Filipi minin 2:11 - LAWA A BOO SONBORE

¹¹ Ǹ tumaa pɛ mà Yezu Krita n Dɛnaa lɛa, ǹ Díi Lawa tɔ guguru kɔ nɛ.

LAWA A BOO SONBORE 2011

¹¹ Ǹ tumaa pɛ mà Yezu Krita n Dɛnaa lɛa, ǹ Díi Lawa tɔ guguru kɔ nɛ.

Filipi minin 2:11 ပူးပေါင်းရင်းမြစ်များ

Loen 110:1

Davida a loe goon ne. LOE ne. Dɛnaa Lawa na á pɛ maa dɛnaa lɛ nɛ kɛnɛn: Giã ma gusin, yǎa ma gɔ̀lɔ̀baa lɛ piɛ̃ koe n la, n zɔ́ɔn la, ǹ die kiɛ tán n gòãn giulun.

Loen 18:49

Dɛnaa Lawa, n din nə ma kanbiɛ maa zɔ́ɔn ganaa, n din nə ma biɛ gɔ̀lɔ̀ lɛa maa zɔ́ɔn kɛn mìi la, n din nə ma kanbiɛ min kakaarɛn kɛn ganaa.

Zeremii 23:6

Bɛa waáraa kəni, Zudaa gána á re goɛ̃ a din gɔn wìi á lɛa, Izirayeli zaman goã yii-nyɛɛ la. Ǹ bɛ́ re tɔ mɛn koe a ganaa, á ke: «Dɛnaa Lawa n wɔ kirisibaali lɛa.»

Matiə 10:32

Bɛ̀ min mɛn lɛ kɔ min tumaa yɔrɔ-a mà an masɛ wɔ lɛa, masɛ dɔ á die lɛ koe ma Di Lawa yɔrɔ-a máa bɛa dɛnaa n masɛ wɔ lɛa sonbore.

Luku 2:11

Pelo kɛ lɛ nɛ, Davida a kiwi, Kirisibaali na á yɛ kaa lɛa, Dɛnaa lɛ nɛ, Lawa bɛ́ á pɛ, mà asɛ á re Minin Nyin-sili mɛn lɛ diɛ.

Zaã a sɛ́wɔ 12:42

A laan ka bɛ nɛ, nyɛɛnaandɛnan lɛn dininmaan bii, min gigiã golee li. Sɛnɛ, Fariziɛ̃n lɛn taman yii, ǹ yii wɔ ǹ nə nyaa minin yɔrɔ-a wa, màn mɛn bɛ́ toɛ, ǹ baran ǹ loo ǹ nə ǹ bɔ lɛsɔkɔn kion wa.

Zaã a sɛ́wɔ 13:13

Ka ǹ ma bíi Mìinaa, Dɛnaa, ka sonbore pɛ, a giala, man bɛ lɛ lɛa.

Zaã a sɛ́wɔ 13:14

Bɛ̀ ń yaa masɛ din Dɛnaa, masɛ din Mìinaa ka gòãn pii, a kũ bɛ lɛ-a, ka dɔn doamaa nɛ ka kɔn gòãn pii.

Zaã a sɛ́wɔ 14:13

Bɛa biikoo li, ka bɛ́ re màn woo màn nyankoe ka masɛ tɔ nɛ, ma á die bɛ koe ka la, màn mɛn bɛ́ toɛ, ma maa Díi a gugurubaa nyaa.

Zaã a sɛ́wɔ 14:23

Yezu pɛ nɛ: – Bɛ̀ min mɛn tá masɛ narɛ, bɛa dɛnaa tá re masɛ a boo sii. Maa Díi dɔ á re bɛa dɛnaa narɛ, ma laanka maa Díi á re die bɛa dɛnaa li, wɔ giã a li.

Zaã a sɛ́wɔ 17:1

Bɛa boon lɛn diɛ kio, Yezu nə́ n yii saa lon á pɛ: «Maa Díi, biikoo dɔ. Gugurubaa kɔ n Nɛgiĩ lɛ la, màn mɛn bɛ́ toɛ, n Nɛgiĩ lɛ gugurubaa kɔ n dɔ la.

Zaã a sɛ́wɔ 20:28

Toomaa tɔ́n pɛ nɛ: «Maa Dɛnaa! Maa Lawa!»

Zaã a sɛ́wɔ 5:23

màn mɛn bɛ́ toɛ, min tumaa Nɛgiĩ lɛ guguru kɔ, ka ǹ bɛ́ a Díi guguru koe lɔn. Bɛ̀ min mɛn ba Nɛgiĩ lɛ guguru koe wa, a Díi mɛn dia, bɛa dɛnaa na a ba bɛ dɔ guguru koe wa.

Zaã a sɛ́wɔ 9:22

A yɛ wolen lɛn man nə́ pɛ miɛ̃, a giala, maǹ nə́ goã nyɛ́ɛ biɛ Zuifun goledɛnan lɛn manɛ. A giala, bɛn nə́ saa lɛlɛ ǹ nə́ n lɛ kaa kun, mà bɛ̀ min mɛn nə́ pɛ mà Yezu n Minin Nyin-sili lɛa, mà maǹ die bɛa dɛnaa lui, ǹ ba toɛ a da lɛsɔkɔn kion doo wa.

Nya ǹ dín 10:36

Lawa boo mɛn dia Izirayeli minin la, ǹ tá bɛa Boo Tii Kɔɔ̃n kɛ doɛ̃. Lawa na á bǐɛ̃ wɔ a din laanka minbuiinin bii ni, ka Yezu barka nɛ, Yezu mɛn bɛ́ minbuiin tumaa a Dɛnaa lɛa.

Nya ǹ dín 2:36

Izirayeli minin tumaa doamaa nɛ ǹ dɔ̃ taãn-taãnɛ mà ǹ Yezu mɛn dere gɔn-a ke lɛn, mà Lawa na á bɛ lɛ baa minbuiin tumaa a Dɛnaa laanka a Nyin-sili lɛa.

Rɔmu minin 14:11

A giala, a n kiɛ̃ nɛ: «Dɛnaa pɛ: Masɛ din yii bɛ́ koo ke, min din tumaa á re n musin kurumii tán ma yɔrɔ-a. Min din tumaa á re n lɛ buĩ a masɛ Lawa tɔ bɔ.»

Rɔmu minin 14:9

A giala, *Krita lɛ na á gã, a yii kaa, màn mɛn bɛ́ toɛ, a geren laanka yiikoonaan Dɛnaa baa.

Rɔmu minin 15:9

Krita lɛ na á daa, màn mɛn bɛ́ toɛ, tɔrɔ kɔsɔn mɛnɛn bɛ́ ǹ ba Zuifun lɛa wa, bɛn dɔn nə Lawa tɔ bɔ, a bǐɛ̃baa a lɛa. A na á n kiɛ̃: «Bɛ lɛ taman yii ni ma á re n guguru koe tɔrɔ kɔsɔn bii, ma á re loe loe man tɔ bɔ nɛ.»

Korɛnti1 12:3

Bɛ lɛ nɛ, ma á pii ka nɛ foaãnɛ: Min kɔ́n ba boe la a goã Lawa a Yiri Fu pàã giulun, a boo baraa dɔ da Yezu ganaa wa. Min kɔ́n dɔ a boe la a pɛ mà Yezu n Dɛnaa lɛa, bɛ̀ Yiri Fu ná a ba kun ni wa.

Korɛnti1 15:47

Min bibinaa Aadã ke, bɛ n kanaa wɔ lɛa, a giala, a na á bɔ tán. Aadã paabaa ǹ wɔ kɛ na á bɔ Lawa li lon á daa.

Korɛnti1 8:6

Sɛnɛ, wɔsɛn yii li, Lawa n goon toto, a n Díi lɛa, màn tumaa zɛnaali lɛa, wɔa tá kanaa na a din wɔ lɛa. A din yii goon ne, Dɛnaa dɔ n goon toto, Yezu *Krita nɛ. Màn tumaa na a tan a din pàã ganaa, wɔ n kanaa a din pàã ganaa.

Piɛrɛ1 1:21

Asɛ lɛ barka nɛ ka á golee-n Lawa li, Lawa mɛn bɛ́ a ná a yii kaa á bɔ geren bii, á gugurubaa kɔ la. Bɛa yɔrɔ kɛ la, kaa goleemali laanka kaa foo-doa giala n doa-n Lawa ganaa.

Zaã1 4:15

Min mɛn bɛ́ pii mà Yezu n Lawa a Nɛgiĩ lɛa, Lawa n kun bɛa dɛnaa nɛ, ǹ dɛnaa dɔ n kun Lawa nɛ.

Zaã1 4:2

Bɛ̀ Lawa Yiri tá ǹ li, ka bɛ́ re doɛ̃ lɔn bɛ á ke: min mɛn bɛ́ pii, mà Yezu *Krita na á daa minbuiin lɛa, Lawa Yiri tá bɛ lon.

Zaã2 1:7

Soɛ-bɔle gigiã nə́ n da kanaa la. Maǹ nə́ n piɛ̃ ǹ ba golee li, mà Yezu Krita daa minbuiin nɛ taãn lɛa wa. Min mɛn bɛ́ zɛnɛɛ miɛ̃, bɛ lɛ n soɛ-bɔle lɛ lɛa, Krita a Zɔ́ɔ dɔ nɛ.

Sii-nyaan 3:5

Min mɛn bɛ́ re gɔ̀lɔ̀ biɛ, ǹ tá re mɔnaa fufun we miɛ̃. Ma a re ǹ tɔ tuturi ma bɔ yiikoonaa baa ǹ sɛ́wɔ kɛ-n wa. Ma á re pii maa Díi yɔrɔ-a, ka a lon a dia dí-a wolen ne, máa ma din wɔn manɛ.