KADA OMBO’ LAKO RASULU’ YOHANES 2:7 - Sura' Madatu

⁷ Minda-minda ketalinga, la naperangii tu apa Napokada Penaa lako mintu’ kombongan. Na lako to patalo, la Kupakande bua katuoan tu lan FirdausNa Puang Matua.

KADA OMBO’ LAKO RASULU’ YOHANES 2:7 ပူးပေါင်းရင်းမြစ်များ

KADADIAN 2:9

Indeto dio Nanii PUANG Kapenomban umpatuo ma’rupa-rupa kayu, naporai tau untiroi sia melo la dikande, sia den duka tu kayu katuoan, lan tangnga pa’lak iato, sia kayu kapaissanan diona melo na kadake.

SARAMBU PEADA’ 11:30

Iatu buanna to malambu’ iamo sangto’ kayu katuoan sia minda-minda tu kinaa, ungkadamak tau.

SARAMBU PEADA’ 13:12

Iatu kapa’rannuanan dipadapa umpa’dikki penaa, apa ianna sundunmo tu lalan inaa, iamo kayu katuoan.

SARAMBU PEADA’ 15:4

Iatu lila kaboro’ iamo garonto’na katuoan marendeng, apa iatu kada leko’ iamo ussanggang penaa.

SARAMBU PEADA’ 3:18

Iamo napooto’ katuoan minda-minda tu untoei, sia minda-minda tu ulla’ka’i la dipudi kumua to maupa’.

YEHEZKIEL 28:13

Lanko Eden, pa’lakNa Puang Matua, ma’rupa-rupa parimata ussitutu’i kalemu; iamotu parimata yaspisi’ mararang, parimata krisoli’ sia parimata yaspisi’ maido, parimata pirusa’, parimata ake’ maido sia parimata nepri’, parimata lasuri’, parimata ake’ malotong sia parimata malaki’. Bulaan panggaraga tu ussa’pi’i sia umpasila’ka’i lako kalemu; iatommu dipadadi, sakka’ nasangmo tu iannato.

YEHEZKIEL 31:8

Mintu’ kayu arasi’ lan pa’lakNa Puang Matua tae’ umpadanni, iatu takke’-takke’ sendana tae’ nasangtinti tu takke’-takke’na, sia iatu tangke kastala’ tae’ nasama tangkena; tae’ misa’ kayu lan pa’lakNa Puang Matua sangtinti kamaballoanna.

MATIUS 11:15

Minda-minda tu ke talinga, nama’perangi.

MATIUS 13:43

Iake attu iato la parrang susi allo tu mintu’ to malolo penaanna lan Parentana Ambe’Na. Minda-minda tu ketalinga, nama’perangi.

MATIUS 13:9

Minda-minda tu ketalinga, nama’perangi.

MARKUS 4:9

Nakuami Yesu: Minda-minda tu ketalinga la ma’perangi, nama’perangi.

MARKUS 7:15

Tae’ ia tu apa salian ke tamai kale, ma’din urruttakki kalena tau, sangadiri iatu apa lu lan mai kale, tu urruttakki tau.

MARKUS 7:16

(Minda-minda tu ketalinga la ma’perangi, nama’perangi).

LUKAS 23:43

Nakuami Yesu lako: Nakua kadangKu mati’: Manassa ia bangsiamote allo iate, anta sisola lan inan kamanamanan.

LUKAS 8:8

Sia den pira tu ta’pa rokko to’ padang lunak; iatu iannato tuo melo namembua manglokkon pessaratu’. Iatonna pokadai te, metambami tu Yesu nakua: Minda-minda tu ketalinga la ma’perangi, nama’perangi!

YOHANES 16:33

Mintu’nate kupokada lako kalemi, kumua misiria kamarampasan ussisolanNa’. Lan te lino umperasaikomi kamaparrisan; apa pabatta’komi penaammi, belanna Aku te mangkaMo’ untaloi te lino.

1 KORINTUS 2:10

Apa iatu kita Napasombomo Puang Matua lako kaleta tete dio PenaanNa, belanna Iamotu Penaa tu umpelalan mintu’na angge maritik, moi anna apa mandalanNa Puang Matua.

2 KORINTUS 12:4

kumua diangka’ sae tama Firdaus, anna rangii tu kada tang diissan disa’bu’, tu tae’ napato’ nasa’bu’ misa’ tolino.

1 YOHANES 2:13

E mintu’ ambe’, massura’na’ lako kalemi, belanna mitandaimo tu Puang tu inang denmo tempon dio mai. E mintu’ to mangura, massura’na’ lako kalemi, belanna mangkamo mitalo tu deata bulituk.

KADA OMBO’ LAKO RASULU’ YOHANES 13:9

Minda-minda ketalinga, sipatu la ma’perangi.

KADA OMBO’ LAKO RASULU’ YOHANES 14:13

Kurangimi misa’ gamara dao mai langi’ ma’kada nakua: Sura’i susite: Rongko’ tu mintu’ to matemo, iamotu to mate lan Puang randuk totemo. Ondongpi, nakua tu Penaa, iatu tau iato mai la umpelayoan tarru’mo kamasussanna; belanna mintu’ penggauranna undi urrondongi.

KADA OMBO’ LAKO RASULU’ YOHANES 15:2

Kutiro polemi takua to tasik sammin sirau api, sia mintu’ tu to untalomo olo’-olo’ iato sia rapang-rapang dipodeatanna sia angka bilangan sanganna, bendan dio randan tasik sammin untoe katapinNa Puang Matua.

KADA OMBO’ LAKO RASULU’ YOHANES 2:11

Minda-minda ketalinga la naperangii tu apa Napokada Penaa lako mintu’ kombongan na iatu to patalo tae’ nala urrua lenni kasanggangan kamatean ma’penduan.

KADA OMBO’ LAKO RASULU’ YOHANES 2:17

Minda-minda ketalinga la naperangii tu apa Napokada Penaa lako mintu’ kombongan. Na lako tu to patalo, la Kuben manna kabunian, sia la Kuben misa’ batu mabusa na dio batu iato tisura’ misa’ sanga ba’ru, tu tae’ misa’ tau untandai, sangadinna ia manna tu to untarimai.

KADA OMBO’ LAKO RASULU’ YOHANES 21:7

Na iatu to patalo la umpomana’ mintu’ apa iate; Akumo la mendadi Puang Kapenombanna na ia la Kupoanak.

KADA OMBO’ LAKO RASULU’ YOHANES 22:14

Maupa’ tu mintu’ to umbusukki bayu lamba’na, naurunganni den katongananna unnappa’i tu kayu katuoan iato, sia mentama tondok iato unnola babangan.

KADA OMBO’ LAKO RASULU’ YOHANES 22:17

Ma’kadami tu penaa sola baine ma’kapa’ nakua: MaiKomi! Sia iatu to urrangii, melo ke nakua dukai: MaiKomi! Na iatu to ma’rang, melo ke saei, sia minda-minda morai, melo ke natimbai tu uai katuoan tang dibaya’.

KADA OMBO’ LAKO RASULU’ YOHANES 22:2

Lan tangnga lalan lan tondok iato sia patomalinna randanan salu iato den kayu katuoan, membua pessangpulo dua; bulanoi membuaoi, namintu’ daunna napomondo mintu’ bangsa.