Pakɔsje 103:8 - Maktub gə́ To gə Kəmee

⁸ Njesigənea̰ lé to njemeekɔrjol gə njekoo kəmtondoo lə dəwje ləm, Yeḛ ila mée dɔ oŋg’g ləa ləma, Yeḛ to bao-meemaji ləm tɔ.

Pakɔsje 103:8 ပူးပေါင်းရင်းမြစ်များ

Nehemi 9:17

Deḛ mbad kula dɔ dee ləma, Deḛ d’ar meḛ dee wəi dɔ néraije gə́ dumkoo’g Gə́ i ra mbata maji lə dee ləm tɔ. Deḛ d’uba gwɔbkelkwɔi, Gə goo kɔs ta rəw lə dee lé Ndá deḛ ra dɔ-kədərə Mba tel dɔ kula ɓər’g gogo. Nɛ i to Ala gə́ si pèrèrè Gə mba kar məəi oso lemsé ləm, I to njemeekaw taḭ-taḭ Gə njemeekɔrjol ləm tɔ, Oŋg ḭ səi kalaŋ el ləm, I to bao-meemaji ləm tɔ Ndá i uba dee ya̰ dee el.

Pakɔsje 130:7

Seḭ Israɛlje, maji kar sí undaje meḛ sí yel gə́ dɔ Njesigənea̰’g ya. Mbata meekoso lemsé to gə́ rɔ Njesigənea̰’g ləm, Nékoga dɔ dəwje taa rəa pəl-pəl ləm tɔ.

Pakɔsje 145:8

Njesigənea̰ lé to njemeekɔrjol ləm, Gə njemeekaw taḭ-taḭ ləm tɔ, Oŋg ḭ səa kalaŋ el ləm, Meemaji ɓa yeḛ to babee ləm tɔ.

Pakɔsje 31:20

Wai, meemaji ləi al dɔ loo sula! Meemaji neelé i unda kul mbata deḛ gə́ ɓəli, I riba dəa ar deḛ gə́ saŋg loo-kula-dɔ lə dee rɔi’g ləm, Aree to raga pai-pai kəm dəwje’g ləm tɔ.

Pakɔsje 86:15

Nɛ i Mbaidɔmbaije lé I to Ala gə́ njemeekoso lemsé ləm, Gə njekookəmto̰doo ləm tɔ, Oŋg ḭ səi kalaŋ el ləm, Meemaji gə meenda londoŋ lé ɓa I to babee ya ləm tɔ.

Pakɔsje 86:5

Mbaidɔmbaije, i to njemeemaji ləm, Gə njemeekoso lemsé ləm tɔ. Deḛ lai gə́ ɓar rii lé I unda dee dan kəmi’g.

Esai 55:7

Maji kar njemeeyèr uba goo rəw ləa ya̰ ləm, Maji kar dəw gə́ njera né kori-kori uba goo takə̰jije ləa ya̰ ləm tɔ, Maji karee tel ree rɔ Njesigənea̰’g Mbata yeḛ a koo kəmtondoo ləa ləm, Maji karee tel ree rɔ Ala’g lə sí Gə́ rəa asee dɔ meekoso lemsé’g el ləm tɔ.

Jeremi 32:18

I ra meemaji gə ŋgaka dəwje gə́ goo na̰ goo na̰ loo tɔl-dɔg (1.000) ləm, i ar bo̰ néra kori-kori lə bɔ ŋganje ɔs ta ŋgan deeje gə́ goo dee’g ləm tɔ. I to Ala gə́ boo gə njesiŋgamoŋ, Njesigənea̰ gə́ njeboo-néje ɓa gə́ rii.

Joɛl 2:13

Arje ɓəŋgərə sí ɓa ti dus Ɓó tilje kubuje lə sí ɓa ba el, Ɔsje badm telje gə́ rɔ Njesigənea̰, Ala’g lə sí, Mbata yeḛ to njemeekaw taḭ-taḭ ləm, Gə njemeekɔrjol ləm, Oŋg ḭ səa kalaŋ el ləma, Yeḛ to bao-meemaji ləm tɔ Ndá yeḛ rəm gə ndia dɔ némajelje’d Gə́ yeḛ wɔji mba ra lé.

Junas 4:2

Yeḛ ra tamaji ta Njesigənea̰’g no̰ ne təa’g pana: Ǝi Njesigənea̰, see ta neelé to ta gə́ ma m’pa loo gə́ ma m’nai ne ɓee-sim’g ɓəi el wa. Gelee gə́ nee ɓa ma m’ḭ ne kalaŋ gə mba kaḭ kaw ne Tarsis gə mbəa. Mbata ma m’gər gao to gə́ i to Ala gə́ njekookəmto̰doo ləm, gə njemeekɔrjol ləm tɔ. I lé oŋg ḭ səi kalaŋ el ləm, i to bao-meemaji ləm tɔ ɓa i ar takə̰ji ləi gə́ wɔji dɔ néraje gə́ majel lé yɔr ne.

Nahum 1:3

Njesigənea̰ lé to njekar oŋg ḭ səa kalaŋ el, Yeḛ to Bao-siŋgamoŋ: Dəw gə́ njera némajel lé Yeḛ a lal kar bo̰ nérea ɔs təa’g el. Njesigənea̰ njaa dan ko̰ ndi’g ləm, Gə dan lel-mal’g ləm tɔ. Ndije gə́ pélé dara lé to kor gə́ ḭ tor gɔlee’g.

Bula lə Israɛlje 14:18

Njesigənea̰ lé oŋg ḭ səa kalaŋ el ləm, yeḛ to bao-meemaji ləma, yeḛ ar mée ti mbidi dɔ néra gə́ kori-kori’g ləm gə dɔ kal dɔ godndu’g ləm tɔ, nɛ yeḛ gə́ ta wa dəa mba̰ lé yeḛ a kée gə́ njegelgodo el ləm, yeḛ a kar bo̰ néra gə́ gə goo rəbee el lə bɔ ŋganje ɔs ta ŋgan deeje’g saar teḛ ne dɔ ŋgakadɔg deeje gə́ loo munda əsé sɔ ləm tɔ.

Tel tura Godndu 5:10

nɛ deḛ gə́ d’undam dan kəm dee’g ar dee d’aa ne dɔ ndukunje ləm kər-kər ndá m’a k’oo kəmtondoo lə dee saar teḛ ne dɔ ŋgaka deeje gə́ tɔl-tɔl-dɔg’d (1.000) tɔ.

Maktub gə́ Jak ula ne ar ngan-Allaje 5:11

Aa ooje, jeḛ m’pana: Deḛ gə́ d’ai meḛ dee sam-sam dan némeeko̰’g lé a maji dɔ dee’g. Seḭ ooje ta meekai sam-sam lə Jɔb ləm, tɔɓəi seḭ ooje né gə́ Mbaidɔmbaije aree ndɔ gə́ rudee un’g lé ləm tɔ mbata Mbaidɔmbaije lé koo kəmtondoo gə meekɔrjol taa rəa pəl-pəl ya.