YOHANES 9:7 - Sura' Madatu

⁷ sia Nakua ungkuanni: Laomoko umbasei lako limbong Siloam!, ke dipallemba’i battuananna: Disua. Laomi nabasei, nasule millikmo matanna.

YOHANES 9:7 ပူးပေါင်းရင်းမြစ်များ

NEHEMIA 3:15

Iatu babangan Kalimbuang napemeloi Salum, anakna Kolhoze, kapala lembang Mizpa; anna bangunni sule sia napapa-sapei sia naba’bai anna palakoi salli’na sia gontingna, ondongpi (nabangun sule) tu rinding tembo’ limbong tu nanii uai saruran tama, sikandappi’ pa’lakna datu sae lako eran tu solo’ dao mai kotana Daud.

PA’PUDIAN 146:8

Sia PUANG umpamillik mata to buta, PUANG umpakalolo to tikongko, sia PUANG ungkamasei to malambu’.

KATASSURAN 4:11

Ma’kadami tu PUANG Nakua: Mindara umbenni puduk tu to lino, ba’tu mindara umpamamang tau, ba’tu umpataru tau, ba’tu umpopakita tau, ba’tu umpabuta tau? Tae’raka na Aku te, tu PUANG?

YESAYA 32:3

Attu iato iatu matanna to pakita tae’mo apa ussiloi, sia iatu talinganna to parangi la ma’perangi;

YESAYA 35:5

Attu iato to buta la dipapakita sia to taru la dipaparangi.

YESAYA 42:7

la umpamillik mata to buta, la untassu’i to ditarungku lan mai pa’tarungkuan sia la urrampananni lan mai pa’pattangan tu to unno’ko’ lan kamalillinan.

YESAYA 43:8

Eloranni sun tu bangsa buta iato, moi anna kemata, sia iatu mai to taru, moi anna ketalinga.

YESAYA 8:6

Tu belanna tang nabilang bangsa iate tu uai Syiloah, tu lolong unnentang, sia umposende diona Rezin na anakna Remalya,

MATIUS 11:5

Iamotu to buta pakita sia to kupi’ lumingka, to golenan dipamondo sia to taru parangi, sia to mate dipatuo sia Kareba kaparannuan dipa’peissanan lako to kalala’.

LUKAS 13:4

Na iatu sangpulo karua tau nasongkai menara dio Siloam namate, misangaraka ondong ia kapuana salana na mintu’ to torro dio Yerusalem?

LUKAS 2:32

Iamotu parrang unnarrang to kalillinan sia misa’ kamala’biran lako taumMi to Israel.

YOHANES 10:36

sipaturaka la mikua lako tu To Napamaindan Ambe’ sia Nasua tama te lino, kumua: Umpa’kada solangiKomi Puang Matua, tu belanna Kukua: Aku te, AnaknaNa’ Puang Matua?

YOHANES 11:37

Apa denno pira tu kumua: To buta Napamillikmo matanna, nala tae’oraka Nala kuasa umpogau’i da’ namate te tau iate?

YOHANES 9:11

Nakuami mebali: Den tau misa’ disanga Yesu ullelo’i litak, nasapuranni matangku sia Nakua: Laomoko umbasei lako limbong Siloam. Laomo’ umbasei lako, angku pakita.

YOHANES 9:39

Nakuami Yesu: Iatu kasaeangKu tama te lino, belanna diona kapangukungan, kumua anna pakita tu to tang pakita, sia buta tu to pakita.

PENGGAURANNA RASULU’ 26:18

ammu pamillikki tu matanna, anna memboko’ dio mai malillinna lako maserona, sia dio mai parentana deata bulituk lako Puang Matua, anna kabu’tui kadipa’deian kasalan sia mana’ sisola tu mintu’ to dipamaindan tete dio kapatonganan lako Kaleku.

ROMA 8:3

Apa iatu tang nalambi’na Sukaran aluk, belanna langga’ diona pa’kalean, Napasundun Puang Matua, tu ussua AnakNa kaleNa unnala a’gan pa’kalean mengkaola lako kasalan, tu belanna iamoratu kasalan, anNa pakannai ukungan tu kasalan, lan pa’kalean,

GALATIA 4:4

Apa iatonna lambi’mi kagannaranna attu, Nasuami Puang Matua tu AnakNa tu dadi dio mai misa’ baine, tu dikianakan naonganni Sukaran aluk.