YUNUS 1:9 - Sura' Madatu

⁹ Ma’kadami lako tau iato mai nakua: Iate aku te to Ibrani sia umpenombaina’ PUANG, Kapenomban dao suruga, tu mangka ungkombong tasik sia karangkean.

YUNUS 1:9 ပူးပေါင်းရင်းမြစ်များ

KADADIAN 1:10

Nasangaimi Puang Matua kapadanganna tu karangkean sia iatu nanii ma’misa uai Nasanga tasik; Natiroi Puang Matua, kumua melo.

KADADIAN 14:13

Ta’kala saemi misa’ tau tu umpallaian kalena umpokadai tu iannato lako Abram, to Ibrani, torro dio to’ kayu tarpin Mamre, misa’ to Amori, tu siulu’ Eskol sia siulu’na Aner, iamo to sibasse Abram.

KADADIAN 24:7

Iatu PUANG, Kapenomban dao suruga, tu mangka ussuana’ sun lan mai banuanna ambe’ku sia lan mai tondokna sangdadiangku sia mangka ma’kada lako kaleku Nabassei kada Nakua: La Kukamasean bati’mu te padang iate, Ia dukamo la ussua malaeka’Na dolo dio to’ mupatunna, ammu alanni baine tu anakku dio mai.

KADADIAN 39:14

natambaimi tu mintu’ tau lan banuanna nama’kada lako nakua: Tiromi, nabaangki’ sae te to Ibrani, la umpaningo-ningoiki’, belanna sae lako kaleku la ussangamparanna’, apa metambana’ umpekapuai gamarangku.

2 DATU 17:25

Iatonna mane ma’tondok dio, tae’ napenombai PUANG tu tau iato mai; iamoto Nasuai PUANG tu ba’tu pira-pira singa lao umpatei tu ba’tu pira-pira tau.

2 DATU 17:28

Saemi tu tau misa’ dio mai mintu’ to minaa tu napali’ dio mai Samaria, anna ma’tondok dio Betel, sia naada’i, umba la nakua umpenombai PUANG.

EZRA 1:2

Inde sia tu kadanna Koresh, datu Persia nakua: Mintu’ kadatuan dao te kuli’na padang Nakamaseammo’ PUANG, Kapenombanna langi’, sia Napasanmo’ la umbangunanNi misa’ banua dio Yerusalem, lan Yehuda.

EZRA 5:11

Mebalimi tu tau iato mai lako kaleki, nakua: Kami te taunNakan Kapenombanna langi’ sola lino, sia kibangunmo sule te banua iate, tu mangka dibangun masai allomo lendu’na, tu nabangun sia napasundun misa’ datu tarompo’na to Israel.

NEHEMIA 1:4

Iatongku rangii te mintu’ kada iate, unno’ko’mo’ tumangi’ sia ma’pote dibolong ba’tu pirang-pirang allo. Ma’puasa dukamo’ sia massambayang dio oloNa Puang Matua dao suruga,

NEHEMIA 2:4

Ma’kadami datu lako kaleku nakua: Apara palakummu? Attu iato massambayangmo’ lako Puang Matua dao suruga.

NEHEMIA 9:6

Kamu mannari tu PUANG, Kamumo tu mangka umpadadi langi’, ondongpi langi’ tu daona lu mintu’ langi’ sia mintu’ ma’dandan maritikna, sia lino sola mintu’ tu untongkonni sia tasik sia mintu’ tu apa lan; sia Kamu umpatuoi tu mintu’na sia mintu’ ma’dandan maritik dao langi’ tukku menomba dio oloMi.

AYUB 1:9

Mebalimi tu deata bulituk lako PUANG, nakua: Ungkataku’ punala bangraka Puang Matua tu Ayub?

PA’PUDIAN 136:26

Pudimi tu Kapenomban dao suruga, belanna iatu kamasokananNa tang tileluk sae lakona.

KATASSURAN 1:15

Sia nakuapa datu Mesir lako to ma’pakianakna to Ibrani, misa’ disanga Sifra na misa’ disanga Pua:

KATASSURAN 2:13

Iatonna masiang tassu’ pole’omi, natiroi tu da’dua to Ibrani marassan sikambean nakuammi tu solana: Ma’apai ammu kambei tu sangsiulurammu?

DANIEL 2:44

Lan attunna mintu’ datu iato la Napabendan Puang Matua dao suruga tu misa’ kadatuan tang la sanggang len sae lakona sia iatu parentana kadatuan iato tang la lele len lako bangsa senga’: iamo la unnisak-nisakki sia la umputtai tu mintu’ kadatuan dipokada undinna, apa ia manna ia la marendeng sae lakona,

HOSEA 3:5

Undinnato la mengkatoba’ tu to Israel, sia undaka’ PUANG Kapenombanna, sia Daud datunna, na sae mennolo ma’parondo tu tau iato mai lako PUANG sia lako kameloanNa, – lan attu la sae.

PENGGAURANNA RASULU’ 14:15

Nakua: E tau, ma’apari ammi pogau’ri te iannate? Kami te tolino duka bangsiakan susi kamu, sia umpa’peissanangkan Kareba-kaparannuan lako kalemi, kumua ammi memboko’ dio mai apa tae’ bua’na ammi lu lako Puang Matua matontongan, tu umpadadi langi’ sia lino sia tasik na mintu’ issinna.

PENGGAURANNA RASULU’ 27:23

Belanna sangmai’ bongi den malaeka’Na Puang Matua, tu Puang kupopuang sia kupenombai, ke’de’ dio sa’deku,

FILIPI 3:5

tu disunna’ tonna karuamo allona dadingku, bati’na to Israel, dio mai to ma’suku Benyamin, to Ibrani ma’gau’ to Ibrani tongan; diona pangalukan Sukaran aluk, aku misa’ to Farisi;

KADA OMBO’ LAKO RASULU’ YOHANES 11:13

Iatonna attu ia dukato saemi lino’ kapua, naurunganni mangsan taa sangpulona tu tondok iato; pitungsa’bu tau mate belanna lino’ iato, na iatu torronapa lendu’ mataku’na, anna pakala’bi’i tu Puang Matua dao suruga.

KADA OMBO’ LAKO RASULU’ YOHANES 15:4

Mindara tu tang mataku’, o Puang, sia tang umpakala’bi’ sangamMi? Belanna kamu manna tu maindan, na mintu’ bangsa la mennolo sia umpenombaiKomi, apa payanmo tu mintu’ pangra’ta’ malambu’Mi.

KADA OMBO’ LAKO RASULU’ YOHANES 16:11

sia umpa’kada solangi Puang Matua dao suruga belanna kamapa’diranna sia bundangna; anna tae’ duka namengkatoba’ dio mai penggauranna.