1 KORINTUS 5:2 - Sura' Madatu

² Ammi umpamadao bangpa penaammi, tang sipato’raka la masussakomi, anna ditassu’i lan mai kombongammi tu to umpogau’i tu iannato?

1 KORINTUS 5:2 ပူးပေါင်းရင်းမြစ်များ

2 DATU 22:19

belanna malamma’ tu penaammu sia umpamadiongangko kalemu dio oloNa PUANG, tommu mangka urrangii tu apa mangka Kupokada diona te inan iate sia iatu to torro lan, kumua la metakuran sia tampakan ropu, sia belanna usserek-serekko tamangkalemu sia tumangi’ dio oloKu, iamoto Kuperangii dukako, kadanNa PUANG.

PA’PUDIAN 119:136

Iatu uai matangku lolong susi uai salossok, belanna tae’ tau umpengkaolai sukaran alukMi.

YEREMIA 13:17

Iake manokapokomi umperangiite, manassa la tumangi’ tu penaangku dio lu inan kabunianna diona kamatampoan, sia la si’dan-si’danna’ tumangi’, sia sitanutuan tu uai matangku, belanna dipali’mo tu pangkambi’Na PUANG.

YEHEZKIEL 9:4

Ma’kadami tu PUANG lako kaleku Nakua: Ke’de’ko unnola tangngai tu kota iamotu unnola tangnga Yerusalem, ammu palakoi tanda tu kidena tu mintu’ to sumarro sia mekaindo’ diona tu mintu’ penggauran megallian tu dipogau’ inde to dio.

YEHEZKIEL 9:6

Iatu mai to matua, pia muane, anak dara, pia’-pia’ sia baine manassa la mipatei sia misanggang; apa moi misa’ tu tau den tandana da mirumbui: manassa la miparanduk dio to’ inan maindanKu. Naparandukmi tau iato mai dio lu muane, iamotu mai pekaamberan, tu dio tingayo Banua Kabusungan.

KADIBILANGAN 25:6

Pakalan saemi misa’ to Israel umbaa misa’ baine to Midian lako siulu’na dio pentirona Musa sia mintu’ kasirampunan to Israel, tonna marassan tu tau sitangiran dio to’ ba’ba Tenda Kasitammuan.

1 KORINTUS 4:18

Apa den ba’tu pira-pira tu tau umpamadao kalena takua to tae’mo kula male mati’.

1 KORINTUS 5:13

Apa iatu to salian Puang Matua la umpaolai salunna. Toyanganni tu to kadake lan mai kombongammi.

2 KORINTUS 12:20

Belanna mataku’na’ saena’ manii mati’ angku kabu’tuikomi, tae’ nasusi tu kuporainna, susi duka aku, ke mikabu’tuina’, tae’ nasusi tu miporainna; mataku’na’ den manii kasigagan, kamagallian, kare’dekan ara’, kasisala-salan, pa’palele beko, ma’parampo sala, kapabe’sean, kamarukkan.

2 KORINTUS 12:21

Mataku’na’, iamo ke sae pole’na’ manii, anna pamadionganna’ Puang dio tingayomi, angku pamasussai tu to umpogau’ bang kasalan pirambongi’, natontongpa tang mengkatoba’ dio mai kamaruttakan napogau’ sia gau’ sala sia passulo bongi.