1 SAMUEL 3:9 - Sura' Madatu

⁹ Iamoto ma’kadami tu Eli lako Samuel, nakua: Malemoko mamma’ sule’; iake Natambai pole’ko, la mebaliko mukua: Ma’kadamoKomi PUANG, belanna napatananmo tu talinganna taumMi. Malemi tu Samuel anna mamma’ sule dao inanna.

1 SAMUEL 3:9 ပူးပေါင်းရင်းမြစ်များ

PA’PUDIAN 85:8

Pakitammokan kamasokanamMi, o PUANG, sia benkanni tu kasalamaran lu dio mai Kalemi.

PA’PUDIAN 85:9

La kuperangii tu apa Napokada Puang Matua, PUANG. Belanna la umpokada kamarampasan lako taunNa sia lako mintu’ to sallo’Na; podo da natibalik tu tau iato mai sule lako kabaganna.

KATASSURAN 20:19

Anna ma’kada lako Musa, nakua: Melo ke kamu bangmo ma’kada lako kaleki, angki perangii; da’omo anNa Puang Matua ma’kada lako kaleki, da angki mate.

YESAYA 6:8

Mangkato kurangimi tu kadanNa Puang Nakua: Mindara tu la Kusua? Mindara tu la Kiposumbungan puduk? Mebalimo’ kukua: Indena’, suamo’.

DANIEL 10:19

Da mumataku’, e to tarru’ dipakaboro’, torro marampa’ko, mengkabatta’ko, ondongpi mengkabatta’ko. Iatonna marassan ussipa’kadanna’, matoto’mo’, angku ma’kada kukua: O puangku, ma’kadamokomi, belanna mangkamo’ mipamatoto’.

PENGGAURANNA RASULU’ 9:6

Malimbangunmoko mumale tama tondok, nalanpa mudipokadan tu apa sipatu la mupogau’.

YOSUA 5:14

Apa mebali, nakua: Tangia, sangadinna aku te Arungna mintu’ ma’dandan maritikNa PUANG; totemo saemo’. Tukkumi menomba tu Yosua rokko padang sia ma’kada lako nakua: Apara kadanNa Puangku lako taunna?

1 SAMUEL 3:10

Saemi tu PUANG bendan dio sia Natambai susito lendu’na, Nakua: E Samuel, Samuel! Mebalimi tu Samuel: Ma’kadamoKomi, belanna napatananmo tu talinganna taumMi.

1 SAMUEL 3:8

Natambai pole’omi PUANG tu Samuel ma’pentallunnamoto, anna millik namale lako Eli anna ma’kada, nakua: Inde siana’, apara mitambanna’? Attu iato maneri naissan Eli, kumua PUANG untambai tu tomangura iato.