Njé gə́ Rɔmə 7:24 - Maktub gə́ To gə Kəmee

²⁴ Ma lé m’to dəw gə́ daŋ’d ŋga! See na̰ ɓa a kwa yoo gə́ rɔm’g neelé kɔree kam wa.

Njé gə́ Rɔmə 7:24 ပူးပေါင်းရင်းမြစ်များ

1 Mbaije 8:38

ɓó lé dəw kára əsé koso-dəwje ləi gə́ Israɛl lai d’ar ndu ra tamaji əsé ra ndòo d’ar ndu no̰ lə dee ɓar, ar nana kara gər doo gə́ to mée’g ɓa ula jia par gə́ rɔ kəi’g neelé ndá

Pakɔsje 102:20

Mbata yeḛ si loo ləa gə́ to tar sab gə́ wɔji dɔ meenda ləa Aa ne loo gərərə ləm, Njesigənea̰ lé si sém dara gə́ tar nu ya Ila kəmee oo ne loo gə́ dɔ naŋg nee ləm tɔ

Pakɔsje 119:131

M’teḛ tam m’ila ne kəmə pugudu Mbata mal godnduije lé ram ŋgwɔd-ŋgwɔd.

Pakɔsje 119:143

Néurti gə néɓəŋgərəti lé darm bus ya, Nɛ godnduije lé ɓa m’ar dee to gə́ nérɔlelje ləm.

Pakɔsje 119:176

Ma lé m’ila tar mbir-mbir Asəna gə badə gə́ ndəm bèe, Maji kari ndolè kura ləi lé ya, Mbata ma lé m’ar məəm wəi dɔ godnduije’g lé el tɔ.

Pakɔsje 119:20

Gər ndaa godnduije lé Malee ram ŋgwɔd-ŋgwɔd ta-ta ya.

Pakɔsje 38:2

Njesigənea̰, maji kari tɔjim kəmkàr Loo gə́ oŋg ḭ səi el ləm, Ar bo̰ néram ɔs tam’g Loo gə́ məəi ḭ səi jugugu el ləm tɔ.

Pakɔsje 6:6

Dəw gə́ wəi mba̰ lé mée olé dɔi’g el. See na̰ ɓa a kɔs gajii ɓee lə njé gə́ d’wəi’g lé wa.

Pakɔsje 71:11

Deḛ lé pana: Ala ubam ya̰’m mba̰, Maji kar dee d’ubam d’wam Mbata dəw kára gə́ njetaam kilam tar godo ŋga.

Pakɔsje 72:12

Mbata yeḛ a taa dɔ njendoo gə́ ra né gə ndia wəl gə́ rəa’g ləm, Yeḛ a la gə njenékəmndoo gə́ njela səa godo lé ləm tɔ.

Pakɔsje 88:5

Deḛ turam gə deḛ gə́ risi gə́ bwa-dɔɓar’g ləm, M’to asəna gə dəw gə́ siŋgá godo bèe ŋga ləm tɔ.

Ejekel 9:4

Njesigənea̰ ulá pana: Aw dan mee ɓee-boo’d gə́ Jerusalem, aw tɔs né ŋgono̰ dəwje gə́ meḛ dee tila ŋgaḭla-ŋgaḭla’g ar deḛ tuma̰ ŋgururu-ŋgururu mbata néje gə́ mina̰ lai gə́ ra mee ɓee-boo’g neelé.

Misee 7:19

Mée a kaw taḭ-taḭ gə mbata lə sí ya ɓəi ləm, Yeḛ a tuba néra kori-korije lə sí gə gɔlee ləm tɔ. I a kɔm kaiyaje lə sí lai gel baa-boo-kad’g.

Matiyo 5:4

Deḛ gə́ d’isi dan kəmndooyoo’g lé rɔ dee lel dee, Mbata d’a gɔl meḛ dee ɓəi.

Matiyo 5:6

Deḛ gə́ mal ra né gə́ gə dɔ najee ra dee asəna gə kṵdaman gə́ tɔl dee əsé ɓoo gə́ ra dee lé rɔ dee lel dee, Mbata meḛ dee a ndan tub-tub ɓəi.

Lugu 4:18

Ndil Mbaidɔmbaije dəb dɔm’g Mbata yeḛ nja wa dɔm gə ubu Mba karm m’ila mber tagə́maji lé m’ar njéndooje ya. Yeḛ ulam gə mba karm m’ila mber ta kɔr ɓər dɔ deḛ gə́ d’wa dee ɓər ləm, Mba karm m’ula njékəmtɔje ta kəm deḛ gə́ a gə kinja kar dee d’oo ne loo ləm, Mba kar deḛ gə́ d’udu dee kəi lé d’a kila rɔ dee ləma,

Njé gə́ Rɔmə 6:6

Jeḛ n’gər gao dəw gə́ ləw gə́ wɔji dɔ darɔ sí lé ɗaree səa na̰’d kaar kag-dəs’g mba kar darɔ sí gə́ to ɓər lə kaiya lé tuji ne ɓó gə mba kar sí n’toje ne ɓərje lə kaiya lé gogo el ŋga.

Njé gə́ Rɔmə 8:13

Tɔgərɔ ya, ɓó lé seḭ sije kəmba gə mba darɔ ndá seḭ a kwəije ne. Nɛ ɓó lé seḭ ndolèje goo Ndil, tɔlje ne néra lə darɔ ndá seḭ a sije ne gə kəmə lé ya.

Njé gə́ Rɔmə 8:2

Tɔgərɔ ya, godndu ka̰ Ndil gə́ ka̰ kisi kəmba gin Jeju Kristi lé ɔr ta godndu gə́ ka̰ kaiya gə́ ka̰ yoo lé dɔm’g.

Njé gə́ Rɔmə 8:23

Deḛ neelé ɓa gə kar dee el, nɛ jeḛ gə́ j’isi gə Ndil gə́ tɔl meḛ sí bujuru lé kara jeḛ m’tuma̰ ŋgururu-ŋgururu sə dee na̰’d, ŋgina ne ndɔ gə́ Ala a kuga dɔ darɔ sí tel sí ne gə́ ŋgan ɓaaje ləa.

Njé gə́ Rɔmə 8:26

Togə́bè ɓa Ndilmeenda ɓa ree la sə sí loo rəm’g lə sí ya mbata loo ra tamaji’g lə sí lé jeḛ n’gər né gə́ kəm kwɔiyee el. Nɛ Ndil nja ɓa ra rəwta lə sí gə ta gə́ dum pa ar sí.

Njé gə́ Kolosə 2:11

Seḭ gə́ ɔmje na̰’d gə Kristi lé kinja tamɔd gə́ wɔji dɔ sí lé to yeḛ gə́ ji dəw ɓa ra el, nɛ to ka̰ Kristi gə́ wɔji dɔ goré ne néra sí gə dakasrɔ sí bura, ɔr unda ila kɔ.

2 Timote 4:18

Mbaidɔmbaije ɓa a kɔrm dan néje gə́ majel gə́ gə ria-ria lai ləm, a kajim mba karm m’isi ne mee ɓeeko̰’g ləa gə́ dara ləm tɔ. Yeḛ nja ɓa maji kula rɔnduba dəa’g gə ləbee-ləbee saar-saar gə no̰. Amen!

Titə 2:14

Yeḛ neelé ya̰ rəa ar yoo mbata lə sí mba kuga ne néra sí gə́ yèr gə́ rara kara ləm, gə mba togo ne won sí kɔr ɓə̰dərə-ɓə̰dərə ləma, mba kunda sí ne gə́ koso-dəwje ləa-yeḛ nja doŋgɔ doi gə mba kar sí j’ɔs ne rɔ sí ɓad-ɓad dɔ néraje gə́ maji’g ləm tɔ.

Ǝbrəje 2:15

mba kar deḛ gə́ ɓəl d’oo ndòo gin yoo’g lé yeḛ a kar dee taa rɔ dee jia’g.

Loo gə́ killa rea kəm Ja̰’g 21:4

Yeḛ a bɔr mán-no̰ kəm dee’g ləm, yoo a ɓar ri dee gogo el ləm, kəmndooyoo kara a godo ləm, no̰ yoo a godo ləma, meeko̰ kara a godo ləm tɔ mbata néje gə́ dɔtar lé sané pá mba̰.