YOSUA 2:14 - Sura' Madatu

¹⁴ Mebalimi tu tau sola duai lako, nakua: Manassa la kiindo’ikomi, penaangki la ussonda penaammi, podo da mimale umpokadai. Manassa iake Nasorongmi PUANG te tondok iate lako kaleki, la kipogau’mo tu kameloan sia kamarurusan lako kalemi.

YOSUA 2:14 ပူးပေါင်းရင်းမြစ်များ

KADADIAN 24:49

Na totemo, ke mitiroanni kameloan sia maruru’komi lako puangku, la mipokadanna’, angku issanni, kululako kanan, ba’tu lakoraka kairi.

KADADIAN 47:29

Iatonna la madomi’ mate tu Israel, natambaimi tu Yusuf, anna ma’kada lako, nakua: Iake mupakaboro’na’, padiongi to’ garonto’ pupungku tu limammu sia pogau’ko kameloan sia kamarurusan lako kaleku, sia da mupeliang indena’ Mesir.

2 SAMUEL 2:5

Mesuami Daud lako to Yabesh dio Gilead, nakua lako: Naparongko’morokomi PUANG, belanna kamaturu-turuan tu mipogau’ lako puangmi, iamotu Saul, tu mangkamo milamun.

2 SAMUEL 2:6

Totemo na PUANGmora umpakitangkomi kamamasean sia kamarurusan sia aku duka la umpakitangkomi kameloan pada tu mipogau’na, belanna mangkamo mipogau’ tu iannato.

2 SAMUEL 9:1

Ma’kadami tu Daud nakua: Denparaka torro tu bati’na Saul, angku pogau’ kamasokanan lako kalena belanna Yonatan?

1 DATU 20:39

Iatonna lendu’ tu datu, metambami tinde nabi lako nakua: Iatonna tassu’ tu taummi anna tama kasirarian, ta’kala saemi misa’ tau untambaina’ lendu’, tu ussolan misa’ tau lako kaleku sia ma’kada nakua: Kampai te tau iate; ianna pa’de, moi umba-umba nakua, manassa sunga’mu la ussonda sunga’na, boko’ ke mubaya’na’ salaka misa’ talenta.

SARAMBU PEADA’ 14:22

Tang la pusaraka tu to umpogau’ bang kadake? Apa sikambi’ ia pa’kaboro’ sia kamarurusan tu to umpogau’ kameloan.

SARAMBU PEADA’ 18:24

Iatu to buda punala bangri tau naposola naposanggang, apa den duka sipissan na iatu sangmane, maruru’ sia marengke’ tongan, na iatu siulu’.

MATIUS 5:7

Maupa’ tu mintu’ to unnampui kamamasean, belanna tau iato la dikamasei.

PENGGAURANNA RASULU’ 23:22

Nasusito nasuami kamandang tinde pia sule nakua ungkuanni: Da mupokada lenni lako misa’ duka tau, kumua mangkamo mupokada te iannate lako kaleku.

YOSUA 2:13

kumua tae’ mila umpatei tu indo’ku sola ambe’ku, sia mintu’ siulu’ku muane sola baine sia iatu mai solana sia la mirampanangkan dio mai kamatean.

YOSUA 2:15

Narorro’mi ulang tu tau rokko dao mai pentiroan, belanna iatu banuanna baine iato rampe salian dao benteng tembo’ kota, na iatu baine iato torro dao benteng tembo’.

YOSUA 6:17

Apa iate kota iate sola mintu’ tu apa lan la disabu’i belanna dipemalian PUANG; sangadinna Rahab, tu baine bualang la dipatuo, la ia la mintu’ tau nasolan la banuanna, belanna nabuni tu pesua mangka tasua.

YOSUA 6:22

Ma’kadami Yosua lako tu tau sola duai tu mangkamo usserre’i tondok iato, nakua: Malekomi tama banuanna tu baine kadake gau’, ammi patassu’i tu baine iato sola mintu’ to lan banuanna, susitu mipalaoan sumpa unnallu’i lako kalena.

YOSUA 6:25

Susimoto tu Yosua umpatuo Rahab, tu baine bualang, sia sangdadianna sia mintu’ to lan banuanna; torromi dio lu mintu’ to Israel sae lako allo iate, belanna nabuni tu to disua da’dua, tu nasua Yosua male usserre’i Yerikho.

1 SAMUEL 20:8

Pa’petiroanni tu kamarurusammu lako taummu, belanna mangkamoki’ sibasse dio oloNa PUANG. Iake denni kakelokangku, iko bangmo umpateina’. Da’iomito musolanna’ lako ambe’mu.