Maji kar sí ulaje koso-dəwje gə́ Israɛl pajena: ndɔ gə́ njekɔm’g dɔg gə́ mee naḭ’g neelé d’a kwa ŋgon badə kára kwɔji ne dɔ njémeekəije lə dee lə dee.
Ɓó lé dəw kára rəa àr ŋgad-ŋgad ya ləm, aw mbá el ləm tɔ nɛ yeḛ ɔg rəa ra naḭ Pag ndá debee neelé d’a kɔree mbuna dəwje’g ləa, mbata yeḛ aw gə nékar lə Njesigənea̰ mee ndəa gə́ d’wɔji njaŋg lé aree el ndá debee neelé bo̰ kaiya ləa a kɔs təa’g ya.
Ɓó lé dəw-dɔ-ɓee gə́ si sə sí ra naḭ Pag lə Njesigənea̰ ndá yeḛ a ra gə goo godnduje gə ndukunje gə́ wɔji dɔ naḭ Pag lé ya. Godndu gə́ kára ba ya a to mbuna sí’g mbata lə dəw-dɔ-ɓee ləm, gə kojiɓee ləm tɔ.