DANIEL 2:47 - Sura' Madatu

⁴⁷ Mebalimi tu datu lako Daniel nakua: Tonganna iatu Kapenombammu, Iamo Puang Matua undaoanni mintu’ deata sia Puangna mintu’ datu, sia Iamo umpaombo’i tu mai rasia: iamoto mubelai umpaombo’i te rasia iate.

DANIEL 2:47 ပူးပေါင်းရင်းမြစ်များ

KADADIAN 41:39

Ma’kadami tu Firaun lako Yusuf nakua: Belanna Napasombo Puang Matua lako kalemu tu mintu’na te, iamoto tae’ tu tau misa’ manarang sia kinaa susi iko.

2 DATU 5:15

Mangkato sulemi lako taunNa Puang Matua la ia la mintu’ to unturu’i. Iatonna rampomo, bendanmi dio tingayona sia ma’kada nakua: Tonganna, totemo kutandaimo, kumua lan mintu’ lino tae’ Puang Matua sangadinna dio manna lu bangsa Israel. Tarimami te pa’kamasean dio mai taummi.

AYUB 12:19

Iatu mai tominaa Nasua male susito makario-rio, sia minda-minda batta’ tumanan, Nasongkan.

PA’PUDIAN 136:2

Pudimi tu Puang Matua undaoanni mintu’ deata, belanna iatu kamasokananNa tang tileluk sae lakona.

PA’PUDIAN 136:3

Pudimi tu Puangna mintu’ puang. Belanna iatu kamasokananNa tang tileluk sae lakona;

PA’PUDIAN 72:11

Sangapaoi anna mintu’ datu tukku sae rokko padang dio olona, sia angganna bangsa la mengkaola lako,

PA’PUDIAN 82:1

Pa’pudianna Asaf. Tongkon tu Puang Matua lan tinimbunna deata, sia urra’ta’ ukungan lan lu mintu’ deata.

PA’PUDIAN 96:4

Belanna pasareongan tu PUANG sia sipatu tongan dipudi, mandu metakuran Ia na mintu’ deata.

YEHEZKIEL 26:7

Belanna inde sia tu kadanNa Puangta PUANG, Nakua: Manassa la Kupake’de’ daa mai tu Nebukadnezar, datu Babel, datunna mintu’ datu, sola darang, kareta, pakkanarang, sia surodadu lumingka buda tongan, sae ullaoi Tirus.

DANIEL 11:36

Na iatu datu iato la umpogau’ bang apa naala penaanna; la umpalayuk sia la umpatarompo’ kalena unnea mintu’ deata, ondongpi sae lako Puang Matua undaoanni mintu’ deata napa’kada solangi; sia la maupa’ ia sae lako sundunna tu kare’dekan ara’, belanna iatu apa pura dipamanassa la dadi.

DANIEL 2:19

Attu iato dipaombo’mi lako Daniel tu rasia iato lan patiro mendeata tonna ibongi, anna pudi-pudi Daniel tu Puang Matua dao suruga.

DANIEL 2:22

Ia umpaombo’i tu apa tang dilambi’ la diissan sia apa kabunian, Naissan duka tu apa lan malillinna sia siayoka kamasiangan.

DANIEL 2:28

Apa den misa’ Kapenomban dao suruga, tu umpaombo’ mintu’ rasia. Iamo umpamanassai lako datu Nebukadnezar tu apa la dadi allo undi. Inde sia tu tindomi sia mintu’ patiro mendeatammi, tu bu’tu dio pentiromi dao katindoammi.

DANIEL 2:29

Iatu kamu, o datu, tommi mamma’ dao katindoammi, bu’tumi tu tangnga’ lan penaammi diona tu apa la dadi undinna; na Ia tu umpaombo’ mintu’ rasia, Ia dukamo tu mangka umpamanassai lako kalemi tu apa la dadi undinna.

DANIEL 2:30

Iatu aku te, tae’ to kumua den kamanarangan losong lan kaleku na iatu mintu’ to tuo, anna dipaombo’ lako kaleku te rasia iate, sangadinna iari tu sembangna dipamanassan datu, ammi issanni tu mintu’ tangnga’ penaammi.

DANIEL 2:37

Kamumo, o datu, datunna mintu’ datu, tu Nakamaseimo Puang Matua dao suruga kadatuan sia kuasa sia kamatotoran sia kamala’biran,

DANIEL 3:15

Kusanga melo, ke naalai penaammi, iammi rangii tu oni tarompe’, suling, katapi, su’dekan, dandi sia suling rapi’ sia ma’rupa-rupa oni-onian, la lumbangkomi sae rokko padang umpenombai tu rapang-rapang dipodeata, tu mangka kugaraga, (tae’ ammi dipatumba-tumba), apa ke tae’i mipenombai, ta’pa dipembuangangkomi tama dapo’, nanii api ma’lana-lana, sia den pole’raka misa’ deata tu ma’din urrampanangkomi lan mai limangku?

DANIEL 3:28

Ma’kadami Nebukadnezar nakua: Mintu’ kadipudian lu langngan Kapenombanna Sadrakh, Mesakh na Abednego! Nasua tu malaeka’Na sae urrampanan taunNa, tu nanii sande’, tu untengkai tu parentana datu sia umpopa’elo’na batang kalena, belanna moi misa’ deata noka ia umpakarayai ba’tu umpenombai, sangadinna Kapenombanna manna.

DANIEL 3:29

Iamoto angku pa’parentanni, kukua lako mintu’ tau, dio mai mintu’ bangsa ba’tu sangpetayanan ba’tu ma’rupa-rupa basana tae’ duka misa’ dipasalian, ke umpa’kada solangi Kapenombanna Sadrakh, Mesakh na Abednego, tau iato mai la dita’tak-ta’tak sia iatu banuanna la dipopendaun lauan, belanna tae’ tu kapenomban senga’, tu ma’din merampanan susito.

DANIEL 4:17

Iate parenta iate napamatu’tunmo mintu’ to ma’kampa na iatu iannate nalampakmo to masero, anna tandai mintu’ to tuo, kumua Puang Patodoranna ungkuasai tu kadatuan tolino sia Nakamasei minda-minda tu Naporai, ondongpi ma’din natokko tu to tarru’ madiongan dio lu tolino lan kadatuan iato.

DANIEL 4:25

La naali’komi tau dio mai sangbilangan tolino na iatu katorroammi la sisola olo’-olo’ dio lu padang; anna pakandekomi tau riu ten to sapi, ammi dipopa’elo’na nasakka’i ambun dao mai langi’; la nalambi’ pempitu attu la minii susito sae lako miakunna, kumua Puang Patodorana ungkuasai kadatuanna tolino sia Nakamasei tu minda-minda Naporai.

DANIEL 4:32

Sia la naali’ko tau dio mai sangbilangan tolino na iatu katorroammu la sisola olo’-olo’ dio lu padang; anna pakandeko tau riu ten to sapi; sia nalambi’ pempitu attu la munii susito sae lako muakunna, kumua Puang Patodoranna ungkuasai kadatuanna tolino sia Nakamasei tu minda-minda Naporai.

DANIEL 5:11

Den misa’ tau lan parentami, natorroi penaa deata masero; na iatonna ambe’mipa iatu tau iato iatu penaanna, naniimo arrang sia tangnga’ kinaa sia kakinaan, susitu kakinaanna deata; iatu ambe’mi datu Nebukadnezar unnangka’i tu tau iato pangulu to paissan-issan, to ma’basa-basa, to Kasdim sia to pakita-kita, – susimoto tu ambe’mi, o datu.

AMOS 3:7

Manassa tae’ Napogau’i Puangta PUANG tu mintu’ apa, ke tae’pi Napasamboi tu pa’timbanganNa lako taunNa, iamotu mintu’ nabi.

1 KORINTUS 14:25

naurunganni sombo tu diongna penaanna, nasusito tukkumi umpenombai Puang Matua sia nakatonganni kumua, manassa den Puang Matua misisolan.

PA’TOLE 10:17

Belanna iatu PUANG, Kapenombammi, Iamo Puang Matua undaoanni mintu’ deata sia Puangna mintu’ puang, iamotu Kapenomban pasareongan sia mawatang sia metakuran, tu tang umpelindo rupa tau sia tang untarima pamengan,

1 TIMOTIUS 6:15

Iatu iannato ke attunnamo la Napa’pekitanan Puang ma’kada misa sia tang dilambi’ karongkosanNa. Datunna mintu’ datu sia Puangna mintu’ pekapuangan.

YOSUA 22:22

Iatu Puang Matua undaoanni mintu’ deata, iamo PUANG, tu Puang Matua undaoanni mintu’ deata, iamo Puang, Iamo unnissanni sia to Israel duka la unnissanni: iake la kipogau’i tu umbalii ba’tu tang maruru’ lako PUANG melo ke tang Mikarimmannikanni!

KADA OMBO’ LAKO RASULU’ YOHANES 1:5

sia lu dio mai Yesu Kristus, tu dadi sa’bi maruru’, tu pa’bunga’ tuo dio mai mintu’ to mate, sia dadi Pangulunna mintu’ datu lan te lino. Nalako tu To-umpakaboro’ki’, sia mangkamo ulla’bakki’ raraNa, dio mai mintu’ kasalan,

KADA OMBO’ LAKO RASULU’ YOHANES 17:14

Mintu’i sola nasang la sirari Anak domba, apa la Natalo Anak domba; belanna Iamo Puangna mintu’ puang sia Datunna mintu’ datu; na mintu’ tu baananna patalo duka, iamotu mintu’ to ditambai sia to ditonno’ sia iatu to maruru’.

KADA OMBO’ LAKO RASULU’ YOHANES 19:16

Dio bayu lamba’Na sia dio pupunNa den misa’ sanga disura’ nakua: Datunna mintu’ datu sia Puangna mintu’ puang.