2 Timodi 3:16 - Panake Pi La: Ula: Buka pita: Kine Pieke Buka

¹⁶ Mo Baibolona꞉ wape pea ula꞉ pi paeyao wape pina꞉ta꞉ haliwekina꞉ hone pa꞉ta꞉ Koda꞉ma꞉ wala꞉ tiaaso haena꞉ wape pimikime. Koto wape pa꞉la꞉ pima꞉ta꞉ wanda꞉hali pa꞉ta꞉ ota꞉ pimanu waluekema꞉ make hoke hau peaama꞉na꞉ sa꞉sa꞉ puluekema꞉ make hoi piki haumanu tondepealuekema꞉ make kutupa epeke hapeke ekina꞉ mana꞉manu loluekema꞉ wape pea ula꞉me.

2 Timodi 3:16 ပူးပေါင်းရင်းမြစ်များ

Ma꞉tiu 13:52

Koto lemeke opitolo Yesuma꞉ alota꞉ Hali ma꞉nda꞉ epi a꞉nda꞉ma꞉ta꞉ mo amba꞉ la꞉ wieke Lo Pimanu walo hala꞉ hali hata꞉ta꞉ pa mo hepenina꞉ Kilu Tombuao Hala꞉ ekina꞉ hau paeyao miniki hala꞉ hali make haya꞉ka꞉na꞉ta꞉ kota꞉ koto someta꞉ mo da tiekena꞉ tekehali tupa꞉ hata꞉ ipika꞉ momba꞉la nu pindu hao u hala꞉ da panda꞉ pa꞉ta꞉ pua amba꞉ epeke alemanu make panake epeke alemanu make apa꞉tao mea a꞉pa peneme yaasa꞉ somema꞉ handilieke leekeme.

Ma꞉tiu 21:42

Yesuma꞉ iki pa꞉ta꞉ alota꞉ Mo Baibolo bukana꞉ wape pea ula꞉ pima꞉ta꞉ dupa la꞉la꞉ma꞉ na yata꞉pelemepe. Mo da a꞉eyo haemeke haliwekima꞉ Hoela꞉me laa kiaemeke toopi kone ameta꞉ keneme pa꞉ta꞉ mo dana꞉ teke toopi ula꞉me. Kutu pieke ekita꞉ Tekehalima꞉ kone pia꞉me. Koto ekina꞉ koto hau nikana꞉ma꞉ handolo hata꞉ Ba꞉sa꞉sa꞉e. Tekehalima꞉ peaasa꞉ haue aloma꞉me laa la꞉la꞉me leekeme.

Ma꞉tiu 22:43

Koto leeke Yesuma꞉ alota꞉ Kota꞉ kotota꞉ ota꞉ ya꞉ka꞉na꞉ta꞉ pa ekipeke handaa mo Holi Sipitidima꞉ Deipidina꞉ hone u tiaaso haena꞉ Deipidima꞉ Ketisota꞉ Tekehalie laa leekepe.

Ma꞉tiu 26:54

Wi lolo pua꞉peke ya꞉la꞉pate kutu pua꞉ka꞉na꞉ta꞉ kota꞉ pa mo amba꞉ Baiboloma꞉ pilieke laa la꞉ ula꞉ haumanu ekipa yaaliepe leekeme.

Ma꞉tiu 26:56

Pate do ikana꞉ma꞉ piteme hau manuta꞉ mo hande amba꞉ potopede haliweki ikana꞉ma꞉ mo Baibolo tukiki pa꞉ta꞉ wape pea ula꞉ pimanu peneme yaaluekema꞉ pitememe leekeme. Koto toma꞉na꞉ta꞉ ipika꞉ disaipolo haliweki paeyaoma꞉ Yesu mina꞉pa꞉lao kilipa pemekeme.

Maka 12:24

Yesuma꞉ iki pa꞉ta꞉ alota꞉ Ikana꞉ma꞉ pi lo hoeyaasememe. Pa ekipeke mo Baibolo bukana꞉ wape pea ula꞉ ekimanu na handelememe. Kutupa Koda꞉na꞉ wele pu hala꞉ ekimanu make na handelememe.

Maka 12:36

Deipidima꞉ ipika꞉ kone alota꞉ Holi Sipitidima꞉ la halolo haena꞉ alota꞉ Mo Tekehalima꞉ yaka Tekehali pa꞉ta꞉ leekeeki dupa. Naka꞉ a꞉nda꞉ tunkuliki haliweki naka꞉ anke oto pa꞉ta꞉ mea pitaanoyeke yaka popeke nane kikina꞉ pita꞉peke la꞉la꞉me.

Dioni 10:35

Kota꞉ Koda꞉ma꞉ ipika꞉ pi la꞉niaemeke haliweki pa꞉ta꞉ ika꞉ bikita꞉ koda꞉manue laa leekeme. Kutupa Baibolo bukana꞉ pita꞉ ota꞉eki kone pa u halieke.

Dioni 3:20

Hoke hau pu haleme haliwekima꞉ta꞉ mo pa̱a̱ pa꞉la꞉ ekina꞉ ika꞉ hoke haumanu peneme yao walaapa꞉na꞉ ota꞉ kiaaso hata꞉ mo pa̱a̱ pa꞉la꞉eki pa꞉ta꞉ na ipilimikie.

Aposolo 1:16

Kutupa ipikana꞉ma꞉ alota꞉ Yaka ana꞉ kame titio. Hande Baibolo bukana꞉ wape pa꞉la꞉ pita꞉ ota꞉ yaapeke ya꞉la꞉me. Hande Holi Sipitidima꞉ Deipidina꞉ hone u tiaaso haena꞉ta꞉ Yesu da꞉ka꞉pa꞉ minina꞉ haliweki hatuku polo pia꞉ hali Diudasima꞉ pulu piekeeki dupilieke laa Deipidima꞉ wape piekeme.

Aposolo 18:25

Hali ma꞉nda꞉ma꞉ ipiki pa꞉ta꞉ Tekehalina꞉ hau amba꞉ waleeke handa ipikana꞉ma꞉ wele pieke hali hata꞉ Yesuma꞉ pieke ekimanu tikitiki yao walo hayekepate Dionima꞉ bapitaisi peaeyekeeki pa꞉ta꞉ homeke hone wiekeme.

Aposolo 20:20

Iki epeaalo pia꞉eki iki na a꞉mbaake walo haowa꞉ ekita꞉ handememe lea꞉me. Kutupa da ma꞉nda꞉ pa꞉ta꞉ make momba꞉la pitimi tukiki pa꞉ta꞉ make walo haowa꞉ ekita꞉ handememe lea꞉me.

Aposolo 20:27

I̱ma꞉ta꞉ pi ma꞉nda꞉ na a꞉mbaake Koda꞉na꞉ hau paeyao iki pa꞉ta꞉ waloa꞉me lea꞉me.

Aposolo 28:25

Koto ekina꞉ ika꞉ kone hone ta꞉ta꞉ ta꞉ta꞉ wia pi ta꞉ta꞉ ta꞉ta꞉ alo hata꞉ poluekema꞉ haena꞉ Poloma꞉ pi homeke ma꞉nda꞉ dupa lea꞉me. Mo Holi Sipitidima꞉ hande potopede hali Aisaya pa꞉ta꞉ la halolo hata꞉ ika꞉ atekemanu pa꞉ta꞉ do leeke pita꞉ ota꞉ alo pia꞉me.

Loma꞉ 15:4

Mo hande Baibolo bukana꞉ wape pa꞉la꞉ ekimanu paeyaota꞉ niki waluekema꞉ wape pea pelememe. Mo hande Baibolo bukana꞉ wape pa꞉la꞉eki manuma꞉ta꞉ niki sutia tia pitolo haena꞉ niki tiao hata꞉ mo hande la꞉ ula꞉ ekimanu yaena꞉yeke handeteke hao hamono ula꞉me.

Loma꞉ 2:20

I̱ta꞉ hone wopu na witeleme wanda꞉hali ika꞉ hone wiaaso hali make weki wandikima꞉ handeleme wanda꞉hali ika꞉ wala꞉la꞉ hali make halome hone witeleme. Naka꞉ honema꞉ta꞉ hande Lo Pimanu opua wia hala꞉ ekina꞉ pita꞉la꞉ ekimanu paeyao I̱ma꞉ handaata꞉ I̱ma꞉ lolo polo pimanu make ota꞉ekie lolueke hone witeleme.

Loma꞉ 3:2

A꞉pa꞉e. Iki pa꞉ta꞉ epekeeki wotu ula꞉me. Titina꞉ dupa Koda꞉ma꞉ta꞉ mo Diu wanda꞉halima꞉ ipika꞉ pimanu miniki hata꞉ handeteke haena꞉yeke iki pa꞉ta꞉ haleekeme.

Loma꞉ 4:23

Mo hande Ipiki yaapo tikitiki yao haena꞉ leekeme pita꞉ Eipoloha꞉ma꞉ pa꞉ta꞉ homeke wape na pa꞉la꞉me.

1 Kotindi 12:7

Wanda꞉hali paeyao epeaaluekema꞉ mo Sipitidima꞉ niki paeyao homeke homeke pa꞉ta꞉ ipika꞉ pitaasa꞉eki wala꞉la꞉me.

Ka꞉leisia 3:8

Baiboloma꞉ dupa la꞉ wiekeme Koda꞉ma꞉ mo hande Diendaili wanda꞉hali ika꞉ hone tulaleme ekina꞉ Koda꞉ ipiki ame̱le̱ epea halimikie laa la꞉ wiekeme. Kota꞉ mo Baiboloma꞉ Eipoloha꞉ma꞉ pa꞉ta꞉ dupiki pi seliapo la halolo alota꞉ Neke pa꞉ta꞉ yama꞉ta꞉ Koda꞉ma꞉ wanda꞉hali paeyao wamo pilieke leekeme. Mo koto leeke ekita꞉

2 Timodi 2:25

Ipikana꞉ma꞉ mo pi tunkuleleme wanda꞉hali tikitiki yaasota꞉ kimelema꞉ hauma꞉ta꞉ yopu pu halieke. Koto hau a꞉nda꞉ pu haya꞉ka꞉na꞉ta꞉ kota꞉ ikita꞉ Koda꞉ma꞉ iki pa꞉ta꞉ waleke wiaya꞉ka꞉na꞉ta꞉ ika꞉ pukimanu topo pea mo ota꞉ pina꞉ hone ti laemeka꞉na꞉ta꞉

2 Timodi 4:2

Koda꞉na꞉ pi walo hapeke. Kutu polo halena꞉ wanda꞉halima꞉ opuluekema꞉ ta꞉na꞉ma꞉ na homolo haena꞉ make o ta꞉na꞉ma꞉ homa opitolo haena꞉ make na kiaake pa walolo walolo ombu hapeke. Nakana꞉ma꞉ mo puki nala꞉ pima꞉ make mineke pima꞉ make kutupa mo hone u tiaasa꞉ pima꞉ make koto pi manuma꞉ ikana꞉ma꞉ epeke honemanu wina꞉ loluekema꞉ ta꞉na꞉ma꞉ homa꞉ tiaaso handeteke hao hapeke.

Hibulu 11:1

Mo hone tulaaluekema꞉ pita꞉la꞉eki manuta꞉ dupae. Hali homekema꞉ mo mulueke hone wita꞉la꞉ ekita꞉ ipika꞉ hone tukiki pa꞉ta꞉ ota꞉ mea miniki hata꞉ make ipika꞉ lekema꞉ handa꞉peke na ya꞉la꞉ ale manuta꞉ honema꞉ hone witolota꞉ ota꞉ ula꞉me alo hata꞉ ipika꞉ hone tulao handeteke hala꞉me.

Hibulu 3:7

Koto pa꞉la꞉ ekina꞉ mo Holi Sipitidima꞉ kinki pitolo hata꞉ alota꞉ Ame do natena꞉ Koda꞉na꞉ pi ho̱la̱꞉make opimika꞉na꞉ta꞉

Hibulu 4:12

Koda꞉na꞉ pita꞉ da꞉taa hata꞉ e wopu poko hala꞉me. Mo pima꞉ta꞉ hande kake yaapo hake bainasi kone lombei pea ne ne wopu hala꞉me. Kutupa mo pima꞉ta꞉ wanda꞉hali ponda꞉pa꞉ awa ika꞉ temoko pita꞉ hone teke yaapo tukikina꞉ opolo pua tekili peao make ika꞉ lokena꞉ holiki kilikalu yaapo pa꞉nka꞉pa꞉ lia tekili pea alu make pea꞉peke ya꞉la꞉me. Wanda꞉halina꞉ honena꞉ hone pa꞉la꞉ ekimanu tikitiki yawao hala꞉me.