Soponi 3:15 - Maktub gə́ To gə Kəmee

¹⁵ Njesigənea̰ ya̰ goo bo̰ néra sí Gə́ yeḛ wɔji mba karee ɔs ta sí’g ləm, Yeḛ ɔs njeba̰ lə sí rɔ sí’g rəw gə́ raŋg ləm tɔ, Mbai gə́ Israɛl gə́ to Njesigənea̰ lé Si mbuna sí’g ya, Seḭ a ɓəlje némeeko̰ gə́ a teḛ dɔ sí’g nda̰ el.

Soponi 3:15 ပူးပေါင်းရင်းမြစ်များ

Gḭ-Néje 30:23

Yeḛ taa kèm oji ŋgon gə́ diŋgam ndá yeḛ pana: Ala ɔr rɔkul dɔm’g.

Pakɔsje 149:2

Maji kar Israɛlje nda meḛ dee kaḭ Dɔ yeḛ gə́ to njekunda dee’g ləm, Ŋganje gə́ Sio̰ kara maji kar dee d’isi dan boo-rɔlel’g Mbata yeḛ to mbai lə dee ləm tɔ.

Pakɔsje 19:9

Ndukunje lə Njesigənea̰ lé To gə goo rəbee sur, D’ar dəwje d’al ne rɔ dee, Godnduje lə Njesigənea̰ lé To ta gə́ àr raŋg-raŋg, D’ar kəm dəw lé inja ne bərəŋ tɔ.

Pakɔsje 85:3

I lé ar məəi ti mbidi dɔ néra gə́ kori-korije’g lə koso-dəwje ləi ya, I nja ɔn dɔ kaiyaje lə deḛ lai tɔ.

Esai 12:6

Seḭ dəwje gə́ Sio̰, Raje né wəl gə rɔlel gə boo-rɔkal! Mbata Njerɔkunda lə Israɛlje Gə́ to gə́ boo lé aar mbuna sí’g ya.

Esai 25:8

Yeḛ tuji yoo pugudu saar gə no̰, Mbaidɔmbaije gə́ Njesigənea̰ a bi mán-no̰ kəm dəwje’g lai ləm, Yeḛ a kar rɔkul-boo gə́ wa kəm koso-dəwje ləa lé Godo dɔ naŋg nee lai ləm tɔ, Mbata Njesigənea̰ ɓa pa bèe.

Esai 33:22

Mbata Njesigənea̰ lé to njégaŋ-rəwtaje lə sí ləm, Njesigənea̰ lé to njekar sí godndu ləm, Njesigənea̰ to mbai lə sí ləma, Yeḛ nja ɓa gə́ njekaji sí ləm tɔ.

Esai 35:10

Deḛ gə́ Njesigənea̰ uga dɔ dee lé D’a tel ree, D’a kaw Sio̰ gə pa kun baŋga ta dee’g ləm, Rɔlel gə́ to gə no̰ a to dɔ dee’g ləm tɔ, Boo-rɔkal gə rɔlel lé d’a rəm pər ya Nɛ némeeko̰ gə tuma̰ ŋgururu-ŋgururu d’a godo tɔ.

Esai 51:22

Mbaidɔmbaije gə́ Njesigənea̰ lə sí, Ala lə sí gə́ aḭ bada dɔ koso-dəwje’g ləa pa togə́bè pana: Aa ooje, ma m’taa bai gə́ nékai gə́ ar dɔ dəw ila mbir-mbir to keneŋ ji sí’g To bai oŋg ləm, Seḭ a kaije gogo el ŋga!

Esai 52:9

Seḭ dɔ ndubaje gə́ Jerusalem gə́ tujije lé Ndubaje rɔ sí na̰’d gə pa rɔlel! Mbata Njesigənea̰ gɔl meḛ koso-dəwje ləa ləm, Yeḛ taa dɔ njé gə́ Jerusalem ləm tɔ.

Esai 54:14

I a kaar njaŋg gə goo néra gə́ gə dɔ najee, Nékula kəmi ndòo a tibi mbɔri el, Mbata né kára gə́ i a ɓəlee ndəb ne pəd-pəd lé a godo, Mbata a tibi mbɔri nda̰ el.

Esai 60:18

Dəw a koo ta néra gə́ kərm-kərm mee ɓee’g ləi el ŋga ləm, D’a koo ta tuji gə tuji-boo dɔ naŋg’d ləi el ŋga ləm tɔ, I a kunda ri kaji dɔ ndògo-bɔrɔje’g ləi ləm, A kunda ri rɔnduba dɔ tarəwkɔgje’g ləi ləm tɔ.

Esai 65:19

M’a kar Jerusalem to gə́ nékalrɔ ləm ləm, M’a kar koso-dəwje ləm tɔ gə́ nérɔlel ləm ləm tɔ, D’a koo ndu no̰ gə ndu kii keneŋ gogo el.

Jeremi 8:19

Aa ooje, ndu no̰ lə koso-dəwje ləm ɓar Dɔ naŋg ɓeeje gə́ əw’g pana: See Njesigənea̰ godo Sio̰ wa. See mbai lə dee godo keneŋ wa. See gelee ban ɓa Deḛ tɔl néndajije gə́ magəje Gə́ to magəje gə́ dɔ ɓee’g D’ar oŋg ḭ ne səm pu wa.

Ejekel 35:10

Mbata i pana: Ginkoji dəwje gə raŋg loo joo ləm, ɓeeje gə́ joo ləm tɔ lé d’a to gə́ ka̰ síjeḛ. Lée Njesigənea̰ si lée’g neelé kara jeḛ j’a kar dee to ka̰ síjeḛ ya.

Ejekel 36:15

N’a kari oo ta rɔkulje gə́ ginkoji dəwje gə raŋg pa ne səi el ləm, koso-dəwje d’a kila rɔkul-boo dɔi’g el ləm tɔ, i a tuji ginkoji dəwje ləi el ŋga, Mbaidɔmbaije gə́ Njesigənea̰ ɓa pa bèe.

Ejekel 39:29

n’a kiya sə dee kəm neḛ el ŋga ləm tɔ. Mbata n’a kar ndil neḛ ɔm dɔ gel-bɔje’g lə Israɛl, Mbaidɔmbaije gə́ Njesigənea̰ ɓa pa bèe.

Ejekel 48:35

Loo gə́ gugu dəa as kəmkil dəw tɔl-dɔg-loo dɔg giree-jinaijoo (18000). Bèe ɓa un kudee mee ndəa’g neelé, ɓee-boo neelé d’a ɓaree pana: Njesigənea̰ si loo gə́ nee ya.

Amɔs 9:15

N’a ma̰a dee mee ɓee’g lə dee ndá Dəw a kɔr dee mee ɓee gə́ neḛ nja n’ar dee Mba kaw sə dee raŋg el ŋga, Njesigənea̰, Ala ɓa pa bèe.

Misee 7:10

Njéba̰je lə sí lé d’a kée ndá Rɔkul a dəb dɔ dee’g, Deḛ gə́ dəji sí pana: See Ala lə sí gə́ Njesigənea̰ lé si ra ɓəi wa lé, Loo gə́ d’a mbula dee naŋg gə gɔl dee to gə́ bɔrɔ gə́ kila-rəwje’g bèe ndá Kəm sí a koo dee gə rɔlel ɓa.

Habakuk 2:17

Mbata néraje gə́ kərm-kərm gə́ seḭ raje mee ɓee gə́ Liba̰ lé D’a tel koso dɔ sí’g ləm, Tuji gə́ seḭ tujije dakulje lé Dakulje kara d’a kɔm ɓəl dɔ sí’g ləm tɔ. Mbata seḭ ɔmje məs dəwje naŋg ləm, Seḭ raje né gə́ kərm-kərm mee ɓee’g Oma̰je ne gə ɓee-boo gə dəwje lai gə́ d’isi keneŋ ləm tɔ.

Habakuk 2:8

To gə́ seḭ taaje néje lə ginkoji dəwje gə raŋg bula lé Ndá koso-dəwje gə́ nai lé d’a taa néje lə sí-seḭ tɔ, Mbata seḭ ɔmje məs dəwje naŋg ləm, Seḭ raje néje gə́ kərm-kərm mee ɓee’g ləma, Seḭ ɔsje ɓee-boo gə dəwje lai gə́ d’isi keneŋ rəw ləm tɔ.

Soponi 3:17

Njesigənea̰, Ala lə sí si mbuna sí’g Yeḛ to bao-rɔ gə́ to njekaji sí, Yeḛ a kar sí toje nérɔlel ləa gə́ boo, Yeḛ a kila təa maree’g gə goo meenoji ləa, Yeḛ a kal rəa gə boo-rɔkal mbata lə sí tɔ.

Soponi 3:5

Njesigənea̰ to njera né gə dɔ najee mbuna dee’g Ɓó yeḛ ra né gə́ majel kára kara el. Teḛ gə ndɔ gə ndɔje kára-kára lai lé Yeḛ riba dɔ rəwta ləa ar dee d’oo Ɓó lal gɔl kára el. Nɛ njémeeyèrje lé rɔkul ra dee el!

Jakari 12:3

Mee ndəa’g neelé n’a kar Jerusalem to asəna gə biri mbal gə́ wɔi yaa̰ mbata lə koso-dəwje lai. Deḛ lai gə́ ndigi karee ḭta gogo lé d’a kiŋga doo keneŋ ndá ginkoji dəwje gə raŋg lai gə́ dɔ naŋg nee d’a kɔm na̰’d mba rɔ səa.

Jakari 14:11

Dəwje d’a si keneŋ ndá Né gə́ a gə tuji dee a godo. Njé gə́ Jerusalem d’a si dan meekulɔm’g.

Jakari 9:9

Seḭ gə́ Sio̰ lé alje rɔ sí! Seḭ gə́ Jerusalem kara ɔsje pa rɔlel to! Aa ooje, mbai lə sí si aw gə́ dɔ sí’g nee, Yeḛ to njemeekarabasur ləm, Gə njedumdɔloo ləm tɔ, Yeḛ to dəw gə́ kul yururu gə́ uba dɔ mulayḛ̀je gao si’g, To ŋgon mulayḛ̀je gə́ aḭ goo kea̰je’g ɓa yeḛ ubá.

Tagə́maji gə́ Ja̰ ndang 1:49

Natanaɛl tel ilá keneŋ pana: Rabi, i lé to Ŋgon-Ala nja, i to mbai lə Israɛlje nja tɔ.

Tagə́maji gə́ Ja̰ ndang 12:15

Seḭ gə́ sije Sio̰ lé ɓəlje el, Aa ooje, mbai lə sí si aw gə́ nee. Yeḛ uba dɔ ŋgon mulayḛ̀je gao si’g.

Tagə́maji gə́ Ja̰ ndang 19:19

Pilatə ar dee ndaŋg ta d’unda dɔ kag-dəs’g neelé tar pana: Jeju gə́ Najaret, mbai lə Jibje.

Tagə́maji gə́ Ja̰ ndang 5:30

Ma m’askəm ra né kára kara gə dɔrɔm el, nɛ torndu né gə́ ma m’oo gə mbim ɓa m’gaŋg ne rəwta ɓəi. Rəwta gə́ ma m’gaŋg lé to gə dɔ najee ya mbata né gə́ mee njekulam wɔji ɓa ma m’ra ɓó ma m’ra né gə́ məəm-ma ɓa wɔji el.

Loo gə́ killa rea kəm Ja̰’g 12:10

Ma m’oo ndu dəw gə́ ḭ dara ɓar ɔr loo lɔi-lɔi pana: Kaji lé ɓasinè kàree teḛ mba̰ ndá siŋgamoŋ gə tɔgmbaŋ ləm, gə ko̰ɓee lə Ala lə sí ləma, gə dɔmoŋ lə Kristi ləa ləm tɔ lé ndəa teḛ mba̰ tɔ. Mbata yeḛ wa njegaŋgta gə́ gaŋgta badə-badə ɔm ta ŋgako̰ síje no̰ Ala’g lə sí gə ndəa-ndəa dan kàrá ləm gə loondul’g ləm tɔ lé yeḛ wá ilá naŋg nee ya.

Loo gə́ killa rea kəm Ja̰’g 18:20

Seḭ gə́ dara lé raje rɔlel dəa’g! Seḭ gə́ njémeendaje gə njékaḭkulaje gə njéteggintaje lé alje rɔ sí to! Mbata Ala ila ta dəa’g ra ne ta lə sí gə goo rəbee mba̰.

Loo gə́ killa rea kəm Ja̰’g 19:16

Ri dəw ɓa ndaŋg kubu’g ləa ləm, gə biŋgee’g ləm tɔ pana: Mbai gə́ ur dɔ mbai mareeje’g ləm, gə Mbaidɔmbaije ya ləm tɔ.

Loo gə́ killa rea kəm Ja̰’g 7:15

Gelee gə́ nee ɓa d’aar ne no̰ kalimbai’g lə Ala, deḛ d’wa ne səa bua kula dan kàrá gə loondul’g mee kəi-siée’g ya. Yeḛ gə́ si kalimbai’g lé a la kəi-kubu ləa dɔ dee’g.