Mo hande pa̱a̱ pita꞉la꞉ ekima꞉ peaasa꞉ hau manuta꞉ dupae. Epeke hau pita꞉la꞉ ekimanu make tikitiki hau pita꞉la꞉ ekimanu make ota꞉ hau pita꞉la꞉ ekimanu make peaasa꞉me.

Pilipai 1:11

Kutu pilie ekima꞉ta꞉ ika꞉ halemeeki tukiki pa꞉ta꞉ta꞉ mo Yesu Ketiso homekema꞉ puemena꞉ lapeke ya꞉la꞉ hau manuma꞉ iki tukiki pa꞉ta꞉ tumbaalieke. Iki tumbaeya꞉ka꞉na꞉ta꞉ kota꞉ koto hauma꞉ta꞉ Koda꞉na꞉ pi lao yeiya꞉ laalieke.

Pilipai 4:17

Ika꞉ pa hameke kiteleme alemanu muluekema꞉ pa na weitolo pateta꞉ pa mo oli hepeni nane ika꞉ epeke haumanu pitelemeeki dimina꞉la꞉eki haka꞉ta꞉pawao wiaena꞉yeke hone pa꞉leke handa iki pa꞉ta꞉ waleke kitolo alome.

Kolosi 1:10

Kutu pia꞉ka꞉na꞉ta꞉ ikita꞉ mo Koda꞉ ipika꞉ hone pa꞉la꞉ tupa꞉ hata꞉ hoto paeyao ipiki ta꞉na꞉ma꞉ homa꞉tiaasa꞉ hau homeke pu halimikie. Ika꞉ halimi pa꞉ta꞉ta꞉ epeke haumanu opolo ipulu hata꞉ ikita꞉ Koda꞉ hone wopu witelemeeki pa꞉ta꞉ daelimikie.

Kolosi 4:12

Ika꞉ tapake some ma꞉nda꞉ ombu Epa꞉petasi Yesu Ketisona꞉ pa hameke e pokaasa꞉ halima꞉ a꞉taloe la꞉neaasa꞉me. Ipikana꞉ma꞉ta꞉ hoto paeyao ikina꞉ pukima꞉ e̱ alo haena꞉ yeni peaatiki pu hala꞉me. Ikita꞉ Koda꞉na꞉ hone pa꞉la꞉eki ota꞉ epeke tupa꞉ opitolo hata꞉ da̱o̱la hamena꞉ Koda꞉ pa꞉ta꞉ honke lao hala꞉me. Ipikana꞉ma꞉ dupiki hauta꞉ iki hone homeke wia keileke Ketiso wanda꞉hali hamena꞉ yeke peaasa꞉me laa loa꞉me.

Taitasi 1:1

I̱ta꞉ Poloma꞉ Koda꞉na꞉ e pokaasa꞉ hali hata꞉ make Yesu Ketisona꞉ aposolo hali hata꞉ make do wape wapitolome. I̱ta꞉ mo Koda꞉ma꞉ ma̱leke lila꞉ wanda꞉halina꞉ hone tulalemeeki daeyaena꞉ lono ipikana꞉ma꞉ I̱ mea tapaeya꞉me. Kuta make ika꞉ pi miniki haasa꞉ hauna꞉ ota꞉ pita꞉ miniki haena꞉ walonoyeke I̱ tapaeya꞉me.

Hibulu 12:14

Wanda꞉hali paeyao ame̱le̱ a꞉nda꞉ pelia haluekema꞉ taapo hapa꞉peke. Kutaata꞉ ika꞉ halo pelemeeki tonka꞉na꞉ yako peao haluekema꞉ taapo hapa꞉peke. Pa ekipeke. Koto hau na piki wanda꞉hali homeke a꞉nda꞉ma꞉ta꞉ mo Tekehali ota꞉ na handilimikie.

Dia꞉mesi 1:1

I̱ta꞉ Dia꞉mesi Koda꞉ make Tekehali Yesu Ketiso yaapona꞉ e pokaaso hali halome. Do wape pitolo ekita꞉ hande ika꞉ kenke nane mina꞉pa꞉lao pemeke Isulai 12 tapake ika꞉ wanda꞉hali pa꞉ta꞉ tapaasome. Iki pa꞉ta꞉ keiyae pi alome.

1 Pida 2:16

Ka꞉la꞉pa hala꞉ haliweki leke hapa꞉peke. Iki ka꞉la꞉pa haleme ekima꞉ta꞉ hoke haumanu a꞉mbaena꞉ dia꞉ya꞉la꞉pate ikita꞉ Koda꞉na꞉ pa hameke e pokaaseme wanda꞉hali hapa꞉peke.

Peneme Yaeyekeeki 7:13

Mo hala꞉ you hali ma꞉nda꞉ma꞉ I̱ lota꞉ pitolo alota꞉ Mo hake piki dau yameleme wanda꞉halita꞉ epi ameda ka꞉ta꞉pe laata꞉ hanema꞉ a꞉pa pelemepe lea꞉me.