LUKAS 15:5 - Sura' Madatu

⁵ Iake nakabu’tui, parannumi penaanna male ungkolongi.

LUKAS 15:5 ပူးပေါင်းရင်းမြစ်များ

YESAYA 62:12

La digente’ Bangsa masero pindan tu tau iato mai, sia to Nalendokan PUANG; sia la disangaiko: Kota naporai tau sia kota tang ditampe.

YESAYA 62:5

Belanna susi pia muane lolle’ umpobaine anak dara, susi dukato la sirampeangko to ma’tondok sia susito misa’ muane la diparampo ungkasinnai baine la narampanni kapa’, ten dukamoto tu Kapenombammu la umpopaimanko.

YESAYA 63:9

Mintu’ kapu’duranna tau iato mai Napokapu’duran duka, na tau iato mai Narampanan Malaeka’ tu umpaombo’ Puang. Belanna pa’kaboro’Na sia kamamaseanNa Nala’bakki tu tau iato mai sia Naendekanni sia Naindo’i lan mintu’ attu tempon dio mai dolona.

YEHEZKIEL 18:23

Ma’apai anna la unnalai penaangKu tu kamateanna to tang mekaaluk?, kadanNa Puangta PUANG. Tang ia raka naala penaangKu te, kumua anna mengkatoba’ dio mai lalanna, anna tuo?

YEHEZKIEL 33:11

Ma’kadako lako tau iato mai kumua: La lelukraka tuoKu, kadanNa Puangta PUANG, tae’ naalai penaangKu tu kamateanna to tang mekaaluk, sangadinna mandu naala penaangKu, ke tibalikki tu to tang mekaaluk dio mai lalanna, anna tuo. Tibalikkomi, tibalikkomi dio mai lalan kadakemi. Belanna ma’apari ammi la matera, e to Israel?

MIKHA 5:4

Sia Ia la oto’na kasalamaran. Iake la tamai tondokta tu to Asyur sia iake la ullesei tongkonan layukta, manassa la tapabendanan pitu to mangkambi’ sia karua arung dio mai tolino la unneai,

MIKHA 7:18

Mindara tu Kapenomban susi Kamu, tu umpagarri’ kakadakean sia umpaboko’i kapatodo-tintinganna mana’ torroNapa, tu tang unnanna kasengkeanNa tontong sae lakona, sangadinna umpopaiman kamasokanan!

ZEFANYA 3:17

Iatu PUANG, Kapenombammu, lan lu tangnga’mu, iamotu to lalong mangrampanan. La parannu tu Puang umposendeko, la umpakappa kaleNa tete dio pa’kaboro’Na; la mela’tek sia unnarrak umpopaimanko.

LUKAS 15:32

Sipatuki’ ma’marua’-rua’ sia parannu-rannu, belanna iate adimmu matemo anna tuomo sule, pa’demo anna dikabu’tuimo sule.

LUKAS 15:4

Mindarokomi kamu tu unnampui domba saratu’, ke pa’dei misa’, tang untampei tu kaseranna pulona ngkasera dio lu padang, namale undaka’i tu misa’, tu pa’dena sanaalanna?

LUKAS 15:6

Sia ianna rampomo lako banuanna, natambaimi tu mintu’ sangmanena sia sangbanuanna sirampun, nama’kada lako, nakua: La parannu-rannuki’ sola, belanna kukabu’tuimo sule tu domba pa’deku.

LUKAS 19:9

Nakuami Yesu lako: Ia duka bangsiamote allo iate narampoi kamakarimmanan te banua iate, belanna iate anakna duka Abraham;

LUKAS 23:43

Nakuami Yesu lako: Nakua kadangKu mati’: Manassa ia bangsiamote allo iate, anta sisola lan inan kamanamanan.

YOHANES 15:11

Mintu’nate Kupokada lako kalemi, kumua anna tontong lan kalemi tu kaparannuangKu, sia sundun tu kaparannuammi.

EFESUS 2:10

Belanna kita te panampaNaki’, Napadadiki’ lan Kristus Yesu la umpogau’ kameloan, tu Naparandan dolomo Puang Matua, kumua anta karitutui tu mintu’nato.

EFESUS 3:7

Anna aku dipadadi to ma’kamayana Kareba-kaparannuan, situru’ serong pa’kamaseanNa Puang Matua, tu Napa’kamasean lako kaleku sitinaya pengkarangan kamatotoranNa.

1 TESALONIKA 1:5

Belanna iatu Kareba-kaparannuan kipa’peissanan, rampomo lako kalemi tangia kumua kada manna, sangadinna situru’ duka kamatotoran sia Penaa Masallo’ sia kamanassan tongan, susitu inang miissanmo kumua tumba tu katorroangki misisolan tu belanna kamu.

2 TIMOTIUS 2:26

anna mengkilala sia tilendok sule dio mai poyana deata bulituk, tu ungkurungi, la umpogau’ pa’poraianna.

IBRANI 12:2

anta mentiro lu lako Yesu, tu panglalan sia umpasundun kapatonganan. Belanna sondana kaparannuan dipaoloanNi, anNa mangka untanggung kayu pea’ta’ tang Nakuamo siri’, unno’ko’mi dio kanan isungan kapayunganNa Puang Matua.

1 PETRUS 1:5

tu Narinding pala’ kuasanNa Puang Matua tete dio kapatonganan lu lako kamakarimmanan tu diparandan la dipasombo, ke attu ma’katampakanna.