1 DATU 4:20 - Sura' Madatu

²⁰ Iatu bilangan to Israel sia to Yehuda susi karangan dio biring tasik budanna; iatu tau iato mai kumande sia mangiru’ sia parannu-rannu.

1 DATU 4:20 ပူးပေါင်းရင်းမြစ်များ

KADADIAN 13:16

La Kupapada budanna barra’-barra’ tu lanto mimi’mu. Iake dikulle umbilangi tu barra’-barra’, maneri dikulle umbilangi tu lanto mimi’mu.

KADADIAN 15:5

Nasolammi Puang sun lako salian, Nama’kada Nakua: Mentingarako langngan langi’, bilangi tu mintu’ bintoen, ke mubelai umbilangi. Nakuami ungkuanni: Susi dukamoto tu bati’mu.

KADADIAN 22:17

manassa la Kubenko karongkosan kapua sia la Kupopemba’ka’ kalle-kallean tu bati’mu pada bintoen dao langi’ sia pada karangan dio biring tasik, sia la nalapa’ nasang bati’mu tu babanganna ualinna.

KADADIAN 32:12

Tang susiraka te tu kadanNa Puang kumua: Manassa la Kupatiroiko melo sia iatu bati’mu la Kupapada karangan diong biring tasik, tu tang dikemba’ dibilang?

1 DATU 3:8

Iate taumMi bendan lan tangnga bangsaMi, tu mangka Mipilei langsa’, misa’ bangsa kapua tu tang dikemba’ diia’ ba’tu tang dipura dibilang diona kabudanna.

1 DATU 4:29

Sia Naben Puang Matua kakinaan tu Salomo sia kamatarrusan kapua tongan sia kapaissanan maluangan susi bungin dio randan tasik,

1 DATU 5:9

Mintu’ taungku la umbaai dao mai Libanon rokko tasik, angku a’ga raki’i lan tasik, sia kusombaranni lako inan tu la mipamanassanna’, anna dibukai inde to dio, ammi ma’din unnalai. Apa iatu kamu la minturu’ tu palakungku, iamotu la miben kande tu to lan tongkonan layukku.

2 DATU 18:31

Da miperangii tu kadanna Hizkia, belanna nakua kadanna datu to Asyur: Menombakomi sia ussorongkomi kalemi lako kaleku, ammi pantan ungkandei tu bua anggoro’mi sia bua arami sia pantan unniru’ uai lan mai bubunmi.

1 OSSORANNA DATU 12:39

Torromi tu tau iato mai inde to dio sola Daud tallung allo, anna kumande sia mangiru’, belanna napasakkarammo siulu’na tu mintu’ apa tu tau iato mai.

1 OSSORANNA DATU 22:9

Manassa den misa’ pia muane la dipadadiangko; na ia la dadi misa’ to marampa’, belanna Aku la urrinding pala’i dio mai mintu’ ualinna tiku lao, anna torro manaman. Belanna la disangai Salomo sia Aku la ungkamasei kamarampasan sia kamakarimmanan dio lu tondok Israel to ke linona.

AYUB 1:18

Marassan bangsiapa tu tau iato ma’kada, saeomi tu to senga’ ma’kada nakua: Iatu anakmi muane sia anakmi baine marassan kumande sia unniru’ anggoro’ lan banuanna siulu’na, tu pa’bunga’,

SARAMBU PEADA’ 14:28

Kamapuluranna pa’tondokan iamo kamala’biranna datu, apa kamadaranganna taunna iamo kasangganganna to paa.

TOMANGADA’ 2:24

Iatu tolino tae’ kuasanna la kumande sia mangiru’ sia la napomanaman tu diona bunga rangka’na; iate iannate kukanassaimo kumua lu dio mai limanNa Puang Matua.

YESAYA 22:13

Apa tiromi, tontong bang tu kasende-sendean sia kamaruasan, untunu sapi sia urrere’ domba, ammi ungkande duku’ sia unniru’ anggoro’, mikua: Maikomi anta kumande sia mangiru’, belanna masiang matemiki’.

MIKHA 4:4

Sangadinna la pantan unno’ko’ diong lu garonto’ anggoro’na sia diong lu garonto’ arana, anna moi misa’ tae’mo la umpatiramban lenni tu tau iato mai, belanna pudukNa PUANGna mintu’ ma’dandan maritik tu mangka umpokadai te.

ZAKHARIA 3:10

Attu ia dukato, kadanNa PUANGna mintu’ ma’dandan maritik la pada mitambai tu solami diong lu garonto’ anggoro’ sia diong lu garonto’ saitun.

ZAKHARIA 9:15

PUANGna mintu’ ma’dandan maritik la urrerungi tu tau iato mai, naurunganni mangampello’, ondongpi nalullu’ tu batu pelobang; la mangiru’ tu tau iato mai, namareko napobua’ uai anggoro’, sia la ponno rara tu tau iato mai susi pindan pa’pi’pikan sia susi tetuk inan pemalaran.

PENGGAURANNA RASULU’ 2:46

Keallo-keallo sanginaa bang makaritutu tama banuanNa Puang Matua, sia ullelei banua nanii sirampun untepu-tepu roti, anna kumande situru’ kaparannuan sia penaa malambu’na,

1 SAMUEL 30:16

Nasolammi rokko. Sangtiamparammi tu tau iato mai dio padang iato marasan kumande sia mangiru’ sia ma’marua’-rua’ belanna mintu’ pangrampa kapua tu narampa dio mai tondok to Filistin sia tondok to Yehuda.