2 SAMUEL 4:11 - Sura' Madatu

¹¹ Ondong pissan totemo to bulituk mangkamo umpongko misa’ to malambu’ lan tongkonan layukna dao patindoanna, tang sipaturaka kutuntun tu pakkan rarana dio mai limammi sia kusabu’ikomi dao mai kuli’na padang?

2 SAMUEL 4:11 ပူးပေါင်းရင်းမြစ်များ

KADADIAN 4:11

Iamoto nasallamoko padang, tu mangka menganga untimang rarana adimmu dio mai limammu.

KADADIAN 6:13

Iamoto anNa ma’kada tu Puang Matua lako Nuh kumua: Nalambi’mo tu ma’katampakanna mintu’ tolino situru’ pangra’ta’Ku, belanna ia te lino naponnoimo kamasa’garan. Tonganna la Kusabu’i tu tau iato mai sola te lino!

KADADIAN 7:23

Susimo lalanna dinii ummangsanni tu angge menono’ lan te lino, la tolino, la patuoan sia mintu’ olo’-olo’ mendonglo’ sia mintu’ manuk-manuk dao lu langi’; mintu’nato dimangsanni lan mai lino, Nuh manna tu tuo sola mintu’ to nasolan lan lembang.

2 SAMUEL 16:8

Napabala’imo PUANG lako kalemu tu rarana bati’na Saul tu musonda dadi datu, sia Nabenmo PUANG Absalom, anakmu tu kadatuan; manassa lanko kamandasan totemo, belanna misa’ko to pa’patibollo rara.

2 SAMUEL 3:27

Iatonna sulemo tu Abner lako Hebron, napasepang senga’mi Yoab dio tangnga babangan tondok la sipa’kada buni, narokki tu tambukna, anna mate, belanna la umpebalaran Asael, adinna.

2 SAMUEL 3:39

Apa totemo malamma’ siapa’ akute, moi angku ditokko dadi datu; tau iato, iamotu anakna Zeruya, mandu masa’ga’ na aku. Na PUANGmora umpakkanni tu to kadake sitinaya kakadakeanna.

1 DATU 2:32

La Napasulean PUANG tu rarana dao botto ulunna, belanna mangka umba’ta sia umpatei pa’dang tu da’dua to malambu’ sia melo anna ia, tu tang naissan ambe’ku Daud, iamotu Abner, anakna Ner, pangulu rarinna to Israel sia Amasa, anakna Yeter, pangulu rarinna to Yehuda.

PA’PUDIAN 109:15

Sangapaoi anna tontong dio pentiroNa PUANG tu mintu’nato, anna dipa’dei lan mai lino tu kadikilalaianna tau iato mai.

PA’PUDIAN 9:12

Pakendekki tu pa’pudian langngan PUANG tu unnisung dao Sion, pa’peissananni tu mintu’ penggauranNa dio lu mintu’ bangsa,

KATASSURAN 21:12

Minda-minda ungkambei tau namate, manassa dipatei duka.

KATASSURAN 9:15

Moi totemote ma’din Kuangka’ tu limangKu umparampoiko ropu sia mintu’ taummu, ammu mangsan dao mai kuli’na padang.

SARAMBU PEADA’ 2:22

apa iatu mintu’ to tang mekaaluk la disabu’i lan mai tondok sia iatu mintu’ to tang maruru’ la ditorakki lan mai.

SARAMBU PEADA’ 25:26

Susi uai saruran dipamalutu sia uai kalimbuang dipamaruttak, susi dukamoto tu to malambu’ ungkalaa’ to tang mekaaluk.

YEREMIA 10:11

– La susi kadammi lako tau iato mai, kumua: Iatu mintu’ deata, tu tae’ napadadi langi’ sola lino, la pa’de dao mai kuli’na padang sia lan mai nasambo langi’, –

HABAKUK 1:12

O PUANG, tae’raka na Kamu tu Kapenombangku tempon dio mai sia To maseroku? Tae’ kila mate. O PUANG, Kamumo umpadenni tu tau iato mai la mangukung, sia o Buntu Batu, Kamu umpamanassai tu tau iato mai la umpalalo peada’.

HABAKUK 1:4

Iamoto natangkan kepatu tu Sukaran aluk sia tae’mo napayan len tu salunna, belanna iatu to tang mekaaluk untikui to malambu’, iamoto napayan tibalik sule tu salunna.

1 YOHANES 3:12

Tae’ nasusi Kain, tu lu dio mai deata bulituk, umpongko siulu’na. Apa bannangna anna pongkoi? Belanna mintu’ penggauranna kadake, apa penggauranna siulu’na malambu’ ia.