Epesese 5:3 - Panake Pi La: Ula: Buka pita: Kine Pieke Buka

³ Kutupa make iki Koda꞉na꞉ wanda꞉hali hata꞉ loke hoeyaasa꞉ haumanu make na tiaake haumanu make pasa꞉tei pita꞉la꞉ haumanu make kutu pikieki manuna꞉ pi ma꞉nda꞉ a꞉nda꞉ na hotia꞉pa꞉peke.

Epesese 5:3 ပူးပေါင်းရင်းမြစ်များ

Ma꞉tiu 15:19

Kota꞉ koto some ipika꞉ puki pa꞉ta꞉ pita ipula꞉ hoke hone manuma꞉ta꞉ dupiki haumanu pu tialieke. Hali ma꞉nda꞉ lina꞉ lo o wanda꞉ pake na꞉na꞉ lo o hali yankeke pa꞉ta꞉ kone hoke hau pina꞉ lo o pake na꞉na꞉ lo o yapiki hau pina꞉ lo o wanda꞉halina꞉ biki hoeyaena꞉ lo

Luku 12:15

Koto laa Yesuma꞉ paeyao pa꞉ta꞉ alota꞉ Handeteke hapa꞉peke. Hande pasa꞉tei hau ta꞉ta꞉ ta꞉ta꞉ pikieki a꞉paapa꞉na꞉ ika꞉ kone wopu handeteke hata꞉ leke leke lo hapa꞉peke. Wanda꞉hali paeyaoma꞉ hamoko tieke ekipa haena꞉ kone ika꞉ da꞉ta꞉la꞉ ekina꞉ teketa꞉ ika꞉ wia haleme alemanu pa꞉ta꞉ na ula꞉me leekeme.

Luku 16:14

Mo hande Pa꞉tisi haliwekima꞉ Yesuma꞉ leekeeki opuaata꞉ ipiki kitaemekeme. Pa ekipeke ikita꞉ mani pa꞉ta꞉ta꞉ puki wotu wimikima꞉ pimikime.

Aposolo 15:20

Dia꞉me. Wape ma꞉nda꞉ pea dupiki pi la halomana꞉ pea꞉pa꞉peke alee. Mo toopi tima꞉ wepia ula꞉ koda꞉manu pa꞉ta꞉ lia haleeke ma꞉na꞉ mindiki napeke na yeke suseke hau na piki make wa꞉ka꞉ta꞉pa lita꞉la꞉ ma꞉na꞉ yeti na neke we make na napa꞉peke laa lomana꞉ pea꞉pa꞉peke alee.

Aposolo 20:33

I̱ma꞉ta꞉ hali ma꞉nda꞉na꞉ silipa kolo dau leke na polopaota꞉

Loma꞉ 1:29

Koto wanda꞉halita꞉ hoke hau manuma꞉ make pasa꞉tei hau manuma꞉ make ma꞉nda꞉ pa꞉ta꞉ hokeeki puluekema꞉ hone witelemeeki manuma꞉ make ta꞉ta꞉ ta꞉ta꞉ pikieki manuma꞉ tumbulu bao halememe. Soka꞉la꞉ pita꞉la꞉ ekima꞉ make hali luekema꞉ pita꞉la꞉ ekima꞉ make a꞉nda꞉ lita꞉la꞉ ekima꞉ make yayapiki hau pita꞉la꞉ ekima꞉ make ma꞉nda꞉ pa꞉ta꞉ hoke hone wita꞉la꞉ ekima꞉ make tumbulu bao hata꞉ pa pimanu la꞉tiki pu halo hata꞉

Loma꞉ 16:2

Koda꞉na꞉ wanda꞉halima꞉ta꞉ ika꞉ ika꞉ kone handa꞉ mu alualu pulu peleme tupa꞉ ikana꞉ma꞉ Tekehalina꞉ bikina꞉ ipiki handa꞉ meata꞉ kutupa ipikana꞉ma꞉ eki hau puluekema꞉ hone wia꞉ka꞉na꞉ta꞉ ikana꞉ma꞉ ipiki tamba꞉ mea꞉pa꞉peke. Ipikita꞉ wanda꞉hali wopu pa꞉ta꞉ make I̱ pa꞉ta꞉ make homu pea hata꞉ nika꞉ yankeke haya꞉ ekina꞉ loa꞉me.

Loma꞉ 6:13

Ika꞉ lokena꞉ haleme alemanu ma꞉nda꞉ta꞉ hoke hau pina꞉ na lapa꞉peke. Dia꞉me. Homa paa da꞉ta a꞉pa hala꞉ wanda꞉hali leke hata꞉ ika꞉ ika꞉ kone Koda꞉ pa꞉ta꞉ hala꞉pa꞉peke. Tikitiki haumanu pina꞉yeke ika꞉ loke tieke paeyao Koda꞉ pa꞉ta꞉ hala꞉pa꞉peke.

1 Kotindi 10:8

Mandane kutupiki haumanu pimiki wanda꞉halita꞉ homeke natena꞉ kone 23 daoseni homemekeme. Koto ekina꞉ nikana꞉ma꞉ kutu piki haumanu na piki pa yankeke ma꞉nda꞉na꞉ loke hoeyaasa꞉ haumanu na pumana꞉ pea꞉pa꞉peke.

1 Kotindi 5:1

Hali ma꞉nda꞉na꞉ wanda꞉ hoeyaasa꞉ hau iki ame̱le̱ ula꞉ ekita꞉ amba꞉ opolome. Kutupa mo kutu piki hauta꞉ mo pi na miki wanda꞉halima꞉ make na pu haleme hau kone pa꞉la꞉me. Hande hauta꞉ dupa. Hali ma꞉nda꞉ma꞉ ipika꞉ atekena꞉ wanda꞉ kone ma꞉la꞉ ekina꞉ loa꞉me.

1 Kotindi 6:13

Hali ma꞉nda꞉ma꞉ alota꞉ Ne nala꞉ ekita꞉ welekena꞉ ekie laata꞉ Pa mo weleke make ne muluekema꞉ hala꞉me laa lelie ekita꞉ ota꞉ ya꞉la꞉pate koto ale yaapo telipina꞉ homeke dina꞉ Koda꞉ma꞉ paeyaalieke. Kutu pulu pa꞉la꞉ ekina꞉ yeke homekema꞉ ipika꞉ lokema꞉ta꞉ ta꞉ta꞉na꞉ loke hoeyaaluekema꞉ na hake pa mo Tekehalina꞉ e pokaaluekema꞉ pa꞉la꞉me. Kutupa make mo Tekehalima꞉ta꞉ nika꞉ lokemanu handeteke haluekema꞉ hala꞉me.

1 Kotindi 6:18

Ta꞉ta꞉na꞉ loke hoeyaasa꞉ hau manuta꞉ ota꞉ na wataake nindi pea hapa꞉peke. Mandane hoke hau pita꞉la꞉ ekimanu paeyaota꞉ loke hama꞉ nane pita꞉la꞉pate hali epima꞉ ta꞉ta꞉na꞉ loke hoeyaasa꞉ haumanu pia꞉ka꞉na꞉ta꞉ kota꞉ ipika꞉ loke pa꞉ta꞉ kone hoke hau peaasa꞉me

2 Kotindi 12:21

I̱ paala꞉ pita꞉la꞉ ekita꞉ I̱ pa ipulua꞉ dina꞉ta꞉ yaka Koda꞉ma꞉ta꞉ ika꞉ leke popelekena꞉ I̱ta꞉ wenoko mealieke. Kutupa I̱ma꞉ta꞉ mo amba꞉ hoke hau pimi wanda꞉halita꞉ ika꞉ kikana꞉ haumanu pimieki make ika꞉ hoke hone wimi ekimanu make ika꞉ loke apa꞉taasa꞉ hoke haumanu pimi ekimanu hoki na walemeke ekina꞉ I̱ma꞉ e̱ lolueke hone witolome.

Epesese 5:12

Ika꞉ a꞉mbao pitelemeeki manuta꞉ wanda꞉hali yaala꞉ma꞉ homaapa꞉na꞉ pi hotia꞉pa꞉peke na ya꞉la꞉me.

Epesese 5:5

Do wape pa꞉la꞉ ekita꞉ Ota꞉ekie hone wia꞉pa꞉peke. Hali epima꞉ loke hoeyaasa꞉eki make na tiaake hau pita꞉la꞉eki make pasa꞉tei hau pita꞉la꞉eki make (mo pasa꞉tei hau pita꞉la꞉ ekita꞉ hande toopima꞉ wepia ula꞉ ale pa꞉ta꞉ yeni hau pita꞉la꞉ ekima꞉ kone handa꞉la꞉me) kutupiki hau pita꞉la꞉ halita꞉ Koda꞉ Ketiso yaapona꞉ Kilu Tombuao Hala꞉ ekina꞉ ota꞉ pua꞉peke na ya꞉la꞉me.

Pilipai 1:27

Ketisona꞉ Pi Seliapoma꞉ puemena꞉ wala꞉la꞉ tupa꞉ pu haleme hauta꞉ ota꞉ tumiki haue. Kutu pilimipate I̱ epoa꞉ka꞉na꞉ make o pa ika꞉ pilimi hauna꞉ pi lalimieki opua꞉ka꞉na꞉ make kota꞉ ikita꞉ taka꞉lao haemeka꞉ta꞉me hone ulueke. Kutupa mo wanda꞉halima꞉ Ketisona꞉ Pi Seliapo pa꞉ta꞉ hone tulaena꞉ ikana꞉ma꞉ ota꞉ homeke hone wia hata꞉ tamba꞉ mualualu pu haemeka꞉ta꞉me hone ulueke.

Kolosi 3:5

Koto ekina꞉ta꞉ do kenkena꞉ ekina꞉ hone pa꞉la꞉eki manuta꞉ yola꞉la꞉ hau make ha̱i̱piki hau pita꞉la꞉eki make we pamba꞉la꞉eki make hoke hauna꞉ hone tulaa pelia hala꞉eki make pasa꞉tei pita꞉la꞉ hauta꞉ mo toopi ti wepia ula꞉ ale pa꞉ta꞉ honke honke ala꞉ pasa꞉tei pita꞉la꞉ hauma꞉ handekeeki make doeki paeyaota꞉ ota꞉ homena꞉ lapa꞉peke.

1 Desalonaika 4:3

Koda꞉ma꞉ iki pa꞉ta꞉ hone pa꞉la꞉ hauta꞉ dupae. Ikana꞉ma꞉ yakopiki wanda꞉hali hata꞉ta꞉ suseke haasa꞉ hau ma꞉nda꞉ na piki hamina꞉yeke hone pa꞉la꞉me.

1 Desalonaika 4:7

Nikita꞉ suseke haasa꞉ hau peomono Koda꞉ma꞉ wi na lea꞉pate yakopiki hauna꞉ hamono wi lea꞉me.

1 Timodi 2:10

Koto hau na pikita꞉ ikana꞉ma꞉ Koda꞉na꞉ wandiki haluekema꞉ hone wimika꞉na꞉ta꞉ kota꞉ ikana꞉ma꞉ ota꞉ epeke haumanu pu hapa꞉peke. Kutu piteleme hauta꞉ ota꞉ ika꞉ au seliapoe.

1 Timodi 3:3

Hoke ikali naa lu keaasa꞉ hali o tekipuleke laasa꞉ hali dia꞉ya꞉la꞉pate ipikita꞉ yopu hata꞉ a꞉nda꞉ a̱i̱ puluekema꞉ na taapa꞉la꞉ halie. Kutupa ipikita꞉ mani pa꞉ta꞉ we na pambeke hala꞉ halie.

1 Timodi 6:10

Mo mani we pamba꞉la꞉ ekima꞉ta꞉ ta꞉ta꞉ ta꞉ta꞉ piki hoke haumanu pu tialo pa꞉la꞉ ekina꞉ teke ula꞉me. Mandane wanda꞉halima꞉ mani muluekema꞉ hone wopu witolo hata꞉ ika꞉ hone tulao halemeeki mina꞉pa꞉lao hoke ka꞉nda꞉ manuma꞉ ika꞉ puki tandama꞉ homo haememe.

2 Timodi 3:2

Koto paelia꞉ dina꞉ta꞉ wanda꞉halima꞉ do haumanu pu halimikie. Ikita꞉ I̱ I̱ alo hata꞉ make pasa꞉tei hau wopu pita꞉la꞉eki make hakoko liki pimanu lo make handaena꞉ honemanu u make yala꞉ peaaso hata꞉ make kikama꞉ handeke some ala꞉ hoke pimanu make lo halimikie. Kutaa make ateke inkikina꞉ kakena꞉ na homo make keiyae loluekema꞉ hone na u make yeni hau pita꞉la꞉ haumanu hone na wiki wanda꞉hali make halimikie.

Taitasi 1:11

Kutupiki yala꞉ mea꞉peke haumanu piteleme hauta꞉ pa yanaaso hata꞉ wanda꞉halina꞉ manimanu muluekema꞉ pitelememe. Mo wala꞉peke na yeke pimanu walemeke ekima꞉ta꞉ mandane haliwekina꞉ hone make ika꞉ wekiwanda꞉na꞉ hone make u hoeyaena꞉ lo halememe. Kutu paama꞉na꞉ ika꞉ lo haleme pimanu sa꞉sa꞉ pea꞉peke.

Taitasi 1:7

Ipikana꞉ma꞉ta꞉ Koda꞉na꞉ hau handeteke hapeke ekina꞉ ipikita꞉ ota꞉eki a꞉nda꞉ na piki hali hapeke yelieke. Ipikita꞉ wanda꞉hali lu pambaake pi lo o mineke a̱i̱ koto kone panka꞉la꞉ o hoke ikali naa keao o wanda꞉hali make ala꞉ta꞉ ala꞉ta꞉ hoeyao tekipuleke lao o I̱ I̱ laa pasa꞉tei pu o dupiki haumanu pu halia꞉ halita꞉ hapeke na yelieke.

Taitasi 2:3

Mo keileke wanda꞉weki pa꞉ta꞉ make koto tupa꞉ kone alota꞉ Iki make yako piki wanda꞉weki hapeke ya꞉la꞉ tupa꞉ hapa꞉peke la alota꞉ mo hande keileke wanda꞉weki pa꞉ta꞉ ikana꞉ma꞉ laasa꞉ hau na pu make mo waini ikalima꞉ ika꞉ hone hoeyaama꞉na꞉ wopu na neke hata꞉ make ikana꞉ma꞉ mo panake wanda꞉weki pa꞉ta꞉ epeke hau pita꞉la꞉ ekimanu wala꞉ tiaapa꞉peke la wala꞉peke.

Hibulu 12:16

Iki homeke ma꞉nda꞉ma꞉ yola꞉la꞉ hau pilimina꞉ma꞉ wopu handeteke hapa꞉peke. Amba꞉ Isoma꞉ mo hande hoto homeke napeke ne hambolo hata꞉ ipika꞉ mupeke wekima꞉ mia꞉peke anke teketa꞉ Koda꞉na꞉ hau pa꞉ta꞉ hone na witolo hata꞉ ma꞉nda꞉ pa꞉ta꞉ pa haleeke hau leke na pia꞉pa꞉peke.

1 Pida 5:2

Ikana꞉ma꞉ handeteke hamena꞉ Koda꞉ma꞉ ka꞉la꞉ sipisipi ma꞉na꞉ta꞉ ta꞉na꞉ma꞉ homolo hata꞉ handeteke hapa꞉peke. Kima꞉ na homeke Koda꞉ma꞉ hone pa꞉la꞉ tupa꞉ handeteke hapa꞉peke. Do e poka꞉la꞉ ekita꞉ yenki homekena꞉ hone na wiki ika꞉ honema꞉ kone hone pitolo haena꞉ poka꞉pa꞉peke.

2 Pida 2:10

Ota꞉ mo ika꞉ ha̱i̱ piki lokena꞉ na꞉na꞉ma꞉ homa꞉la꞉eki pita꞉ Koda꞉na꞉ handeteke hala꞉ ekita꞉ pa pina꞉ma꞉ hone u haleme wanda꞉hali pa꞉ta꞉ loa꞉me. Do yayapikieki wala꞉la꞉ haliwekima꞉ta꞉ ma꞉nda꞉ pa꞉ta꞉ homu na piki ika꞉ homeke hone u hata꞉ oli manda hala꞉ seliapo piki enisolo titita꞉ na handomo tiao halememe. Kotoeki na pikita꞉ pa iki kitao halememe.

2 Pida 2:14

Ikita꞉ wanda꞉na꞉ leke titolo hata꞉ hoke hauta꞉ ota꞉ na pao halememe. Ikana꞉ma꞉ mo damako piki wanda꞉halita꞉ hona꞉ pa꞉ta꞉ mea teao halememe. Ika꞉ta꞉ pasa꞉tei pita꞉la꞉ hau puluekema꞉ amba꞉ moka꞉la handa wilimime. Ikita꞉ Koda꞉na꞉ mineke panka꞉la꞉eki oto pa꞉ta꞉ hala꞉ tapake au laa halememe.

2 Pida 2:3

Do yayapiki pi wala꞉la꞉ haliwekima꞉ta꞉ pasa꞉tei pitolo hata꞉ ika꞉ alemanu muluekema꞉ makeaaso la꞉la꞉ tamenimanu la kilieke. Ameta꞉ amba꞉ kiake kone iki pi yokaalu pulu pa꞉la꞉ halita꞉ tikitiki yao hata꞉ iki hoeyaalo pa꞉la꞉ halita꞉ u̱ na pa꞉ela꞉me.

Peneme Yaeyekeeki 2:14

Koto pelemepate I̱ma꞉ta꞉ iki pa꞉ta꞉ alo pimanu dupa. Iki tukiki pa꞉ta꞉ta꞉ mo Beilame wala꞉la꞉ pi tolu haleme wanda꞉hali taa haleme handa꞉e. Koto Beilame Beileke walolota꞉ Isulai wanda꞉hali mo toopi ti wepia ula꞉ ale pa꞉ta꞉ halo haleme nemanu nena꞉ alo make loke hoeyaasa꞉ hau pina꞉yeke ipikana꞉ma꞉ sutiaeyeke hauma꞉ iki hoke hau pa꞉ta꞉ hatuku pena꞉yeke waleekeme.

Peneme Yaeyekeeki 2:21

I̱ma꞉ta꞉ ipika꞉ hoke hau hoki walena꞉ waleke haloa꞉pate ipika꞉ loke hoeyaasa꞉ hau pa꞉ta꞉ hoki wala꞉peke ya꞉leke kiaasa꞉me.

Peneme Yaeyekeeki 21:8

Pate hone pamboneke tapake make ba꞉sa꞉ piteleme tapake make ata꞉ka꞉ peaaseme tapake make honema꞉ kone hali lu homaaseme tapake make pake nalo loke apa꞉taaseme tapake make ti̱o̱ hau pu haleme tapake make toopi ti wepia ula꞉ ale pa꞉ta꞉ yeni pu haleme tapake make mo yayapiki pi lo haleme tapake make paeyaota꞉ ika꞉ hala꞉peke ya꞉la꞉ ekita꞉ oni ti uleke kiake make titipupiki lanka꞉ ma꞉nda꞉ biki solopa bu lo hala꞉ pa꞉ta꞉e. Koto hau pita꞉la꞉ ekita꞉ mo yaapo peao homa꞉la꞉ekie.

Peneme Yaeyekeeki 22:15

Pate mo ata꞉ka꞉ peaaseme tapake make ti̱o̱ hau pu haleme tapake make pake nalo loke apa꞉taaseme tapake make honema꞉ kone hali lu homaaseme tapake make toopi ti wepia꞉ ula꞉ ale pa꞉ta꞉ yeni hau pu haleme tapake make yayapiki ekina꞉ ta꞉na꞉ma꞉ homa pu haleme tapake make paeyao sikita꞉ mo daoni tea꞉na꞉ hama꞉ nane halememe.

Peneme Yaeyekeeki 9:21

Kutupa make ika꞉ hali homena꞉ lilimieki make ika꞉ ti̱o̱ haumanu make ika꞉ loke hoeyaasa꞉ haumanu make pake nala꞉ ekimanu kone ota꞉ na kiaememe.