1 SAMUEL 30:6 - Sura' Madatu

⁶ Kapussakan tongan tu Daud, belanna iatu to buda sipa’kada-kada la untumbui batu, belanna kamapallanna penaanna tu to buda, tu diona anakna muane sia diona anakna baine, apa iatu Daud umpabatta’ penaanna urrannuan PUANG, Kapenombanna.

1 SAMUEL 30:6 ပူးပေါင်းရင်းမြစ်များ

KADADIAN 32:7

Lendu’mi mataku’na tu Yakub sia pussak, na iatu mintu’ to nasolan sia mintu’ domba sia bembe’ sia sapi sia unta napaduang tuntunan.

2 SAMUEL 17:8

Sia nakuapa Husai: Mitandai kumua iatu ambe’mi sia mintu’ taunna lalong nasang, sia mapalla susi beruang setangan dio lu padang, tu sisayuran anakna. Ondongpi iatu ambe’mi to malute parari, dadi tae’ nala torro ma’bongi sola mintu’ to buda.

2 DATU 4:27

Iatonna rampomo lako taunNa Puang Matua dao buntu, naraka’mi tu lette’na. Nareke’mi Gehazi la ullendokanni, apa nakua taunNa Puang Matua: Popa’elo’nai, belanna bonnong tu penaanna, apa Nabunianna’ PUANG sia tae’ Napaissannina’.

AYUB 13:15

Moi Namorai tu Puang umpateina’, tontong duka kurannuan; ondongpi iatu gau’ku moraina’ untongananni dio oloNa.

PA’PUDIAN 116:10

Tontongna’ ma’patongan, moi angku mangka ma’kada kumua: Pussak tonganna’;

PA’PUDIAN 138:3

Iatongku meongli’, Mitananni siamo’ talinga, sia Mipabatta’ tu penaangku anna bantang.

PA’PUDIAN 18:2

Nakua: Ponno tongan penaangku, ungkamali’Komi, o PUANG, oto’na kamatotorangku,

PA’PUDIAN 18:6

naerrena’ mintu’ pearra’ lino to mate; sia la naalana’ mintu’ poya kamatean.

PA’PUDIAN 25:17

Sakerangan-rangannamo tu kamagiangan penaangku, alaina’ lan mai mintu’ karossoangku.

PA’PUDIAN 27:14

Peagimi tu PUANG, melo ke batta’ko, sia kalebu penaammu. Sia peagimi tu PUANG.

PA’PUDIAN 31:24

Kamali’mi tu PUANG e mintu’ to Naala mase; Narinding pala’ PUANG tu to maruru’, apa iatu to umpogau’ kamatampoan Napapakkanni kapua.

PA’PUDIAN 42:11

Butung misa’ petobok lan lu bukungku, susimoto tu nabe’seanna’ mintu’ to unneana’, belanna tontong bangna’ nakuan kumua: Umbamira tu Kapenombammu?

PA’PUDIAN 42:5

Iake kukilalai tu diona te, mamalling tu penaangku lan ba’tengku: Iamotu tumbai tu kamangkangku ussolan to buda, ma’baanan lako banuanNa Puang Matua, sila’tekan sia ussa’bu’ pa’pudi-pudian, iamotu to buda tu umpakaraya allo kapua.

PA’PUDIAN 42:7

O Kapenombangku, ma’dosso-dosso tu deatangku lan kaleku, iamoto angku kilalaiKomi dio mai padang Yordan sia dio mai buntu Hermon, sia dao mai buntu Mizar.

PA’PUDIAN 56:11

Lako Puang Matua – la kupudi tu kadanNa –, lako Puang – la kupudi tu kadanNa –

PA’PUDIAN 62:1

Lu lakona pangala sengo. Unturu’ baenan sengo Yedutun. Pa’pudianna Daud.

PA’PUDIAN 62:5

Ia manna nabisara tu la umpasisayuranni kamala’biranna, naporai tau iato mai tu mo’rang; iatu pudukna ma’passakke, apa iatu penaanna ma’tampakki ropu. Sela

PA’PUDIAN 71:4

o Puang Matua, rampananna’ dio mai limanna to tang mekaaluk, dio mai lisu pala’na to patua’ ba’tang sia to kelok.

PA’PUDIAN 71:5

Belanna Kamuri kapa’rannuanangku, Puangku PUANG. Tu kuposande’ tempon bitti’ku.

KATASSURAN 17:4

Attu iato meongli’mi tu Musa langngan PUANG, nakua: Apara la kugauranni te bangsa iate? Sattu’mora naleba’na’ batu.

SARAMBU PEADA’ 18:10

Iatu sanganNa PUANG sangtinti to menara matoto’; iatu to malambu’ mallai lako natang matumba-tumba dio.

YESAYA 25:4

Belanna Kamumo tu pentilindungan matoto’na to bitti’, sia pentilindungan ma’toto’na to bongko lan kapu’duranna, sia pentirerungan, ke uran bara’i, sia pentionganan, ke sarrangi tu allo. Belanna iatu urrungna to masa’ga’ susimoto uran bara’ untu’ba’ benteng tembo’ susi lassu’ dio to’ padang marangke.

YEREMIA 16:19

O PUANG, Kamumo kamatotorangku sia tambakukungku sia pentirerungangku ke allo kapussakan! Lakomo Kalemi la nanii sae tu mintu’ bangsa dio mintu’ randan langi’ sia ma’kada nakua: Kabuttokan manna tu mana’na nene’ to doloki sia apa tae’ gai’na, tu moi misa’ tae’ apa kebattuan napaden.

YUNUS 2:2

Nakua: Metambana’ lako PUANG lan kamaparrisangku, anNa pebaliina’; melallakna’ lan mai panglisuanna lino to mate, amMi perangii tu gamarangKu.

KADIBILANGAN 14:10

Attu iato sipa’kadami tu mintu’ kasirampunan iato la ulleba’i batu tu tau sola duai. Apa iatu kamala’biranNa PUANG payan lako mintu’ to Israel lan Tenda Kasitammuan.

MATIUS 21:9

Iatu to buda, tu dolona dio tingayoNa sia undinna unturu’I, unnarrak-arrak, nakua: Hosanna tu Anakna Daud, Kurre sumanga’Na tu saeNa umpotete sanganNa Puang, Hosanna dao masuanggana.

MATIUS 27:22

Nakuami Pilatus lako tu tau: Iake susito, umba tu sipatu la kugauranNi tu Yesu disanga Kristus? Nakuami tu tau mintu’: Sipatu Ia dia’ta’.

YOHANES 8:59

Pada unnalami batu la morai untumbui batu, apa mentirerung tu Yesu Nasun lan mai Banua Kabusungan.

ROMA 4:18

Belanna tonna ka’tu rannumo tu Abraham, inang narannuammo lan kapatonganan, kumua la napoambe’ buda bangsa, susitu dipokada kumua: La susimoto tu tarukmu undinna.

ROMA 4:20

apa belanna ungkilalai pangallu’Na Puang Matua, tae’mi nabata butung to tanggan ma’patongan, sangadinna sadipamatoto’-toto’na lan kapatongananna umpakala’bi’ Puang Matua,

ROMA 8:31

Totemo apara la takua diona tu mintu’nato? Iake sisolaki’ Puang Matua mindapa la umbaliki?

2 KORINTUS 1:6

Apa iake narampoikan kamaparrisan, la napabu’tuangkomi pa’pakatana sia kamakarimmanan, sia iake dipakatanakan, la napabu’tuangkomi pa’pakatana, tu umpakananna’komi ammi ma’patari lan kamaparrisan susitu kiperasai.

2 KORINTUS 4:8

Disilatukki tikukanni sae, apa tae’ angki disirimpi’i, dipaselangkan, apa tae’ anna ka’tu rannungki;

2 KORINTUS 7:5

Belanna iatongki rampomo dio Makedonia, tae’ nasikita kapelayoan tu kaleki, sangadinna disussai bangkan lan mintu’na, dio mai salian den kadiboboran, lan penaangki den kamatakuran.

IBRANI 13:6

Naurungan batta’ki’ ma’kada, kumua: Puangmo tu To patunduangku, tae’ kula mataku’ len. Apara la nagauranna’ telino?

TO PARENGNGE’ 18:25

Ma’kadami tu to Dan nakua: Da muparangiikanni tu kadammu, den manii to mapalla penaanna unta’paiko, anna ka’tumo sunga’mu sola to lan banuammu.

TO PARENGNGE’ 20:22

Apa iatu surodadu, iamotu to Israel, umpabatta’ penaanna, anna ma’pampangan pole’ dio inan tu nanii mangka ma’pampangan iongi’.

1 SAMUEL 1:10

Belanna tarru’ masussa tu penaanna, mengkamoyami lako PUANG, anna unnade-ade tumangi’.

1 SAMUEL 23:16

Ta’kala ke’de’mi tu Yonatan, anakna Saul, anna male sitiro Daud dio Koresa sia umpabatta’ penaanna umposande’ Puang Matua.

1 SAMUEL 28:15

Nakuami Samuel lako Saul: Ma’apai mirosona’ sia mipamalimbangunna’? Nakuami Saul: Pussak maro’mo’, belanna sirarimo’ to Filistin na iatu Puang Matua toyangmo dio mai kaleku, tae’mo Napebaliina’, la tete dio pudukna nabi ba’tu tindo; iamoto angku tambaikomi, ammi pokadanna’ apa tu sipatu la kupogau’.