KOLOSE 3:11 - Sura' Madatu

¹¹ Tu naninna tae’mo to Yunani ba’tu to Yahudi, to disunna’ ba’tu to tang disunna’, bangsa senga’ ba’tu to Skit, kaunan ba’tu to makaka, sangadinna ma’massangmo Kristus sia Naluang nasangmo.

KOLOSE 3:11 ပူးပေါင်းရင်းမြစ်များ

PA’PUDIAN 117:2

Belanna lendu’ kapuana tu kamasokananNa lako kaleta, sia iatu kamarurusanNa PUANG tang tileluk sae lakona. Haleluya.

YESAYA 49:6

Nakua: Maringanpako dadi taungKu la umpabendanni sule tu mintu’ sukunna Yakub sia umbaai sule tu dikarimmanninnapa dio mai to Israel; Kupatulangdanko naposulo mintu’ bangsa, kumua anna iatu kasalamaran dio mai Kaleku landa’ lako mintu’ randan langi’.

YESAYA 52:10

Nakalili’mo PUANG tu takia’ maseroNa dio tingayona mintu’ bangsa sia la natiro mintu’ randan langi’ tu kasalamaran dio mai Kapenombanta.

YEREMIA 16:19

O PUANG, Kamumo kamatotorangku sia tambakukungku sia pentirerungangku ke allo kapussakan! Lakomo Kalemi la nanii sae tu mintu’ bangsa dio mintu’ randan langi’ sia ma’kada nakua: Kabuttokan manna tu mana’na nene’ to doloki sia apa tae’ gai’na, tu moi misa’ tae’ apa kebattuan napaden.

YEHEZKIEL 47:22

La miloterei mipotaa mana’ sola mintu’ to sae, tu mempue dio kalemi sia iatu ma’dadian taumo dio kalemi; iatu tau iato mai la mipapada to dadi diomo lu to Israel; la unnappa’ taa mana’ diloterei dio lu suku to Israel;

AMOS 9:12

kumua anna iatu Edom torronapa la napomana’ sia iatu mintu’ bangsa, tu dinii ussa’bu’ sangangKu, kadanNa PUANG, tu umpogau’i te apa iate.

MIKHA 4:2

Sia buda to sangpetayanan la ke’de’ male anna ma’kada nakua: Maikomi anta male langngan buntunNa Puang, langngan banuanNa Kapenombanna Yakub, anNa ada’iki’ diona mintu’ lalanNa sia anta olai tu mai lalanNa, belanna lan mai Sion la nanii bu’tu tu Sukaran aluk sia iatu kadanNa lan mai Yerusalem.

ZAKHARIA 2:11

Allo iato buda bangsa la mengkara’pa lako PUANG sia dadi taungKu. Sia la torroNa’ lan lu tangngamu. Attu iato la mutandai, kumua mangkamo’ Nasua PUANGna mintu’ ma’dandan maritik lako kalemu.

MALEAKHI 1:11

Belanna dio mai tu inan nanii berre’ mata allo sae lako naninna lambun, pasareongan tu sangangKu dio lu mintu’ bangsa, sia dio mintu’ inan dinii umpennoloan dupa sia pemala’ masero tu sangangKu, belanna pasareongan sangangKu dio lu mintu’ bangsa, kadanNa PUANGna mintu’ ma’dandan maritik.

YOHANES 14:23

Mebalimi Yesu nakua ungkuanni: Iake den tau ungkamali’Na’, la nakaritutui tu kadangKu, anNa kamasei Ambe’Ku, sia la saeKanni lako kalena sia mareso’ dio.

YOHANES 15:5

Akumote tu oto’ anggoro’, na kamumo tu mai tangkena. Minda-minda tu reso’ lan Kaleku, sia Aku lan kalena, iamo tarri’ buanna; belanna ke tae’i na Aku urrondongkomi moi misa’ tae’mikullei umpogau’i.

YOHANES 17:23

LanNa’ kalena sia Kamu lan Kaleku, kumua anna sundun kasiturusanna; anna issanni issinna te lino kumua kamumo tu ussuaNa’, sia umpakaboro’i tu tau iato susi Aku Mipakaboro’.

PENGGAURANNA RASULU’ 15:17

dikua anna daka’ Puang tu to torropa, sia iatu mintu’ to kapere’ tu dininnamo ussa’bu’ sangangKu,

PENGGAURANNA RASULU’ 28:2

Iatu to inde to lebukan iato nakasokanni tongankan, belanna napadukkuangkan api sia natammuikan sola nasang, belanna la uran sia madinginkan.

PENGGAURANNA RASULU’ 28:4

Iatonna kitai tinde to dio lebukan iato tu ula’ mendoyang dio limanna, nakuami sipa’kada-kada: Tae’mo nasalai tang to papatean te tau iate, moi anna lessu’mo dio mai kasanggangan lan tasik, apa tae’ naeloranni tu ma’pakalolo la tuo.

ROMA 1:14

Anna aku te kaindananna’, la lako to Yunani la lako bangsa senga’, la lako to manarang, la lako to tang paissan.

ROMA 10:12

Belanna tae’ silaenanna to Yahudi anna to Yunani. Apa misa’ri Puang umpuangi mintu’na sia sumpu mamase lako mintu’ to metamba lako Kalena.

ROMA 3:22

iamotu kamaloloanNa Puang Matua tete dio kaumpatonganan Yesu Kristus umpatu sia tang umpasalian rinding mintu’ to ma’patongan; belanna tae’ silaenanna.

ROMA 3:29

Ba’tu iatu Puang Matua Puangna mannaraka to Yahudi? Tang Puangna dukaraka to kapere’? Tonganna, Puangna dukato kapere’.

1 KORINTUS 12:13

Belanna misa’ri Penaa mangka dinii undio’ki’ sola nasang anta mendadi misa’ kale, la to Yahudi, la to Yunani, la kaunan, la to makaka; mintu’ki’ dipatamai tu Penaa misa’.

1 KORINTUS 14:11

Iamoto, iake tae’i kutandai battuananna tu oni manassa to banga’na’ lako tu to ma’kada, sia iatu to ma’kada to banga’ lako kaleku.

1 KORINTUS 7:19

Iatu disunna’ tae’ patunna, sia iatu tang disunna’ tae’ patunna, sangadinna iari tu ungkanannangi parentaNa Puang Matua.

GALATIA 2:20

Iatu tuoku te tangiamo aku umpoissanni, sangadinna Kristus tu tuo lan kaleku; apa iatu kupotuona lan kaleku totemo te, umpokatuoanna’ kapatonganan lako AnakNa Puang Matua, tu ungkamaseina’, sia ussorong Kalena belanna aku.

GALATIA 5:6

Belanna iake sirapumoki’ Kristus Yesu, la umpogau’ ba’tu tang umpogau’ sunna’, tae’ kuasanna, sangadinna kapatonganan tu napakedo pa’kaboro’.

EFESUS 1:23

Anna iatu kombongan iamo batang kaleNa sia kasundunanNa Kristus, tu umpasundun nasangi lan mintu’na.

EFESUS 2:14

Belanna Ia dadi kasikaeloanta, umpamisa’i patomalinna sia urrondonni tu rinding ussapa’i, iamotu kasiualian;

EFESUS 2:15

belanna mangka umpasalian tuntunan sukaran aluk sola mintu’ pangalukanna lan batang kaleNa, dikua anna lan Kalena Nanii umpopendadi misa’i tolino ba’ru patomalinna anNa pabu’tu kasikaeloan,

EFESUS 3:17

anNa torroi Kristus tu penaammi tete dio kapatonganan sia ammi mennuaka’ sia keparandangan lan pa’kaboro’,

EFESUS 3:6

to kumua iatu to kapere’ pada-pada ma’mana’ sia misa’ kale sia pada ketaa dio mai pangallu’ lan kasiturusanNa Kristus Yesu tete dio Kareba-kaparannuan.

EFESUS 6:8

belanna miissan, kumua kameloan apa tu napogau’ tau, ia duka natarima sule dio mai Puang, la kaunan, la to makaka.

KOLOSE 2:10

sia kamu duka dipasundun tete dio Kalena, tu to napopangulu mintu’ to ma’parenta sia to paa.

1 YOHANES 5:20

Sia taissan kumua saemo tu AnakNa Puang Matua sia Nakamaseammoki’ kapaissanan, kumua anta tandai tu To tongan; iatu kita te lanki’ To tongan, iamotu lan AnakNa, – Yesu Kristus –. Ia tonganmo Puang Matua te sia katuoan matontongan.

2 YOHANES 1:9

Minda-minda palenduran natae’ anna bantang lan pangadaranNa Kristus, tae’ naampui Kapenomban. Apa iatu to bantang lan pangadaran iato, tau iamora to unnampui la Ambe’ iato, la Anak iato.