ZAKHARIA 7:6 - Sura' Madatu

⁶ Sia iammi kumande sia mangiru’, tae’raka nakamu kalena kumande sia mangiru’?

ZAKHARIA 7:6 ပူးပေါင်းရင်းမြစ်များ

1 OSSORANNA DATU 29:22

Kumandemi sia mangiru’ tu tau iato mai dio oloNa PUANG situang kaparannuan kapua, ma’penduanna unnangka’ Salomo, anakna Daud, dadi datu, anna tokkoanni PUANG dadi arung, na Zadok dadi to minaa.

YESAYA 43:23

Tae’ra mubaanNa’ domba la dipopemala’ pantunu pu’pu’mu sia tae’ra mupakalangka’Na’ pemala’ pangrere’mu tae’ dukara Kupamatana’ko diona kande dipemalaran sia tae’ dukara Kutuntunko diona pantunu dupa.

YESAYA 58:3

Nakua: Ma’apai angki ma’puasa anna tae’ Mitiroi, ma’apai angki urra’takki kaleki natae’ Miissanni? Tonganna iatommi ma’puasa ma’balilikomi ammi masero sia miparuku bang tu mintu’ to sumaromi mengkarang.

HOSEA 8:13

Umpennoloan pemala’ tu tau iato mai, iamo tu duku’, anna kandei. Apa tae’ nakalo’i penaanNa PUANG to; totemo Nakilalaimo Puang tu kakadakeanna tau iato mai sia Naukungi diona tu kasalanna; la sule tu tau iato mai lako Mesir.

HOSEA 9:4

Tae’ anna untedokan uai anggoro’ PUANG tu tau iato mai, sia tae’ anna alai penaanNa Puang tu pemala’ pangrere’na; disanga kande ro’ lako kalena tau iato mai; mintu’ tau tu ungkandei urruttakki kalena, belanna iatu roti iato la napokandena siamo, sia tae’ anna ma’din dibaa tama banuanNa PUANG.

ZAKHARIA 7:5

Pokadai lako mintu’ tau lan lu tondok sia lako mintu’ to minaa, kumua: Iammi ma’puasa sia umbating lan bulan ma’pellima sia bulan ma’pempitu lan pitungpulomo taun lendu’na, tonganrokomika ma’puasa belanna Aku?

ZAKHARIA 7:7

Tang susi dukaraka to tu diona mintu’ kadanNa PUANG tu Napa’peissanan nalopian mintu’ nabi dolona, tonna torroipi tau tu Yerusalem sola mintu’ kota untikui sia tonna rapa’pa sia tonna torroipi tau tu padang rampe Lo’na lu sia Padang Merrantena? –

1 KORINTUS 10:31

Iamoto, la iake kumandekomi, ba’tu mangiru’, la diona umba-umba misa’ penggaurammi, pogau’i tu mintu’nato situru’ tu la Napomala’bi’na Puang Matua.

PA’TOLE 12:7

Indemoto la minii kumande dio oloNa PUANG Kapenombammi, sia parannu la kamu la iatu mintu’ to lan banuammi diona tu mintu’ apa mitoe tu Nanii PUANG, Kapenombammi umpamasakkekomi.

PA’TOLE 14:26

Sia iatu doi’ iato la muallian mintu’ apa muporai, iamotu sapi ba’tu domba sia bembe’ ba’tu uai anggoro’ ba’tu pangiru’ mepamalango, ba’tu iatu apa muporai, sia la kumandeko inde to dio, dio oloNa PUANG, Kapenombammu, sia parannu-rannuko, la iko la iatu mai to lan banuammu.

KOLOSE 3:17

Na apa-apa mipogau’, la diona kada la diona pengkarangan, mintu’na la mipogau’ lan sanganNa Puang Yesu, ammi ma’kurre sumanga’ langngan Puang Matua, iamotu Ambe’, tete dio Kalena.

1 SAMUEL 16:7

Apa sae tu kadanNa PUANG lako Samuel, nakua: Da narupanna bang mutiro ba’tu kakalandoanna kalena, belanna tae’ naalai penaangKu. Belanna iatu natirona tolino, tae’ na ia bang tongan; belanna iatu tolino ia manna tu apa dio tingayona natiro, apa PUANG untiroi tarru’ tama ba’teng.