DANIEL 2:23 - Sura' Madatu

²³ Kamu, o Kapenombanna nene’ to doloku, tu kupudi sia kupakala’bi’, belanna mangkamoKomi ungkamaseina’ kakinaan sia kamatotoran, sia Mipokadammo’ totemo tu apa kipalaku lako Kalemi, belanna Mipaombo’mo lako kaleki tu diona a’ganna datu.

DANIEL 2:23 ပူးပေါင်းရင်းမြစ်များ

KADADIAN 18:17

Nakuami tu PUANG: Ma’apari angKu la umbunianri Abraham tu apa la Kupogau’?

KADADIAN 31:42

Iake tang la Narondongna’ Kapenombanna ambe’ku, Kapenombanna Abraham sia To napengkaolai Ishak, manassa totemo misuana’ male ma’pala’ lo’bang. Manassa Natiro Puang Matua tu parri’ku sia kamara’tasangku mengkarang. Iamo umpakilalakomi sangmai’ bongi.

1 DATU 18:36

Iatonna lambi’mi attunna dinii memala’ bongi, tassu’mi tu nabi Elia dio tingayona to buda nama’kada nakua: O PUANG, Kapenombanna Abraham, Ishak na Israel, allo iate melo, ke payanni, kumua Kamumo tu Kapenomban dio lu to Israel, sia akumo tu taumMi, na iatu mintu’ apa kupogau’ te unturu’ kadamMi.

1 DATU 8:57

Lalasia manii anNa rondongki’ PUANG, Kapenombanta, susitu Ia mangka urrondong nene’ to dolota; sangapaoi upa’ da Natampeki’ sia da Natumpuki’.

1 OSSORANNA DATU 29:10

Attu iato napudi-pudimi Daud tu PUANG dio tingayona kombongan, sia nakua Daud: Mintu’ kadipudian lu lako Kalemi, o PUANG, Kapenombanna Israel, nene’ to doloki, tempon dio mai landa’ lako attu situran.

1 OSSORANNA DATU 29:13

Totemo, o Kapenombangki, kipudi-pudiKomi, sia kipakala’bi’ tu sanga madatumMi.

2 OSSORANNA DATU 20:6

sia ma’kada nakua: O PUANG, Kapenombanna nene’ to doloki, tang Kamuraka Puang Matua lan suruga, sia tang Kamu dukaraka umparenta mintu’ kadatuanna mintu’ tu mai bangsa? Lan limamMi tu kapaan sia kamatotoran, naurunganni moi misa’ tau tae’ ungkullei tumanan unneaKomi.

PA’PUDIAN 21:2

O PUANG, parannu paiman tu datu tu diona kuasamMi, sia tumba kalo’dokanna belanna kamakarimmanan lu dio mai Kalemi!

PA’PUDIAN 21:4

Belanna Mipatammuimo rongko’ sanda maelo, sia Mipaluangimo makota bulaan tasak tu ulunna.

PA’PUDIAN 25:14

Iatu kada rasianNa PUANG lu lako to ungkasiri’I, sia iatu basseNa la dipasombo lako.

PA’PUDIAN 50:14

Pennoloanni lako Puang Matua tu pa’kurre sumangasan, sia palesso’i tu mintu’ pangallonammu lako Puang Patodoranna.

KATASSURAN 3:15

Ma’kadami tu Puang Matua lako Musa, nakua: Susimo la mupokada lako to Israel, kumua: Iatu PUANG, Kapenombanna nene’ to dolomi, Iamo Kapenombanna Abraham, Ishak na Yakub ussuana’ sae lako kalemi sia Nakua: iamote tu sangangKu tontong sae lakona sia sanga iamote tu misiosso’i la ussa’bu’Na’.

SARAMBU PEADA’ 21:22

Iatu to kinaa unteka’ kota ditambakukunna to lalong sia natuan tu benteng naposanderan.

SARAMBU PEADA’ 24:5

Iatu to kinaa matoto’, sia iatu to unnampui kapaissanan umpasombo kamawatangan.

SARAMBU PEADA’ 8:14

Kuampui tu pa’pakilala melo sia pa’timbangan, akumo tu pakita penaa; kuampui tu kamatotoran.

TOMANGADA’ 7:19

Iatu kakinaan umpabu’tuan kuasa to kinaa losong na iatu kuasa naampui sangpulo to paa lan misa’ kota.

TOMANGADA’ 9:16

Ma’kadamo’ kukua: La’biran ia tu kakinaan na ia tu kamabukuan, apa iatu kakinaanna to bongko nasayu liu tau sia tae’ duka naperangii tu kadanna.

TOMANGADA’ 9:18

Iatu kakinaan mandu melo na iatu pa’buno rari, apa misa’ to kadake gau’na ussanggangi buda apa melo.

YESAYA 12:1

Allo iato la ma’kadako mukua: La kupudi-pudikomi, o PUANG, belanna moi amMi sengkeina’, apa meremo tu sengkeMi, Mipakatanamo’.

YEREMIA 33:3

Meongli’ko lako Kaleku, angKu pebaliiko sia la Kupokadangko tu apa kapua tu tang dipebuyu’, tu tae’ mutandai.

DANIEL 1:17

Nakamaseimi Puang Matua kapaissanan, kamatarrusan untandai mintu’ sura’ sia kakinaan tu to mangura sola a’pa’i, na iatu Daniel matarru’mo untandai ma’rupa-rupa patiro mendeata sia tindo.

DANIEL 2:18

anna ma’kada kumua la umpalaku kamamasean lako Puang Matua dao suruga diona te rasia iate, kumua na iatu Daniel sola to nasolan da nadipatei sola to paissan torronapa dio Babel.

AMOS 3:7

Manassa tae’ Napogau’i Puangta PUANG tu mintu’ apa, ke tae’pi Napasamboi tu pa’timbanganNa lako taunNa, iamotu mintu’ nabi.

MATIUS 11:25

Iatonna iato umpakendekmi pa’pudian tu Yesu, Nakua: O Ambe’, Puangna langi’ na lino, KupudiKomi, belanna Misamboan to paissan sia to manarang te ianna te, anna lako pia Minii umpasomboi.

LUKAS 10:21

Iatonna iato parannu penaanNa tu Yesu belanna Penaa Masallo’, nakua: Ma’kurre sumanga’Na’ lako Kalemi, O Ambe’, Puangna langi’ sola lino, belanna mintu’na te Misamboan to matarru’ sia to manarang, amMi pasomboi lako pia. O Ambe’Ku, belanna susimoto tu pa’poraiamMi dio oloMi.

YOHANES 11:41

Naberumi tau tu batu. Mentingarami tu Yesu anNa ma’kada Nakua. O Ambe’, ma’kurre sumanga’Na’ mati’, belanna MiperangiiNa’.

YOHANES 15:15

Tae’mo Kusangakomi kaunan, belanna iatu kaunan tae’ naissanni tu napogau’na puangna; apa Kusangamokomi sangmane, belanna mintu’na tu Kuranginna dio mai Ambe’Ku, iamoto tu Kupokadangkomi.

KADA OMBO’ LAKO RASULU’ YOHANES 1:1

Iamote tu kada ombo’ dio mai Yesu Kristus, tu NakamaseanNi Puang Matua, dikua anNa pakitanni mintu’ taunNa tu mintu’ apa inang manassa la dadi madoi’: Nasuami tu malaeka’Na umpamanassanni Yohanes, taunNa.

KADA OMBO’ LAKO RASULU’ YOHANES 5:5

Denmi misa’ dio mai tu mintu’ penatua ma’kada lako kaleku nakua: Da mutumangi’, tiromi, iatu Singa tu lu dio mai sukunna Yehuda, iamo Una’na Daud unnappa’mo kapataloan naurunganni umbungka’i tu sura’ sia iatu pitu ca’na.