NEHEMIA 9:32 - Sura' Madatu

³² Totemo, o Kapenombangki, Kapenomban pasareongan, mawatang sia dikabangnga’, tu ungkaritutui basse sia kamasokanan, da Misanga maringanni tu mintu’ kamandasan urruakanni, la datungki la pangulungki, la tominaangki la nabingki la nene’ todoloki sia mintu’ taumMi, randuk dio mai linona datu Asyur sae lako allo iate.

NEHEMIA 9:32 ပူးပေါင်းရင်းမြစ်များ

1 DATU 8:23

Sia ma’kada nakua: O PUANG, Kapenombanna to Israel, tae’ tu Kapenomban senga’ sangadinna Kamu manna, la lan langi’ dao la dao kuli’na padang diong, tu umpalanda’ basseMi sia kamasokanamMi lako taumMi, tu lantuk penaanna lolang dio oloMi.

2 DATU 15:19

Ke’de’mi tu Pul, datu to Asyur, la ullaoi tondok Israel, apa nasorongan Menahem, sangsa’bu talenta salaka tu Pul, kumua anna tundui umpabantangi tu kadatuan iato lan limanna.

2 DATU 15:29

Iatonna linona Pekah, datu Israel, saemi tu Tiglat-Pileser, datu Asyur, untalo kota Iyon. Abel-Bet-Maakha, Yanoah, Kedesh sia Hazor, Gilead sia Galilea, sia mintu’ tondok Naftali; napali’i tu pa’tondokan lako Asyur.

2 DATU 17:23

sae lako attu Nanii PUANG umpatoyang to Israel dio mai oloNa, susitu mangkamo Napokada nalopian mintu’ taunNa, iamotu mai nabi. Iamoto nadipali’ tu to Israel dio mai tondokna lako tondok Asyur sae lako allo totemo.

2 DATU 17:3

Ke’de’mi tu Salmaneser, datu to Asyur, la ullaoi, apa iatu Hosea lumbang baka direngnge’ lako sia umbaya’ sima.

2 DATU 17:6

Iatonna taun ma’pengkaseramo kadatuanna Hosea natalomi datu Asyur tu Samaria, anna pali’i tu to Israel lako Asyur, sia napopa’tondok dio Halah, dio biring salu Habor, iamo salu dio Gozan, sia dio lu mintu’ kota to Madai.

2 DATU 23:29

Iatonna linona ke’de’mi tu Firaun Nekho, datu Mesir, lako salu Efrat la sirari datu Asyur. Malemi tu datu Yosia umpentammui la unneai; napateimi tu Yosia dio Megido, tonna tiroi.

2 DATU 25:7

Napateimi tau iato mai tu mintu’ anakna muane Zedekia dio tingayona; sia napesuan datu Babel umpopebutai patomalii tu matanna Zedekia sia umpungoi da’dua rante tambaga, anna solanni tau lako Babel.

EZRA 4:10

sia mintu’ bangsa senga’ tu napalele Asnapar, to tarompo’ sia kabarre-alloan, tu napatorro lan kota Samaria sia lan lu lili’ senga’ sambalinna lu Salu, –

EZRA 4:2

saemi tu tau iato mai lako Zerubabel sia mintu’ pangulu rapu nakua: Da’ito anta pabendanni sola, belanna kidaka’ duka tu Kapenombammi, susi kamu; sia memala’ dukakan lako randuk dio mai linona Esarhadon. Datu Asyur, tu mangka ussuakanni sae indete.

EZRA 9:13

Iatonna mangkamo tu mintu’ apa iato rampo lako kaleki napobua’ penggauran kadakeki sia kasalan kapua, anna Kamu, o Kapenombangki, umpasosso’i tu ukungan sipatunna la urrampoikan, sia ungkamaseangkan buda tongan tau dirampanan,

NEHEMIA 1:5

kukua: O PUANG, Puang Matua dao suruga, o Puang Matua pasareongan sia dikabangnga’, tu ungkanana’i basse sia kamasokanan lako tu mintu’ tau ungkamali’Komi sia ungkaritutui pepasanMi.

PA’PUDIAN 47:2

E mintu’ bangsa, massala’pa-la’pakomi, sia unnarrak langngan Puang Matua situang la’tek kaparannuan.

PA’PUDIAN 66:3

La ma’kadakomi lako Puang Matua, kumua: Lendu’ metakuranna tu mintu’ penggauramMi, mintu’ duka ualimMi pudukna bangri mengkanorong Mati’ belanna kuasa kapuamMi.

PA’PUDIAN 66:5

Maikomi untiro penggauranNa Puang Matua; metakuran tu penggauranNa lako mintu’ ma’rupa tau.

KATASSURAN 18:8

Nauleleammi Musa lako matusanna tu mintu’ apa, tu napogau’ PUANG lako Firaun sia lako mintu’ to Mesir, belanna to Israel, sia mintu’ kamasussan urrampoi dio lu lalan sia umba Nakua PUANG urrampananni tu tau iato mai dio mai mintu’-mintu’na.

YESAYA 9:6

La kapua tu parentaNa sia tae’ upu’na tu kamarampasan dao isungan kapayunganna Daud sia lan nalili’ parentaNa, la Napabantang sia Naparandanganni katonganan sia kamaloloan randuk totemo tontong sae lakona; kamamaliranNa PUANGna mintu’ ma’dandan maritik la umpogau’i tu ianna te.

DANIEL 9:4

Massambayangmo’ langngan PUANG, Kapenombangku sia mangaku sala, kukua: O Puang, Puang Matua pasareongan sia metakuran, tu ungkanana’i basse sia kamasokanan lako tu mintu’ to ungkamali’Komi sia ungkaritutui pepasanMi.

DANIEL 9:6

Sia tae’ kiperangii tu mai taumMi, iamotu mai nabi, tu ma’kada tete dio sangamMi lako mintu’ datungki, mintu’ arungki, mintu’ nene’ to doloki sia lako mintu’ tau lan tondok.

DANIEL 9:8

O PUANG, natodingmokan siri’ sia iatu mai datungki, arungki sia nene’ to doloki, belanna kasalammokanni lako Kalemi.

SURA’ KATOMINAAN 26:18

Moi narampoimokomi susito, ke tae’i miperangiiNa’, manassa la Kutompoipa sae lako pempitu, diona kasalammi.

SURA’ KATOMINAAN 26:21

Iake la mieaNa’ sia tae’ miperangiiNa’, manassa la Kupa’dikkikomi pempitu pole’pa makarra’, sitinaya kasalammi.

SURA’ KATOMINAAN 26:24

manassa la Kulaoikomi sia la Kupa’dikki dukakomi pempitu diona kasalammi,

SURA’ KATOMINAAN 26:28

manassa la Kulaoikomi sia la Kuparampoikomi kare’dekan ara’Ku, ondongpi la Kupa’dikkikomi pempitu diona kasalammi.

PA’TOLE 7:12

La dadi tu iannato, ke miperangii te atoran sia mikaritutui tongan, tu Napobannang PUANG, Kapenombammu untoe manda’i tu basse mutanan sola sia umpalanda’i tu kamasoka- nanNa, tu Naallu’ lako nene’ to dolomu, tu Napamatoto’ Napalaoi sumpa.

PA’TOLE 7:13

La Nakamaseiko sia Napamasakkeko sia Napamarapuangko. La Napamasakke tu kakianakanmu sia bura padangmu sia gandungmu sia uai anggoro’ ba’rummu sia minna’mu sia kamabatiranna sapimmu sia kabudanna dombamu sia bembe’mu lan tu tondok, tu mangka Naallu’ Puang lako nene’ to dolomu Napalaoan sumpa, kumua la Nakamaseangko.

PA’TOLE 7:21

Da muma’parondo ungkataku’i tu tau iato, belanna iatu PUANG, Kapenombammu, den musisolan, iamotu Kapenomban pasareongan sia metakuran.

PA’TOLE 7:9

ammu issanni, kumua iatu PUANG, Kapenombammi, Kapenomban misari, iamotu Kapenomban maruru’, tu untoe manda’i tu basse sia umpalanda’ kamasokananNa lako mintu’ to ungkamali’I sia ungkaritutui pepasanNa sae lako massa’bu-sa’bu osso’na.