Loma꞉ 5:17 - Panake Pi La: Ula: Buka pita: Kine Pieke Buka

¹⁷ Mo hande hali homekema꞉ hoke hau pieke handa homa꞉la꞉ ekita꞉ honkopu hao wanda꞉hali paeyao lu tombuao ula꞉ ekita꞉ nikana꞉ma꞉ handoloma꞉me. Koto pa꞉la꞉pate mo hande hali homeke Yesu Ketisoma꞉ pieke ekita꞉ ota꞉ hone mateke some tieke pa꞉la꞉me. Koda꞉ma꞉ pa hameke a꞉ta꞉ma꞉ wopu homa꞉la꞉eki make ipiki yaapo tikitiki yao hamono la kita꞉la꞉eki make kotoeki yaapo moloma꞉ wanda꞉halima꞉ta꞉ Ketisoma꞉ peaala꞉ ekina꞉ da꞉ta hata꞉ honkopu hao halumeke.

Loma꞉ 5:17 ပူးပေါင်းရင်းမြစ်များ

Kini Pieke 2:17

mo epeke hau pita꞉ hoke hau pita꞉la꞉eki yaapona꞉ hone u tiaasa꞉ ti poteke homeke homeke dia꞉me. Mo koto tina꞉ poteketa꞉ ota꞉ na napeke laata꞉ Neka꞉na꞉ta꞉ kota꞉ mo nelipi natena꞉ kone homilipikie laa leekeme.

Kini Pieke 3:19

Kutupa mo kenkema꞉ anemone ale opena꞉ yeketa꞉ a꞉ka꞉li mendia honkopu hao e poka꞉tiki pilipikie. Dupiki hau putia pua mo neke wa꞉pa꞉la꞉ kenke pa꞉ta꞉ pulu hata꞉ta꞉ mina꞉pa꞉lalipikie. Neketa꞉ dokoloma꞉ wepiekeeki yalo hata꞉ dokolo au kone lelipikie.

Kini Pieke 3:6

Mo wanda꞉ma꞉ mo ti handeeketa꞉ au epeke laa mo ti poteke nalota꞉ ota꞉ a꞉pa꞉la꞉me laa handeekeme. Kutupa ipika꞉ honema꞉ ipikita꞉ hone wopu u lenkene pitolota꞉ ota꞉ a꞉pa꞉la꞉me hone wiekeme. Koto ekina꞉ta꞉ ipikana꞉ma꞉ mo mandane ti potekemanu mea neekeme. Kutupa ipikana꞉ma꞉ mandane ekita꞉ ipika꞉ haliki haleeketa꞉ halikima꞉ make neekeme.

Ma꞉tiu 25:34

Kutu pu paeya꞉ka꞉na꞉ta꞉ mo Kini Halima꞉ ipika꞉ popeke nanema꞉ halimi wanda꞉hali pa꞉ta꞉ alota꞉ Ikita꞉ Koda꞉na꞉ wamo pa꞉la꞉eki mimiki wanda꞉hali yeleme ekina꞉ ika꞉ Apa꞉ Koda꞉ma꞉ do kenke kini pea wepieke toma꞉na꞉ kone tikitiki yao wina꞉ la꞉la꞉ kilu tumbuao hala꞉ kenke a꞉pa mipee lelieke.

Dioni 10:10

Pake nala꞉ halima꞉ta꞉ mo sipisipi ma꞉na꞉manu pake meata꞉ lia hoeyaaluekema꞉ ipilimipateta꞉ I̱ epolo ekita꞉ ikana꞉ma꞉ da꞉ta꞉la꞉eki muemena꞉yeke epolome. Tumba ula꞉ da꞉ta꞉la꞉eki kone muemena꞉yeke epolome.

Loma꞉ 5:12

Hali homekema꞉ pa꞉la꞉ ekima꞉ kone niki kenke wanda꞉hali paeyaoma꞉ hoke hau pu haloma꞉me. Ipika꞉ hoke hau pieke ekina꞉ homeekeme. Kutupa kenke wanda꞉hali paeyaoma꞉ make hoke hau pu haloma꞉ ekina꞉ homolo poloma꞉eki moloma꞉me.

Loma꞉ 5:15

Koto tupa꞉ hayekepate Koda꞉ma꞉ pa hameke kita꞉la꞉eki pita꞉ A꞉da꞉ma꞉ma꞉ hoke hau piekeeki yaapota꞉ ta꞉ta꞉ pu alu pa꞉la꞉ ekina꞉ mo hande hali yaapota꞉ mandake tupa꞉ na halo pelepeme. Mo hande hali homekema꞉ hoke hau pieke ekina꞉ wanda꞉hali paeyaota꞉ homemeke ekita꞉ nikana꞉ma꞉ hone uluma꞉me. Koto pa꞉la꞉pate Koda꞉ma꞉ pa a꞉ta꞉ma꞉ homo hala꞉eki wala꞉la꞉ hauta꞉ ota꞉ tiekee. Mo hande hali homeke Yesu Ketisoma꞉ pa a꞉ta꞉ma꞉ homeeke ekima꞉ Koda꞉ma꞉ta꞉ wanda꞉hali paeyao pa꞉ta꞉ ipika꞉ pa hameke kita꞉la꞉eki walo hala꞉me.

Loma꞉ 5:20

Hande Lo Pi manuta꞉ wanda꞉halima꞉ hao hoeyaaseme ekimanu daeyaena꞉yeke Koda꞉ma꞉ wetepena꞉ Mosesi pa꞉ta꞉ la haleekeme. Kutu piekepate hoke haumanu daeya꞉tia peekepate Koda꞉ma꞉ pa hameke a꞉ta꞉ma꞉ homa꞉la꞉eki tiekema꞉ daeya꞉tia pulu hata꞉ lu ankulala꞉me.

Loma꞉ 6:14

Hande Lo Pi manuna꞉ dupa꞉pe laa wala꞉la꞉eki ika꞉ wenoko tikitikina꞉ na mea wikita꞉ hande Koda꞉na꞉ pa a꞉ta꞉ma꞉ homa꞉la꞉eki homeke ika꞉ wenoko tikitikina꞉ mea wina꞉ aleme ekina꞉ kota꞉ hoke hau pita꞉la꞉ ekima꞉ iki paa a꞉nda꞉ na lu tombuaena꞉ lapa꞉pekema.

Loma꞉ 6:23

Hoke hau piteleme ekina꞉ mea꞉peke yenkita꞉ homa꞉la꞉ekie. Kutu pa꞉la꞉pate Koda꞉ma꞉ pa hameke kita꞉la꞉ ekita꞉ da꞉ta hao hala꞉ekie. Nika꞉ Tekehali Yesu Ketiso yaapo ta꞉ma꞉ni pea hamono kita꞉la꞉me.

Loma꞉ 8:39

Do kenke manda hala꞉ eki ma꞉nda꞉ma꞉ make o do kenke oto pa꞉ta꞉ pila꞉eki ma꞉nda꞉ma꞉ make do wepia ula꞉ alemanu paeyao pa꞉ta꞉ kone ala꞉ta꞉ ma꞉nda꞉siki homeke a꞉nda꞉ma꞉ mo nika꞉ Tekehali Yesu Ketiso pa꞉ta꞉ yama꞉ Koda꞉ ipika꞉ pukima꞉ homa꞉la꞉eki niki pa꞉ta꞉ pa꞉la꞉ ekita꞉ ka꞉taalu peapeke na ya꞉la꞉me.

1 Kotindi 15:49

Ameta꞉ nikana꞉ma꞉ hande kenkema꞉ wepia haena꞉ leeke halima꞉ handoloma꞉ tupa꞉ kota꞉ wetepena꞉ mo hepeni nane hao epeeke halima꞉ handulumeke.

1 Kotindi 4:8

Ikana꞉ma꞉ mea꞉peke ya꞉la꞉ ale manuta꞉ amba꞉ melememe. Ikita꞉ hamoko haliweki amba꞉ halememe. Ikita꞉ mo kini haliweki leke hata꞉ ika꞉ kilu tombuao hala꞉eki pa꞉ta꞉ halemepate pa nikita꞉ yonka꞉lao pelememe. A꞉ta꞉e. Yaka hone pa꞉la꞉ ekita꞉ iki ota꞉ kini haliweki hamina꞉ alome. Kutu pu haemeka꞉na꞉ta꞉ kota꞉ niki make iki ame̱le̱ kini haliweki halumeke.

Pilipai 3:9

Koto ekina꞉ mo tikitiki yao hala꞉ ekita꞉ ya kone na polome. Hande Mosesima꞉ mieke Lo Pimanu opua pu hao mea꞉peke ya꞉la꞉ ekima꞉ na polome laa loa꞉me. Mo Koda꞉ma꞉ Yesu Ketiso pa꞉ta꞉ hone tulaasome wanda꞉hali pa꞉ta꞉ ku hala tikitiki yao hala꞉ ekita꞉ ame molome. Do tikitiki yao haasa꞉ ekina꞉ teketa꞉ hone tulaasa꞉ekie.

1 Timodi 1:14

Nika꞉ Tekehalima꞉ ipika꞉ a꞉ta꞉ma꞉ homa tamba꞉ mina꞉la꞉eki I̱ pa꞉ta꞉ wopu kua꞉niaeyekeme. Kutupa make mo nika꞉ Ketiso Yesu ame̱le̱ molome hone tulaasa꞉eki pita꞉ pukima꞉ homa꞉la꞉eki yaapo I̱ pa꞉ta꞉ make kia꞉me.

2 Timodi 2:12

Kutupa nikana꞉ma꞉ mo ka꞉nda꞉manu epena꞉ kone aela꞉ bao haoma꞉ka꞉na꞉ta꞉ kota꞉ ipiki ame̱le̱ mandake piki you wanda꞉hali kone halumeke. Nikana꞉ma꞉ ipiki a꞉nda꞉ kiaoma꞉ka꞉na꞉ta꞉ kota꞉ ipikana꞉ma꞉ niki make kiaalieke.

Dia꞉mesi 2:5

Ya kametitio. Opua꞉pe. Kenke wanda꞉halima꞉ta꞉ aleta꞉ ma꞉nda꞉ na wiki natehali wanda꞉halio laa alemepateta꞉ Koda꞉ma꞉ koto wanda꞉hali talopu meata꞉ ika꞉ hone tulaaleme ekina꞉ta꞉ iki hamoko mea yaasa꞉me. Kutupa make ipiki pa꞉ta꞉ pukima꞉ homeleme wanda꞉hali pa꞉ta꞉ pi la꞉ wieke tupa꞉ koto wanda꞉hali ipika꞉ Kilu Tombuao Hala꞉ ekina꞉ mea haena꞉ lelieke.

1 Pida 2:9

Koto pa꞉la꞉pate ikita꞉ Koda꞉na꞉ ma̱leke lila꞉ tapake halememe. Ikita꞉ mo Kini halina꞉ yeni peao haleme wanda꞉halie. Ikita꞉ mo yakopiki tapakee. Koda꞉na꞉ wanda꞉hali homeke halememe. Ikita꞉ mo timba꞉la꞉ pambeke pa꞉ta꞉ haapa꞉na꞉ ipika꞉ pa̱a̱ pita꞉la꞉eki ota꞉ seliapo pa꞉ta꞉ epoemena꞉ wi lea꞉ Koda꞉ma꞉ ipika꞉ ota꞉ epeke pita꞉la꞉ ekimanu la halamena꞉ iki ma̱leke lila꞉me.

Peneme Yaeyekeeki 1:6

Kutupa ipika꞉ Apa꞉ Koda꞉na꞉ e pokomono nikita꞉ ipika꞉ kilu tombuao hala꞉ ekina꞉ yeni peao haleme wanda꞉hali hamono la꞉la꞉me. Yesu Ketiso pa꞉ta꞉ta꞉ pa̱a̱ pita꞉la꞉eki make wele pita꞉la꞉eki make hoto paeyao pa utia pu haena꞉e. Kutu pina꞉e.

Peneme Yaeyekeeki 20:4

Kutupa kini seamanu handoa꞉me. Koto seana꞉ pitimi haliwekita꞉ pi yokaalu pulu pimi wele halea꞉me. Kutupa make mo hande Yesuma꞉ peneme yaeya꞉ ota꞉eki waleme ekina꞉ make Koda꞉na꞉ pi waleme ekina꞉ limiki wanda꞉halina꞉ temokomanu handoa꞉me. Ikana꞉ma꞉ta꞉ mo hande sayale tieke hombeleke make ipiki manda꞉ meao wepimiki ale yaapo pa꞉ta꞉ panda꞉puniao yeiya꞉ laaso hata꞉ yeni na pimi make ika꞉ wenoko o popeke nane kikina꞉ mo sayalena꞉ maka na mimikime. Ikita꞉ paa da꞉ta hata꞉ 1 daoseni bapi manuna꞉ Ketiso ame̱le̱ kini pita꞉ handeteke haememe.

Peneme Yaeyekeeki 20:6

Mo mandane homeme wanda꞉halimanu do titina꞉ mea tiaasa꞉eki pa꞉ta꞉ apa꞉taemeka꞉na꞉ta꞉ ika꞉ta꞉ ta꞉na꞉ma꞉ homena꞉ laa yako pina꞉ lelieke. Mo yaapo peao homa꞉la꞉ ekima꞉ta꞉ iki wataapeketa꞉ honkopu na ula꞉me. Ikita꞉ Koda꞉ pita꞉ Ketiso yaapona꞉ yeni peaasa꞉ haliweki hata꞉ 1 daoseni bapimanu ipiki ame̱le̱ handeteke halimikie.

Peneme Yaeyekeeki 22:5

Koto pa꞉ta꞉ta꞉ timba꞉ ala꞉eki ota꞉ dia꞉yalo hata꞉ ola꞉pake make natena꞉ pa̱a̱ make na weilimikie. Pa ekipeke mo Tekehali Koda꞉ta꞉ ika꞉ pa̱a̱ halieke. Kutupa ikana꞉ma꞉ta꞉ kinimanu pita꞉ hoto paeyao handeteke hao halimikie.

Peneme Yaeyekeeki 3:21

Ma꞉nda꞉ epima꞉ a꞉nda꞉ pea bepolaeya꞉ka꞉na꞉ta꞉ I̱ ame̱le̱ mo yaka kini seana꞉ lopulao pitulupeke. I̱ma꞉ta꞉ bepolaota꞉ ameta꞉ yaka Apa꞉na꞉ kini seana꞉ lopulao pilupa꞉ tupa꞉ loa꞉me lea꞉me.