1 SAMUEL 12:19 - Sura' Madatu

¹⁹ Ma’kadami tu mintu’ tau lako Samuel, nakua: Pengkamoyammi te mintu’ taummi lako PUANG, Kapenombammi, kumua da angki mate. Belanna senga’mi tu kasalangki, kirangnganni pole’omi kakadakean, iamotu umpalaku misa’ datu.

1 SAMUEL 12:19 ပူးပေါင်းရင်းမြစ်များ

KADADIAN 20:7

Totemo pasuleanni tu bainena muane iato, belanna nabi tu muanena, anna passambayangangko, mumarendeng, apa iake tae’i ammu pasuleanni, issan bangmi, tae’ tang matemu sola tu mintu’ solamu!

AYUB 37:13

napoukungan padangNa, sia la Napakitan duka kamasokananNa, anNa papatui patunna.

AYUB 42:8

Iamoto alami pitu sapi laki sia pitu domba laki, mimale lako Ayub, taungKu, ammi penoloanni sia pemalaranni la mipopemala’ ditunu pu’pu’, anna taungKu Ayub umpassambayangangkomi, belanna ia manna tu passambayangna la naala penaangKu, angKu pobannangi, tang umparampoikomi tu apa kadake, belanna iatu kamu tae’ misusi taungKu Ayub, mangkamokomi umpokada tang maloloNa’.

KATASSURAN 10:17

Totemo te pagarri’pi tu kasalangku, ammi mengkamoya langngan PUANG, Kapenombammi, anNa pasoro’i dio mai kaleku te kamandasan mepatei.

KATASSURAN 32:30

Iatonna masiangmo dio mai ma’kadami tu Musa lako to buda: Mangkamokomi umpogau’ kasalan kapua; totemo la kendekna’ umpennoloi PUANG, lala siai manii kupadenanni kadiseroian tu kasalammi.

KATASSURAN 9:28

Mengkamoya tonganmokomi lako PUANG, belanna iatu guntu’ Napasae Puang Matua sia uran batu metakuran tongan. Ianna dadi la kuelorangkomi male, tae’mo ammi la torro.

YESAYA 26:16

O PUANG, iatonna mandasa tu tau iato mai, nadaka’moKomi, iatomMi ada’i, umpakendek kamama’mi passambayangna.

YEREMIA 15:1

Apa Nakua PUANG lako kaleku: Moi anna Musa sola Samuel bendan dio oloKu, tae’ duka nala unnalai penaangKu te bangsa iate; papallai tu tau iato mai dio mai oloKu, suai male.

YEREMIA 27:18

Iake la nabi tonganni tu tau iato mai sia iake sikambi’i kadanNa PUANG, melo ke mengkamoyai lako PUANGna mintu’ ma’dandan maritik, kumua anna iatu mintu’ pareanan tu torropa lan banuanNa PUANG sia lan banuanna datu Yehuda sia dio Yerusalem, damo nadibaa lako Babel.

YEREMIA 37:3

Attu iato nasua datu Zedekia, tu Yukhal anakna Selemya, sia to minaa Zefanya, anakna Maaseya, lako nabi Yeremia, nakua: Passambayangkan lako PUANG, Kapenombanta.

YEREMIA 42:2

anna ma’kada tu tau iato mai lako nabi Yeremia, nakua: Iake nakalo’i penaammi tu pengkamoyaki, ammi passambayangkan lako PUANG, Kapenombammi sola te mintu’ tau, tu torronapa, belanna sidi’morakan torro dio mai tu mintu’ to buda, susite mitiro totemo.

MALEAKHI 1:9

Iamoto, pamalinomi tu penaaNa Puang Matua, anNa katuru-turuiki’! Denmo tu gau’mi susito. Umbanii apa Na la matana untirokomi moi misa’ duka! kadanNa PUANGna mintu’ ma’dandan maritik.

KADIBILANGAN 21:7

Saemi tu bangsa iato lako Musa anna ma’kada nakua: Kasalammokanni, belanna ma’kadamokan umbali PUANG sia umbalikomi; passambayangangkan lako PUANG, anNa patoyangi te mai ula’ dio mai kaleki. Napassambayangammi Musa tu tau iato.

PENGGAURANNA RASULU’ 8:24

Mebalimi Simon nakua: Passambayanganna’ lako Puang, da naden misa’ urrampoina’ tu apa mipokada.

YAKOBUS 5:15

Anna passambayang narondong kapatonganan umpamakarimmanni tu to masaki, anna Puang la umpamalekei, sia iake mangkai umpogau’ kasalan, la dipa’dei tu kasalanna.

1 YOHANES 5:16

Iake denni misa’ tau untiro siulu’na umpogau’ kasalan tu tang umpabu’tunna kamatean, la napassambayangan, na Puang ungkamasei katuoan, iamotu mintu’ to umpogau’ kasalan tu tang umpabu’tunna kamatean. Den tu kasalan umpabu’tu kamatean, tae’ nadiona to tu kukuan pato’ napassambayangan.

1 SAMUEL 12:13

Totemo tiromi tu datu, tu mitonno’ sia mipalaku. Tonganna Naangkarammokomi PUANG misa’ datu tu umparentakomi.

1 SAMUEL 12:17

Tang pegandunganraka te totemo? La meongli’na’ langngan PUANG, anNa pasae guntu’ sia uran. Ammi issanni sia mitiroi kumua kapua dio oloNa PUANG tu kakadakean mipogau’, iamotu umpalakuangkomi kalemi misa’ datu.

1 SAMUEL 12:20

Ma’kadami tu Samuel lako to buda, nakua: Da mimataku’; moi ammi pogau’mi te mintu’ kakadakean iate, apa totemo damo mimemboko’ dio mai PUANG, sangadinna la kalebu tu penaammi mengkaola lako PUANG.

1 SAMUEL 12:23

Na iatu aku kurannuan tongan la dipamambela dio mai kaleku umpogau’i te kasalan iate lako PUANG, iamotu la tadang umpengkamoyangkomi; sangadinna la kuada’ikomi tu lalan melo sia tongan.

1 SAMUEL 7:5

Mangkato nakuami Samuel: Rampunni tu mintu’ to Israel lako Mizpa, angku pengkamoyangkomi lako PUANG.

1 SAMUEL 7:8

Ma’kadami tu mintu’ to Israel lako Samuel, nakua: Da mitorroi umpengkamoyangkan lako PUANG Kapenombangki, anna Ia urrampanangkan dio mai limanna to Filistin.

1 SAMUEL 8:6

Kadakemi nasa’ding Samuel te kada iate, tonna kuai tu tau iato mai: Benkanni misa’ datu la urrengnge’kanni. Massambayangmi tu Samuel lako PUANG.