MIKHA 2:11 - Sura' Madatu

¹¹ Iake denni misa’ tau ma’kedo tang kebattuan sia ma’kada tang tongan, nakua: La kupa’nubuarangko tu diona uai anggoro’ sia pangiru’ palango –, iamoto tu nabinna bangsa iate.

MIKHA 2:11 ပူးပေါင်းရင်းမြစ်များ

1 DATU 13:18

Nakuami te tau lako: Misa’ dukana’ nabi, susi kamu, sia nakuamo malaeka’ lako kaleku tete dio kadanNa PUANG: Solanni sule tama banuammu anna kumande sia mangiru’. Apa iatu iannato napakena.

1 DATU 22:6

Napasipulungmi datu to Israel tu mai nabi, agi-agi a’pa’ ratu’ tau, anna mekutana lako tau iato mai, nakua: La laoraka kurarii tu Ramot dio Gilead, da’i bangmiraka to? Mebalimi tu tau iato mai nakua: Laomokomi, belanna la Nasorong PUANG tu kota iato tama limanna datu.

AYUB 31:5

Iangku kamorang-morang len ba’tu matira’ tu lentekku umpogau’ pa’pakena,

SARAMBU PEADA’ 25:14

Susito salebu’ sia angin tang umbaa uran, susi dukato tu misa’ tau untendeng pamenganna tu tae’ gai’na.

YESAYA 28:7

Ia duka te tau iate mai re’ba len napobua’ uai anggoro’ sia tumbang len naginta’ tuak palango; moi dukato minaa sia nabi re’ba len napobua’ tuak palango, pusa natumang uai anggoro’, tumbang len napobua’ tuak palango, tire’ba len lan patiro mendeata, titu’mu’ len untingayo pa’bisaran.

YESAYA 9:15

Iatu mai panglalanna bangsa iate iamo panglalan sala, sia napapusa nasang tu tau nalalanan.

YEREMIA 14:14

Apa ma’kada PUANG lako kaleku Nakua: Tae’ natongan tu apa napokada mintu’ nabi iato tete dio sangangku; tae’ Kusuai tu tau iato mai, ba’tu umpasanni, ba’tu ma’kada lako kalena. Iatu pa’nubua’na lako kalemi iamo patiro mendeata tang tongan sia kapakita-kitan tae’ gai’na sia pa’pakena bu’tu lan penaanna.

YEREMIA 23:14

Apa dio lu mintu’ nabi Yerusalem Kutiro tu apa megi’giran, iamotu pasandak salu lako rampanan kapa’ sia ma’kada tang tongan; sia napamatoto’ limanna tu mintu’ to umpogau’ kadake naurungan moi misa’ tae’ namengkatoba’ dio mai kakadakeanna. Mintu’ tau iato mai susi Sodom lako Kaleku sia mintu’ pa’tondokanna sangtinti Gomora.

YEREMIA 23:17

Tontong bang tu tau iato mai ma’kada lako to untattaNa’ nakua: Iatu PUANG mangkamo ma’kada Nakua: La marampa’komi, sia ma’kada lako mintu’ to lolang unturu’ kamakarrasanna penaanna, nakua: Moi misa’ tae’ tu kadake la urrampoikomi.

YEREMIA 23:25

Kurangimo tu apa napokada mintu’ nabi, tu ma’nubua’ tang tongan, tete dio sangangKu, nakua: Mangkamo’ mangimpi, mangkamo’ mangimpi.

YEREMIA 23:32

Manassa Aku la ullaoi tu mai pa’nubua’ tu umpokada pangimpi tang tongan, kadanNa PUANG, tu naulelean tau iato mai la umpapusa taungKu tete dio kada tang tonganna sia passedena; tae’ra Kusuai sia tae’ Kupasanni tu tau iato mai; iatu tau iato mai moi misa’ tae’ gai’na lako bangsa iate, kadanNa PUANG.

YEREMIA 28:15

Sia nakua duka nabi Yeremia lako nabi Hananya: Perangii, e Hananya, manassa tae’ nasuako PUANG, sangadinna iko napobannang te bangsa iate urrannuan apa tang tongan.

YEREMIA 5:31

Mintu’ nabi ma’nubua’ tang tongan sia mintu’ to minaa undi duka mesaro la’da’ sia mintu’ taungKu umporai tu iannato. Na apamora la mipogau’ ke katampakannai?

BATING 2:14

Iatu nabimmu untiroangko patiro mendeata tu apa tae’ gai’na sia tae’ patunna, tae’ natuarasangko tu kakadakeammu la undampai tu dalle’mu, untiroangko patiro mendeata, tu tae’ gai’na sia ma’pakena bang.

YEHEZKIEL 13:22

Belanna miparossomo tu penaanna to malambu’ tete dio kamo’rangan, moi natae’ Kupamasussai, sia mipamatoto’ tu limanna to tang mekaaluk, kumua da natibalik dio mai lalan kadakena, anna tuo.

HOSEA 7:14

Tae’ duka nadio mai penaanna tu tau iato mai metamba lako Kaleku, ke sumarroi dao patindoanna. Natori’-tori’ piso tu kalena umpalaku gandung sia uai anggoro’ ba’ru; pabali-bali tongan tu tau iato mai lako Kaleku.

MIKHA 3:11

Iatu mintu’ pangulu ma’paolai salu ungkande pappe’, sia mintu’ to minaa mangada’ umpalaku saro sia mintu’ nabi pakita-kita umpalaku doi’. Moi na susito iatu tau iato mai sande’ duka lako PUANG sia ma’kada nakua: Tae’raka PUANG dio lu kaleta? Tae’ nala urrampoiki’ kamandasan!

MIKHA 3:5

Inde sia tu kadanNa PUANG diona mintu’ nabi, tu umpapusa taungKu, sia iatu ma’kada nakua: maupa’, ke denni apa nakeke’, apa iatu to tae’ bang apa nasuak, nasa’buran rari, nakua:

ROMA 16:18

Belanna iatu to susito, tangia to mekapuang lako Puangta Kristus, sangadinna umpopuang tambukna; sia mamming bang kadanna sia male’so’ untua’ ba’tangi to mai to ma’inaa sangkaloloan.

FILIPI 3:19

Ma’katampakanna tau iato mendadi kasanggangan, sia umpa’deatai tambukna, sia napomasiri’na nasanga napomala’bi’, sia a’gan lino manna nainaa-naa.

1 YOHANES 4:1

E mintu’ pa’kaboro’ku, da mipatongan bangi tu anggenna penaa, sangadinna sudi dolo tu mintu’na penaa iato, ba’tu la lu dio siai mai Puang Matua; belanna budamo nabi tang tongan bu’tu lan lili’na lino.