DANIEL 4:25 - Sura' Madatu

²⁵ La naali’komi tau dio mai sangbilangan tolino na iatu katorroammi la sisola olo’-olo’ dio lu padang; anna pakandekomi tau riu ten to sapi, ammi dipopa’elo’na nasakka’i ambun dao mai langi’; la nalambi’ pempitu attu la minii susito sae lako miakunna, kumua Puang Patodorana ungkuasai kadatuanna tolino sia Nakamasei tu minda-minda Naporai.

DANIEL 4:25 ပူးပေါင်းရင်းမြစ်များ

PA’PUDIAN 103:19

Napatunannangmo PUANG tu isungan kapayunganNa lan suruga, sia iatu kadatuanNa umparenta mintu’ angge maritik.

PA’PUDIAN 106:20

Indemoto nanii tau iato mai ussondai rupa tedong sapi ungkande riu, tu To napomala’bi’.

PA’PUDIAN 75:7

Belanna tang lu dio mai matallo, tang lu dio mai matampu’, ba’tu lu lo’ mai padang aak nanii bu’tu kama’pakalayukan.

PA’PUDIAN 83:18

Da’ito anna kasirisan tu tau iato mai sia tiramban tontong sae lakona, sia da’ito anna maila’ sia anna sanggang.

YEREMIA 27:5

Akumo tu mangka umpadadi lino sia mintu’ tolino sia olo’-olo’ dao kuli’na padang tete dio kamatotoran kapuaKu sia takia’ tiangka’Ku, la Kupa’kamasean lako minda-minda tu naala penaangKu.

DANIEL 2:21

Ia duka umpopembali pentaunan sia attu. Ia untassu’i datu, Ia duka unnangka’i, Ia duka ungkamasei kakinaan tu to kinaa sia kapaissanan tu to paissan.

DANIEL 2:37

Kamumo, o datu, datunna mintu’ datu, tu Nakamaseimo Puang Matua dao suruga kadatuan sia kuasa sia kamatotoran sia kamala’biran,

DANIEL 2:47

Mebalimi tu datu lako Daniel nakua: Tonganna iatu Kapenombammu, Iamo Puang Matua undaoanni mintu’ deata sia Puangna mintu’ datu, sia Iamo umpaombo’i tu mai rasia: iamoto mubelai umpaombo’i te rasia iate.

DANIEL 4:16

La dipopembali tu penaanna, anna tang susimo tolino: dibenmo penaa olo’-olo’, la nalambi’ pempitu attu la nanii susito.

DANIEL 4:17

Iate parenta iate napamatu’tunmo mintu’ to ma’kampa na iatu iannate nalampakmo to masero, anna tandai mintu’ to tuo, kumua Puang Patodoranna ungkuasai tu kadatuan tolino sia Nakamasei minda-minda tu Naporai, ondongpi ma’din natokko tu to tarru’ madiongan dio lu tolino lan kadatuan iato.

DANIEL 4:2

Naalamo penaangku umpa’peissananni tu mintu’ tanda kalle-kallean sia tanda mangnga, tu mangka Napogau’ Puang Matua patodoranna lako kaleku.