ESTER 4:1 - Sura' Madatu

¹ Iatonna issanmi Mordekhai tu mintu’ apa dadi, naserek-serekmi tu pakeanna anna mellullung karung sia au, anna male tama tangnga kota, na sumarro sia unnurruk-urruk tumangi’.

ESTER 4:1 ပူးပေါင်းရင်းမြစ်များ

KADADIAN 27:34

Iatonna rangimi Esau tu kadanna ambe’na susito, unnurruk-urrukmi tumangi’, na ma’kada lako ambe’na, nakua: Passakkena’, passakke dukana’, ambe’!

KADADIAN 37:34

Naserekmi Yakub tu tamangkalena, anna pododo karoro’ sia ma’barata ba’tu pirang-pirang allo diona tu anakna.

2 SAMUEL 1:11

Attu iato natoemi Daud tu pakeanna, naserek-serekki; susi dukato tu mintu’ tau nasolan.

2 SAMUEL 13:19

Napalangannimi barra’-barra’ Tamar tu ullunna sia naserek-serek tu bayu maa’na tu napake, anna pa’lullungi tu limanna, anna marassan sia male marassan sia unnurruk-urruk tumangi’.

ESTER 4:2

Rampomi lako tingayo babangan datu, belanna tae’ nama’din tu tau tama babangan datu ma’pakean karoro’.

ESTER 4:3

Lan lu mintu’ propinsi tu nanii rampo parenta sia atoranna datu, den passanda bolongan kapua, pa’puasa, tangi’ sia sarro dio lu to Yahudi, iamotu buda tau mamma’ umpennampa’ au.

AYUB 1:20

Attu iato ke’de’mi tu Ayub, na kake-kakei tu bayu lamba’na sia naku’ku’i tu ulunna, nalumbang rokko padang, tukku menomba, anna ma’kada nakua:

AYUB 2:8

Naalami tu bibang sangti’pek nakarrukki tu kalena, anna unno’ko’ lan to’ au.

AYUB 42:6

Iamoto kuriu’ sulei tu kadangku, angku mengkatoba’ unno’ko’ diong to’ barra’-barra’ sia to’ au.

YESAYA 15:4

Siurrukan tu to Hesbon sia to Eleale; dirangi tu gamaranna sae lako Yahas, ondongpi tu surodadunna to Moab, silallakan sia ranggang tu penaanna.

YESAYA 22:4

Iamoto angku ma’kada kukua: Da mitirona’, da’ito angku unnade-ade tumangi’; da miparukuna’ mipakatana diona tu kasangganganna anak dara bangsaku.

YESAYA 37:1

Iatonna rangimi datu Hizkia tu iannato, naserek-serekmi tu tamangkalena anna ma’pakean karoro’, male tama banuanNa PUANG.

YESAYA 37:2

Nasuami datu tu Elyakim, sandan uainna datu, sia Sebna pangulu to massura’, sia mintu’ to matua-tuanna to minaa ma’pote dibolong male umpellambi’i nabi Yesaya, anakna Amos.

YESAYA 58:5

Kuporairaka te puasa susite, kumua umpa’dikki kalena tu tau lan sangallo: umpatuttu ulunna butung biang, ma’pakean karung, mamma’ diong to’ au? Iamoraka misanga puasa sia allo Naporai PUANG te?

YEHEZKIEL 21:11

Mesuamo umburindai, kumua anna tangkei tau; mangkamo diasa sia diburinda tu pa’dang iato, nadiben to papatean.

YEHEZKIEL 21:6

Na iko, e ma’rupa tau, sumarroko butung to rantang buana; ondongpi sumarroko diona kamapa’dikan penaammu.

DANIEL 9:3

Mentingaramo’ langngan Puang Kapenomban la massambayang sia mengkamoya angku ma’puasa sia ma’karoro’ sia undudung barra’-barra’.

MIKHA 1:8

Diona apa iato angku umbating sia sumarro, angku lumingka tang ma’sepatu sia ma’kambelang, sia melallak susi serigala sia kumarrak susi burung unta?

ZEFANYA 1:14

Mareke’mo tu allo kapuanNa PUANG, mareke’mo sia madomi’ bangmo rampo mengkareke’. Perangiimi tu alloNa PUANG. Moi anna iatu to lalong metamba duka diona kamaparrisan.

MATIUS 11:21

Upu’ allomu, E Khorazim! Sumpu sumandakmu, e Betsaida! Belanna iakenna susinna nalan Tirus na Sidon nanni dadi tu mintu’na tanda mangnga mangka dadi lan lili’mi, tae’ natang masaimo ia namangka mengkatoba’ naumpembungku’ karoro’ sia au.

PENGGAURANNA RASULU’ 14:14

Apa iatonna rangii tinde rasulu’ sola duai tu iannato, iamotu Barnabas sola Paulus, usse’bu-se’bumi sambu’na sia male ma’dondo-dondo tama to’ to buda sia metamba-tamba.

YOSUA 7:6

Naserek-serekmi Yosua tu pakeanna, anna lumbang rokko padang dio tingayo pattinNa PUANG sae lako makaroeanna, la ia la mintu’ pekaamberanna to Israel, sia naambo’i barra’-barra’ tu ulunna.

KADA OMBO’ LAKO RASULU’ YOHANES 11:3

La Kuben kuasa tu da’dua to ma’katottongingKu tu ma’tamangkale karoro’, ma’nubua’ sangsa’bu duaratu’ annan pulona allona.