2 SAMUEL 3:39 - Sura' Madatu

³⁹ Apa totemo malamma’ siapa’ akute, moi angku ditokko dadi datu; tau iato, iamotu anakna Zeruya, mandu masa’ga’ na aku. Na PUANGmora umpakkanni tu to kadake sitinaya kakadakeanna.

2 SAMUEL 3:39 ပူးပေါင်းရင်းမြစ်များ

2 SAMUEL 16:10

Apa nakua datu: La siapariki’, e anakna Zeruya? Da’ito natampakkina’ ropu! Iake Nakuai PUANG lako: Tampakki ropu tu Daud, mindaopa la ma’kada kumua: Ma’apai mupogau’i to?

2 SAMUEL 19:13

Sia lako Amasa la mikua susite: Tang sangrara sangbukuraki’ka? Nasanggangimora’ Puang Matua sia la Narangnganni pole’pa, ke tae’i na iko dadi kamandang lompo dio oloku tontong sae lakona la ussonda Yoab.

2 SAMUEL 19:22

Apa nakua Daud: La siapariki’, e anakna Zeruya? Belanna allo iate dadikomi to umbalina’. Ma’apai anna la den misa’ tau dipatei allo iate dio lu to Israel. Belanna inang kuissan, kumua allo iate dadi pole’mo’ datu lako mintu’ to Israel.

2 SAMUEL 3:38

Mangkato nakuami datu lako mintu’ to mase’ponna: Tae’raka miissanni, kumua allo iate tibambang misa’ arung iamo misa’ to kapua lan lu to Israel?

1 DATU 2:32

La Napasulean PUANG tu rarana dao botto ulunna, belanna mangka umba’ta sia umpatei pa’dang tu da’dua to malambu’ sia melo anna ia, tu tang naissan ambe’ku Daud, iamotu Abner, anakna Ner, pangulu rarinna to Israel sia Amasa, anakna Yeter, pangulu rarinna to Yehuda.

1 DATU 2:9

Apa totemo da mueloranni tu salana tang diukung belanna misa’ko to kinaa; manassa muissan tu apa sipatu la mugauranni, kumua ammu parokkoi lino to mate tu ubanna sitombang rara.

1 OSSORANNA DATU 22:5

Belanna natangnga’ Daud, kumua iatu anakku Salomo mangurapa sia tang matona’pa, na iatu banua la dipabendanan PUANG sipatu la kapua tongan anna undaoanni mintu’ banua kalelean sia mala’bi’ lan mintu’ tondok; iamoto kurampunni totemo tu apa la napake. Susimoto tu Daud urampunni dolo tu apa la dipake lendu’ budanna, namane mate.

1 OSSORANNA DATU 29:1

Mangkato ma’kadami tu datu Daud lako mintu’ kombongan, nakua: Iatu anakku Salomo, tu Natonno’mo Puang Matua misa-misai mangurapa sia malolle’pa, anna iate pengkarangan kapua, belanna iate tambakuku tangia inan tolino, sangadinna inanNa PUANG Kapenomban.

2 OSSORANNA DATU 13:7

Sirampunmi dio tu ba’tu pira-pira to tae’ gai’na sia to bulituk, tu ussau’ Rehabeam, anakna Salomo, tonna mangurapa tu Rehabeam sia malamma’pa penaanna, naurungan tang nakullepa unneai tu tau iato mai.

PA’PUDIAN 101:8

Melambi’oi la kusabu’ioi tu mintu’ to tang mekaaluk lan padang iate, angku roto’i lan mai kotaNa PUANG tu mintu’ to umpogau’ kakadakean.

PA’PUDIAN 28:4

Papakkanni tu tau iato mai sitinaya gau’na, sia sitinaya kakadakeanna penggauranna; papakkanni sitinaya lalan limanna, pabala’i tau iato mai sitinayanna tu napogau’na.

PA’PUDIAN 62:12

Pissanmo ma’kada tu Puang Matua, penduammo kurangi Nakua: Iatu kuasa, Puang Matua Ia tu ampunna.

PA’PUDIAN 7:16

Umbo’bokmo patuang lambe’, namukkun ussindungi; apa ia kalena tobang rokko tu patuang nagaraga.

PA’PUDIAN 75:10

Apa iate aku la tontong bang kupa’peissanan tu iannato, sia umpakendekan pa’pudian Kapenombanna Yakub.

KATASSURAN 21:12

Minda-minda ungkambei tau namate, manassa dipatei duka.

SARAMBU PEADA’ 20:8

Misa’ datu tu unnisung dao kadera pa’paolaian salu, matanna bangsia umpasilaenanni tu kadake na melo.

SARAMBU PEADA’ 25:5

Pamambelai tu to tang mekaaluk dio mai olona datu, na iatu isungan kapayunganna dipabantang tete dio kamaloloan.

YESAYA 3:11

Upu’ allona tu to tang mekaaluk, la narampoi kakadakean tu tau iato, belanna la dipasisurung kande limanna.

YESAYA 7:4

ammu kuanni kumua: Ma’penandakomi sia parapa’i tu penaammi; da mimataku’ sia da naranggang tu penaammi diona te da’dua lalotin merambu, iamora kare’dekanna kasengkeanna Rezin sola mintu’ to Aram sia anakna Remalya.

YEREMIA 38:5

Nakuami datu Zedekia: Tiromi, lan sia limammi, belanna aku, datu, tang kubela undampakomi.

DANIEL 6:16

Naparuku tonganmi tau iato mai tu datu nama’kada lako nakua: La miissan datu, kumua iate misa’ atoran napondok to Media sia to Persia, tae’ nama’din disondai len tu misa’ atoran ba’tu parenta, tu mangkamo napatassu’ datu.

KADIBILANGAN 32:23

Apa iake tae’i mipogau’i susito, manassa kasalangkomi lako PUANG, sia la miissan, kumua iatu kasalammi la sule langan botto ulummi.

ROMA 13:4

Belanna iamo taunNa Puang Matua tu umpabu’tuangko kameloan. Apa iake umpogau’ko kakadakean, la mataku’ko, belanna tae’ natakin punala bangi tu la’bo’, apa iamo taunNa Puang Matua, tu umparampo kasengkean lako minda-minda tu umpogau’ kakadakean.

2 TIMOTIUS 4:14

Iatu Aleksander, pande tambaga, lendu’mo kakadakean napogau’ lako kaleku; Puang la umpapakkanni lako kalena tu sitinayanna penggauranna.

TO PARENGNGE’ 9:57

Sia ia duka tu mintu’ kakadakeanna to Sikhem Napasule nasang Puang Matua langngan botto ulunna. Susimoto tu pa’tampak ropunna Yotam, anakna muane Yerubaal dipalanda’ lako tau iato mai.