YOSUA 4:3 - Sura' Madatu

³ Sia suai tu tau iato, kumua: Alakomi batu sangpulo dua indete tangngana Yordan, dio mai tu inan nanii lette’ to minaa bendan bantang, ammi baai lamban lian, sia patorroi lan pa’bongian tu la minii ma’bongi te bongi iate.

YOSUA 4:3 ပူးပေါင်းရင်းမြစ်များ

KADADIAN 28:22

Iate batu tu kupabendan la dadi misa’ tanda dianna batu silambi’ iato, mendadi banuanNa Puang Matua, angku penombangKomi sangtaa sangpulona tu mintu’ barang apa Mikamaseanna’.

PA’PUDIAN 103:2

Pudimi tu PUANG, e sumanga’ku, sia da naden misa’ mukalupai tu pa’kamaseNa.

PA’PUDIAN 11:4

Iatu PUANG tongkon lan banua kabusunganNa, sia lan suruga tu isungan kapayunganNa PUANG; mentiro tu matanNa, sia kulimbang matanNa ussudi mintu’ ma’rupa tau.

LUKAS 19:40

Mebalimi nakua: Kukua lako kalemi: Iake la ma’loko-lokoi tinde mai, inang la kumalasi-lasi tu batu.

YOSUA 24:27

Ma’kadami tu Yosua lako bangsa iato, nakua: Manassa batu iate la mendadi tanda sa’bi la untiroki’, belanna narangimo batu tu mintu’ kadanNa PUANG, tu Napokadamo lako kaleta. Iamoto la dadimo tanda sa’bi, la untirokomi, kumua da mipeonganni tu Kapenombammi.

YOSUA 3:13

Iake mellesemi lan to’ uai Yordan tu pala’ lette’na mintu’ to minaa tu umbulle patti PUANG, Iamo Puangna mintu’ ma’dandan maritik dao kuli’na padang, tipa’duami tu uai Yordan; na iatu uai lolong daa mai ulunna la tadang butung to misa’ panampo.

YOSUA 4:4

Natambaimi Yosua tu muane sangpulo dua tu napamanassa dio mai to Israel, simisa’ muane, ke misa’oi suku,

YOSUA 4:8

Napogau’mi to Israel susitu napa’parentan Yosua. Naangka’mi tau iato mai tu batu sangpulo dua lan mai tangnga Yordan, susitu mangka Napokada PUANG lako Yosua situru’ bilanganna mintu’ suku to Israel, anna baai tau iato mai lako pa’bongian napatorroi dio.

1 SAMUEL 7:12

Attu iato naalami Samuel tu batu misa’ napabendanni dio kasiallaranna Mizpa na Yesana sia nasangai Eben-Haezer, anna ma’kada nakua: Rampo indete Nanii PUANG untunduiki’.