1 Kotindi 1:30 - Panake Pi La: Ula: Buka pita: Kine Pieke Buka

³⁰ Koda꞉ma꞉ iki mea Yesu Ketiso yaapo ta꞉ma꞉ni peala꞉me. Kutupa ipikana꞉ma꞉ Ketisota꞉ nika꞉ hone wopu wita꞉la꞉eki haena꞉ la꞉la꞉me. Kutupa make Ketisoma꞉ nikita꞉ Koda꞉ yaapo tikitiki yao hamono laata꞉ nikita꞉ yakopiki wanda꞉hali hamono la꞉la꞉me. Kutupa ipikana꞉ma꞉ make niki pa ka꞉la꞉pa꞉ tapaala꞉me.

1 Kotindi 1:30 ပူးပေါင်းရင်းမြစ်များ

Ma꞉tiu 1:21

Mo wekita꞉ hali weki mendilieke. Kutu pia꞉ka꞉na꞉ ipika꞉ wanda꞉hali mea da꞉taalo pa꞉la꞉ ekina꞉ yeketa꞉ ipika꞉ biki Yesue lelipipikie leekeme.

Luku 11:49

Doeki tekena꞉ta꞉ Koda꞉na꞉ epeke hone wotu wita꞉la꞉ ekima꞉ta꞉ do la꞉la꞉me. I̱ma꞉ta꞉ yaka potopede haliweki make pi mea pomuao haleme haliweki tapaalo polopate mandaneta꞉ lu baalimiki make mandaneta꞉ tanda tanda wopu halimikie laa la꞉la꞉me.

Luku 21:15

Pa ekipeke I̱ma꞉ iki pa꞉ta꞉ kutupiki pimanu make epeke hone make kua꞉ka꞉na꞉ta꞉ ika꞉ a꞉nda꞉ tunkuliki haliweki homeke a꞉nda꞉ma꞉ make na tumbalimikie. Kutupa ika꞉ pi na yoko baalimikie.

Dioni 1:18

Hali homeke ma꞉nda꞉ma꞉ Koda꞉ ota꞉ na handeekeme. Kutu piekepate Eiyeke homekema꞉ homeke Koda꞉ tupa꞉ hata꞉ Atekena꞉ popeke nane kikina꞉ pila꞉ halima꞉ kone ipikana꞉ma꞉ niki la ka꞉la꞉me.

Dioni 14:6

Yesuma꞉ ipika꞉ pi hombo peaaso alota꞉ I̱ta꞉ hande pota꞉e. I̱ ota꞉ekie laa I̱ta꞉ da꞉ta꞉la꞉ekie. Hali epima꞉ yaka Apa꞉ pa꞉ta꞉ polueke hone wia꞉ka꞉na꞉ta꞉ pota꞉ ma꞉nda꞉ dia꞉me. I̱ pa꞉ta꞉ homeke epena꞉e leekeme.

Dioni 17:26

Naka꞉ hale ekita꞉ I̱ma꞉ iki pa꞉ta꞉ waloa꞉pate pa wala꞉tiki pulueke. Nakana꞉ma꞉ I̱ pa꞉ta꞉ pukima꞉ homele ekita꞉ iki pa꞉ta꞉ make pitina꞉yeke kutupa I̱ make iki pa꞉ta꞉ hanoyeke pulueke.

Dioni 17:8

Nakana꞉ma꞉ I̱ pa꞉ta꞉ la ki pimanu paeya꞉ tapao iki pa꞉ta꞉ waloa꞉me. Kutu pua꞉peke handaa ikana꞉ma꞉ opua mimime. I̱ta꞉ neke yaapo epoloeki make ota꞉ekie laa nakana꞉ma꞉ I̱ tapaeeki make opitelememe.

Dioni 8:12

Yesuma꞉ iki pa꞉ta꞉ paa alota꞉ I̱ta꞉ do kenkena꞉ pa̱a̱e. Hali epima꞉ ya hoki nane telia꞉ mea epea꞉ka꞉na꞉ta꞉ timba꞉ lo pamba꞉la꞉eki pa꞉ta꞉ na pomiki pa̱a̱ pa꞉la꞉eki pa꞉ta꞉ hata꞉ da꞉ta halieke. Mo da꞉ta꞉la꞉ ekina꞉ pa̱a̱ pa꞉la꞉eki pa꞉ta꞉ halieke.

Aposolo 26:18

Ika꞉ leke kilaowalena꞉ yeke neke tapaasome lea꞉me. Ikana꞉ma꞉ timba꞉ lo pamba꞉la꞉eki la꞉ka꞉la mina꞉pa꞉lao pa̱a̱na꞉ epoemena꞉yeke pua꞉me. Hande Sadanina꞉ wele pa꞉la꞉eki la꞉ka꞉la mina꞉pa꞉lao Koda꞉na꞉eki hamina꞉yeke pua꞉me. Koto ekina꞉ ika꞉ hoke hau pita꞉la꞉ ekimanu Koda꞉ma꞉ pa tombuao hala꞉eki muemena꞉yeke pua꞉me. Kutupa ikana꞉ma꞉ yaka pi mina꞉leke handa talopu mea haena꞉ lolo wanda꞉hali ame̱le̱ tukiki pa꞉ta꞉ a꞉pa hamina꞉yeke pua꞉me lea꞉me.

Loma꞉ 1:17

Mo hande Pi Seliapoma꞉ doeki wala꞉leke handa loa꞉me. Koda꞉ma꞉ wanda꞉hali ipiki pa꞉ta꞉ tiki tiki haena꞉ ala꞉eki wala꞉la꞉me. Mo Koda꞉ma꞉ do pita꞉la꞉ ekita꞉ wanda꞉halima꞉ hone tulao hatiki puo pu hao paeyaalo pulu make pilieke. Mo Baibolo bukana꞉ wape pea ula꞉ tupa꞉ Hali epima꞉ Koda꞉ pa꞉ta꞉ hone tulao haya꞉ka꞉na꞉ta꞉ Koda꞉ma꞉ ipiki pa꞉ta꞉ mo hali tiki tiki haena꞉ lelieke. Kutupa mo halita꞉ da꞉ta halieke.

Loma꞉ 11:36

Koda꞉ma꞉ta꞉ ala꞉ta꞉ ala꞉ta꞉ paeyao ipikana꞉ma꞉ wepia wina꞉ la꞉la꞉me. Kutupa ala꞉ta꞉ ala꞉ta꞉ paeyao ipikana꞉ma꞉ kone pa putia pulu pulu haena꞉ ala꞉me. Kutu pa꞉la꞉ ekita꞉ ala꞉ta꞉ ala꞉ta꞉ paeyao ipika꞉eki kone wina꞉ loluekema꞉ pa꞉la꞉me. Nikana꞉ma꞉ta꞉ Koda꞉na꞉ pita꞉ hoto paeyao laatiki pu hamana꞉e. Kutu pina꞉e.

Loma꞉ 12:5

Koto tupa꞉ niki make wanda꞉hali wopu haloma꞉pate Ketiso yaapo ta꞉ma꞉ni pea hata꞉ homeke loke tupa꞉ haloma꞉me. Kutupa hata꞉ta꞉ koto lokena꞉ tuna tuna pa꞉la꞉ ekimanu ya꞉leke handaata꞉ niki make tuna alualu pea haloma꞉me.

Loma꞉ 16:11

Ya tapake Diu hali Hetodioni pa꞉ta꞉ make mo hande Nasisasi tapake Ketiso wanda꞉hali pa꞉ta꞉ make a꞉taloe pi la꞉niaasome.

Loma꞉ 16:7

Hande nika꞉ mandakena꞉ dipula pituma꞉ Diu hali yaapo A꞉ndotonaikusi pita꞉ Diuniasi yaapo pa꞉ta꞉ make a꞉taloe pi la꞉niaasome. Mo hande aposolo haliwekima꞉ta꞉ koto hali yaapo wotu handa wilimime. I̱ta꞉ pi a̱i̱ na miki hano kone ipilikana꞉ma꞉ amba꞉la Ketiso haliweki haepekeme.

Loma꞉ 4:25

Nika꞉ hoke hauna꞉ Koda꞉ma꞉ Yesu homolo epena꞉ tapaeyekeme. Kutupa nikita꞉ ipiki yaapo tikitiki yao hamonoyeke Yesu paa mea da꞉taeyekeme.

Loma꞉ 4:6

Kutu pita꞉la꞉eki make Deipidima꞉ la꞉la꞉me. Hali homeke a꞉nda꞉ ipika꞉ pieke ekimanu hone na witolo hata꞉ Koda꞉ma꞉ pa mo someta꞉ tikitiki yao haena꞉ lea꞉ka꞉na꞉ta꞉ kota꞉ koto halima꞉ ta꞉na꞉ma꞉ homa paleke hala꞉ ekina꞉ Deipidima꞉ leeke ekita꞉ dupa wape pa꞉la꞉me.

Loma꞉ 5:19

Kutupa make mo hande hali homekema꞉ Koda꞉na꞉ pi na opieke ekina꞉ wanda꞉hali woputa꞉ hoke hau poloma꞉ wanda꞉hali haloma꞉me. Koto tupa꞉ kone mo hande hali homeke ma꞉nda꞉ma꞉ Koda꞉na꞉ pi opua pieke ekina꞉ Koda꞉ma꞉ wanda꞉hali wopu ipiki yaapo tikitiki yao hamono lo hala꞉me.

Loma꞉ 5:21

Koto ekina꞉ wanda꞉hali paeyao homolo puma꞉ ekina꞉ hoke hau pita꞉la꞉eki titipu wotu piekeme. Koto tupa꞉ kone Koda꞉ma꞉ niki pa꞉ta꞉ pa hameke a꞉ta꞉ma꞉ homolo hata꞉ nikita꞉ ipiki yaapo tikitiki yao hamono laata꞉ da꞉ta hao hamono la꞉la꞉me. Koto pa꞉la꞉ ekima꞉ Koda꞉ ipika꞉ pa hameke a꞉ta꞉ma꞉ homa꞉la꞉eki titipu wopu pa꞉la꞉eki peneme yao wala꞉la꞉me. Kutupa koto pa꞉la꞉ ekita꞉ Koda꞉ma꞉ nika꞉ Tekehali Yesu Ketisoma꞉ peaena꞉ leekeme.

Loma꞉ 8:1

Koto ekina꞉ Yesu Ketiso ame̱le̱ ta꞉ma꞉ni pea haloma꞉ wanda꞉hali pa꞉ta꞉ta꞉ ma꞉nda꞉ma꞉ hoke yenki kia꞉peke na ya꞉la꞉me.

Loma꞉ 8:23

Koto wa꞉pa꞉la꞉eki manuma꞉ homeke na alemepate niki make hande Koda꞉ma꞉ titina꞉ amba꞉la ka꞉la꞉ Sipitidi mea hata꞉ta꞉ nikana꞉ma꞉ make niki tukiki pa꞉ta꞉ keme lo haloma꞉me. Koda꞉ma꞉ niki ipika꞉ wekitonu hamono laata꞉ nika꞉ loke tieke paeyao ka꞉la꞉pa꞉ tapaowaena꞉yeke handeteke hao hata꞉ lo haloma꞉me.

Loma꞉ 8:9

Kutupu halemepate ika꞉ lokena꞉ hone pa꞉la꞉eki manuma꞉ iki na handeteke hatiki pita꞉la꞉pateta꞉ Koda꞉ ipika꞉ Sipitidita꞉ iki tukiki pa꞉ta꞉ ota꞉ pitia꞉ka꞉na꞉ta꞉ kota꞉ hande Sipitidima꞉ walo hala꞉eki pea꞉tiki pu halememe. Hali ma꞉nda꞉ pa꞉ta꞉ Ketiso ipika꞉ Sipitidi na pitia꞉ka꞉na꞉ta꞉ kota꞉ ipikita꞉ Ketisona꞉eki dia꞉me.

1 Kotindi 1:2

Iki Kotindi daoni pa꞉ta꞉ haleme Koda꞉na꞉ siosi wanda꞉hali pa꞉ta꞉ wape polo pi doe. Koda꞉ma꞉ ikita꞉ ipika꞉ yakopiki wanda꞉hali hamina꞉ wi la꞉la꞉me. Iki mo Yesu Ketiso yaapo ta꞉ma꞉ni pea hata꞉ Koda꞉na꞉eki haleme wanda꞉hali pa꞉ta꞉ loa꞉me. Kutupa mo kenke paeyao pa꞉ta꞉ hata꞉ nika꞉ Tekehali make ika꞉ Tekehali Yesu Ketisona꞉ biki wi aleme wanda꞉hali make iki paeyao pa꞉ta꞉ wape polo pi doe.

1 Kotindi 1:24

Koto lo halemepate pa mo hande Koda꞉ma꞉ wi la ma꞉la꞉ Diu wanda꞉hali make Diendaili wanda꞉hali make koto wanda꞉halima꞉ do pina꞉ Ketisota꞉ Koda꞉na꞉ wele pita꞉la꞉eki pita꞉ hone wotu wita꞉la꞉eki yaapo hala꞉me lo haloma꞉me.

1 Kotindi 12:18

Loketa꞉ koto tupa꞉ dia꞉me. Pa ekipeke Koda꞉ma꞉ ipika꞉ hone witolo tupa꞉ kone mo ta꞉ta꞉ ta꞉ta꞉ piki ale manuta꞉ mo loke pa꞉ta꞉ ota꞉ tuna tuna peayekeme.

1 Kotindi 12:27

Koto ekina꞉ iki paeyaota꞉ Ketisona꞉ loke kone hata꞉ hande tunaala꞉ alemanu homeke homeke lo halememe.

1 Kotindi 12:8

Hande Sipitidima꞉ hali homeke pa꞉ta꞉ epeke hone wiki pi ala꞉eki halolo hata꞉ mo homeke Sipitidima꞉ kone hali ma꞉nda꞉ pa꞉ta꞉ make epeke handaasa꞉eki hala꞉la꞉me.

1 Kotindi 4:15

Ika꞉ Ketiso haleme ekina꞉ pi wala꞉la꞉ haliwekita꞉ mo 10 daosenimanu mea haena꞉ lemeka꞉na꞉ta꞉ epolo pa꞉la꞉pate pa ika꞉ apa꞉ta꞉ homekee. Ika꞉ Yesu Ketiso pa꞉ta꞉ haleme ekina꞉ I̱ta꞉ ika꞉ apa꞉ halome. Koto mo Pi Seliapo iki pa꞉ta꞉ mea epolo ekina꞉ loa꞉me.

1 Kotindi 6:11

Iki pa꞉ta꞉ mandane wanda꞉halita꞉ kutupiki wanda꞉hali haemepate pa Koda꞉ma꞉ ika꞉ hoke haumanu tanda꞉ pea haena꞉ yeke handa ameta꞉ wamo pea halememe. Ameta꞉ Koda꞉ma꞉ iki talopu mea hamina꞉ la꞉la꞉me. Kutupa ame ikita꞉ Koda꞉ pa꞉ta꞉ tikitiki yao hamina꞉ la꞉la꞉me. Kutupiki hauta꞉ mo Tekehali Yesu Ketiso pita꞉ nika꞉ Koda꞉na꞉ Sipitidi yaapoma꞉ peaala꞉me.

2 Kotindi 12:2

I̱ma꞉ hone uluta꞉ amba꞉ paeya꞉ bapi 14 haowa꞉ dina꞉ta꞉ Ketiso hali ma꞉nda꞉ta꞉ oli ota꞉ manda hala꞉ hepeni nane pa꞉ta꞉la꞉ mea pea꞉eki hone ulume. Do ekita꞉ ota꞉ pia꞉pe o pa upama꞉ leke handea꞉pe laa I̱ hone na ulupate Koda꞉ma꞉ homeke hone ula꞉me.

2 Kotindi 4:6

Mo amba꞉ hande Koda꞉ma꞉ alota꞉ Mo timba꞉ la꞉ pamba꞉la꞉ pa꞉ta꞉ta꞉ mo pa̱a̱ pa꞉la꞉ ekima꞉ pa̱a̱ pina꞉e leeke homeke Koda꞉ma꞉ kone mo pa̱a̱ta꞉ nika꞉ pukina꞉ pa̱a̱ peaya꞉me. Kota꞉ pa꞉la꞉ ekita꞉ Koda꞉ma꞉ ipika꞉ pa̱a̱ta꞉ Ketisona꞉ leke popelekena꞉ nikana꞉ma꞉ hone wiomonoyeke pa̱a̱ peaala꞉me.

Ka꞉leisia 1:4

Ketisoma꞉ nika꞉ Apa꞉ Koda꞉na꞉ hone pa꞉la꞉ ekina꞉ ipika꞉ kakena꞉ homolo hata꞉ nika꞉ hoke hauna꞉ yenkita꞉ ipika꞉ lokema꞉ mina꞉ homeekeme. Kutu pieke ekita꞉ do hoke natena꞉ haloma꞉eki pa꞉ta꞉ niki peteluekema꞉ piekeme.

Ka꞉leisia 3:13

Hali epima꞉ ti manda endiaeya꞉ka꞉na꞉ta꞉ kota꞉ koto halita꞉ Koda꞉na꞉ esihou pi la꞉la꞉eki oto pa꞉ta꞉ hala꞉me mo Baibolona꞉ wape pea ula꞉ tupa꞉ Ketisoma꞉ mo pi ula꞉ ekina꞉ esihou pi niki pa꞉ta꞉ a꞉paama꞉na꞉yeke ipikana꞉ma꞉ nika꞉ anketeke mieke handaata꞉ mo esihou pita꞉ ipiki pa꞉ta꞉ yapeekeme.

Epesese 1:10

Koda꞉ma꞉ ipika꞉ hone u hala꞉ ekita꞉ dupae. Kenke ya yaapo nane ula꞉ ale hala꞉ ekimanu paeyaota꞉ hande Koda꞉ma꞉ wepia haena꞉ la꞉la꞉ ekimanu paeyao ipikana꞉ma꞉ mea momba꞉laota꞉ kutupa Ketisota꞉ you haena꞉ lelieke. Ipika꞉ di tunkulia꞉ka꞉na꞉ta꞉ Koda꞉ma꞉ koto hau pu paeyaalieke.

Epesese 1:14

Holi Sipitidi ka꞉la꞉ ekita꞉ kota꞉ Koda꞉ma꞉ ipika꞉ wanda꞉hali pa꞉ta꞉ la꞉ wiekeeki ota꞉ yaalo pa꞉la꞉ ekina꞉ ti witolo pa꞉la꞉me. Dupa make Koda꞉ma꞉ ipika꞉ wanda꞉halita꞉ ota꞉ ka꞉la꞉pe tapao hao hamono la꞉la꞉eki wopu wala꞉la꞉me. Hande pa̱a̱ pa꞉la꞉ Koda꞉ ipika꞉ pi laamana꞉e.

Epesese 1:7

Ketiso homeeke ekima꞉ nikita꞉ ka꞉la꞉pa꞉ tapao hamono laata꞉ nika꞉ hoke hau poloma꞉ ekimanu ipika꞉ wema꞉ pa paeyaala꞉me. Koda꞉ ipika꞉ pa hameke a꞉ta꞉ma꞉ homa꞉la꞉ ekita꞉ ota꞉ wopue.

Epesese 2:10

Koda꞉ta꞉ niki wepia hamono la꞉la꞉ Halie. Ipikana꞉ma꞉ta꞉ nikita꞉ Yesu Ketiso yaapo ta꞉ma꞉ni pea hata꞉ epeke haumanu pu hamonoyeke nikita꞉ panake wanda꞉hali wepia hamono la꞉la꞉me. Nikana꞉ma꞉ kutupiki hau peomonoyeke Koda꞉ma꞉ amba꞉ kone pota꞉ pilao pa꞉la꞉me.

Epesese 4:30

Koda꞉ ipika꞉ Holi Sipitidi make ka꞉nda꞉ma꞉ na homaapa꞉peke. Do ekina꞉yeke loa꞉me. Koda꞉ma꞉ iki ota꞉ ka꞉la꞉pa꞉ tapaaluekema꞉ ipikana꞉ma꞉ mo Holi Sipitidi pitaala꞉ ekima꞉ tombo amba꞉ wiaala꞉me.

Epesese 5:26

Dupieke ekima꞉ Ketisoma꞉ hande ipika꞉ siosi wanda꞉hali pima꞉ make ikalima꞉ make wamo peata꞉ Koda꞉na꞉eki kone tombo waleekeme.

Pilipai 3:9

Koto ekina꞉ mo tikitiki yao hala꞉ ekita꞉ ya kone na polome. Hande Mosesima꞉ mieke Lo Pimanu opua pu hao mea꞉peke ya꞉la꞉ ekima꞉ na polome laa loa꞉me. Mo Koda꞉ma꞉ Yesu Ketiso pa꞉ta꞉ hone tulaasome wanda꞉hali pa꞉ta꞉ ku hala tikitiki yao hala꞉ ekita꞉ ame molome. Do tikitiki yao haasa꞉ ekina꞉ teketa꞉ hone tulaasa꞉ekie.

Kolosi 1:14

Ipikana꞉ma꞉ta꞉ niki ka꞉la꞉pa꞉ tapaala꞉me. Kotota꞉ nika꞉ hoke hau paeyawala꞉me laa loa꞉me.

Kolosi 3:16

Ketisona꞉ pi ipika꞉ ota꞉ epeke ta꞉ta꞉ ma꞉nda꞉ piki pi paeyaota꞉ ika꞉ puki pa꞉ta꞉ wina꞉ lapa꞉peke. Ika꞉ ika꞉ kone hone lenkene pea wita꞉la꞉eki paeyaoma꞉ walolo make tikitiki yatiki pu alualu pu hapa꞉peke. Mo Baibolona꞉ emelimanu make Tekehali yeiya꞉ laasa꞉ emelimanu make Sipitidima꞉ wala꞉la꞉ emelimanu make paeyaota꞉ ika꞉ puki nane Koda꞉ pa꞉ta꞉ keiyae alo lo hapa꞉peke.

1 Desalonaika 5:23

Nika꞉ puki lopawao hala꞉ Koda꞉ma꞉ ikita꞉ ika꞉ haumanu paeyao pa꞉ta꞉ yako pina꞉ lawaena꞉e alome. Kota꞉ nika꞉ Tekehali Yesu Ketisona꞉ epolo pa꞉la꞉ nateta꞉ ipula꞉me. Koto nate opolo epea꞉ka꞉na꞉ta꞉ ikita꞉ ata꞉ka꞉ na piki wanda꞉hali hamina꞉ Koda꞉ma꞉ ika꞉ temoko make a̱o̱a̱o̱ make loke make paeyaota꞉ ana꞉na꞉ handeteke hao haena꞉e alome.

Taitasi 2:14

Ketiso ipikita꞉ nikina꞉ homeekeme. Kutu pieke ekima꞉ta꞉ nikita꞉ mo hoke hau pa꞉ta꞉ haomeke yoka꞉ muluekema꞉ make ipika꞉ epeke hauna꞉ puawee hone pa꞉la꞉ yako piki wanda꞉hali homeke hamono yeke piekeme.

Hibulu 9:12

Ketisoma꞉ mo da tukiki pa꞉ta꞉ pua mo Ota꞉ Yako Piki Da Panda꞉ pa꞉ta꞉ honda꞉ pamba puluta꞉ hande kao o sipisipina꞉ we Koda꞉ pa꞉ta꞉ haluekema꞉ na mea peekepate ota꞉ ipika꞉ we kone mea peekeme. Koto wema꞉ nika꞉ deto halo poloma꞉eki meala꞉me.

Dia꞉mesi 1:5

Iki pa꞉ta꞉ hali homekema꞉ epeke hone wita꞉la꞉eki yonka꞉laeya꞉ka꞉na꞉ta꞉ kota꞉ Koda꞉ pa꞉ta꞉ honke lea꞉ka꞉na꞉ta꞉ epelieke. Koda꞉ma꞉ta꞉ haliweki paeyao pa꞉ta꞉ ipika꞉ kiki tindipao hata꞉ haka꞉ta꞉pao halo hala꞉me. Kutupa mo hali pa꞉ta꞉ halieke.

1 Pida 1:2

Apa꞉ Koda꞉ma꞉ ipika꞉ hau ma꞉nda꞉ tekena꞉ hata꞉ iki ma̱leke lia mia꞉me. Kutu pieke ekita꞉ dupa Mo Holi Sipitidima꞉ iki yakopiki wanda꞉hali hamena꞉ lena꞉ make Yesu Ketisona꞉ pi opua puemena꞉ make kutupa ipika꞉ wema꞉ iki tandepena꞉ make iki mea haena꞉ la꞉la꞉me. A꞉ta꞉ma꞉ homa tamba꞉ mina꞉la꞉eki make a꞉nda꞉ peliaasa꞉eki make iki pa꞉ta꞉ ota꞉ tumbaena꞉e.

2 Pida 1:1

I̱ta꞉ Saimono Pida mo hande Yesu Ketisona꞉ e pokaasa꞉ make aposolo halima꞉ loa꞉me. Mo hande niki da꞉taasa꞉ Koda꞉ Yesu Ketisona꞉ tikitiki hau pita꞉la꞉eki pa꞉ta꞉ yama꞉ hone tulaala꞉eki hala꞉la꞉ ekita꞉ nika꞉ hande ota꞉ seliapo piki ekima꞉ handekeeki meleme wanda꞉hali pa꞉ta꞉ do tameiya꞉ tapaasome.

1 Dioni 5:6

Yesu Ketisota꞉ mo ikalima꞉ bapitaisi pita꞉la꞉ hauna꞉ make ipika꞉ we holo pieke hauna꞉ make epeekeme. Ipikita꞉ mo ikalina꞉ hau homekena꞉ na epeekepate pa mo ikali pita꞉ we yaapo telipuna꞉na꞉ epeekeme. Kutupa mo Sipitidima꞉ kone peneme yaasota꞉ do hauta꞉ ota꞉ekie laa ala꞉me. Pa ekipeke mo Sipitidita꞉ ota꞉ ekie.

Peneme Yaeyekeeki 14:4

Ikita꞉ wanda꞉weki hakopu na tunkulimieki yaalo yakopiki haliweki haememe. Ikana꞉ma꞉ta꞉ mo Sipisipi Ma꞉na꞉ Ikiki pea꞉ pa꞉ta꞉ta꞉ telipaleke ombu haememe. Ikita꞉ kenke wanda꞉hali paeyao anka꞉lopuna꞉ epeaala꞉ tapakee. Ikita꞉ Koda꞉ pa꞉ta꞉ make mo Sipisipi Ma꞉na꞉ Ikiki pa꞉ta꞉ make titina꞉ halo pa꞉la꞉ tapakee.

Peneme Yaeyekeeki 5:9

Ikana꞉ma꞉ panake emeli homeke alota꞉ Neketa꞉ mo pi ula꞉ buka mea tonkaake ale yamba꞉lapeketa꞉ ota꞉ ana꞉ pa꞉la꞉me. Pa ekipeke neketa꞉ limikime. Kutupa nakana꞉ma꞉ naka꞉ wema꞉ mo wanda꞉halita꞉ Koda꞉na꞉ wanda꞉hali haena꞉yeke hambeleme. Ikita꞉ tapake ta꞉ta꞉ ta꞉ta꞉ make pi ta꞉ta꞉ ta꞉ta꞉ make kapomani manuma꞉ handeteke hala꞉ da ta꞉ta꞉ ta꞉ta꞉ make tutu ta꞉ta꞉ ta꞉ta꞉ paeyao pa꞉ta꞉ hambeleme.