Soponi 2:7 - Maktub gə́ To gə Kəmee

⁷ Ta baa-boo-kadje neelé d’a to mbata ges gel-bɔje lə Juda gə́ nai, Lée neelé ɓa d’a kul rɔ dee keneŋ: Loondul ndá d’a kwa rɔ dee mee kəije’g lə Askalo̰: Mbata Njesigənea̰, Ala lə dee lé Mée a kwəi dɔ dee’g el Ndá yeḛ a kɔr dee ɓee-ɓər’g lə dee tel ree sə dee.

Soponi 2:7 ပူးပေါင်းရင်းမြစ်များ

Gḭ-Néje 50:24

Jisəb ula ŋgakea̰je pana: M’a gə kwəi ŋga! Nɛ tɔgərɔ Ala a tɔs kəmee dɔ sí’g bao-bao ləm, yeḛ a kar sí ḭje mee ɓee’g neelé mba kawje mee ɓee gə́ yeḛ un ndia gə mba kar Abrakam, gə Isaak, gə Jakob kédé lé ya.

Pakɔsje 80:14

Ber gə́ kag-kɔr’g lé səa rém-rém ləm, Daje gə́ mee wala’g kara telee gə́ nésɔ dee ya ləm tɔ.

Pakɔsje 85:1

Pakɔs lə Koréje gə́ d’ar bao-pa mba karee ɔs sə dee lé.

Teḛ-Raga 4:31

Togə́bè ɓa koso-dəwje lé d’ɔm ne meḛ dee dɔ’g. Deḛ d’oo gao to gə́ Njesigənea̰ ila kəmee dɔ Israɛlje’g ləm, yeḛ oo kəmtondoo lə dee ləm tɔ, ndá deḛ d’unda barmba dəb kəm dee naŋg tɔ.

Esai 11:11

Mee ndəa’g neelé ya Mbaidɔmbaije a kun jia tar gɔl kára ya ɓəi Mba taa ne dɔ ges koso-dəwje gə́ nai lé gogo, Deḛ gə́ sanéna̰ mee ɓee gə́ Asiri, gə Ejiptə, Gə Patros, gə Etiopi, Gə Elam, gə Sineyar, gə Amat, Gə dɔgoré-looje gə́ dan baa-boo-kad’g tɔ.

Esai 11:14

D’a tel buŋga na̰ dɔ Pilistije gə́ d’isi dɔdərlooje’g ləm, D’a kunda deḛ gə́ d’isi bər banrɔ taa néje lə dee ləm, Edɔmje gə Moabje d’a to nékwa peb gə ji deeje ləma, Amo̰je kara d’a kula dɔ dee no̰ dee’g ləm tɔ.

Esai 11:16

Bèe ɓa rəw a to keneŋ mbata ges koso-dəwje ləa gə́ nai Gə́ teḛ ji Asirije’g To gə́ rəw to keneŋ kédé gə́ ləw mbata lə Israɛlje Mee ndəa gə́ deḛ d’unda ne loo mee ɓee gə́ Ejiptə teḛ lé tɔ.

Esai 14:1

Mbata Njesigənea̰ a koo kəmtondoo lə ŋgaka Jakob ləm, yeḛ a mbər Israɛlje ya ləm tɔ ndá, a tel kunda dee mee ɓee’g lə dee gogo, dəw-dɔ-ɓeeje d’a kɔm sə dee na̰’d ləm, d’a kɔm na̰’d gə ŋgaka Jakob ləm tɔ.

Esai 32:14

Kəi-mbai lé d’uba d’ya̰ ləm, Ɓee-boo kunda bula lé tel to dɔ nduba ləm tɔ, Dɔdərloo gə kəi-kaar-kɔgərɔ gə́ duu dɔ loo lé Tel to duu-loo si gayim-dəwje saar gə no̰, Loo neelé a tel to gə́ loo-ndam lə mulayḛ̀je-je gə́ wala ləm, Gə loo-ko̰-mu lə koso-nékulje ləm tɔ.

Jeremi 23:3

M’a mbo̰ ges badje ləm dɔ na̰’d mee ɓeeje lai gə́ m’unda dee m’ɔm dee keneŋ lé ndá m’a tel ree sə dee loo-ko̰-mu’g lə dee gogo. Deḛ d’a koji na̰ bula digi-digi.

Jeremi 29:10

Nɛ aa ooje, ta gə́ Njesigənea̰ pa ɓa nee: Loo gə́ ləb gə́ rɔ-siri gə́ wɔji dɔ Babilɔn a dəs mba̰ ndá m’a kar məəm olé dɔ sí’g ləm, m’a kar tagə́maji ləm gə́ m’pa m’wɔji ne dɔ sí lé aw lée’g béréré mba tel sə sí lée’g neelé gogo ləm tɔ.

Jeremi 29:14

M’a kya̰ loo kar sí iŋgamje ya. Njesigənea̰ ɓa pa bèe. M’a kar njé’g lə sí gə́ d’wa dee gə́ ɓərje lé tel ree ləm, m’a mbo̰ sí mbuna ginkoji dəwje gə raŋg’g lai gə looje lai gə́ m’tuba sí m’ɔm sí keneŋ ləm tɔ. Njesigənea̰ ɓa pa bèe. Ndá m’a tel sə sí ree sə sí loo gə́ d’wa sí keneŋ d’aw sə sí ɓee-ɓər’g lé.

Jeremi 3:18

Mee ndəaje’g neelé gel-bɔje lə Juda d’a kɔm na̰’d gə gel-bɔje lə Israɛl, d’a kḭ na̰’d mee ɓee gə́ dɔgel kaw mee ɓee gə́ ma m’ar bɔ deeje-je gə́ né ka̰ dee lé.

Jeremi 30:3

Njesigənea̰ pana: Aa ooje, ndɔje gə́ d’a gə ree lé m’a tel gə koso-dəwje ləm gə́ Israɛl gə Judaje gə́ d’aw ɓee-ɓər’g lé ree sə dee. Njesigənea̰ ɓa pa bèe. M’a tel ree sə dee mee ɓee gə́ m’ar bɔ deeje-je lé ndá a to ka̰ dee-deḛ ya.

Jeremi 31:7

Mbata Njesigənea̰ pa togə́bè pana: Raje né wəl gə ndu rɔlel dɔ Jakob’g ləm, Arje boo-rɔkal lə sí nduba rəa gə́ raga Dɔ yeḛ gə́ to doŋgɔr Le ginkoji dəwje gə raŋg ləm tɔ. Ɔrje ndu sí gə́ tar ɔsje ne pa Pideeje paje ne pana: Njesigənea̰, maji kari taa Dɔ koso-dəwje ləi, Ges Israɛlje gə́ nai lé!

Jeremi 32:44

D’a ndogo loo-ndɔje gə larnda ləm, d’a ndaŋg maktubee ləm, d’a kunda nétorji dee dɔ’g ləma, d’a kɔr njékoo géeje ləm tɔ mee ɓee’g lə Bḛjamije gə looje gə́ gugu dɔ Jerusalem ləm, gə mee ɓee-booje gə́ Juda ləm, gə mee ɓee-booje gə́ dɔ mbal’g ləm, gə mee ɓee-booje gə́ ndag-loo’g ləma, gə mee ɓee-booje gə́ to par gə́ dɔkɔl ləm tɔ. Mbata ma Njesigənea̰ m’pana: M’a kar njé’g lə dee gə́ d’aw ɓee-ɓər’g lé tel ree ya.

Jeremi 33:12

Njesigənea̰ gə́ njeboo-néje lé pa togə́bè pana: Lée neelé gə́ to dɔdilaloo gə́ dəwje əsé daje godo keneŋ ləm, gə mee ɓee-booje ləa lai ləm tɔ lé loo-si njékulbadje a to keneŋ gə mba kar dee d’ar koso-nékulje lə dee d’wa rɔ dee keneŋ.

Jeremi 33:7

M’a tel gə Judaje gə Israɛlje gə́ d’wa dee ɓər lé ree sə dee ɓée, ree kunda dee kar dee d’isi to gə́ kédé lé ya.

Jeremi 47:5

Njé gə́ Gaja ndisa dɔ dee ŋgori-ŋgori ləm, Njé gə́ Askalo̰ lé d’isi ta dee mundu ləma, Gə ges ndag-loo lə dee na̰’d bèe ya ləm tɔ. See saar ndɔ gə́ ra ɓa seḭ a kundaje ŋgaŋ kinja rɔ sí pədərə-pədərə bèe ɓəi wa.

Ejekel 39:25

Gelee gə́ nee ɓa Mbaidɔmbaije gə́ Njesigənea̰ pa ne togə́bè pana: Ɓasinè n’a tel gə njé’g lə Jakob gə́ d’aw sə dee ɓee-ɓər’g lé ree sə dee ləm, n’a koo kəmtondoo lə gel-bɔje lə Israɛl lai ləma, n’a kaḭ bada dɔ ri neḛ gə́ to gə kəmee lé ləm tɔ.

Ojee 6:11

Seḭ gə́ Juda kara ma m’wa dɔ gɔl né Gə́ seḭ dubuje lé gə mba kinja mba̰ Loo gə́ m’a gə tel gə koso-dəwje ləm Gə́ loo si dee gə́ kédé’g lé.

Abdias 1:19

Deḛ gə́ d’isi par gə́ dɔkɔl lé d’a taa dɔ mbalje lə Esawu gə́ né ka̰ dee-deḛ. Deḛ gə́ d’isi mee ndag-loo’g lé d’a taa ɓee lə Pilistije tɔ. D’a taa dɔ naŋg lə Eprayim ləm, gə ka̰ Samari ləm tɔ, tɔɓəi Bḛjamije d’a taa Galaad tɔ.

Misee 2:12

Ǝi Jakobje! M’a mbo̰ sí dɔ na̰’d gə gin sí lai ya. M’a mbo̰ ges Israɛlje dɔ na̰’d To gə́ mbo̰ ne badje loo-kaar dee’g bèe ləm, To gə́ koso-nékulje loo-ko̰-mu’g lə dee bèe ləm tɔ, Bèe ɓa ndu dəwje a ɓar wəl-wəl keneŋ.

Misee 4:10

Seḭ gə́ Jerusalem, maji kar sí ooje ko̰ né ləm, Gə tuma̰je ŋgururu-ŋgururu To gə́ dené gə́ ndóo tée bèe ləm tɔ! Mbata ɓasinè lé seḭ a kundaje loo mee ɓee-boo’g teḛje Ndá a kaw síje wala, Tɔɓəi seḭ a kawje saar teḛje Babilɔn. Lée neelé ɓa d’a kɔr sí kila sí tar keneŋ ləm, Lée neelé ɓa Njesigənea̰ a kɔr sí ji njéba̰je’g lə sí kɔm sí tar ləm tɔ.

Misee 4:7

Njémədje lé n’a kar dee tel to ges deḛ gə́ nai ləm, Deḛ gə́ n’tuba dee lé n’a tel dee gə́ ginkoji dəwje gə́ njésiŋgamoŋje ləm tɔ, Njesigənea̰ a ko̰ɓee dɔ dee’g dɔ mbal gə́ Sio̰ Un kudee mee ndəa’g neelé saar gə no̰.

Soponi 2:9

Gelee gə́ nee ɓa Njesigənea̰ gə́ njeboo-néje, Ala lə Israɛlje lé pa ne bèe pana: Neḛ n’to njesikəmba ya! Moab a tel to kasəna gə Sɔdɔm ləm, Amo̰je kara d’a tel to kasəna gə Gɔmɔr ləm tɔ. D’a to loo gə́ kun-pɔrɔrɔje d’a taa loo keneŋ pəl-pəl ləm, D’a to kasəna gə puna kad ləma, D’a to dɔdilaloo ya saar gə no̰ ləm tɔ. Ges koso-dəwje lə neḛ D’a taa néje lə dee ləm, Ges ginkoji dəwje lə neḛ kara D’a kiŋga ɓee lə dee gə́ né ka̰ dee-deḛ ya ləm tɔ.

Soponi 3:13

Ges Israɛlje gə́ nai lé D’a ra né gə́ kori-kori el ŋga ləm, D’a pata ŋgɔm el ləma, Dəw a kiŋga ta sukəmloo ta dee’g el ləm tɔ, Nɛ d’a kul rɔ dee ləm, d’a kwa rɔ dee ləm tɔ Ndá dəw kára kara a kɔm ɓəl dɔ dee’g el.

Soponi 3:20

Mee ndəa’g neelé n’a tel ree sə sí, Mee ndəa’g neelé n’a mbo̰ sí dɔ na̰’d, Mbata n’a kar sí tel toje gə́ nékula rɔnduba gə népidi Mbuna koso-dəwje lai gə́ dɔ naŋg nee Loo gə́ n’a kḭ gə njé’g lə sí gə́ d’wa dee gə́ ɓər Tel sə dee kəm sí’g ya, Njesigənea̰ ɓa pa bèe.

Ajee 1:12

Jorobabel, ŋgolə Səaltiel ləm, gə Juje, ŋgolə Josadak, ŋgɔ-njekinjanéməs ləma, gə ges koso-dəwje lai gə́ nai ləm tɔ d’oo ndu Njesigənea̰, Ala lə dee gə goo ta gə́ Aje, njetegginta pa taree gə goo kula gə́ Njesigənea̰ Ala lə dee ɔm jia’g lé. Bèe ɓa ɓəl unda koso-dəwje badə gaŋg dee no̰ Njesigənea̰’g.

Ajee 2:2

Maji kari ula kula dəji Jorobabel, ŋgolə Səaltiel, njeguburuɓee gə́ Juda ləm, gə Juje, ŋgolə Josadak, ŋgɔ-njekinjanéməs ləma, gə ges koso-dəwje gə́ nai ləm tɔ lé pana:

Lugu 1:68

Maji kar dɔ ri Mbaidɔmbaije Ala lə Israɛlje lé ai səgərə Mbata yeḛ ila kəmee dɔ koso-dəwje’g ləa ɔr dee ne ɔm dee tar.

Lugu 7:16

Koso-dəwje lai neelé ɓəl unda dee badə gaŋg dee ar dee pidi Ala pana: Ŋgɔ-njetegginta gə́ dum ya to ŋga, unda loo teḛ mbuna sí’g. To Ala nja ɓa ila ne kəm koso-dəwje ləa toro’g.

Néra Njékaḭkulaje 8:26

Kura lə Mbaidɔmbaije gə́ dara teḛ dɔ Pilibə’g wai ulá pana: Uba naŋg ḭta ɔd aw par gə́ dɔkɔl, taa rəw gə́ ḭ Jerusalem aw Gaja gə́ to dɔdilaloo lé.

Néra Njékaḭkulaje 8:40

Pilibə lé kubà ndá uba Ajot, ḭ keneŋ aw Sejare. Ɓeeje lai gə́ yeḛ dəs keneŋ lé yeḛ ila mber tagə́maji lé keneŋ.

Njé gə́ Rɔmə 11:5

Ɓasinè kara kawal dee nai ɓəi tɔ gə goo nojikwa ləa gə́ yeḛ ɔr dee ne lé.

Rudu 1:6

Togə́bè Naomi gə məmeeje-je lé d’ḭ gə mba kya̰ ɓee gə́ Moab lé mbata loo gə́ yeḛ si Moab ɓəi lé yeḛ oo to gə́ Njesigənea̰ ila kəmee dɔ dəwje’g ləa ar dee ne nésɔ tɔ.