DANIEL 2:2 - Sura' Madatu

² Mesuami tu datu untambai mintu’ to paissan-issan sia to ma’basa-basa sia to unnampui balik mata sia to Kasdim, la ussembanganni tu tindona datu; saemi tu tau iato mennolo dio olona datu.

DANIEL 2:2 ပူးပေါင်းရင်းမြစ်များ

KADADIAN 41:8

Iatonna melambi’ dio mai ma’bara-barami tu ara’na Firaun na mesua untambai mintu’ to paissan-issan sia to patanda-tandan dio tondok Mesir; napokadami Firaun lako tau iato mai tu tindona, apa tae’ bang misa’ unnissanni ussembanganni Firaun.

ESTER 1:13

Ma’kadami tu datu lako mintu’ to paissan tu unnissanni tu attunna, belanna susimoto tu kabiasan la umparampo a’ganna datu lako to untandai atoran sia salunna.

KATASSURAN 7:11

Natambaimi Firaun tu mintu’ to paissan sia mintu’ balik mata, na mintu’ tu to Mesir den issan-issanna umpogau’ dukai susito tete dio basa-basana.

YESAYA 19:3

Attu iato iatu tangnga’na to Mesir la putta, sia la Kudampa tu tanan penaanna; anna male mekutana lako dipa’deatainna sia mintu’ to ma’basa-basa sia bombo to mate sia to sola deata.

YESAYA 8:19

Iake nakuangkomi tau kumua: Ma’petiro-tirokomi lako bombo to mate sia to sola-sola bombo tu kumissak-missak sia ma’nemu-nemu – tang Kapenombannaraka misa’ bangsa tu sipatu la nanii mekutana? Pato’raka dipekutanan lako to mate tu to tuo?

DANIEL 1:20

Na lan mintu’na apa diona kamatarrusan sia kapaissanan, tu napekutanan datu lako kalena, naappa’mi datu kumua losong ia pessangpulo manarangna na iatu mintu’ to paissan-issan sia to ma’basa-basa lan mintu’ kadatuanna.

DANIEL 1:4

Iamotu ba’tu pira-pira to mangura, tu tae’ tattanna sia melo pantarisanna, tu kinaa sia paissan sia tarru’ manarang, tu malute untoe pengkarangan lan tongkonan layukna datu, anna ada’i sura’ sia basa to Kasdim tu tau iato mai.

DANIEL 2:10

Mebalimi tu to Kasdim lako datu nakua: Tae’ misa’ tau dao kuli’na padang umbelai napokada tu apa natuntun datu, iamoto tae’ duka misa’ datu, moi nakapua sia makuasa untuntunni tu apa susite lako misa’ to paissan-issan, ba’tu to ma’basa-basa, ba’tu to Kasdim.

DANIEL 2:27

Mebalimi tu Daniel lako datu nakua: Iatu rasia napekutanan datu moi misa’ to paissan, to ma’basa-basa, to paissan-issan ba’tu to pakita-kita, tae’ nabelai umpokadanni datu.

DANIEL 3:8

Attu iato ta’pa saemi tu ba’tu pira-pira to Kasdim mennolo umparapa’i tu to Yahudi tu diona to.

DANIEL 4:3

Tumba kapuanna tu tanda kalle-kalleanNa sia tumba kuasanna tu tanda mangngaNa! Iatu kadatuanNa misa’ kadatuan tontong sae lakona sia iatu pekapuanganNa tontong disituran-turananni.

DANIEL 4:6

Attu iato kupa’parentammi mesua umbaai lako kaleku tu mintu’ to paissan dio lu Babel, kumua anna pokadanna’ tu sembangna tindo iato.

DANIEL 5:7

Metambami tu datu umpekapuai gamaranna, mesua ussolanni sae tu to ma’basa-basa, sia to Kasdim sia to pakita-kita. Ma’ kadami tu datu lako mintu’ to paissan lan Babel, nakua: Minda-minda ma’din umbasai te pangoki’ iate sia umpokadanna’ tu battuananna, la dipakei tamangkale lango-lango, sia dipaluangi manik bulaan tu barokona, sia iamo la ma’parenta lan kadatuan untoe pangka’ ma’pentallun.

1 SAMUEL 6:2

natambaimi to Filistin tu mintu’ to minaa sia to pakita-kita, nakua: La kipatumbai tu pattinNa PUANG? Pokadangkanni umba la kipakuanni umpasulei lako to’ inanna?