1 Pida 3:7 - Panake Pi La: Ula: Buka pita: Kine Pieke Buka

⁷ Haliki tonu iki make haliki hata꞉ta꞉ ika꞉ wanda꞉ta꞉ iki tupa꞉ honkopu na halememe hone wia꞉pa꞉peke. Koto ekina꞉ta꞉ ikana꞉ma꞉ iki pa꞉ta꞉ epeke tupa꞉ hone witolo hata꞉ handeteke hapa꞉peke. Kota꞉ kotota꞉ mo wanda꞉weki iki make iki ame̱le̱ mandakena꞉ Koda꞉na꞉ pa hameke kita꞉la꞉ da꞉ta꞉la꞉ ekita꞉ milimikie. Ala꞉ta꞉ ma꞉nda꞉ma꞉ ika꞉ yeni pu haleme ekimanu sa꞉sa꞉ na pina꞉ koto hau pu hapa꞉peke.

1 Pida 3:7 ပူးပေါင်းရင်းမြစ်များ

Ma꞉tiu 18:19

Pa ameta꞉ do pi make apa꞉taaso iki pa꞉ta꞉ alome. Iki paeyao tukiki pa꞉ta꞉ epi yaapo a꞉nda꞉ma꞉ mo pea꞉peke hau homeke a꞉nda꞉ do pate puluekema꞉ epena꞉e laa homeke hone wia hata꞉ yeni pipika꞉na꞉ta꞉ kota꞉ oli ya hepeni hala꞉ Apa꞉ma꞉ opua ipilika꞉ hone pa꞉la꞉ ekita꞉ ota꞉ peawalieke.

1 Kotindi 7:3

Halima꞉ ipika꞉ weteke pa꞉ta꞉ hala꞉peke ya꞉la꞉ ekita꞉ hala꞉peke ya꞉la꞉me. Kutupa wanda꞉ma꞉ make haliki pa꞉ta꞉ hala꞉peke ya꞉la꞉ ekita꞉ hala꞉peke ya꞉la꞉me.

Epesese 3:6

Koto hande a꞉mbao u hayeke honeta꞉ dupae. Hande Pi Seliapo opueleme ekina꞉ Diendaili wanda꞉hali ikana꞉ma꞉ta꞉ Koda꞉ma꞉ epeaasa꞉ ekimanu Diu wanda꞉hali ame̱le̱ mandakena꞉ apa꞉tao mea꞉peke ya꞉la꞉me. Ikana꞉ma꞉ta꞉ apa꞉tao homeke loke ta̱la̱ hata꞉ta꞉ hande Koda꞉ma꞉ Yesu Ketisoma꞉ peaena꞉ pi la꞉ wiekeeki ikana꞉ma꞉ make minelememe.

Epesese 4:30

Koda꞉ ipika꞉ Holi Sipitidi make ka꞉nda꞉ma꞉ na homaapa꞉peke. Do ekina꞉yeke loa꞉me. Koda꞉ma꞉ iki ota꞉ ka꞉la꞉pa꞉ tapaaluekema꞉ ipikana꞉ma꞉ mo Holi Sipitidi pitaala꞉ ekima꞉ tombo amba꞉ wiaala꞉me.

Epesese 5:33

iki pa꞉ta꞉ make la꞉la꞉me laa hone witolome. Koto ekina꞉ haliwekio ikana꞉ma꞉ ika꞉ loke pa꞉ta꞉ kone hone witeleme tupa꞉ ika꞉ wanda꞉weki pa꞉ta꞉ make hone wia꞉pa꞉peke. Kutupa wanda꞉wekima꞉ make ika꞉ haliki titi pa꞉ta꞉ homu pea hapa꞉peke.

Epesese 6:18

Do haumanu paeyaota꞉ Koda꞉ma꞉ tamba꞉ mina꞉yeke pitolo hata꞉ yeni pea꞉tiki pu hapa꞉peke. Koto mo Sipitidima꞉ walolo haena꞉ hoto paeyao yeni pea꞉pa꞉peke. Koto ekina꞉ wotu handeteke hata꞉ soka꞉la꞉ma꞉ na homeke Koda꞉na꞉ wanda꞉hali paeyao pa꞉ta꞉ hone witolo hata꞉ hoto paeyao yeni pea꞉tiki pu hapa꞉peke.

Kolosi 3:19

Haliwekio. Ika꞉ wanda꞉weki pukima꞉ homolo hata꞉ tetopiki pi na lapa꞉peke.

1 Desalonaika 4:4

Iki pa꞉ta꞉ hali homeke homekema꞉ wanda꞉ minolo hata꞉ ota꞉ tupa꞉ yako pea hata꞉ mea꞉pa꞉peke aleo.

Taitasi 3:7

Kutu pieke ekima꞉ta꞉ mo Ketiso ipika꞉ a꞉ta꞉ma꞉ homeeke ekina꞉ niki Koda꞉na꞉ leke popelekena꞉ tikitiki pea make nika꞉ hone puaasoma꞉ deto hala꞉eki make miomono piekeme. Do ala꞉ pita꞉ ota꞉ pie.

Hibulu 1:14

Mo enisolo paeyaota꞉ Koda꞉na꞉ deto hala꞉eki mulu peleme wanda꞉halina꞉ pa꞉ta꞉la꞉la꞉ temokomanu na halemeke yekea.

1 Pida 3:1

Koto tupa꞉ kone weteke tonu ikita꞉ ika꞉ haliki tonu pa꞉ta꞉ homu pea hao hapa꞉peke. Mandane haliki tonuma꞉ Koda꞉na꞉ pi na miki haemeka꞉na꞉ta꞉ kota꞉ ika꞉ epeke hau pilimi ekima꞉ta꞉ mo haliweki pi mina꞉ yola꞉ milimikie.