ZEFANYA 2:7 - Sura' Madatu

⁷ Iatu randan tasik la napotaa to Yehuda torronapa, la nasolan tu domba inde to lako anna kande riu, lan lu banuanna to Askelon la nanii torro ma’bongi, belanna PUANG iamo Kapenombanna, la umparinaai sia la umpopembalii tu dalle’na.

ZEFANYA 2:7 ပူးပေါင်းရင်းမြစ်များ

KADADIAN 50:24

Ma’kadami Yusuf lako mintu’ siulu’na nakua: La matemo’, apa manassa la Nakamaseikomi Puang Matua sia Natassu’ikomi sun lan mai tondok iate anna solangkomi langngan to tana Naallu’ lako Abraham, Ishak na Yakub Napandanni sumpa.

PA’PUDIAN 80:14

Napepuraimo bai lampung, sia angganna olo’-olo’ dio lu padang pura ungkandei.

PA’PUDIAN 85:1

Lu lakona pangala sengo. Pa’pudianna bati’na Korah.

KATASSURAN 4:31

Napatonganmi to buda tu kadanna Musa sia iatonna rangimi, kumua Nakilalaimo PUANG sia Natiromo tu kamaparrisanna, tukkumi menomba.

YESAYA 11:11

Allo ia dukato la dadi kumua Puang la unnete’ pole limanNa la ulla’bakki sule tu taunNa tu mai torronapa, tu mai torronapa dio Asyur, dio Mesir, dio Patros, dio Etiopia, dio Elam, dio Sinear, dio Hamat na dio lu tondok ma’randan tasik.

YESAYA 11:14

Sangadinna la sanginaa sola duai la ma’palulako matampu’ undammak palempengna to Filistin, anna pangrampai tu to rampe matallo; iatu limanna la ussabak to Edom sola to Moab sia mintu’ to Amon la mengkanorong lako kalena.

YESAYA 11:16

Attu iato la den tu batatta naola taunNa tu torrona siapa, iamotu torrona siapa dio Asyur, susito pirambongi’ dipadenan to Israel tonna tassu’ lan mai tondok Mesir.

YESAYA 14:1

Belanna Nakaturu-turui PUANG tu Yakub sia la tontong Natonno’ tu Israel sia la Napatorro lan tondokna; anna iatu to salian lembang la menturu’ lako to Israel sia la mareke’ lako rapunna Yakub.

YESAYA 32:14

Belanna iatu tambakuku mendadimo kota talo ditampe, iatu kamaruasanna kota membalimo biung-biungan. Sia iatu Ofel sia Menara pa’kampan mendadi lo’ko’mo tontong sae lakona, napoparannu keledai lampung sia nanii baanan sapi sola domba siga’luan undaka’ kande.

YEREMIA 23:3

Apa iatu mintu’ domba torroKu la Kurampun lan mai mintu’ tondok, tu Kunii mangka urrambai sia la Kupasule lako padang dinii ungkambi’i, anna memba’ka’ sia sabuda-budanna.

YEREMIA 29:10

Belanna nakua kadanNa PUANG: Iatu tonganna, ianna ganna’mo pitungpulo taunna dio Babel, la Kuto’longikomi sia la Kupalalo lako kalemi tu pangallu’ meloKu sia la Kupasulekomi lako inan iate.

YEREMIA 29:14

Sia Kuelorangkomi la unnapparanNa’, kadanNa PUANG, sia la Kupopembali tu toto’mi, sia la Kupulungkomi dio mai mintu’ bangsa sia dio mai mintu’ inan tu Kunii urrambaikomi male, kadanNa PUANG, sia la Kupasulekomi lako inan, tu Kunii mesua umpa’pepalirangkomi dio mai.

YEREMIA 3:18

Attu iato to lan tondok Yehuda la male sitammu to lan tondok Israel, anna tau iato pada la sae lu daa mai padang daa ulunna salu lako padang Kukamaseammo nene’ to dolomi la napomana’.

YEREMIA 30:3

Belanna tonganna la sae tu allona, kadanNa PUANG, ke Kupopembalii tu toto’na taungKu Israel sia Yehuda, kadanNa PUANG, sia umpasulei tu tau iato mai tama tondok, tu mangka Kukamasean nene’ to dolona, kumua anna pomana’i.

YEREMIA 31:7

Belanna nakua kadanNa PUANG: Unnarrak-arrakkomi diona Yakub, sia kumalasi-lasikomi diona pangulunna mintu’ bangsa; pa’petaleranni sia pudii sia ma’kadakomi kumua: Narampanammo PUANG tu taunNa, iamotu to Israel torronapa.

YEREMIA 32:44

Iatu pa’lak la naalli tau doi’ sia unggaraga sura’ kasiallian, anna ca’i sia naalan sa’bi la ussa’bii dio tana Benyamin sia lili’na Yerusalem sia lan mintu’ kota Yehuda, sia lan mintu’ tondok dao Ma’buntunna sia lan mintu’ tondok dio Padang Merrantena sia lan mintu’ tondok lo’ Pollo’na uai; belanna la Kupopembali tu toto’na tau iato mai, kadanNa PUANG.

YEREMIA 33:12

Nakua kadanNa PUANGna mintu’ ma’dandan maritik: Lan inan iate tu sanggangmo, naurungan moi misa’ tolino ba’tu misa’ patuoan tae’mo lan, sia lan lu mintu’ kotana la den pole’mo padang kariuan, la nanii to mangkambi’ umpakande dombana.

YEREMIA 33:7

Sia la Kupopembali tu toto’na Yehuda sia Israel sia la Kupabangun tu tau iato mai susito dolona.

YEREMIA 47:5

Iatu Gaza digalettungimo sia Askelon disanggangmo; e to Enak tu torronapa, la sangapaporoko untori’-tori’ kalemu?

YEHEZKIEL 39:25

Iamoto, inde sia tu kadanNa Puangta PUANG, totemo la Kupasule tama dandanna tu Yakub sia la Kukamasei tu mintu’ to Israel sia la natukka’Na’ ara’Ku belanna sanga madatungKu.

HOSEA 6:11

Sia iko duka, e Yehuda, dipasakkarammoko tu bura padang, ke Kupopembalii sule tu dalle’na taungKu.

OBAJA 1:19

Iatu tau lo’ padang rampe Lo’na lu la unnala buntunna Esau napobuntu, sia iatu tau dio padang Merrantena la unnala tondok to Filistin napotondok; iatu tau iato mai la umpopadang padang Efraim sia padang Samaria, sia Benyamin la umpopadang Gilead.

MIKHA 2:12

Tonganna la Kurampunkomi sola nasang, e Yakub, ondongpi la Kupulung tu to Israel, torronapa. Iatu tau iato mai la Kurampun butung domba lan misa’ bontong sia sangtinti misa’ tuntunan lan lu padang kariuan. Inde to dio la mamak bang belanna kabudanna tau.

MIKHA 4:10

Malimukku-mukkuko sia melallakko, e anak dara Sion, susito manguria’; belanna totemo la tassu’ko lan mai kota, ammu torro dio lu padang sia la rampoko lako Babel. Inde to dio la dinii urrampanangko; inde to dio la Nanii PUANG ullendokangko lan mai limanna ualimmu.

MIKHA 4:7

Iatu to keppa la Kupadadi to torrona sia iatu to dirambai male la Kupadadi misa’ bangsa mawatang, anNa PUANG, la Undatui dao buntu Sion, randuk totemo tontong sae lakona.

ZEFANYA 2:9

Iamoto, la lelukraka tuoKu, kadanNa PUANGna mintu’ ma’dandan maritik, Kapenombanna Israel, tonganna iatu Moab la dadi susi Sodom, sia iatu to Amon la susi Gomora, iamotu padang nanii a’da’ sia nanii pangkalian sia, sia padang lo’bang sae lakona. Iatu torronapa tu taungKu, la urrampai tu tau iato mai na iatu sesanna sangpetayanangKu la umpomana’i.

ZEFANYA 3:13

Iatu to torrona Israel tae’mo nala ma’pakario-rio ba’tu ma’kada tang tongan sia iatu lila pa’pakenan la tae’mo lan sadangna, belanna tau iato mai la ungkande riu dio padang kariuan sia la matindo sia tae’mo misa’ tau la umpatirambanni.

ZEFANYA 3:20

Attu iato la Kupasaekomi, iamotu attu la Kunii urrampunkomi. Belanna la Kupadadikomi misa’ sanga kalelean sia kadipudian dio lu mintu’ bangsa dao kuli’na padang, ke Kupopembalimi tu dalle’mi dio pentiromi, kadanNa PUANG.

HAGAI 1:12

Attu iato naperangiimi Zerubabel, anakna Sealtiel sia Yosua, anakna Yozadak, tominaa kapua, sia mintu’ to buda, tu torronapa, tu gamaranNa PUANG, Kapenombanna, sia iatu kadanna nabi Hagai, tu Nasua PUANG, Kapenombanna, umparampoi lako tau iato mai, anna mataku’ tu to buda dio olona PUANG.

HAGAI 2:2

Iatonna bulan ma’pempitu, allo ma’penduangpulo mmisa, saemi tu KadanNa PUANG, nalopian nabi Hagai, nakua:

LUKAS 1:68

Mintu’na kadipangkeran lu lako nasang Puang Kapenombanna to Israel, belanna denmo mamaseNa umpemaranga to Napilei, Napadenanni kadila’bakan.

LUKAS 7:16

Iatu tau mintu’, saemi kamatakuranna, naumpakaraya Puang Matua, nakua: Misa’ nabi kapua bendanmo lan tondokta, sia Natontongimo Puang Matua tu to Napilei.

PENGGAURANNA RASULU’ 8:26

Denmi misa’ malaeka’Na Puang ma’kada lako Filipus nakua: Ke’de’ko mumale sau’ unnola lalan dao mai Yerusalem rokko Gaza; lalan iato kasalan.

PENGGAURANNA RASULU’ 8:40

Apa iatu Filipus dikabu’tui dio Asdod; mukkun sia male umpa’peissanan Kareba-kaparannuan lan lu mintu’ tondok, anna sae lako Kaisarea.

ROMA 11:5

Ten dukamoto te attu iate den siapa torrona situru’ tu pa’tonno’na pa’ka- masean.

RUT 1:6

Mangkato ke’de’mi sola tu minintunna baine da’dua anna sule dio mai padang marantena Moab, belanna denmo kareba narangi dio padang marantena Moab, kumua Nakilalaimo PUANG tu taunNa, anNa benni kande.