IBRANI 1:3 - Sura' Madatu

³ Iamo arrang kamala’biranNa Puang Matua sia bate rupanna A’ganNa sia Naria tu mintu’na tete dio kada kuasanNa; iatonna mangkamo umpogau’ kadiseroianna mintu’ kasalan, unno’ko’mi dio kananNa To patodoranna dao masuanggana.

IBRANI 1:3 ပူးပေါင်းရင်းမြစ်များ

1 OSSORANNA DATU 29:11

Kamumo, o PUANG, unnampui kapasareonganan sia kamatotoran, kamala’biran, kadipangkeran sia kabarre-alloan. Kamuri tu unnampui tu mintu’na apa dao langi’ sia lan lino; Kamuri tu unnampui kadatuan, o PUANG, sia Kamu unnampui kapaan undaoanni mintu’ apa.

AYUB 37:22

Daa mai rampe daanna lu nanii bu’tu tu arrang bulaan; iatu Puang Matua naputu’ kamala’biran dikabangnga’.

PA’PUDIAN 110:1

Pa’pudianna Daud. Susite tu kadanNa PUANG lako Puangku Nakua: Nno’ko’Ko dio kananKu, sae lako Kupopengkanorongna nasang tu mai ualimMu Mupolilli’ lentek.

PA’PUDIAN 75:3

Iake Kulambi’mi tu allu’na, tae’ nasalai tang Kupaolai maloloi salunna:

TOMANGADA’ 8:4

Belanna patalo tu kadanna datu sia mindara ma’din ma’kada lako kalena. Kumua: Matumbari tu penggaurammi?

SURA’ KATOMINAAN 15:15

Anna pemalaranni to minaa misa’ diposuru’ pengkalossoran namisa’ dipopemala’ ditunu pu’pu’. Anna padenanni kadiseroian kasalan to minaa dio oloNa PUANG diona kanakasunninna nana.

MIKHA 5:4

Sia Ia la oto’na kasalamaran. Iake la tamai tondokta tu to Asyur sia iake la ullesei tongkonan layukta, manassa la tapabendanan pitu to mangkambi’ sia karua arung dio mai tolino la unneai,

MATIUS 22:24

O Guru, naannangki’ Musa kumua, iake denni tau mate, anna tae’ nakeanak, siulu’na la umpobainei tu bainena anna pabu’tuanni bati’ tu siulu’na.

MARKUS 16:19

Iatonna mangka ma’kada susito tu Puang Yesu lako tinde tau, tiangka’mi kendek langngan suruga, Naunno’ko’ dio kananNa Puang Matua.

YOHANES 1:14

Mentolinomo tu Bisara, sia tongkon tau matamo tasisolan sia kitiromo tu kamala’biranNa, susi kamala’biranNa Anak misa dio mai Ambe’, ponno kamaturu-turuan sia kamanapparan.

YOHANES 1:29

Tonna masiang to nakitami tu Yesu sae lako kalena nakuami: Tiromi tu Anak dombaNa Puang Matua, tu ussarapai kasalanna issinna lino.

YOHANES 1:4

Ia oto’na katuoan, anna iatu katuoan iamo arrangna tolino.

PENGGAURANNA RASULU’ 2:33

Iatonna pamalangka’mi lima kananNa Puang Matua sia Natarima dio mai Ambe’ tu Penaa Masallo’ diallu’, Natua’mi tu Penaa iato susite mikita sia mirangi.

PENGGAURANNA RASULU’ 7:56

Nakuami: Tiromi kukita tu langi’ tibungka’ na iatu Anak rampan dilino ke’de’ dio kananNa Puang Matua.

ROMA 1:16

Belanna tang ussa’dinganna’ siri’ untongananni tu Kareba-kaparannuan, apa iamo kamatotoranNa Puang Matua tu umpabu’tu kamakarimmanan lako mintu’ to ma’patongan, ondonganna lako to Yahudi sia to Yunani duka.

ROMA 8:34

Mindara umpakannai ukungan? AnNa Kristus Yesu Ia tu mangka mate, ontongpi mangka dipamalimbangun sule, sia dio kananNa Puang Matua, sia umpa’kadangki’.

2 KORINTUS 4:4

tu mangka napabuta datunna lino tu mata penaanna to tang ma’patongan, kumua da anna kita arrang kamala’biranNa Kristus iamotu rupanNa Puang Matua.

KOLOSE 3:1

Iamoto iake dipamalimbangunmokomi sola Kristus, daka’i tu apa dao, tu Naninna Kristus, unno’ko’ dio kananNa Puang Matua.

TITUS 2:14

tu mangka ussorong Kalena belanna kita, kumua anna la’bakki’ dio mai mintu’ kakadakeanta, sia kumua anna pamaseroanni Kalena tu sangrapu tau la Napotau misa, tu birisanna umpogau’ kameloan.

IBRANI 1:13

Mindannamora tu malaeka’ mangka Nakuan kumua: Unno’ko’Komi dio kananKu, sae lako Kupopengkanorongna nasang tu ealimMi mendadi pelilli’ lentekMi?

IBRANI 10:12

Apa Tominaa Kapua iate, tonna mangkamo umpemalaran misa’ suru’ belanna mintu’ kasalan, unno’komi dio kananNa Puang Matua tontong sae lakona.

IBRANI 12:2

anta mentiro lu lako Yesu, tu panglalan sia umpasundun kapatonganan. Belanna sondana kaparannuan dipaoloanNi, anNa mangka untanggung kayu pea’ta’ tang Nakuamo siri’, unno’ko’mi dio kanan isungan kapayunganNa Puang Matua.

IBRANI 4:14

Tu belanna den Tominaa Kapua ma’iringanta, tu umpasitarru’mo mintu’ langi’, Iamo Yesu, AnakNa Puang Matua, sipatu tatoe tu kapangakuan iato.

IBRANI 7:27

tae’ Namanggi’ susi tominaa kapua senga’, kiallo-kiallo umpennoloan ba’tu sangapa suru’, bunga’na belanna mintu’ kasalanna siamo, namane belanna mintu’ kasalanna to buda. Belanna iatu ianna te mangkamo Ia Napissanni Napogau’ tonna pemalaran Kalena.

IBRANI 8:1

Lan mintu’na apa kipokada susito iamo ma’iringanna te, to kumua: Den misa’ Tominaa Kapuata tu susinnato, tu unno’ko’ dio sa’de kanan isunganNa Topatodoranna dao suruga.

IBRANI 9:16

Belanna iake denni pantaa dolo, sipatu dipemanassa tu kamateanna to mantaa dolo.

IBRANI 9:26

Belanna iake susito, tae’ anna salai tang la ma’tole-tole umperasai parri’ tempon dio mai dikombongna tu lino. Apa totemo te tonna ganna’mo tu attu, pissan dukari mangka dipasombo diona kaumpassurusanna batang kaleNa la umpa’dei kasalan.

1 PETRUS 1:21

bannang diomora Kristus, ammi patongan Puang Matua, tu umpamalimbangunNi dio mai to’ to mate sia Naba’gi kamala’biran, naurunganni lu lako Puang Matua tu kapatonganammi sitonda kapa’rannuanammi.

1 PETRUS 3:22

tu mangkamo kendek langngan suruga, anNa unno’ko’ dio kananNa Puang Matua, na mintu’ malaeka’ sia to paa sia kakuasan mengkanorong lako Kalena.

2 PETRUS 1:16

Belanna tae’ angki turu’i tu ulelean pare digaraga kamalutean, tongki pokadangkomi tu kuasa sia kasaeanNa Puangta Yesu Kristus, sangadinna kitiro kalenamo tu kamatandeanNa.

2 PETRUS 1:17

Belanna mangkamo unnappa’ kadipangkeran sia kamala’biran dio mai Puang Matua Ambe’, tonna diparampoI gamara dao mai kamala’biran matande, susite: Iamote tu Anak pa’kaboro’Ku, Ia dukamo Nanii kasendeangKu.

1 YOHANES 1:7

Apa iake lolangki’ lan kamaseroan, susi Ia torro lan kamasiangan, manassa denmo kasiturusanta sola nasang, sia raraNa Yesu, AnakNa, usseroiki’ dio mai mintu’ kasalan.

1 YOHANES 3:5

Miissan kumua dipasombo tu Kristus anNa lendokanni tu mintu’ kasalan; lan Kalena tae’ kasalan.

YUDAS 1:25

iamo Puang Matua tu Misari, To pakarimmananta, tete dio Yesu Kristus tu Puangta, tu kamala’biran sia kakapuan sia kamatotoran sia kapaan tempon dio mai sia totemo te sia sae lakona. Amin.

KADA OMBO’ LAKO RASULU’ YOHANES 3:21

Na iatu to patalo, Kueloran unno’ko’ dio sa’deKu dao isungan kapayungangKu susi duka tu Aku pataloMo’ angKu unno’ko’ sola Ambe’Ku dao isunganNa.

KADA OMBO’ LAKO RASULU’ YOHANES 4:11

O Puang, Kapenombangki, sipatuKomi untoe kadipakala’biran sia kadipangkeran sia kapaan, belanna Kamumo umpadadii tu mintu’ apa sia pa’poraiamMi duka anna den tu mintu’na sia anna dipadadimo.