IBRANI 12:2 - Sura' Madatu

² anta mentiro lu lako Yesu, tu panglalan sia umpasundun kapatonganan. Belanna sondana kaparannuan dipaoloanNi, anNa mangka untanggung kayu pea’ta’ tang Nakuamo siri’, unno’ko’mi dio kanan isungan kapayunganNa Puang Matua.

IBRANI 12:2 ပူးပေါင်းရင်းမြစ်များ

PA’PUDIAN 110:1

Pa’pudianna Daud. Susite tu kadanNa PUANG lako Puangku Nakua: Nno’ko’Ko dio kananKu, sae lako Kupopengkanorongna nasang tu mai ualimMu Mupolilli’ lentek.

PA’PUDIAN 138:8

PUANG la umpatepuanna’ tu iannato! O PUANG iatu kamasokanamMi tang tileluk sae lakona. Da amMi tampei tu pengkarangamMi!

YESAYA 31:1

Upu’ allona tu mintu’ to male rokko Mesir la umpalaku pa’tunduan, tu umposande’ darang sia urrannuan kareta, belanna buda, sia pakkanarang, belanna seba’ bilanganna, apa tae’ namengkamoya lako To maserona to Israel sia tae’ namekutana lako PUANG.

YESAYA 45:22

Lu maikomi Kaleku, ammi makarimman, e mintu’ randan langi’, belanna Akumo tu Puang Matua tae’ senga’na.

YESAYA 53:3

Dipamatunamo sia nasa’biangan tau, misa’ to tang natampe kamaparrisan sia napembanuai saki, ondongpi susi misa’ to natampunan lindo tau; susimoto tu kadipamatunanna natae’ anta pokariangananni.

YESAYA 8:17

La kutayan tu PUANG, tu umpembuniammo bati’na Yakub, lako Kalena la kunii sande’.

MIKHA 7:7

Apa iatu aku la ma’penununa’ untayan PUANG, sia la umpeagina’ Puang Matua, oto’na kasalamarangku; la Naperangiina’ Kapenombangku.

ZAKHARIA 12:10

Lako to lan tongkonan layukna Daud sia lako to lan Yerusalem la Kubarrakan tu Penaa kamaturu-turuan sia passambayang; iatu tau iato mai la mentiro lako tu to mangka narok, anna sa’buranni bating, susito umbatingi anak tungga’, ondongpi la si’dan-si’dan untangi’i butung to untangi’i anak pa’bung’a.

KADIBILANGAN 21:9

Nagaragaimi Musa tu misa’ ula’ tambaga napatoppo’i dao kayu sangbatang; sia minda-minda, ke mangkami natotok ula’, anna mentiro langngan ula’ tambaga iato, manassa tuo.

MATIUS 16:21

Randuk tonna iato Napa’peissanammi Yesu lako anak gurunNa kumua sipatu la lao lako Yerusalem anNa perasai buda parri’ dio mai pekaamberan sia dio mai pangulu to minaa sia pandita Sura’, naurunganni dipatei, Nadipamalimbangun sule tonna allo ma’pentallun.

MATIUS 20:28

Susi Anak rampan dilino tae’ Nasae kumua Nadikamayai, sangadinna kumua anNa ma’kamayai sia ussorong penaanNa la napopela’bak buda tau.

MARKUS 14:36

Nakuami: Abba, o Ambe’, mintu’na angge maritik lan nasang kuasamMi, lendokanni dio mai Kaleku te irusan iate, apa iatu iannato tangia pa’poraiangKu sangadinna pa’poraiamMi.

MARKUS 15:28

Nasusi to, sundunmo tu kada lan Sura’ Madatu, tu nakua: Dipasangbilangammo to masua-sua.

MARKUS 16:19

Iatonna mangka ma’kada susito tu Puang Yesu lako tinde tau, tiangka’mi kendek langngan suruga, Naunno’ko’ dio kananNa Puang Matua.

MARKUS 9:12

Nakuami lako: Inang la sae ia dolo tu Elia sia umpasirundunan mintu’ sakka’ saeanna. Apa tumbai tu mangkanna disura’ tu diona Anak rampan dilino, kumua la umperasai buda kamaparrisan sia la nasassai tau?

MARKUS 9:24

Ta’pa melallakmi tu ambe’na tinde pia tumangi’, nakua: O Puang, kupatongan, tundui tu kapatonganan malamma’ku!

LUKAS 17:5

Nakua nasangmi tu rasulu’ lako Puang: Rangngannipi tu kapatonganangki ke!

LUKAS 23:11

Nalo’bo-lo’bomi Herodes sola mintu’ surodadunna tu Yesu sia natelle-telle, napakei sambu’ pandillak-dillak, nasuai umbaaI sule lako Pilatus.

LUKAS 24:26

Tang sipaturaka Mesias umperasai tu iannato, Namane tama kamala’biranNa?

YOHANES 1:29

Tonna masiang to nakitami tu Yesu sae lako kalena nakuami: Tiromi tu Anak dombaNa Puang Matua, tu ussarapai kasalanna issinna lino.

YOHANES 12:24

Tonganna tongan Kukua mati’: Iatu gandung sanglise’ ke tae’i natobang rokko padang namate, tontong bang sanglise’; apa iake matei, memba’ka’ tu buanna.

YOHANES 12:32

IangKu dipakendekmo diong mai te lino, la Kupatilao nasang tu penaanna tau, anna sae lako Kaleku.

YOHANES 13:3

moi anNa issanni Yesu, kumua mangka nasangmo Nasorong Ambe’ tu mintu’ angge maritik lako Kalena, sia Ia lu dio mai Puang Matua sia sule lako Puang Matua,

YOHANES 6:40

Belanna inde sia tu pa’poraianNa Ambe’ku, kumua umba-umba tu mentiro lako tu Anak anna patonganNi, la ungkabu’tui katuoan tontong sae lakona, na Aku la umpamalimbangunni ke allo katappurannai lino.

YOHANES 8:56

Iatu Abraham ambe’mi sende sia mamali’ penaanna la untiroi tu alloKu; natiromo naparannu penaanna.

PENGGAURANNA RASULU’ 2:36

Iamoto la naissan tongan mintu’ to ma’rapu Israel kumua Puang Matuamo umpadadiI Puang sia Kristus tu Yesu, tu mia’ta’.

PENGGAURANNA RASULU’ 3:15

Ammi patei tu Panglalan lako katuoan, apa Napamalimbangunmo Puang Matua dio mai to’ to mate, iamotu iannato tu kikatottongi.

PENGGAURANNA RASULU’ 5:31

Iamora Te tu napakalangka’ lima kananNa Puang Matua mendadi Pangulu sia To pakarimmanan la umpa’kamasean katobaran lako to Israel sia kadipa’deian kasalan.

PENGGAURANNA RASULU’ 5:41

Parannumi penaanna soro’ lan mai kombongan, belanna disanga sipato’ natanggung tu kadisa’san belanna Sanga iato.

1 KORINTUS 1:18

Belanna iatu pangadaran diona pea’ta’, nasanga pa’popetaa to lu lako kasanggangan; apa iake kita lu lakona kamakarimmanan iamo kuasanNa Puang Matua.

1 KORINTUS 1:23

anna iate kita te umpa’peissanangki’ Kristus dia’ta’, tu napomatana’ to Yahudi sia misa’ pa’popetaa lako to kapere’,

EFESUS 2:16

kumua anna Ia umpasikaeloi Puang Matua tu patomalinna mendadi misa’ batang kale diona kayu pea’ta’, anna inde to Nanii umpa’dei tu kasiualian.

EFESUS 5:2

sia lolangkomi umpa’pekitanan pa’kaboro’ susi Kristus mangka ungkamaseikomi, sia mangka ussorong Kalena belanna kita, mendadi pemala’ sia pesuru’, tu busarungngu’ lako Puang Matua.

FILIPI 1:6

Kukatappa’i te iannate, kumua Puang Matua tu mangka umparanduk misa’ pengkarangan melo dio kalemi, Ia duka la umpasundunni sae lako alloNa Yesu Kristus.

FILIPI 3:20

Apa dao suruga tu tondok kadadianta, dao duka mai tanii untayan To pakarimmanan, Iamotu Puang Yesu Kristus,

2 TIMOTIUS 4:8

Na undinna sakka’mo makota kamalamburan, tu la Napa’kamasean Puang lako kaleku ke Allo iato, tu Tomangra’ta’ malambu’, sia tangia lako manna kaleku, sangadinna lako duka mintu’ to ungkamali’mi tu kasaeanNa.

IBRANI 1:13

Mindannamora tu malaeka’ mangka Nakuan kumua: Unno’ko’Komi dio kananKu, sae lako Kupopengkanorongna nasang tu ealimMi mendadi pelilli’ lentekMi?

IBRANI 1:3

Iamo arrang kamala’biranNa Puang Matua sia bate rupanna A’ganNa sia Naria tu mintu’na tete dio kada kuasanNa; iatonna mangkamo umpogau’ kadiseroianna mintu’ kasalan, unno’ko’mi dio kananNa To patodoranna dao masuanggana.

IBRANI 10:14

Belanna diona misa’ pemala’ anNa mangkamo Ia umpasundun sae lakonai tu mintu’ to Naseroi.

IBRANI 10:33

denkomi pira tu ditelle-telle sia dipakario-rio mendadi pengkitanna tau, sia den pira tu manda’ sisola tu to dia’ga susito.

IBRANI 11:36

Na iatu to senga’ umpatanan peroso, petelle-telle, sia diongkan-ongkan, sia rante bassi sola pa’tarungkuan.

IBRANI 12:3

Iamoto, timbangmi tu Yesu, tu umma’tanan penaa mintu’ kada layukna to kasalan unneai, kumua da ammi masorro, belanna ranggang penaammi.

IBRANI 13:13

Iamoto tatassu’ lako umpellambi’i dio salian lili’na to’ tenda iato sia anta tanggungi tu kaditelleanNa.

IBRANI 5:9

Tonna mangkamo dipasundun maneri Ia mendadi oto’ kamakarimmanan matontonganna mintu’ to mengkaola lako Kalena,

IBRANI 7:19

– belanna moi misa’ tae’ napasundun Sukaran aluk – apa dipabu’tu tu kapa’rannuanan mandu melo, tapobannang umpentireke’i Puang Matua.

IBRANI 8:1

Lan mintu’na apa kipokada susito iamo ma’iringanna te, to kumua: Den misa’ Tominaa Kapuata tu susinnato, tu unno’ko’ dio sa’de kanan isunganNa Topatodoranna dao suruga.

IBRANI 9:28

susi dukamo Kristus, tonna mangkamo pissan dipemalaran la ullendokan kasalanna to buda, anna iake ma’penduannami, tang untanggungmo kasalanna tau, anNa tiroi mintu’ to untayanNi la napomakarimman.

YAKOBUS 2:1

E sangsiulurangku, tu ma’patongan lako Puang Mala’bi’ta Yesu Kristus, da mipalaloi tu kapatonganammi umpelindo tau.

1 PETRUS 1:11

sia napelalan attu umbara nakua a’ganna tu attu Napa’patuduan PenaanNa Kristus lan kalena tau iato mai, tonna pamanassa dolomi Penaa tu mintu’ kamaparrisanNa Kristus sia iatu mai kamala’biran sidanu’-danu’ undinna.

1 PETRUS 3:18

Belanna pissan dukari tu Kristus mate diona mintu’ kasalanna tau, Iamo To malolo belanna to tang malolo, kumua anNa solangki’ lako Puang Matua; tonganna anNa dipatei diona batang kale, apa dipatuo diona penaa.

1 PETRUS 3:22

tu mangkamo kendek langngan suruga, anNa unno’ko’ dio kananNa Puang Matua, na mintu’ malaeka’ sia to paa sia kakuasan mengkanorong lako Kalena.

YUDAS 1:21

Nasusito karitutui tu kalemi lan pa’kaboro’Na Puang Matua, ammi tayan kamamaseanNa Puangta Yesu Kristus tu mebaa lako katuoan matontongan.

KADA OMBO’ LAKO RASULU’ YOHANES 1:11

nakua: Apa-apa tu mutiro, sura’i lan misa’ sura’, ammu pakatui lako pitu kombongan, iamotu lako Efesus, sia Smirna, sia Pergamus, sia Tiatira, sia Sardis, sia Filadelfia na Laodikia.

KADA OMBO’ LAKO RASULU’ YOHANES 1:17

Iatongku tiromi, songkamo’ rokko to’ lentekNa susito mate. Naremme’mo’ lima kananNa, nama’kada Nakua: Da mumataku’. Akumo tu pamulanna sia ma’katampakanna,

KADA OMBO’ LAKO RASULU’ YOHANES 1:8

Akumote tu Alfa sia Omega, kadanNa Puang Kapenomban, tu Den, sia inang Den tempon dio mai, sia la saeMo, Iamotu Umpoissan angge maritik.

KADA OMBO’ LAKO RASULU’ YOHANES 2:8

Surasanni malaeka’ kombongan Smirna susite: Iamote tu kadanNa Puang tu pamulanna sia ma’katampakanna, tu mangka mate, anna tuo sule: