Pakɔsje 23:5 - Maktub gə́ To gə Kəmee

⁵ I wa dɔ gɔl nésɔ unda nɔm’g Kəm njéba̰je’g ləm, I wa dɔm gə ubu ləm, Ŋgo-kai-ma̰ ləm lé Man rusu tub ləm tɔ.

Pakɔsje 23:5 ပူးပေါင်းရင်းမြစ်များ

Maktub gə́ wɔji dɔ Jɔb 36:16

I kara yeḛ a kɔri dan kəmndoo’g ləi Gə mba kilai loo gə́ tad ila rəs’g. Ta ka-nésɔ’g ləi lé nésɔje gə́ to ubu ɓa a taa pəl-pəl.

Pakɔsje 104:15

Gə mán-nduú mba kar rɔ dəw lelee ne ləm, Gə mba kar rəa ndɔḭ ne unda ubu ləma, Gə muru gə mba kar siŋgá to ne ləm tɔ.

Pakɔsje 116:13

M’a kun ŋgo gə́ wɔji dɔ kaji lé kula ndiŋ gə́ tar Ɓar ne ri Njesigənea̰.

Pakɔsje 16:5

Njesigənea̰ ɓa to nénduba ləm, gə ŋgo-kai-mán ləm ləm tɔ, I nja ar né gə́ wɔji dɔm to njaŋg,

Pakɔsje 22:26

I a to gin pa pidije ləm loo-mbo̰-dɔ-na̰’g lə koso-dəwje, M’a tɔl ne ta ndukun ləm bém kəm dee-deḛ gə́ ɓəli’g.

Pakɔsje 22:29

Mbata ko̰ɓee lé to ka̰ Njesigənea̰, Yeḛ nja o̰ ɓee dɔ ginkoji dəwje gə raŋg’g.

Pakɔsje 45:7

Ǝi Ala, kalimbai ləi lé to saar gə no̰, Kag-mbai gə́ ka̰ ko̰ɓee ləi lé to kag-mbai gə́ ka̰ meekarabasur lé.

Pakɔsje 78:19

Deḛ pata gə́ majel d’ila dɔ Ala’g lé pana: See Ala askəm ɓar neḛje gə nésɔ dɔdilaloo’g neelé wa.

Pakɔsje 92:10

Ǝi Njesigənea̰, aa oo, njéba̰je ləi lé Aa oo, njéba̰je ləi lé d’udu guduru mba̰, Deḛ lai gə́ ra né gə́ majel lé kara sané kad mba̰ tɔ.

Pakɔsje 92:11

I lé am m’uba siŋga lə dadɔg ya ləm, Ma lé ubu gə́ kul yururu ɓa wa ne dɔm ya ləm tɔ.

Esai 25:6

Njesigənea̰ gə́ njeboo-néje gɔl muru-gad Gə́ wɔji dɔ nésɔje gə́ lel ləm, Gə mán-nduú gə́ àr ŋgad-ŋgad ləm tɔ Dɔ mbal’g neelé mbata koso-dəwje lai, To nésɔje gə́ lel gə́ to ubu yaa̰ ləm, Gə mán-nduú gə́ kuree əw Gə́ àr ŋgad-ŋgad ləm tɔ.

Amɔs 6:6

Deḛ d’ai mán-nduú mee baije gə́ boi-boi ləm, Deḛ d’wa rɔ dee gə ubu Gə́ maji ur dɔ mareeje’g ləm tɔ Nɛ meḛ dee o̰ dee Dɔ tuji gə́ oso dɔ ginkoji’g lə Jisəb lé el.

Matiyo 6:17

Nɛ i lé loo gə́ i ɔg məəi ɓoo lé ndá togo kəmi ləm, ndèm ubu dɔi’g ləm tɔ

Lugu 7:46

I lé ndèm ubu dɔm’g el nɛ dené neelé yeḛ ndèm ubu gə́ ə̰də sululu ya gɔlm’g.

Tagə́maji gə́ Ja̰ ndang 16:22

Seḭ kara ɓasinè lé seḭ síje dan némeeko̰’g, nɛ loo gə́ m’a tel koo sí ndá rɔ sí a lel sí tɔɓəi dəw kára kara a kɔr rɔlel lə sí el tɔ.

1 Njé gə́ Kɔrḭtə 10:16

Ŋgo-kai-né gə́ Ala tɔr ne ndia dɔ sí’g gə jeḛ n’tɔr ne ndu sí dɔ’g lé see to né gə́ ɔm meḛ sí na̰’d sad gə məs Kristi lé el wa. Muru gə́ jeḛ j’wa n’gaji lé see to né gə́ ɔm sí na̰’d gə darɔ Kristi lé el wa.

2 Njé gə́ Kɔrḭtə 1:21

Ala nja ɓa ar sí ŋgəŋ sə sí na̰’d ar sí j’ɔm na̰’d gin Kristi’g ləm, yeḛ nja ɓa ɔr sí unda sí gə kəmee ləm tɔ.

Njé gə́ Epesə 3:20

Yeḛ gə́ askəm ra néje lai kar sí, karee dum dɔ né gə́ jeḛ n’dəjee əsé gə́ jeḛ n’la̰ji toree meḛ sí’g gə goo siŋgamoŋ gə́ yeḛ ula meḛ sí’g lé

1 Ja̰ 2:20

Seḭ ɓa yḛ̀, yeḛ gə́ to Njemeenda lé ɔr sí unda sí gə kəmee ndá seḭ lai lé seḭ gərje kankəmta gao tɔ.

1 Ja̰ 2:27

Kɔr gə́ yeḛ ɔr sí unda sí gə kəmee lé nai sə sí ɓəi, yee ɓa seḭ awje ne ndòo njendoo sí né dɔ maree’g el ŋga, nɛ to gə́ ndia gə́ yeḛ tɔr dɔ sí’g lé to né gə́ tɔgərɔ ɓó to né gə́ ŋgɔm el, yeḛ nja ɓa a ndoo sí néje lai lé ndá maji kar sí naije səa gə goo ta gə́ seḭ taaje mba̰ lé tɔ.