Loma꞉ 2:4 - Panake Pi La: Ula: Buka pita: Kine Pieke Buka

⁴ Koda꞉ma꞉ neke pa꞉ta꞉ a꞉ta꞉ma꞉ wopu homaata꞉ naka꞉ hoke hauna꞉ yenki a̱i̱ na kiki yu wia hao hala꞉ ekita꞉ neketa꞉ hone na witele. Koda꞉ma꞉ a꞉ta꞉ma꞉ homa꞉la꞉ ekita꞉ nakana꞉ma꞉ ipiki pa꞉ta꞉ hone ma꞉nda꞉ la꞉ka꞉la꞉ mina haelena꞉yeke pita꞉la꞉me. Koto ekita꞉ iki paeyaoma꞉ hone witolo pelememe.

Loma꞉ 2:4 ပူးပေါင်းရင်းမြစ်များ

Loma꞉ 10:12

Koto wape pa꞉la꞉ ekita꞉ wanda꞉hali paeyao pa꞉ta꞉ la꞉la꞉me. Diu wanda꞉hali make Diendaili wanda꞉hali make paeyaota꞉ homeke tupa꞉ da꞉ta hapa꞉peke ekina꞉ loa꞉me. Wanda꞉hali paeya tapaona꞉ Tekehali homeke kone hala꞉me. Kutupa make epi ameda paeyaoma꞉ ipika꞉ biki laa honke lemeka꞉na꞉ta꞉ kota꞉ ipikana꞉ma꞉ iki wotu epeaalieke.

Loma꞉ 11:22

Kutu pieke ekina꞉ ikana꞉ma꞉ta꞉ Koda꞉ ipika꞉ a꞉ta꞉ma꞉ homa꞉la꞉ hau make ipika꞉ taka꞉lake hau pita꞉la꞉eki make hone wotu wia꞉pa꞉peke. Koda꞉ma꞉ta꞉ lopeleme wanda꞉hali pa꞉ta꞉ taka꞉lake hau peata꞉ ikita꞉ ipika꞉ a꞉ta꞉ma꞉ homa꞉la꞉eki taapuna꞉ hao hamina꞉ ipika꞉ a꞉ta꞉ma꞉ homa꞉la꞉ hau iki pa꞉ta꞉ ka꞉la꞉me. Koto a꞉nda꞉ iki make ipika꞉ a꞉ta꞉ma꞉ homa꞉la꞉eki taapuna꞉ na hao haemeka꞉na꞉ta꞉ ipikana꞉ma꞉ iki make tonda꞉pa꞉ mepi pilieke.

Loma꞉ 11:33

Koda꞉na꞉ ipika꞉ hamoko hala꞉ ekita꞉ ota꞉ hone mateke some kiakee. Ipika꞉ epeke hone wita꞉la꞉eki make ipika꞉ handa꞉la꞉eki make kinuku dia꞉me. Ipikana꞉ma꞉ dupa꞉pe laa ala꞉eki manuna꞉ teke manuta꞉ hali epima꞉ handa꞉ wia la kiliepe. Ipikana꞉ma꞉ pita꞉la꞉ haumanu hali epima꞉ handa꞉ tapaapeke ya꞉la꞉pe.

Loma꞉ 3:25

Koda꞉ma꞉ta꞉ Yesu Ketiso mea haena꞉ laata꞉ ipiki homolo hata꞉ ipika꞉ we lopolo piekeme. Lopeeke ekima꞉ ipiki pa꞉ta꞉ hone tulaalo peleme wanda꞉halina꞉ hoke hau pelemeeki manuta꞉ pa paeyaena꞉ leekeme. Koda꞉ma꞉ koto pa꞉la꞉ ekita꞉ ipika꞉ tikitiki hau pita꞉la꞉eki peneme yao waluekema꞉ piekeme. Amba꞉ta꞉ Koda꞉ma꞉ wanda꞉halina꞉ hoke hau peleme ekimanu leke honikima꞉ hando ankulao handeteke hao hayekepate

Loma꞉ 6:1

Koto poloma꞉ ekina꞉ nikana꞉ma꞉ eki pi loluma꞉pe. Koda꞉ma꞉ pa hameke a꞉ta꞉ma꞉ homa꞉la꞉eki daeya꞉tia pena꞉yeke nikana꞉ma꞉ hoke haumanu pa pu tia pomana꞉pe.

Loma꞉ 6:15

Koto ekina꞉ eki pumana꞉pe. Hande Lo Pi manuma꞉ dupa꞉pe laa wala꞉la꞉eki nika꞉ wenokona꞉ na wiki hande Koda꞉na꞉ pa a꞉ta꞉ma꞉ homa꞉la꞉eki homeke nika꞉ wenokona꞉ wina꞉ aloma꞉ ekina꞉ hoke hau pumana꞉pe. A꞉pa꞉e. Dia꞉me.

2 Kotindi 8:2

Mo wanda꞉halita꞉ ika꞉ mutia peme ka꞉nda꞉ manuma꞉ta꞉ ota꞉ hoke tupa꞉ la handea꞉pate ika꞉ ta꞉na꞉ma꞉ homeme ekita꞉ ota꞉ tieke aneke yaeyeke handaa ikita꞉ natehali wanda꞉hali hata꞉ kone ika꞉ alemanu pa haleme ekita꞉ ota꞉ ankulake hau pimime.

Epesese 1:18

I̱ma꞉ yeni pu halo ekita꞉ ika꞉ hone lumbu wia ipika꞉ pa̱a̱ pa꞉la꞉eki handoemena꞉yeke pu halome. Kotoeki handemeka꞉na꞉ta꞉ Koda꞉ma꞉ ipika꞉ pi la꞉ witolo hata꞉ ipika꞉ wanda꞉hali wotu epeaalo pa꞉la꞉ ekimanu ota꞉ seliapo pikieki hone wilimikie.

Epesese 1:7

Ketiso homeeke ekima꞉ nikita꞉ ka꞉la꞉pa꞉ tapao hamono laata꞉ nika꞉ hoke hau poloma꞉ ekimanu ipika꞉ wema꞉ pa paeyaala꞉me. Koda꞉ ipika꞉ pa hameke a꞉ta꞉ma꞉ homa꞉la꞉ ekita꞉ ota꞉ wopue.

Epesese 2:4

Nikana꞉ma꞉ pi na opu haoma꞉ ekina꞉ nika꞉ temokomanu homa wimikipate kone Koda꞉ma꞉ a꞉ta꞉ma꞉ wopu homolo hata꞉ niki pa꞉ta꞉ pukima꞉ wotu homeeke ekina꞉ Ketiso ame̱le̱ niki mea da꞉taeyekeme. Koda꞉ ipika꞉ pa hameke a꞉ta꞉ma꞉ homeeke ekima꞉ iki mea da꞉taala꞉me.

Epesese 2:7

Koto hande Koda꞉ma꞉ pieke hauta꞉ ipikana꞉ma꞉ pukima꞉ homolo hata꞉ Yesu Ketiso niki pa꞉ta꞉ ka꞉la꞉ ekima꞉ wetepena꞉ halo peleme wanda꞉halima꞉ ipikana꞉ma꞉ ota꞉ pa hameke a꞉ta꞉ma꞉ wopu homo hala꞉eki nate paeyao handa꞉tiki pina꞉ piekeme.

Epesese 3:16

I̱ma꞉ Koda꞉ pa꞉ta꞉ honke alo ekita꞉ dupae. Ipikita꞉ manda hata꞉ tieke hala꞉ ekina꞉ ipikana꞉ma꞉ ikita꞉ puki hana꞉ noka꞉pa honkopu hao hamina꞉yeke Sipitidi wele tonka꞉na꞉ kina꞉yeke honke alome.

Epesese 3:8

Koda꞉na꞉ wanda꞉hali paeyao titina꞉ haena꞉ I̱ta꞉ ota꞉ wetepe nane halopate Koda꞉ma꞉ta꞉ mo Diendaili wanda꞉hali pa꞉ta꞉ hande Pi Seliapo I̱ma꞉ walo ponoyeke I̱ pa꞉ta꞉ kia꞉me. Hande Pi Seliapo pa꞉ta꞉ta꞉ Ketiso ipika꞉ paelo pua꞉peke na ya꞉la꞉ hamoko hala꞉eki pila꞉me.

Pilipai 4:19

Ya Tekehali Koda꞉ma꞉ ipika꞉ ota꞉ aneke hapu haka꞉ta꞉pao ula꞉ ale manuma꞉ ika꞉ wia hapa꞉peke ya꞉la꞉ alemanu paeyaota꞉ Yesu Ketiso pa꞉ta꞉ yama꞉ ana꞉lao ku halieke.

Kolosi 1:27

Koda꞉na꞉ pulueke hone ula꞉ ekita꞉ ipika꞉ a꞉mbao ula꞉ ekita꞉ ipika꞉ wanda꞉halima꞉ hone wina꞉e hone wita꞉la꞉me. Do napeke wia seliapo piki a꞉mbao ula꞉ ekita꞉ paeyaoma꞉ hone wina꞉ ula꞉ ekina꞉ loa꞉me. Do a꞉mbao ula꞉ ekita꞉ Ketisota꞉ iki pa꞉ta꞉ hala꞉me. Koto ekina꞉ta꞉ ikita꞉ Koda꞉na꞉ pa̱a̱ pa꞉ta꞉ pua halimikie la ala꞉me.

Kolosi 2:2

I̱ma꞉ doeki pitolo ekita꞉ mo wanda꞉halima꞉ pukima꞉ homa꞉ alualu pitolo hata꞉ puki hana꞉ noka꞉pa꞉la꞉ ekima꞉ tumbina꞉ lena꞉ loluekema꞉ pitolome. Do pitolo ekita꞉ ikana꞉ma꞉ ota꞉ tikitiki piki hone wita꞉la꞉eki pa꞉ta꞉ yama꞉ a꞉pa꞉la꞉ hone tulaaseme honkopu muemena꞉ loa꞉me. Do hau pimika꞉na꞉ta꞉ Koda꞉na꞉ a꞉mbao ula꞉eki handilimikie. Do ekita꞉ Ketiso ipiki konee.

1 Timodi 1:16

Koda꞉ma꞉ I̱ pa꞉ta꞉ a꞉ta꞉ma꞉ homeekeme. Ipikana꞉ma꞉ koto I̱ pa꞉ta꞉ a꞉ta꞉ma꞉ homeeke ekina꞉ teketa꞉ Ketiso Yesuma꞉ mo wetepe hone tulao da꞉ta꞉la꞉eki mulu peleme wanda꞉halima꞉ ipika꞉ a꞉ta꞉ma꞉ homa꞉la꞉eki I̱ pa꞉ta꞉ pieketa꞉ iki pa꞉ta꞉ make pina꞉ I̱ pa꞉ta꞉ amba꞉la wala꞉la꞉me.

1 Timodi 6:17

Mo kenke ala꞉ta꞉ ala꞉ta꞉na꞉ hamoko haseme wanda꞉hali pa꞉ta꞉ta꞉ dupiki pi la wia꞉peke. Ika꞉ hakoko na lu make mo a̱i̱ paelo pa꞉la꞉ kenke ale manuna꞉ hone na ti lao hao hapa꞉peke. Kotoeki na pikita꞉ niki ta꞉na꞉ma꞉ homomono epeke alemanu ku hala꞉ Koda꞉ pa꞉ta꞉ hone ti lao hapa꞉peke lapeke.

1 Pida 3:20

Mo temoko manuta꞉ amba꞉ hande Noama꞉ mo kawaso eiyeke pita꞉ma꞉ haemeke wanda꞉halina꞉ temokomanue. Koto pita꞉ma꞉ta꞉ kota꞉ koto wanda꞉halima꞉ta꞉ ikana꞉ma꞉ pi mina꞉ yu wia handeteke hayeke Koda꞉na꞉ pi na opimikime. Kutu pieketa꞉ mo hande kawaso tukiki pa꞉ta꞉ta꞉ wanda꞉hali hombo a꞉nda꞉ iki paeyaota꞉ ketepo hata꞉ mo ikalima꞉ peteleekeme.

2 Pida 1:11

Dupimika꞉na꞉ta꞉ ikita꞉ mo nika꞉ Pa꞉ta꞉la꞉la꞉ Tekehali Yesu Ketisona꞉ na paelo pa꞉la꞉ Kilu Tombuao hala꞉eki pa꞉ta꞉ honda꞉ pamboemena꞉ waleke tieke kilieke.

2 Pida 3:15

Nika꞉ kame seliapo Poloma꞉ Koda꞉ma꞉ haleeke epeke hone wita꞉la꞉eki miniki hata꞉ iki pa꞉ta꞉ tameiya꞉ tapaaso leekeme. Koto tupa꞉ mo nika꞉ Tekehalina꞉ a꞉ta꞉ma꞉ homolo yu wia hala꞉ ekita꞉ iki da꞉ta꞉la꞉eki miomena꞉ waleke wiaaso pita꞉la꞉me hone wopu u hapa꞉peke.

2 Pida 3:3

Titina꞉ amba꞉la do hone wopu wia꞉peke. Mo hande paetolo nate manuna꞉ta꞉ mandane kitao hala꞉ wanda꞉hali ipilimikie. Koto wanda꞉hali ika꞉ hau manuta꞉ ika꞉ hone pa꞉la꞉ ekima꞉ handeteke haena꞉ lelimikie. Ikana꞉ma꞉ta꞉ iki kitaaso hata꞉ lota꞉ pitolo alota꞉

2 Pida 3:9

Mandane wanda꞉halima꞉ hone witolota꞉ Tekehalita꞉ ipika꞉ pi la꞉ ula꞉eki puluekema꞉ta꞉ kesema꞉ pu hala꞉me lo halememe. Kotoeki na piki ipikana꞉ma꞉ta꞉ ikina꞉ a꞉ta꞉ma꞉ homolo yu wia hala꞉me. Pa ekipeke ipikana꞉ma꞉ta꞉ homeke a꞉nda꞉ hoeyaapa꞉na꞉e laata꞉ wanda꞉hali paeyao ika꞉ hoke hau mina꞉pa꞉laena꞉e hone u̱ hala꞉me.

Peneme Yaeyekeeki 2:21

I̱ma꞉ta꞉ ipika꞉ hoke hau hoki walena꞉ waleke haloa꞉pate ipika꞉ loke hoeyaasa꞉ hau pa꞉ta꞉ hoki wala꞉peke ya꞉leke kiaasa꞉me.

Peneme Yaeyekeeki 3:20

Opua꞉pe. I̱ta꞉ pota꞉ kake pa꞉ta꞉ hata꞉ kili kili lao halome. Ma꞉nda꞉ epima꞉ yaka pi ho̱la̱꞉make opua pota꞉ lombea꞉ka꞉na꞉ta꞉ I̱ta꞉ ipika꞉ da pa꞉ta꞉ a꞉pa ipiki yaapo ne nolueke. Kutupa ipikana꞉ma꞉ make I̱ yaapo ne nelieke.