2 PETRUS 2:3 - Sura' Madatu

³ Belanna kabasisi-inaanna nala undaka’ saro dio mai kalemi umpokada kada passede. Masaimo tumaya tu ukungan la urrampoi sia ia duka tu kasangganganna ma’kampa bangmo.

2 PETRUS 2:3 ပူးပေါင်းရင်းမြစ်များ

AYUB 6:27

Moi anna pia biung la mipa’lotereian duka, sia iatu sangmanemi la mipo- balukan.

PA’PUDIAN 18:44

MangkamoKomi urrampananna’ dio mai kasipakkanna to buda, sia Mipopangulunnamo’ ba’tu pira-pira bangsa; iatu bangsa tang kuperambu sae duka mengkaunan lako kaleku.

PA’PUDIAN 66:3

La ma’kadakomi lako Puang Matua, kumua: Lendu’ metakuranna tu mintu’ penggauramMi, mintu’ duka ualimMi pudukna bangri mengkanorong Mati’ belanna kuasa kapuamMi.

PA’PUDIAN 81:15

Manassa ta’pa Kupatunduk madomi’ tu mai ualinna, sia Kupasulei limangKu tu mai to unneai.

YESAYA 5:19

Tu ma’kada nakua: Melo ke madomi’-domi’I, melo ke Nasarra’-sarra’i tu penggauranNa, anta tiropi; melo ke samandappi’-dappi’nai tu apa Nalampakna To maserona to Israel, anta issanni.

YESAYA 56:11

Sia asu iate soko, tae’ natandai dia’; iatu tau iato mai iamoto mangkambi’ tang makaritutu, pada unturu’ kalena lalanna, pada umparinaa kalena sarona, tae’ misa’i dipasalian rinding.

YESAYA 60:22

Iatu bittikna la memba’ka’, naurunganni mendadi misa’ pa’rapuan sia iatu madiongna la mendadi misa’ bangsa kapua; Akumo, tu PUANG la umpogau’i madomi’, ke attunnami.

YEREMIA 6:13

Belanna tau iato mai randuk dio mai to bitti’ sae lako to kapua undaka’ bang saro bu’tu kadake; mintu’nato ma’pakena nasang; la nabi la to minaa.

YEREMIA 8:10

Iamoto Kueloranni tu bainena tau iato mai naala to senga’ sia iatu pa’lakna diben to untaloi. Belanna randuk dio mai to bitti’ sae lako to kapua undaka’ bang saro bu’tu kadake, mintu’na to ma’pakena nasang la nabi la to minaa.

YEHEZKIEL 13:19

MipamatunaNa’ dio tingayona taungKu kumua ammi appa’ dalle sisikan ba’tu pirang-pirang raku’ sia ba’tu pirang-pirang sasa’ roti, la ungka’tu sunga’na tau, tu tae’ nasipatu la mate sia la ungkarimmanni sunga’na tau, tu tae’ nasipatu la tuo, belanna mimo’rangi tu taungKu, tu morai umperangii mo’rang.

MIKHA 3:11

Iatu mintu’ pangulu ma’paolai salu ungkande pappe’, sia mintu’ to minaa mangada’ umpalaku saro sia mintu’ nabi pakita-kita umpalaku doi’. Moi na susito iatu tau iato mai sande’ duka lako PUANG sia ma’kada nakua: Tae’raka PUANG dio lu kaleta? Tae’ nala urrampoiki’ kamandasan!

HABAKUK 3:3

Saemo tu Puang Matua dio mai Téman, sia iatu To masero dao mai buntu Paran. Sela Iatu kamala’biranNa ussamboi mintu’ langi’, sia nasitutu’i kadipudianNa tu lino.

MALEAKHI 1:10

Melo ke den misa’ tau dio kalemi, tu untutu’ ba’ba, kumua da mipadukku punala bang api dao inan pemalarangKu! Tae’ nakalo’komi penaangKu, kadanNa PUANGna mintu’ ma’dandan maritik, sia tae’ Kuporai tu pemala’ natangke limammi.

MATIUS 23:14

(Upu’ allomi, e pandita Sura’ sia to Farisi, to belo puduk, belanna miimbakan tu iananna baine balu, ammi angga’-angga’i umpamalambe’ passambayangmi; iamoto mandu la naruakomi tampak ropu.)

LUKAS 18:8

Kukua lako kalemi: Manassa madomi’ la Napakaloloan tu kara-karana tinde tau. Apa iake saeI tu Anak rampan dilino, la ungkabu’tuiparaka kadipatonganan lan te lino?

LUKAS 20:20

NatuntunNi bangmi tau iato, iamoto nasuai ba’tu pira-pira tu tau loo ummata-matai sia unna’ga to malolo kalena, kumua anna pentoei sangbuku tu kadanNa, tu la naninna umpa’peturoanNi lako to paa sia lako parentana to maraya.

LUKAS 22:47

Marassan bangsiapa ma’kada-kada pakalan nasaemo sangtuntunan tau sola tu anak gurunNa misa’ disanga Yudas, dolo undoloanni tu tau, nasae umpentireke’i Yesu, la unnudungI.

YOHANES 2:16

Nakuami ungkuanni tu to ma’baluk bu’ku’: Alai nasangi lao te apa iate, da mia’ga pa’balukanni te banuanNa Ambe’ku.

ROMA 16:18

Belanna iatu to susito, tangia to mekapuang lako Puangta Kristus, sangadinna umpopuang tambukna; sia mamming bang kadanna sia male’so’ untua’ ba’tangi to mai to ma’inaa sangkaloloan.

2 KORINTUS 2:17

Belanna kami te tae’ kisusitu tau pira tu umpopandakaran kadanNa Puang Matua, sangadinna malambu’ tongankan ma’kada-kada, susitu lu diona mai Puang Matua, sia dio oloNa Puang Matua kinii umpokadai tete dio Kristus.

PA’TOLE 24:17

Da mupakelokki tu katongananna to sae sia pia biung; sia da duka muala pakeanna baine balu la mutoe.

PA’TOLE 32:35

Aku puangna tu pa’pabala’ sia pa’papakkan, iake la attunnami tilende’ tu lette’na, belanna iatu allo kasangganganna mandappi’mo, sia madomi’mo mengkareke’ tu apa dipamanassanni.

1 TESALONIKA 2:5

Belanna tae’pa kibelai ullono’komi, moi kamu miissan duka; tae’ duka angki kalemu’i kabasisi-inaan, Puang Matua untiroi!

1 TESALONIKA 5:3

Ianna kua tau: Marampa’ sia salama’, pakalan to ke saemi kasanggangan urrampoi, susito baine ma’tambuk mangurria’; anna tae’ nabelai la urrampanan kalena.

1 TIMOTIUS 3:3

tang pa’anggoro’, ba’tu passiboboran, sangadinna to sallo’ penaanna, tangia to passite’geran sia tangia to ungkaduangi doi’;

1 TIMOTIUS 3:8

Susi dukato tu mai pa’kamaya, la massipa’, da anna popa’pangka lilana, da anna pa’anggoro’ da anna mesaro bu’tu kadake;

1 TIMOTIUS 6:5

iamo kasisakkan napabu’tu tu to tang ma’runduanan tangnga’na sia disabakkimo tu kamanapparan, tu ussangai kumua iatu kamengkaolan misa’ tangnga’ la dinii mesaro.

TITUS 1:11

Tu sipatu dikamummu’ sadangna, tu umbalittua’ tau lan lu tananan dapo’na, diona umpa’pangadaran tang sipato’na, belanna mesaro bu’tu kadake.

TITUS 1:7

Belanna iatu to ma’panundu’ la susito makatirinnanNa Puang Matua tae’ len sayuanna, da nato umpakapua penaanna, da nato madoi’ sengke, da nato pa’anggoro’, ba’tu to passiboboran, ba’tu to mesaro bu’tu kadake;

1 PETRUS 2:8

sia: Misa’ batu katitodoan sia buntu batu ma’pamatana’, tu nanii titodo tau iato, belanna tae’ anna turu’i tu kadanNa Puang Matua; dilampakmo tu tau iato mai lako apa iato.

1 PETRUS 5:2

kambi’i tu mintu’ dombaNa Puang Matua tu mitage’na, da anna susito diparuku sangadinna la sanning penaa situru’ pa’poraianNa Puang Matua; sia da anna butung la morai mesaro bu’tu kadake, sangadinna naturu’ penaa kalebu;

2 PETRUS 1:16

Belanna tae’ angki turu’i tu ulelean pare digaraga kamalutean, tongki pokadangkomi tu kuasa sia kasaeanNa Puangta Yesu Kristus, sangadinna kitiro kalenamo tu kamatandeanNa.

2 PETRUS 2:1

Apa den dukamo dolona ba’tu pira nabi mo’rang dio lu to Israel, susi duka tu kamunna la bu’tu ba’tu pira guru ma’papusa, la umbaa buni pangadaran sala, tu untumang tau, sia napeonganni tu Puang mangka ulla’bakki’, sia umpasae kasanggangan madoi’ lako kalena.

2 PETRUS 2:9

iake susito, payanmo kumua Naissan Puang urrampanan mintu’ to mengkaola lan mai kadirosoan, sia umpattang mintu’ to kelok penaanna sae lako allo pangukungan, anNa pakario-rioi,

YUDAS 1:11

Upu’ allona tau iato mai, belanna unturu’mo lalanna Kain, sia mentu’mu’mo tama peroso sarona Bileam, anna sanggang diona pabali-balinna susi Korah.

YUDAS 1:15

la umpaolai salunna lako mintu’na tau, sia la unnukung mintu’ to tang mekaaluk diona mintu’ penggauran tang mekaalukna, tu mangka napogau’ tang mekaaluk, sia diona mintu’ kada makarra’ nasa’bu’ to kasalan tang mekaaluk unnea Puang.

YUDAS 1:16

Tau iamorato mai tu pa’nuku-nukuan sia suma’rok sia unturu’ bang kamoraianna, ma’kada matampo, anna ussede tau belanna untiroan misa kalena.

YUDAS 1:4

Belanna den ba’tu pira-pira tau tama buni, iamotu to tisura’ dolomo lako ukungan iate; to tang mekaaluk, tu ussondai tang penggauran tu pa’kamaseanNa Kapenombanta, anna peonganni tu pangulu misa’ta sia Puangta, Yesu Kristus.

YUDAS 1:7

Susi Sodom na Gomora sia mintu’ tondok nasikandappiran, susi bangsiamo tau iato mai mangka ussorong kalena lako gau’ tang nakande asu anna male sigau’ sala tangia bali lalan biasanna, mendadi misa’ rapangan nakande api tang pa’de-pa’de tonna perasai kamaparrisanna.